Унгарскиот премиер Петер Маѓар изјави дека забрзаниот прием на Украина во ЕУ „не би бил фер“ кон земјите од Западен Балкан, истакнувајќи дека унгарската влада е меѓу земјите-членки кои би сакале побавно темпо на процесот.

– Мислењата се поделени кога станува збор за пристапувањето на Украина во Европската унија. Унгарија е за процес базиран на заслуги и конкретни резултати – рече Маѓар вчера на прес-конференција во Брисел пред состанокот на Европскиот совет, објави унгарскиот портал „Телекс“.

Маѓар, исто така, го поздрави фактот дека е постигнат договор со Украина во врска со правата на унгарското малцинство во Закарпатскиот регион. Ова овозможи отворање на првиот кластер преговори за пристапување на Украина во Европската унија.

Според него, унгарската влада не е сама во спротивставувањето на отворањето на други кластери за преговори.

Тој нагласи дека „Европската унија не може да ги заобиколи земјите од Западен Балкан – кои со години водат преговори – со примена на различен модел на проширување за Украина, бидејќи тоа не би било ниту фер ниту прагматично“.

Како што изјави, „некои би сакале различен процес на пристапување“.

– Некои би ги отвориле сите преговарачки поглавја веднаш, а некои би отвориле само две поглавја – рече тој, истакнувајќи дека унгарската влада е меѓу земјите-членки кои би сакале побавно темпо на процесот.

Како што изјави, ќе биде потребна едногласност.

– Тешко е да се најде компромис меѓу 27. земји-членки, но се сеќавам на ситуации од минатото кога тоа беше постигнато – рече премиерот.

Маѓар, исто така, рече дека е малку веројатно Унгарија да се согласи со другите земји-членки за сите прашања, но дека е посветен на претставување на интересите на унгарскиот народ во секоја дискусија.

– Ние ќе ја претставуваме Унгарија на поинаков начин. Нема да се судриме само заради судирање. Без разлика дали ќе се согласиме или ќе ставиме вето на нешто, тоа нема да биде од причини на внатрешна политика или партиски интереси, туку исклучиво врз осно

The post БРЗА ТРАКА ЗА УКРАИНА Е НЕПРАВДА ЗА ЗАПАДЕН БАЛКАН Будимпешта е против забрзано отворање кластери за Киев appeared first on plusinfo.mk.

Министерството за правда соопшти дека внимателно ги следи информациите во јавноста поврзани со наводите дека поранешниот премиер Никола Груевски добил унгарско државјанство, нагласувајќи дека тој и понатаму останува државјанин на Македонија и лице опфатено со правосилни судски пресуди и активни постапки.

Во реакцијата од Министерството се наведува дека, без оглед на шпекулациите и неофицијалните информации за неговиот евентуален статус во Унгарија, институциите продолжуваат да постапуваат согласно важечките законски процедури.

„Никола Груевски останува државјанин на Република Северна Македонија и лице кое е предмет на правосилни судски одлуки и активни постапки“, соопшти Министерството за правда.

Оттаму потенцираат дека постапката за негова екстрадиција продолжува согласно домашното законодавство, билатералните договори и меѓународните конвенции.

Министерството додава дека и понатаму ќе ги презема сите неопходни правни и дипломатски чекори во комуникација со надлежните институции во Унгарија.

Реакцијата следува откако во дел од медиумите беа објавени информации дека Груевски, кој од 2018 година престојува во Будимпешта, наводно добил унгарско државјанство врз основа на „државен интерес“.

The post ГРУЕВСКИ И НАТАМУ Е МАКЕДОНСКИ ДРЖАВЈАНИН Активни се постапките за негова екстрадиција, велат од правда appeared first on plusinfo.mk.

Унгарија останува сигурно засолниште за поранешниот македонски премиер Никола Груевски. Повикувајќи се на извор во унгарската влада, истражувачкиот портал (ВиСквер) „VSquare“, пишува дека Груевски, кој живее во Будимпешта од 2018 година, добил целосно унгарско државјанство во 2022 година, врз основа на „државен интерес на Унгарија“. Според друг владин извор, се верува дека тој и натаму престојува во земјата. Тоа ја прави неговата екстрадиција назад во С. Македонија речиси невозможна, пишува Дојче Веле.

Премиерот Петер Маѓар уште при стапувањето на функцијата најави дека Унгарија повеќе нема да служи како засолниште за меѓународни криминалци. Двајца од најпознатите „станари“ на таквиот систем експресно реагираа и ја напуштија земјата. Поранешниот полски министер за правда Збигњев Зјобро, кој доби азил по бегството во Унгарија во 2025 година, беше забележан на аеродромот „Њуарк Либерти“, САД во мај годинава.

Неговиот поранешен заменик Марчин Романовски, кој кон крајот на 2024 година избега во Будимпешта по обвиненија за злоупотреба на јавни средства, наводно не успеал да влезе во САД и подоцна бил забележан во Србија и Хрватска, додека полските служби трагаат по него.

Државјанството – поцврста заштита од азил

Сепак, според порталот, Унгарија Груевски веројатно нема да мора да го повторува тоа сценарио.

Позицијата на Груевски е значително посигурна од онаа на полските бегалци, пишува „VSquare“. Додека политичкиот азил може да биде укинат, одземањето државјанство е далеку потешка правна постапка. Тоа му обезбедува ниво на заштита што го прави имун на ветувањата на Маѓар за екстрадиција.

Одземањето на државјанството би барало да се докаже дека е стекнато со измама или корупција. Во вториот случај – со оглед дека е доделено поради „државен интерес“ – обвинителството би требало да докаже вмешаност на највисоки претставници на владата на Виктор Орбан. Што, се разбира, не е невозможно.

Бегството на Груевски

Груевски избега од Северна Македонија во ноември 2018 година, непосредно пред да започне со издржување затворска казна од две години во случајот „Тенк“ – пресуда за корупција поврзана со набавка на оклопен луксузен „мерцедес“ во вредност од 600.000 евра.

Тој ја напушти земјата преку Албанија, а потоа продолжи низ Црна Гора и Србија, наводно со помош на унгарско дипломатско возило и, според тогашни извештаи, со вмешаност на унгарската странска разузнавачка служба.

Владата на Орбан потоа му одобри политички азил.

Во Македонија во изминатиот период, по падот на Виктор Орбан од власт во Унгарија, се актуелизираше приказната за враќањето на Груевски. Во април годинава, премиерот Христијан Мицкоски изјави дека не очекува Груевски да се врати во земјата, но доколку тоа се случи „ќе оди во затвор“.

Опозицискиот СДСМ на почетокот на неделава ги праша премиерот и министерот за правда Филков дали ги испратиле во Будимпешта документите за екстрадиција на Груевски. Оттаму уште оценија дека Мицкоски се плаши дека враќањето на Груевски во земјата ќе ја загрози неговата позиција во партијата.

The post ГРУЕВСКИ СИ ГО ЗАЦЕМЕНТИРА ПРЕСТОЈОТ ВО УНГАРИЈА Добил државјанство, екстрадиција речиси невозможна appeared first on plusinfo.mk.

27-годишен Јорданец е уапсен во Будимпешта под сомнение дека ги украл податоците од банкарската картичка на Џони Деп и потрошил речиси половина милион фунти од неговата сметка. Она што е особено чудно е што 62-годишниот актер наводно не забележал дека неговите пари исчезнуваат повеќе од две години, сè додека банката не ги означила трансакциите како сомнителни, објавува Дејли Меил.

Унгарските истражители изјавија дека случајот е отворен претходно оваа година откако американска финансиска институција контактирала со унгарската филијала на ФБИ за нелегални подигнувања од сметката на еден од нејзините клиенти.

Наскоро било утврдено дека лицето за кое станува збор е Џони Деп, кој, според извештаите, не бил свесен за стотици трансакции направени помеѓу јануари 2024 и декември 2025 година.

Истражителите во моментов истражуваат вкупно 308 трансакции во вредност од повеќе од 536.534 фунти, или околу 619.500 евра.

Полицијата го пронајде осомничениот со следење на IP адреси, е-мејл адреси и унгарски телефонски број што се користел за онлајн купувања и резервации на сместување. Тој бил уапсен во стан што го изнајмил во Будимпешта, а објавена е и снимка од неговото приведување.

За време на претресот на станот, запленети се електронски уреди за кои се сомнева дека се користени во измамата. Полицијата, исто така, пронашла супстанции за кои се сомнева дека се наркотици, а започнала и дополнителна истрага за поседување дрога.

Според полициското соопштение, осомничениот ги негира обвиненијата, но судот му одредил притвор. Сè уште се утврдува како ги добил податоците за кредитната картичка на Деп. Не е исклучена можноста за кражба на податоци, истекување на информации или компромитирање за време на претходна онлајн трансакција.

Унгарската полиција потврди дека истрагата за наводната измама е во тек и дека не се исклучени понатамошни апсења.

Џони Деп е чест посетител на Будимпешта во последните години, каде што снимал неколку филмови, вклучувајќи го и „Моди“. Актерот е виден како снима во близина на Будимскиот замок, Унгарската државна опера и други познати локации во градот, што би можело да ја објасни унгарската поврзаност во овој случај.

The post МУ ЈА УКРАЛ КАРТИЦАТА НА ЏОНИ ДЕП И ТРОШЕЛ ПАРИ 2 ГОДИНИ Актерот не забележал дека некој му ја празни банкарската картичка appeared first on plusinfo.mk.

Новиот унгарски премиер Петер Маѓар, заедно со полскиот премиер Доналд Туск, од Варшава испрати порака дека е време повторно да оживее влијанието на Вишеградската група.

Маѓар предложил В4 да се прошири и со земјите од Западен Балкан кои сè уште не се дел од Европската Унија.

– Подготвен сум да ја прошириме соработката на Вишеградската четворка и на други земји, можеби скандинавските држави, Австрија, Хрватска, Словенија, Романија и земјите од Западен Балкан кои уште не влегле во ЕУ – изјавил Маѓар на заедничката прес-конференција со Туск.

Полскиот премиер порача дека Централна и Источна Европа повеќе не се периферија, туку простор каде се решава иднината на континентот.

Маѓар изразил надеж дека Унгарија до крајот на своето претседавање во јуни ќе организира самит на Вишеградската група во Будимпешта.

Полска и Унгарија како една тупаница

Туск директно посочил дека односите меѓу Полска и Унгарија биле нарушени во последните години од владеењето на Виктор Орбан.

Сепак, тој нагласил дека со доаѓањето на Маѓар гледа можност двете држави повторно да дејствуваат координирано во Европската Унија.

– Петер Маѓар е гарант дека Полска и Унгарија повторно ќе делуваат како една тупаница во ЕУ, бидејќи имаме заеднички интереси – изјавил Туск.

Азилот за полските функционери повторно отвори стара рана

За време на посетата во Варшава, Маѓар се осврнал и на чувствителното прашање околу азилот што претходната унгарска влада им го дала на поранешниот полски министер за правда Збигњев Зјобро и неговиот заменик Марќин Романовски.

Двајцата во Полска се обвинети за злоупотреба на службената положба и финансиски малверзации.

– Будимпешта и Унгарија повеќе нема да бидат прифатилиште за кривично прогонувани престапници. Едниот од нив побегна во САД, а другиот, колку што е познато, преминал во Србија. Подготвен сум да помогнам овие лица да бидат вратени во Полска – истакнал Маѓар.

Тој појаснил дека европскиот налог за апсење нема правна сила во Србија и во САД, каде што тие на крајот нашле засолниште.

Што значи ова за Балканот?

Предлогот на Маѓар доаѓа во време кога Брисел бара нови модели за приближување на Западен Балкан кон Европската Унија.

Идејата за поширока Вишеградска група би можела да отвори нов политички и економски канал меѓу Централна Европа и Балканот, особено во делот на енергетиката, безбедноста и инфраструктурата.

The post ВИШЕГРАДСКА ГРУПА ПЛУС ЗАПАДЕН БАЛКАН Маѓар и Туск предлагаат нова оска во Европа appeared first on plusinfo.mk.

Македонскиот премиер, Христијан Мицкоски, при посетата на Будимпешта оствари средба со унгарскиот премиер Виктор Орбан, при што двајцата лидери ја потврдија заложбата за продлабочување на стратешкото партнерство меѓу двете држави и зголемување на економската соработка.

Според соопштението, разговорите биле фокусирани на инвестиции, трговија, инфраструктура и енергетска стабилност, како и на регионалната соработка во услови на глобални предизвици.

– Силните партнерства се клучни за обезбедување стабилност и развој. Нашата соработка со Унгарија е заснована на доверба, заеднички вредности и конкретни резултати – истакнал премиерот Мицкоски.

Тој нагласил дека поддршката од Унгарија е значајна за европската перспектива на земјата и дека интеграцијата треба да се темели на принципиелност и мерит-систем.

– Силните држави се градат врз јасни политики, стабилни институции и доследна заштита на националните интереси – порача Мицкоски во своето обраќање на настан организиран од „Mathias Corvinus Collegium“.

Во говорот тој ја посочил Унгарија како пример за економски развој и стабилност, нагласувајќи ја улогата на премиерот Орбан.

– Унгарија со јасна визија и силно лидерство успева да обезбеди економски развој и зачувување на националниот идентитет – рекол Мицкоски, додавајќи дека Орбан е лидер кој носи одлуки во интерес на својата држава.

Двајцата премиери разговарале и за инфраструктурната поврзаност, енергетската стабилност и мигрантската криза, оценувајќи дека соработката во безбедноста е од суштинско значење за регионот.

Посетата, како што беше нагласено, претставува чекор напред во зацврстувањето на стратешкото партнерство меѓу двете земји, со фокус на економски развој и политичка поддршка.

The post ОРБАН И МИЦКОСКИ СО ЗАЕДНИЧКА ВИЗИЈА Економија, енергетика и европска перспектива appeared first on plusinfo.mk.

Премиерот Христијан Мицкоски денеска од Будимпешта порача дека Македонија е отворена за нови инвестиции и партнерства, нагласувајќи дека економската соработка со Унгарија има значителен потенцијал за раст.

Обраќајќи се на бизнис форумот посветен на деловната соработка меѓу двете земји, Мицкоски истакна дека ваквите средби се можност за директно поврзување на компаниите и отворање нови пазари. Според него, токму ваквата комуникација може да донесе нови деловни модели и одржлив економски раст.

Тој посочи дека новата авиолинија меѓу Скопје и Будимпешта е дополнителен поттик за продлабочување на економските односи, но и за развој на туризмот и инвестициите. Премиерот изрази уверување дека директната врска ќе ја засили деловната динамика и ќе отвори простор за нови заеднички проекти.

Во своето обраќање, Мицкоски се осврна и на економските резултати, нагласувајќи дека земјата во 2024 година достигнала рекордно ниво на странски директни инвестиции од околу 1,25 милијарди долари. Тој оцени дека ваквите резултати се должат на политиките за стабилна и предвидлива деловна средина.

Премиерот потенцираше дека политичката стабилност и реформите во владеењето на правото, борбата против корупцијата и дигиталната трансформација се клучни за привлекување нови инвеститори. Дополнително, тој нагласи дека државата останува посветена на европскиот пат и исполнување на критериумите врз основа на заслуги.

Мицкоски упати порака до унгарските компании да ги разгледаат можностите за инвестирање во Македонија, додавајќи дека и македонските фирми се подготвени за проширување на унгарскиот пазар. Според него, форумот може да резултира со конкретни договори и нови деловни партнерства.

На настанот учествуваа десетици македонски компании кои имаа можност директно да се вмрежат со унгарската бизнис-заедница и да отворат нови перспективи за соработка.

The post МАКЕДОНИЈА БАРА ПАРТНЕРСТВА ВО БУДИМПЕШТА Мицкоски најави нова економска динамика appeared first on plusinfo.mk.

Американскиот државен секретар Марко Рубио денеска во Будимпешта изјави дека односите меѓу САД и Унгарија се во „златна фаза“ и дека се темелат на солидна соработка, која не е само реторичка, туку и конкретна во областа на економијата и енергетиката.

– Унгарија стана важен партнер на САД, а американските инвестиции во Унгарија постојано растат. Под водство на премиерот Орбан, земјата создаде стабилна и конкурентна деловна средина што поттикнува понатамошен раст“, ​​рече Рубио на заедничката прес-конференција со унгарскиот премиер Виктор Орбан – пренесува Индекс.ху (Index.hu).

Рубио истакна дека за време на ноемвриската средба во Белата куќа се постигнати значајни договори, врз основа на кои денеска беше потпишана спогодба.

– Се надеваме дека ова е само првиот од многуте договори – рече американскиот државен секретар.

Тој потсети на блиските врски меѓу Орбан и американскиот претседател Доналд Трамп и рече дека Трамп е посветен на Унгарија и нејзиниот успех.

„Претседателот Трамп е посветен на вашиот успех. Вашиот успех е наш успех и овој однос е во наш најдобар интерес. Ако имате финансиски проблеми, каде што растот е тежок или стабилноста е загрозена, ние сме тука да ви помогнеме“, нагласи Рубио.

Зборувајќи за актуелните геополитички предизвици, Рубио го повтори ставот на САД дека една од клучните цели е што поскоро да се заврши војната во Украина, додавајќи дека САД презеле иницијатива во водењето преговори меѓу Русија и Украина, додека другите меѓународни институции не успеале да постигнат напредок во таа насока.

„Вашингтон ги собра спротивставените страни на разговори, што ниту ОН ниту Европа не беа во можност да го сторат. А минатата недела, во Оман на експертско ниво се одржаа руско-украинско-американски консултации за завршување на војната. Не разбирам зошто некои членови на меѓународната заедница не го поддржуваат фактот дека има земји кои активно учествуваат или сакаат да учествуваат во прекинувањето на непријателствата“, нагласи Рубио.

Тој повтори дека за време на посетата на Вашингтон во ноември, тие се согласиле привремено да го суспендираат увозот на руски енергетски производи за Унгарија и дека тоа е направено затоа што Америка сака да ја поддржи Унгарија во сè.

Во исто време, додаде тој, Белата куќа е благодарна и затоа што Будимпешта е важен застапник на мирот во Европа уште од почетокот на војната, а Доналд Трамп отсекогаш го сметал ова за важно во случајот со украинското решение.

Орбан рече дека Унгарија ќе продолжи да ги поддржува Трамп и напорите на САД за мир во Украина, без оглед на тоа какви европски конфликти подразбира ова, и повтори дека сегашниот американски претседател „направил најмногу во целата меѓународна политика за да обезбеди мир во руско-украинската војна“.

– Повторувам, иако сите знаат, ако Доналд Трамп беше претседател на САД, оваа војна немаше да избувне. Ако тој не беше претседател сега, немаше да имаме шанса да го завршиме ова мирно во догледна иднина, затоа изразуваме почит и благодарност до претседателот на САД за неговите мировни напори – рече Орбан.

Тој додаде дека Унгарија останува подготвена да биде домаќин на мировниот самит во Будимпешта „доколку има таков“ и ја повтори поканата до американскиот претседател да ја посети Унгарија.

Орбан го пофали сеопфатниот развој на билатералните односи, истакнувајќи дека односите меѓу Унгарија и САД се на највисоко ниво во последните неколку децении.

Тој, исто така, истакна дека минатата година се постигнати значајни инвестициски договори, додека американските инвестиции во Унгарија достигнаа рекордно високо ниво.

Орбан оцени дека „се роди ново златно доба во односите“ со САД.

– Не се сеќавам кога односите биле на толку високо ниво, избалансирани и водени од добри намери. Можеби бев- ме на толку високо ниво кога претседателот Буш постариот нè посети пред промената на режимот. Оттогаш имало подобри и полоши времиња, но никогаш не сме биле толку високи – рече тој.

Тој потсети дека од јануари минатата година се донесени одлуки за 17 американски инвестиции во Унгарија, што е рекорд за една деценија.

– Унгарците повторно можат да патуваат во САД без виза. Унгарија е поканета во Одборот за мир. Постигнати се клучни договори во областа на нафтата, гасот и нуклеарната енергија. На Унгарија ѝ е доделено ослободување за руската нафта и гас, така што Унгарија останува безбедна во однос на снабдувањето со енергија – објасни Орбан.

На денешната прес-конференција беше потпишан и договор за нуклеарна енергија.

The post ТРАМП Е ПОСВЕТЕН НА УСПЕХОТ НА ОРБАН И НА УНГАРИЈА Рубио со пораки за силна поддршка во Будимпешта appeared first on plusinfo.mk.

Застрашувачки сцени утрово пристигнуваат од Унгарија, каде што во пожар во хотел во градот Будакеши, во близина на Будимпешта, според првичните информации, загинале неколку лица, а повеќе се повредени.

Огнот избувнал околу 2:15 часот по полноќ на покривот на Спортскиот хотел на улицата Зихи Петер. Според локалните медиуми, пожарот најверојатно бил предизвикан од експлозија на плинска боца.

Пожарникарските екипи интервенирале со часови и успеале да евакуираат 27 лица од двокатниот објект. Градоначалникот на Будакеши изјавил дека повеќе од 20 лица се здобиле со полесни повреди, но има и повредени во сериозна и животозагрозувачка состојба.

Според локалните власти, во моментот сè уште се трага по неколку лица.

Во пожарот изгореле повеќе од 200 квадратни метри од зградата, која се користела како сместување за работници.

Причините за трагедијата официјално се утврдуваат.

The post 📷 📽️ ПЛАМЕН ЗАФАТИ ХОТЕЛ ПРЕКУ НОЌ, ИМА МРТВИ И ИСЧЕЗНАТИ Прва фотографија од ужасот во Унгарија appeared first on plusinfo.mk.

Рускиот претседател Владимир Путин денеска изјави дека би сакал да се сретне со американскиот претседател Доналд Трамп во Будимпешта, на најавениот мировен самит, јави Скај њуз. Путин му го пренесе ова на унгарскиот премиер Виктор Орбан во Москва.

Средбата Трамп-Путин во Будимпшета првично требала да се одржи во октомври, но е откажана бидејќи, според руската страна, не биле исполнети сите услови.

Меѓутоа, Москва сè уште чека сигнал од Вашингтон. Според дипломатски извори, иницијативата за нов термин би можела да биде поврзана со новиот американски мировен план за Украина.

Планот, кој во меѓувреме беше изменет и скратен од 28 на 19 точки, бара од Украина да се откаже од приклучување кон НАТО и да ги повлече војниците од некои територии. Русија, пак, остро реагираше на членот 14, што се однесува на замрзнатите руски средства на Запад.

Од друга страна, во Вашингтон засега нема потврда дали би се прифатил состанок меѓу двајцата лидери, ниту кога би можел да се одржи.

The post БУДИМПЕШТА УШТЕ Е ВО ИГРА ЗА КЛУЧНАТА СРЕДБА Путин на Орбан му пренел дека чека сигнал од Вашингтон appeared first on plusinfo.mk.