Министерството за внатрешни работи соопшти дека  од 10.04.2026 започнува со целосната имплементација на системот за влез во ЕУ (EES – Entry/Exit System), со што на надворешните граници на Европската унија се воведува нов, дигитализиран начин на евиденција и контрола на државјани кои патуваат за краткорочен престој, а се од држави кои не се членки на ЕУ.

– Со воведувањето на ЕЕС, влезовите и излезите ќе се евидентираат електронски, а системот ќе овозможи обработка на основни биометриски податоци (отпечатоци од прсти и фотографија), со цел побрза идентификација и поефикасно следење на дозволениот престој согласно правилото „90 дена во период од 180 дена” со што времето на задржување на граничните премини за влез во ЕУ би се зголемило – појаснуваат од МВР.

Оттаму додаваат дека Граничната полиција на нашата држава ги презеде сите потребни мерки и активности, односно ставени се во функција сите расположливи материјално-технички и човечки ресурси, со цел обезбедување брз и непречен проток на патници на нашите гранични премини.

– Граничната полиција ќе постапува со засилена ангажираност на терен, континуирано ќе ја следи состојбата, ќе презема соодветни мерки за одржување на проточноста на сообраќајот и ќе ги информира граѓаните за сите важни информации поврзани со примената на системот – велат од МВР.

The post ОД 10 АПРИЛ ЦЕЛОСНО СЕ ИМПЛЕМЕНТИРА СИСТЕМОТ ВЛЕЗ-ИЗЛЕЗ ВО ЕУ Македонската гранична полиција е подготвена да обезбеди брз проток на патници appeared first on plusinfo.mk.