Државата ќе смее да потроши околу 477 милијарди евра, од кои 39 милијарди евра треба да се финансираат со кредити. Ова е максимумот што го дозволува во Уставот внесената должничка кочница, кој ги поврзува кредитите со економското постигнување на земјата.

Долг од 2.500 милијарди евра

Пред да се воведе должничката сопирачка, вообичаено беше владите да земаат големи кредити кога државните приходи беа недоволни. Со текот на времето се натрупа планина од долгови, кои сега изнесуваат околу 2.500 милијарди евра. Неколку стотици милијарди евра беа додадени за време на пандемијата на коронавирус и откако Русија ја нападна Украина. Кочницата за задолжување во тој период беше прекината поради вонредни ситуации.

– На долгот мора да се плати со камата. Само во 2024 година висината на каматите изнесува 36 милијарди евра. Затоа, „разумот диктира“ повторно да се почитува кочницата за задолжување –  рече сојузниот министер за финансии и лидер на ФДП, Кристијан Линднер во Бундестагот.

Коалициските партнери, СПД и Зелените, од друга страна, би сакале да земат повеќе кредити за да ја модернизираат земјата. Од двете страни постојано се слуша дека должничката сопирачка е „кочница за иднината“.

Голема потреба од инвестиции

Во Германија се дотраени многу нешта. Дотраени се патиштата, мостовите, железничката мрежа, но и зградите на државните образовни институции, односно училиштата и универзитетите. Ќе треба да се инвестира и во дигитализација. Во овој поглед, Германија заостанува во меѓународна споредба, исто како и во постигнувањата на своите ученици.

Институциите и судовите се префорсирани, а предметите се трупаат во администрацијата. На државно ниво недостасуваат стотици илјади станови, особено социјални станови за лица со ниски примања.

Тешко збогување со гасот, нафтата и јагленот

Сепак, најголем дел од парите недостасува за постепено исфрлање на фосилните горива и климатско неутрално преструктуирање на економијата. Владата за ова предвиде 60 милијарди евра, финансирани преку кредити кои не беа потребни за време на корона-пандемијата. План кој беше стопиран од Уставниот суд.

Тесно е и во воениот сектор. Бундесверот, кој со години е во лоша состојба, повторно треба да биде подобро опремен. За ова се предвидени 100 милијарди евра, распоредени во неколку години. Парите нема да траат вечно.

Како натаму во Украина?

Особено што од таканаречениот специјален фонд на Бундесверот сега треба да се финансира и испораката на оружје за Украина. Вонредно решение со оглед на затегнатата буџетска ситуација. Ова може да стане уште полошо доколку на Украина ѝ бидат потребни повеќе пари. СПД и Зелените веќе побараа во таков случај повторно да се прекине сопирачката за задолжување.

Ситуацијата би можела да стане уште потешка во 2025 година, доколку следен американски претседател биде Доналд Трамп. САД се најголемиот финансиер во Украина, а на второто место е Германија. Ако Трамп ја прекине поддршката за Украина, Европејците ќе мора да го покријат тоа финансиски. Тоа би имало огромно влијание врз германскиот буџет.

Сојузни избори во 2025 година

Ситуацијата со следниот буџет е веќе тесна. Како што стојат работите во моментов, во финансиското планирање за 2025 година има дупка од најмалку 16 милијарди евра. Деталите би можеле да станат познати во март, доколку министерот за финансии Линднер тогаш ги претстави клучните точки од предлог буџетот.

2025 година ќе биде клучна година за трите владејачки партии, бидејќи следните сојузни избори ќе се одржат во септември. СПД, Зелените и ФДП имаат слаби резултати во анкетите. Линиите на конфликт во буџетското планирање се предвидливи. СПД ќе се обиде да спречи кратења во социјалниот сектор, Зелените ќе се залагаат за доволно средства за заштита на климата, а ФДП ќе сака да продолжи да штеди.

Германската економија во рецесија

Министерот за финансии Линднер бара да има три блока на трошоци за кои треба повторно да се преговара: надоместокот што го добиваат невработените и неспособните за работа и меѓународна финансиска помош и субвенциите кои не помагаат да се олесни товарот на економијата.

Додека економското постигнување ширум светот, а и во еврозоната, се зголемува, тоа во Германија се намалува. Ова ќе има влијание и на даночните приходи. Следната даночна проценка, која исто така ќе биде основа за планирање на буџетот, ќе биде направена во мај.

Не е само АфД таа што сака да заштеди пари за бегалците

Најголемата опозициска пратеничка група во Бундестагот, ЦДУ/ЦСУ, исто така бара намалување на социјалните бенефиции. Унијата (ЦДУ/ЦСУ) во визир го има и надоместокот за невработени и лица неспособни за работа (т.н. граѓански надоместок), кој изнесува 44 милијарди евра годишно, како и издатоците за бегалците.

– Имаме 1,7 милиони корисници на граѓанскиот надоместок кои се регистрирани како невработени, а кои би можеле да почнат со работа утре. Темата азил сега е исто така голем фактор на трошок – ние трошиме 27 милијарди евра за тоа, вклучително и за борба против причините за бегство – рече заменик-претседателот на парламентарната група на Унијата, Матијас Миделберг, во Бундестагот.

Помалку пари за развојна помош

Борба против причините за бегство – тука се мисли и на развојна соработка и хуманитарна помош. Двете области се веќе најголеми губитници во буџетот за 2024 година, се жалат невладините организации како што е ВЕНРО. Буџетот на Сојузното министерство за економска соработка БМЗ ќе се скрати за речиси 10 отсто, а хуманитарната помош за 20 отсто. Заедно тоа изнесува добри 1,4 милијарди евра.

Михаел Хербст, прв човек на ВЕНРО, смета дека е загрижувачки тоа што намалување веќе не бара само АфД (Алтернатива за Германија), која е делумно десноекстремна.

Она што е особено загрижувачко е тенденцијата во центарот, па и полево од него, кон популистичка критика на развојната политика, која инаку е стандардна кај екстремната десница.

(Насловот на анализата преземена од Дојче Веле е редакциски)

The post ВЕРУВАЛЕ ИЛИ НЕ, ГЕРМАНИЈА МОРА ДА ШПАРА Сите бараат кредити, а земјата веќе е презадолжена appeared first on plusinfo.mk.

-Тоа се реални проекти кои се потребни за граѓаните кои не ги испланирала власта за буџетот во следната година- рече пратеникот Здравко Трајанов  од ВМРО- ДПМНЕ, на почетокот на денешната расправа за предлог буџетот за 2024 година.

Од партијата тврдат дека со овој буџет ќе се исцрпат пари кои треба да завршат во партиски компании. Од ВМРО-ДПМНЕ се сигруни и дека вака планираниот буџет нема да може да се полни од даночните приливи Буџетот, велат од партијата, ќе придонеси и за зголемување на јавниот долг за дополнителни 540 милиони евра.

Предлог-буџетот за следната година тежи 5,5 милијарди евра. Владата го карактеризира како развоен и одржлив Буџет кој ги има сите карактеристики за истовремено да го поддржи развојот, но и да ја обезбеди фискалната одржливост.

Министерот за финансии Фатмир Бесими во експозето рече дека буџетот обезбедува услови за одржлив економски раст, продолжување на фискалната консолидација и зацврстување на фискалната одржливост, поддршка на стандардот на граѓаните и ранливи категории граѓани и стопанство, како и интензивирање на конвергенцијата на земјата кон ЕУ.

-Стратегијата за заздравување, а понатаму и за забрзување на растот се заснова, прво и основно, на поттикнување на развојот преку силен инвестициски циклус, чиј носител е јавниот сектор, преку крупните инфраструктурни проекти, но исто така и приватниот сектор, кој ќе биде поддржан преку буџетските политики. Второ, клучно е обезбедувањето фискална одржливост, преку континуирана фискална консолидација, но воедно и енергетска одржливост, одржливост во земјоделството и воопшто во економијата, преку водење зелена економија – рече Бесими.

Тој потенцира дека најважно е што во буџетот се менува структурата, односно дека од минатата година нивото на капитални расходи е два пати повисоко во однос на 2020 година и дека таквата тенденција е задржана и во Буџетот за 2024 година. Од друга страна, како што наведе, буџетскиот дефицит е речиси за една третина намален во однос на проектираното ниво за оваа година, односно на ниво од 3,4% од БДП, од кој само половина е примарниот, односно 1,7% од БДП, додека другата половина оди за плаќање камати за долг акумулиран од минатото до сега.

Во Комисијата за финансирање и буџет, расправата по Предлог-буџетот трае 10 работни дена, по што се праќа на разгледување и усвојување на пленарна седница на Собранието. Согласно утврдените рокови Буџетот за наредната година треба да биде усвоен во Собранието најдоцна до 31 декември.

The post 250 АМАНДМАНИ ОД ВМРО-ДПМНЕ НА БУЏЕТОТ ЗА 2024 ГОДИНА Опозицијата обвинува дека со буџетот јавниот долг ќе се зголеми за 560 милиони евра appeared first on plusinfo.mk.

Вкупната сума за капитални инвестиции е позиционирана на 731.509.000 евра.

Колку и за кои инвестиции ќе се одвојат најмногу пари во министерствата кои располагаат со поголеми буџети и позначајни проекти?

Во Министерството за транспорт се концентрирани највисоките износи за јавни инвестиции а салдото е значајно зголемено за 245 милиони евра преку ставката инвестиции во патна инфраструктура која го опфаќа пред сè проектот Бехтел и Енка. Позначајна сума од 30,9 милиони евра е планирана за инвестиции во железничката инфраструктура при што околу 60% од средствата ќе се обезбедуваат од заеми. Поголем износ, скоро 2,1 милион евра, е планирана за системите за отпадни води. Предвидени се 9,8 милиони евра за локални патишта преку обезбедување на заеми. Вкупниот износ на планирани заеми за следната година изнесува 32,8 милиони евра.

Со повисоки износи за развојни проекти е Министерството за финансии. Конкретно преку Министерство за финансии – функции на држава до година ќе се потрошат вкупно 67,1 милион евра, од нив 58,2 милиони евра за проекти поврзани со ЕУ реформи во повеќе сектори и министерства. Преку развојниот дел на буџетот на Министерството за финансии планирани се близу 8,9 милиони евра наменети за проекти на општинско ниво.

Преку развојната компонента на Министерството за одбрана се планирани 111,1 милион евра – најголем дел или 95 милиони евра се за „Интеграција во НАТО“, за изградба и реконструкција на објекти се планирани 11,5 милиони евра а за модернизација 4,6 милиони евра.

Министерството за образование догодина ќе треба да потроши 12 милиони евра за реконструкција и изградба на основни училишта и спортски сали во основни училишта, 3,5 милиони евра за средни училишта и ученички домови додека за изградба и реконструкција на студентски домови 2,8 милиони евра. Ова министерството планира дел од овие проекти да ги оствари со заеми во износ од 4,7 милиони евра и уште 1 милион евра од донации.

Следната 2024-та за реконструкција на охридската Специјална болница Св. Еразмо-Охрид, за Клиника за хируршки болести Св. „Наум Охридски“ од Скопје и други, преку развојниот дел на Министерството за здравство планирани се скоро 2,2 милиони евра а за медицинска опрема за сите здравствени установи, предвидени се 7,8 милиони евра. И во новиот Буџет се најдоа старите проекти, почнати а сè уште незавршени. Па така за општа Болница Кичево се планирани 812 000 евра а двојно поголеми суми се планирани во следните години, 2025 и 2026. За изградбата на новите клинички центри во Скопје и во Штип догодина ќе се одвојат 2,5 милиони евра а најголем дел од оваа сума или 1,5 милиони евра планирано е да се обезбедат од заем.

Буџетот за развој на Министерството за внатрешни работи во 2024година ќе изнесува 13,3 милиони евра. Од нив 8,8 милиони евра за реформи во полицијата а 4,5 милион евра за реконструкција и опремување на згради.

Во развојниот дел на буџет на Министерството за економија доминира проектот за гасификација за што се одвојуваат скоро 3,7 милион евра а за поддршка на мали и средни фирми предвидени се 1,3 милиони евра. Буџетот на Дирекцијата за ТИРЗ догодина ќе изнесува 12,4 милиони евра – пари кои ќе се трошат за инфраструктура во повеќето економски зони, освен во Скопје, Штип, Прилеп и во Струга, Струмица, Кичево, Куманово, Липково, Косел, Жабени.

Развојниот дел за инвестиции на Министерството за земјоделство изнесува 4,5 милиони евра. Од нив околу 1 милион евра се за модернизација во земјоделството, скоро 1 милион евра за хидросистемите Злетовица и Лисиче и 800 000 евра за проектот наводнување на јужната долина на Вардар и уште 1,6 милиони евра за останатите системи за наводнување по должина на реката Вардар.

Преку Министерството за труд и социјална политика, за изградба и реконструкција на објекти за детска заштита се предвидени 1,1 милион евра а за објекти за социјална заштита и за домови за стари лица 276 000 евра. Позначајна сума од околу 812.000 евра е за поттикнување на вработувањето.

Од останатите ресори, Министерството за информатичко општество добива 2,8 милиони евра, Министерството за животна средина 711.000 евра а Министерството за правда ќе има 200.000 евра за развојни програми и проекти.

The post ВИСОКА БУЏЕТСКА ЦЕЛ ЗА 2024 ГОДИНА Каде министерствата ќе потрошат 731 милион евра? appeared first on plusinfo.mk.

Растот на буџетот е двојно повисок од претпоставениот раст на економијата за следната година од 3,4% кој владата планира да го поткрепи и со 773 милиони евра за капитални инвестиции кои треба да се реализираат во година на двојни избори кога политиката е поважна од економијата. Следната година владата очекува стапката на инфлација да се стабилизира на 3,6% што, според неа, ќе биде овозможено од стабилно ниво на цени на енергенсите и храната и покрај надворешните и внатрешните предизвици кои се зависни од недостигот на работна сила, падот на потрошувачката, двете војни во светот и нејасната состојба кај најголемиот трговски партнер на земјава.

Според власта, буџетот е развоен и обезбедува солидни основи за раст на економијата и подобар стандард за граѓаните. Тој ќе биде столб на економското заздравување, а понатаму и на забрзување на растот. Најголем придонес се очекува да имаат бруто инвестициите од државата. Двигател на растот ќе биде и поддршката на приватниот сектор, закрепнувањето на трговските партнери, Германија и ЕУ.

Економисти и стопанственици предупредуваат дека инфлацијата сè уште е висока, задолжувањето расте, инвестициите тешко се реализираат, а економијата има проблеми со работната рака и случувањата кај трговските партнери. Опозицијата, пак, вели дека буџетот е напумпан и е во прилог на криминалот и корупцијата на власта.

– Факт е дека годинава е планиран повисок раст на буџетот од растот на БДП, 5,8, наспрема 3,4%. Тоа е добро, ако со таа разлика владата планирала да го стимулира стопанството во изборна година, но во суштина тоа не е така бидејќи најголемиот дел од парите  повторно ќе одат на плати, во Фондот за пензиско осигурување и на социјални трансфери, што говори дека повторно се купува социјален мир и избирачи во уште една изборна година. Да, сите ние сакаме повисоки плати, пензии… но кој тоа ќе го финансира, ако економијата недоволно расте и не може да ги покрие растечките побарувања. Во неизвесни услови за работа и со недоволен човечки потенцијал компаниите не можат да обезбедат раст, а со вакви трошења, не е познато колку економијата ќе обезбеди буџетот да се полни. Се може да се планира, но што фактички сме создале во текот на една година се гледа од завршната сметка, а не од планот. Затоа нашето внимание треба да се насочи токму кон оствареното и колку сме се задолжиле тоа да го реализираме. Јавниот долг секоја година расте, но не дава резултати во развојот, туку во купување на социјалниот мир – вели Ангел Димитров од Организацијата на работодавачи.

Тој додава дека без работна сила, која во земјава неповратно се намалува, не може да се испорача висок процент на раст.

– Опаѓаме со работна сила, многу повеќе од регионот, а увозот на нова е лимитиран. Од друга страна се планира најголем раст да има токму кај приходите од личен доход. Новите работници треба да ги создадат тие пари, а во отсуство на работници како ќе може да се полни пензискиот фонд од кој се планира пораст на пензиите или Фондот за здравство од каде се финансираат новите лекови и здравствените услуги. Без луѓе нема развој, затоа јас сум песимист, поради намалувањето на бројот на работниците во индустријата. Тоа ќе биде рак-рана на целата држава, но гледаме дека нема план како тоа да се надмине. Секое одлагање на решение на овој проблем ќе повлече преселување на компании на други локации, затворање на фирми…, што исто така ќе се одрази на растот на економијата која нема да може да испорача доволно пари за да може државата да троши – вели Димитров.

Маријанчо Николов, економист и поранешен пратеник, смета дека владата треба да се придржува кон планираниот дефицит кој годинава е понизок и да се обиде да скрати колку што може од непродуктивните трошења. Посебно внимание, според него, треба да се посвети на реализација на капиталните трошења и реализацијата на големите капитални проекти кои треба да се реализираат во прилог на економскиот раст.

– Овој буџет покажува дека е направен според оптимистички очекувања за растот на економијата. Но, такви се и сите претходни буџети кои подоцна кога ќе се покажеше дека не може да се реализира очекуваниот раст претрпуваа ребаланси во кои најмногу се кратеше на капиталните трошоци. Тоа не смее да се дозволи и со овој буџет бидејќи инвестициите на државата и приватниот сектор го прават растот. Владата веројатно ги имала предвид сите внатрешни и надворешни предизвици за следната година кога ја зголемила државната каса и планирала економски раст од 3,4%. Но, има многу предизвици следната година. Таа е година на избори и во неа компаниите се воздржуваат да инвестираат што се одразува на развојот и растот. Тука е и проблемот со недостиг на работници кој станува сѐ посериозен и кој сигурно ќе влијае на полнењето на буџетот кое годинава се покажа проблематично поради намалената потрошувачка на домаќинствата. Надворешните влијанија се сѐ позначителни бидејќи светот се соочува со две војни од кои едната може да се прелее и да направи нов проблем со цените на енергенсите. Проблем е и состојбата со германската економија која е најголем наш трговски партнер. Сето тоа не ветува дека економијата ќе може да испорача висок раст. Затоа е потребно да се внимава на дефицитот, новите задолжувања и секако на непродуктивните трошења – вели Николов.

Според него, проблем за полнењето на државниот буџет ќе има и следната година токму поради овие влијанија.

– Ако како и годинава полнењето на буџетската каса биде проблематично, а расходите останат на истото ниво тогаш буџетскиот дефицит од 3,4% тешко ќе се оствари. Затоа е потребно да се внимава на расходите посебно на непродуктивните и да не се надмине планираниот дефицит. Владата е добро, како што се обврза, да истрае на консолидирањето на дефицитот и достигнувањето на планираните бројки од 3% од БДП, јавниот долг да не зафаќа 60% од БДП, а гарантираниот долг да не надмине 50% исто така од БДП. Не само за да се исполнат Махстришките критериуми, туку многу поважно е за македонската економија и за стандардот на граѓаните. Бидејќи високите проценти на дефицитот го поттикнуваат јавниот долг и спиралата се зголемува и се движи кон грчко сценарио кое никој не го посакува бидејќи ќе се одрази на способноста државата да ги исполнува своите услуги кон граѓаните и остварувањето на нивните права  – вели Николов.

Опозициската ВМРО-ДПМНЕ оцени дека буџетот за 2024 е напумпан, и не носи развој, туку криминал и корупција.

– Од 2018 година до денес власта потроши 25 милијарди евра низ буџети, и ништо ново не направи. Македонија стагнира на секое поле, нема учебници за учениците, нема лекови за болните, нема покачување на пензиите за пензионерите. 6 години нема еден готов автопат. Кичево-Охрид е во застој, Скопје-Блаце не е ниту почнат. Каде се трошат милијардите евра од буџетите 6 години по ред? Очигледно е дека наместо кај граѓаните, парите завршуваат кај криминалците, затоа и власта се обидува да купи ден повеќе власт во 2024 година, за да продолжи со криминалот и корупцијата до последен ден – велат од ВМРО-ДПМНЕ.

The post СЕ ДВИЖИМЕ КОН ГРЧКО СЦЕНАРИО?! Со досега најголемиот буџет ќе се купуваат социјален мир и избирачи appeared first on plusinfo.mk.