Во рамки на денешниот настан, премиерот Христијан Мицкоски одговарајќи на новинарско прашање во врска со поддршката за науката во земјава, истакна дека буџетот за научни истражувања е двојно зголемен во споредба со минатата година и дека Владата обезбедила бесплатен пристап до најголемите светски научни бази на податоци.

– Она коешто прво би кажал е дека буџетот за науката е двојно зголемен оваа година споредено со минатата година. Дали е тоа доволно бидејќи доаѓам од науката – ќе ви кажам не, но е секако повеќе од тоа што беше минатата година. Мислам дека околу 650-660 милиони денари се одвоени – рече премиерот.

Тој истакна дека е овозможен бесплатен пристап за студентите до најголемите две научни бази.

– Нашата цел е да ја стимулираме науката и во таа насока е и онаа активност на Владата да обезбеди бесплатен пристап на сите научници – и млади и поискусни – на две бази на научни списанија. Ако тоа во минатото се плаќаше и беше тешко достапно, сега веќе го имаат бесплатно. Државата тоа го покри за сите универзитети – вели Мицкоски.

Како што посочи премиерот, целта на владата е македонските универзитети да се најдат во светскиот врв.

– Очекувам младите научници да продолжат во таа насока, да ги користат овие бази, да ги следат светските трендови и да публикуваат научни трудови. Така ќе придонесат нашите универзитети да се приближат до првата илјадарка на Шангајската листа, која е една од најважните во светот. Очекувам тоа да се случи во овој мандат на Владата – додаде Мицкоски.

The post ПОВЕЌЕ ПАРИ, ПОВЕЌЕ НАУКА, ПОВЕЌЕ ИДНИНА Владата двојно ќе го зголеми буџетот за да ги поддржи младите умови appeared first on plusinfo.mk.

Науката добива зголемена поддршка од Владата. Преку два јавни повика, Министерството за образование и наука распредели над 54 милиони денари (876.623 евра) на јавните научни установи за реализација на научно-истражувачки проекти, како и на високообразовните установи кои во соработка со бизнис заедницата спроведуваат проекти од посебен научен и јавен интерес што се во корелација со целите на Стратегијата за паметна специјализација на Македонија.

Како што информира Министерството за образование и наука, со 23,7 милиони денари ќе се финансира реализацијата на 8 проекти со кои осумте самостојни јавни научни установи, односно институти аплицираа на објавениот повик на МОН за доделување на средства за поддршка на нивната дејност, која е од висок стратешки и национален интерес за државата.

– Пет научно-истражувачки проекти од посебен научен и јавен интерес кои се резултат на соработката помеѓу академскиот и бизнис секторот во рамки на паметната специјализација на државата ќе се финансираат со 30,4 милиони денари.

Министерството информира дека дополнително ќе бидат објавени и резултатите од третиот јавен повик кој е дел од програмата за поддршка на научно – истражувачката дејност во Македонија за 2025 година, преку кој ќе се финансираат иновативни проекти на државните универзитети, факултети, научни институти и Македонската академија на науките и уметностите. Секој прифатен проект ќе добие до 8 милиони денари.

Буџетот за наука во 2025 изнесува 680 милиони денари, што е речиси двојно зголемување споредбено со буџетот од 2024 година.

The post ДОДЕЛЕНИ ПОВЕЌЕ ОД 876.000 ЕВРА ЗА НАУЧНИ ПРОЕКТИ Министерството за образование објави 3 јавни повици за користење на државни пари appeared first on plusinfo.mk.