За 11 милиони евра е зголемена наплатата на приходи од увоз на тутун и тутунски производи во првото тримесечје од годинава, во споредба со истиот период минатата година. Само по овој основ, во Буџетот се слеале вкупно 2,82 милијарди денари, односно околу 45,7 милиони евра.

Паралелно со зголемената наплата, во истиот период се спроведени и засилени контроли на терен. Во осум случаи се запленети над еден милион парчиња цигари, како и 225,6 килограми тутунски производи, меѓу кои сецкан тутун, тутун за наргиле и никотински ќесички.

Во четири случаи била спроведена предистражна кривична постапка од страна на Одделението за истраги при Секторот за контрола и истраги. Притоа се поднесени кривични пријави против четири физички лица и едно правно лице.

Од Царинската управа истакнуваат дека овие активности се насочени кон заштита на државниот буџет, но и кон заштита на здравјето на граѓаните.

На одбележувањето на 34-годишнината од Царинската управа, директорот Бобан Николовски порача дека институцијата има многу поширока улога од самата контрола.

– Нашата улога не е само да контролираме, туку да заштитиме, да спречиме и да покажеме дека законот важи подеднакво за сите. Компаниите што работат законски мора да имаат сигурност и предвидливост. Нашата улога е да обезбедиме услови во кои чесното работење е предност, а за нелојалната конкуренција нема простор. Така се создава здрава економија и се отвораат нови бизнис можности. Тоа е нашата одговорност, но не само наша – тоа е и одговорност на секој поединечен учесник во секоја царинска постапка: транспортер, увозник, царински застапник, патник. За секого од нив важи законот, затоа што носат одговорност и имаат обврска да се однесуваат законски, а не селективно и според моментални лични потреби и убедувања. Само според законот. И само тогаш ќе можеме да зборуваме за систем. Сè друго ќе биде само импровизација. Ние како Управа треба да се стремиме да го достигнеме стадиумот кога не реагираме само на веќе настанати проблеми, туку истите ги предвидуваме и анулираме пред да се случат – порача Николовски.

The post ЗАПЛЕНЕТИ НАД МИЛИОН ЦИГАРИ И ТОНИ ТУТУН Поднесени кривични пријави против фирми и лица, информира Царина appeared first on plusinfo.mk.

Исплатата на ланските субвенции за велосипеди ќе започне во наредните денови, најави градоначалникот на Скопје, Орце Ѓорѓиевски, по реакциите на граѓаните кои со месеци чекаат средства.

Скопјани аплицираа на јавниот повик на Град Скопје уште во јуни минатата година, но и девет месеци подоцна исплатата не е реализирана. Според Ѓорѓиевски, причината се два проблема – недоволно средства и непочитување на редоследот на апликантите.

– – Постапката не била спроведена како што треба. Имало околу 200 апликанти, а средствата не биле доволни за сите. Дополнително, не бил запазен принципот „прв дојден – прв услужен“ – рече Ѓорѓиевски.

Тој посочи дека биле потпишувани решенија за дел од апликантите, потоа имало празнина во редоследот, па повторно биле потпишани други, без јасно објаснување зошто не се почитувал редот.

– Според редоследот од прва до 30 аликација се во ред, потоа имаме празен простор до 70 аликација, па имаме повторно последните 30-40 тина пак потпишани, Не знам од кои причини така се постапило, не знам зошто не се запазил редоследот. Што одлучивме ние? Ние имаме во овој буџет средства за исплата на субвенциите. За да нема неправда, сите субвенции ќе бидат исплатени во наредните неколку дена. Дополнително ќе побараме поддршка за ребаланс на буџетот и нов јавен повик оваа година – рече градоначалникот.

Според него, слична ситуација има и со субвенциите за чистење оџаци, кои исто така не биле исплатени за минатата година.

Со јавниот повик од 2025 година беше предвидено граѓаните да добијат до 5.000 денари за купување нов велосипед, а за оваа намена беа планирани три милиони денари од градскиот буџет. И покрај тоа, досега не е исплатен ниту денар.

The post НЕ СЕ ПОЧИТУВАЛ РЕДОТ, ПАРИТЕ ЗА ВЕЛОСИПЕДИ ДОАЃААТ НАСКОРО Скопјани чекаа 9 месеци, Ѓорѓиевски најави исплата на субвенциите appeared first on plusinfo.mk.

Во првите три месеци од 2026 година, Буџетот бележи стабилна реализација и раст на приходната страна, што укажува подобрена наплата, соопшти Министерството за финансии.

Вкупните приходи во Буџетот достигнаа 81,2 милијарди денари, што претставува раст од 5,7% во однос на истиот период во 2025 година. Вкупните приходи од даноци се зголемни за 4,7%, при што највисок пораст се забележува кај Данокот на добивка од 23,6% и Данокот на личен доход од 12,3%.

Повратот на ДДВ е зголемен за 17,3%, или вкупно кон стопанството се вратени 12 милијарди денари. Воедно, приходите од увозни давачки се повисоки за 9,1%.

Раст е забележан и кај неданочните приходи од 16,4% во првиот квартал од 2026 година споредено со истиот период минатата година.

На расходната страна, вкупните расходи изнесуваат 106,3 милјарди денари, што претставува раст од 18,4% споредено со првиот квартал минатата година. Особено значаен е растот на капиталните расходи, кои во првиот квартал достигнаа 8,3 милијарди денари, што е зголемување од 196,5% во однос на истиот период лани, што укажува на засилена динамика на реализација на капиталните инвестиции.

Министерството за финансии соопшти дека ќе продолжи да работи на одговорно управување со јавните финансии, поддршка на економската активност и реализација на приоритетните развојни проекти.

The post ПОДОБРЕНА Е НАПЛАТАТА ВО ПРВИТЕ 3 МЕСЕЦИ ОД ГОДИНАВА Највисок пораст има кај Данокот на добивка и кај Данокот на личен доход appeared first on plusinfo.mk.

Додека регионот се соочува со енормни поскапувања, во Македонија бензините остануваат со иста цена, додека цената на дизелот се зголемува само за 3,5 денари наспроти очекувањата дека ќе поскапи за 10,5 денари по литар, соопшти ВМРО-ДПМНЕ.

„Со одлука на Владата за намалување на ДДВ на нафтените деривати од 18 на 10% се спречи поскапување на горивата и се постигна нивна стабилизација. Со намалување на ДДВ за горивата директно се интервенираше во намалувањето и стабилизирањето на цените, со што цените на нафтените деривати се намалија од 6,5 до седум денари за литар гориво.

Според пресметките дневната заштеда за граѓаните е повеќе од 200.000 денари, додека на неделно ниво заштедата е приближно 1,5 милиони евра. Со ова, се потврдува дека навремената и прецизна интервенција на државата го прекина трендот на раст на цените, кој во спротивно ќе значеше поскапување за граѓаните и стопанството.

Во услови на силен раст на цените на светските пазари, со оваа интервентна мерка на Владата за намалување на ДДВ-то се прекинува синџирот на поскапувањата, од горивата до храна и услуги“, се наведува во соопштението од ВМРО-ДПМНЕ.

Македонија останува со убедливо најниски цени на горивата од земјите од регионот и меѓу ретките земји од регионот коишто директно од буџетот го одржува и се грижи за стандардот на граѓаните.

The post МАКЕДОНИЈА СО НАЈНИСКИ ЦЕНИ НА ГОРИВАТА Стандардот на граѓаните се одржува директно од буџетот appeared first on plusinfo.mk.

Собраниската Комисија за транспорт го проследи на натамошна постапка Предлог-законот за изменување на Законот за утврдување на јавен интерес и номинирање стратешки партнер за имплементација на проектот за изградба на инфраструктурниот Коридор 8 (делница: Тетово – Гостивар – Букојчани и проектот за Автопатот Требеништа – Струга – Ќафасан) и Коридорот 10 д (делница на Автопатот Прилеп – Битола), по скратена постапка.

Како што објасни заменик-претседателот на Владата и министер за транспорт, Aлександар Николоски, со постојниот Закон е предвидено финансирањето на проектот да се прави исклучиво од буџетот на државата, а со измените се остава простор тоа да се прави и од посебната сметка што ја има Јавното претпријатие за државни патишта (ЈПДП).

-ЈПДП, како инвеститор во проектот, има сериозна количина сопствени приходи кои доаѓаат од различни извори – акциза, давачки што се плаќаат при акциза на горива,…, има солидна сума што годишно ја добива, а има и можности да користи други финансиски механизми кои Буџетот не може да ги користи. Имајќи предвид дека се забрзува динамиката на работа на автопатите и на овие делници, предлагаме можност и ЈПДП од сопствени приходи да го финансира проектот како негов инвеститор. Тоа е измената -рече Николоски.

Митко Трајчулески од СДСМ оцени дека предложената законска измена е бај-пасирање на состојбата.

-Ова денес што го прави Владата е начин на бај-пасирање состојба. Се бара начин како да се задржи динамиката на проектот, а реалната слика е дека државата нема доволно пари за спроведување на своите стратешки национални интереси како што е овој проект. Не гледам дека во рамки на Буџетот соодветно се водело сметка за доволно алоцирање средства. Без разлика на добрите приходи, за ЈПДП овој проект ќе претставува голем товар што понатаму ќе се одрази врз реализацијата на останатите проекти. Претпријатието нема да има доволно финансиски ресурси и затоа мора да остане обврската да биде финансирано од страна на државата. Се докажа дека новиот начин на градба и методологијата придонесоа за сериозна динамика. Ова е единствениот проект досега што тера со одлична динамика. Динамиката го следи планираното, истакна пратеникот од СДСМ.

Пратеникот Тони Јаревски  потсети дека оваа Влада во однос на проектот наследи низа проблеми – недефинирани парцели, несредени имотно-правни односи,…

-Имаме Влада која е длабоко посветена на стратешките цели. Некои проекти досега беа само мисловна именка. Реализацијата на овие проекти укажува на зголемената ефикасност на институциите, во случајов, пред се, на ЈПДП, кое има доволно стабилно работење и може да се посвети на реализација на овој проект рече тој.

The post И ПАРИ ОД ДРЖАВНИ ПАТИШТА ПОКРАЈ ОД БУЏЕТОТ ЌЕ СЕ ТРОШАТ ЗА АВТОПАТОТ ШТО ГО ГРАДИ „БЕХТЕЛ И ЕНКА“ Измените на законот за изградба на проектот на брза лента во Собрание appeared first on plusinfo.mk.

Буџетот е ликвиден. Пари се обезбедени навреме и има простор за мерки доколку се потребни. Ова го истакна министерката за финансии Гордана Димитриеска-Кочоска

– Работевме посветено во изминатиот период и испорачуваме како што сме испланирале. Граѓаните можат да бидат спокојни. Пари обезбедивме навреме. Условоите по кои ги обезбедивме беа многу поповолни. Издадовме Еврообврзница со убедливо најниска камата – рече Димитриеска-Кочоска во гостување во Само интерву” на ТВ Канал 5.

При тоа, додаде, дека има огромен  предизвик, но радува фактот дека има раст кај бруто домашниот производ.

– Тоа е важно затоа што сите бројки, вклучително и јавниот долг го гледаме како процент од БДП и колку е тој поголем тоа значи дека јавниот долг ни се намалува, а со тоа се  отвора простор за дополнителни задолжувања доколку има потреба. Важно е како ја водите целокупната политика. Да, еден дел е со помошта што би требало да се даде преку форма на намалување на акцизи, даноци, што би значело намалени приходи во буџетот, но ќе реагираме соодветно, простор за одредени реакции има се уште – рече таа.

Димитриеска-Кочоска очекува политиките и одлуките што оваа Влада ги носи сега да се почувствуваат реално подоцна, затоа што вели, во економијата постои нешто што се нарекува временско задоцнување, односно дека растот во економијата бара континуитет во повеќе години.

Во интервјуто посочи дека не смета дека проекциите за прихдоите се преоптимистички и  направи споредба на приходите во 2025 и 2017 кои што се со реализација 95,91% од планираното за 2025 и 95,81% за 2017 година.

Во однос на расходната страна потенцира дека нема нереализирани расходи, односно дека се исплатени сите обврски, вклучително и налозите за реализација на капиталните расходи.

-Се што стига како налог во Трезорот во МФ се исплаќа редовно и согласно упатството – појасни министерката.

The post БУЏЕТОТ Е ЛИКВИДЕН Се што стига како налог во Трезорот во МФ се исплаќа редовно appeared first on plusinfo.mk.

Буџетот е во стабилна и добра кондиција и сите обврски се сервисираат навремено и непречено, истакна министерката за финансии Гордана Димитриеска Кочоска во одговор на пратеничко прашање во Собранието.

Таа апелираше да не се создава лажна перцепција дека буџетот е во банкрот.

– Доколку Буџетот ги сервисира сите обврски навреме и не воведува дополнителни товари за граѓаните и компаниите, тоа јасно покажува дека јавните финансии се стабилни и во добра кондиција. Нашите политики се насочени кон фискална консолидација, транспарентност и градење доверба кај инвеститорите и јавноста -рече  Димитриеска Кочоска.

Министерката повтори дека од почетокот на годината државата се задолжи со 1 милијарда евра со цел раздолжување на постојни обврски, а дополнително ќе се обезбедат уште 300 милиони евра од странство, исто така наменети за сервисирање на долг кој доспева,  бидејќи како што кажа, само во 2026 година доспеваат околу две милијарди евра обврски, информација што континуирано и транспарентно се соопштува, при што, како што посочи министерката, станува збор за одговорно управување со јавниот долг, а не за ново нето задолжување.

– Буџетскиот дефицит бележи континуирано намалување, од 4,4% од БДП во 2024 година, на 4% во 2025 година, со проектирани 3,5% во 2026 година, што претставува јасен сигнал за фискална консолидација и стабилизирање на јавните финансии – рече министерката.

Осврнувајќи се на еврообврзницата, таа нагласи дека најниската каматна стапка која што е постигната со нејзиното издавање е резултат на месеци посветена работа и интензивна комуникација со меѓународните инвеститори.

– Нема ниту еден коментар за најниската каматна стапка што ја добивме на еврообврзницата. Тоа не доаѓа „од небо”. Тоа е резултат на месеци работа и постојана комуникација со инвеститорите, кои на дневна основа поставуваат прашања за буџетот, економијата, плановите и секако за наследените состојби, кои внимателно ги следат економските политики, буџетската дисциплина, реформските процеси и наследените состојби – рече Димитриеска Кочоска.

Таа нагласи дека останува приоритет одговорното управување со јавните финансии, одржувањето на макроекономската стабилност и обезбедувањето предвидлива и сигурна економска средина за граѓаните и бизнисите.

The post БУЏЕТОТ Е ВО ДОБРА КОНДИЦИЈА Димитриеска Кочоска информира дека буџетскиот дефицит лани е намален на 4% appeared first on plusinfo.mk.

Министерот за јавна администрација, Горан Минчев, во контекст на реакциите на дел од невладините организации и граѓанските здруженија, кои предлагаат формирање на посебно тело, нова, проширена комисија со сопствена администрација, истакна дека ваквиот пристап е спротивен на реформската политика на Владата и на Министерството за јавна администрација.

Министерот нагласи дека формирањето ново тело би значело дополнителни финансиски трошоци и нова администрација, што не е во согласност со заложбите за рационализација и ефикасност на јавниот сектор.

– Ако ние кратиме членови во управни одбори во овој закон, и ако оваа Влада и Министерството за јавна администрација се залагаат за реформи и намалување на ваквите тела, тогаш е нелогично да формираме ново габаритно тело, нова комисија која ќе создава дополнителни трошоци во буџетот – изјави Минчев.

Министерот објасни дека во следниот закон што го подготвува Владата, Законот за организација и работа на органите на државната управа, е предвидено намалување на 40% на буџетските корисници од органите на државна управа.

– Доколку имаме институции во кои надлежностите се преклопуваат, или имаат слични или исти надлежности, логично е тие да се рационализираат, а не паралелно да формираме нови тела – нагласи министерот.

Минчев истакна дека критериумите за избор на раководни позиции остануваат високи и строго дефинирани, при што, изборот во одредена институција ќе го врши комисија составена од професионални административни службеници од таа институција.

The post НЕМА ЗОШТО ДА ГО ОПТЕРЕТУВАМЕ БУЏЕТОТ СО НОВА КОМИСИЈА Целта на владата е да го намали бројот на институции за 40% appeared first on plusinfo.mk.

Градоначалникот на град Скопје Орце Ѓорѓиевски, на денешната прес конференција за медиумите, испрати силна порака дека Скопје излегува од финансискиот и институционален колапс и влегува во период на стабилизација, развој и најголема инвестициска офанзива во својата историја.

Тој истакна дека при преземањето на функцијата затекнал урнат систем, град на раб на банкрот, јавни претпријатија со блокирани сметки, вработени без плати, нефункционални институции и долгови од речиси 300 милиони евра. На сметката на градот имало само осум милиони денари реално расположливи средства, додека истиот ден чекале извршни решенија од 48 милиони денари.

– Наместо да се жалиме, засукавме ракави и почнавме да работиме. Денес можеме гордо да кажеме дека Скопје полека застанува на нозе и оди напред – нагласи Ѓорѓиевски.

Во само два месеци, како што информираше, намалени се повеќе од 40 милиони евра обврски на Градот и јавните претпријатија, нормализирана е исплатата на платите во Дрисла, Комунална хигиена, Паркови и зеленило, Лајка, Флораком и Луна, каде што претходно се доцнело по две плати, а се решавале обврски од околу 450 милиони денари.

Со првиот ребаланс на Буџетот за 2025 година е засилена наплатата и воведена финансиска дисциплина, а Буџетот за 2026 година изнесува 5,2 милијарди денари – зголемен за 12 проценти. Пренесен е вишок од 482,9 милиони денари, со што за првпат по долги години Град Скопје има повеќе пари отколку обврски.

– Тоа ни овозможи да тргнеме во најголемата инвестициска офанзива досега – потенцираше градоначалникот.

Капиталните инвестиции се зголемени за 33,4 проценти, а веќе се реализирани 389,7 милиони денари, при што јануари 2026 година е најуспешен јануари по приходи и реализација.

Започната е изградба на 50 мини паркови низ Скопје и на Мега паркот Христијан Тодоровски Карпош во Бутел, кој ќе биде новото зелено срце на градот.

Големи вложувања се прават во образованието: изградени се спортски терени во шест средни училишта, обезбедени се 60 милиони денари за реконструкции, прочистувачи за воздух во секоја училница, целосна дигитализација, 86 милиони денари за енергетска ефикасност, лаптоп за секој првенец на генерација, воведување униформи за прва година, летни кампови за ранливи категории и целосно бесплатна психолошка поддршка за сите ученици – за првпат во историјата на Град Скопје.

Во инфраструктурата се откочени клучни проекти што со години стоеле заглавени. Кај клучката Момин Поток е исплатена експропријацијата и работите се во полн ек. Во тек е супервештачење за објект на булевар АСНОМ со што ќе се стави во функција таканаречениот мост за ловење риба во 2026 година.

Започната е Фаза 1 од булевар Македонија, наскоро стартува Фаза 2, а Фаза 4 ќе отпочне до крајот на 2026 година. Со завршување на сите фази, Скопје ќе ја добие првата подземна сообраќајница.

Во напредна фаза се и преговорите за експропријација на објектите на булевар Борис Трајковски, за чиј завршеток се веќе обезбедени средства, со што оваа клучна артерија конечно ќе функционира нормално.

Реконструкцијата на улицата Фрањо Клуз е во втора фаза, започната е и реконструкцијата на Перо Наков, а дополнителни 150 милиони денари се обезбедени за рехабилитација на помали улици. Во Буџетот за 2026 година има средства и за булеварите Февруарски Поход, Цветан Димов и други сообраќајни решенија.

Во јавните претпријатија започна обнова каква што Скопје не памети – нови специјални возила за Комунална хигиена, Паркови и зеленило, ЈСП и Градски паркинг, нови контејнери и систем за воведување ред во хигиената.

Се инвестира и во зонското паркирање и нови монтажни паркинзи, како и во две монтажни гаражи во Клиничкиот центар кои ќе решат долгогодишен проблем.

Откочен е и најголемиот еколошки проект во историјата на градот – пречистителната станица за отпадни води вредна околу 185 милиони евра.

Во Водовод се реализираат десетици проекти за нови цевководи, атмосферска канализација, заштита од поплави и стабилно водоснабдување.

Со Флораком и Луна се обновува зелената инфраструктура и се враќа Луна паркот, кој ќе биде завршен во втората половина на 2027 година.

– После повеќе од една деценија лажни ветувања, конечно на децата ќе им обезбедиме современ простор за забава и спомени – истакна Ѓорѓиевски.

Проширени се капацитетите на Лајка со инвестиција од 30 милиони денари, а над 90 милиони денари се обезбедени за реконструкција и опрема на културните установи, плус дополнителни 25 милиони денари за намалување на нивните обврски.

Паралелно со инвестициите, сериозно се намалуваат долговите – тековните обврски за над 4,6 милиони евра, кредитите за над 1,2 милиони евра, како и драстично долговите на јавните претпријатија: Водовод за 1,3 милијарди денари, ЈСП за 427 милиони, Комунална хигиена за над 130 милиони, Паркови и зеленило за над 80 милиони, Дрисла за 14,5 милиони и Градски паркинг за 41,6 милиони денари.

Градоначалникот им се заблагодари на граѓаните кои го платиле данокот на имот и информираше дека се блокирани 17.694 сметки за долг од 1,3 милиони евра за 2021 година, како и дека во наредните 15 дена се очекува подмирување на обврските од 2022 до 2025 година од вкупно 96.562 физички лица и 2.335 правни субјекти во износ од 19,5 милиони евра.

Ред мора да има. Секој денар во буџетот значи повеќе проекти и подобар живот за сите – порача тој.

На крајот, Ѓорѓиевски нагласи дека ова е само почеток на финансиската консолидација и целосната трансформација на градот.

– Наследивме долгови, но градиме иднина. Наследивме хаос, но воспоставуваме ред. Наследивме разочараност, но ја враќаме надежта. Ќе го направиме Скопје модерен, чист, функционален и достоинствен град. Нема враќање назад. Нема изговори. Само резултати. Заедно ќе успееме. Време е скопјани да живеат подобро, време е градот да застане цврсто на нозе и да оди напред – рече градоначалникот Орце Ѓорѓиевски на денешната прес-конференција.

The post СКОПЈЕ ЗАСТАНУВА НА НОЗЕ И ВЛЕГУВА ВО НАЈГОЛЕМА ИНВЕСТИЦИСКА ОФАНЗИВА ДОСЕГА Што сработе градоначалникот Ѓорѓиевски во првите 100 дена од мандатот? appeared first on plusinfo.mk.

Градоначалникот на Скопје Орце Ѓорѓиевски на седница од сите советници побара да гласаат против одлуката од минатото за вработување на 21 лице, одлука што директно би го чинела градот 1,4 милион евра вкупно за следните 4 години.

Ѓорѓиевски е дециден дека повеќе нема место за оваа наследната пракса за партиски вработувања во Град Скопје која, како што вели, е на штета на граѓаните.

– Тоа се пари на граѓаните, средства со кои можеме да изградиме кружни текови, да обезбедиме нови автобуси и да реализираме проекти што носат реална корист за Скопје.

На градскиот буџет гледам како на сопствениот. Кога го презедовме градот во финансиски колапс, со одговорно и домаќинско работење успеавме повторно да го исправиме на нозе.

И затоа, партиските апетити немаат место во Град Скопје. Се бориме за Скопје какво што го сакаме – функционално, чесно и во служба на граѓаните – изјави Ѓорѓиевски на седница на градот.

The post СО ТИЕ 1,4 МИЛИОН ЕВРА МОЖЕМЕ ДА ИЗГРАДИМЕ КРУЖНИ ТЕКОВИ Ѓорѓиевски дециден, нема место за вработување 21 лице во Град Скопје appeared first on plusinfo.mk.