Аксел Рудакубана, осуден на 52 години затвор за убиство на три девојчиња и за обид за убиство на уште 10 лица во британскиот град Саутпорт е префрлен од затвор во психијатриска болница. Во јули 2024 година, Рудакубана ги нападна учесниците на работилница за танц на тема музика од Тејлор Свифт, пишуваат британските медиуми.

Тој се изјасни за виновен за убиствата на 9-годишната Алис да Силва Агиар, 6-годишната Бебе Кинг и 7-годишната Елси Дот Стенкомб. Во времето на нападот имаше 17 години.

Рудакубана вчера бил префрлен од затворот со висока безбедност Белмарш во болницата Бродмур. Министерството за правда соопшти дека префрлањето не влијае на должината на неговата казна.

Крис Вокер, адвокат на семејствата на убиените девојки, рече дека веста е особено тешка за нив, бидејќи доаѓа непосредно пред втората годишнина од нападот.

– Семејствата што ги претставуваме беа известени за ова во последните 48 часа. Веста ќе ги погодеше силно во секое време, но се случи непосредно пред втората годишнина. Веруваме дека ова е уште еден потег на Рудакубана кој се чини дека се обидува повторно да го манипулира системот – изјави Вокер.

Добивме само основни информации, додаде тој.

– Им даваме поддршка на семејствата и итно бараме средба со властите, за да ја разбереме целата ситуација пред да дадеме дополнителни коментари – рече адвокатот.

Сторителите кои претставуваат висок ризик и не можат да останат во затвор поради ментални нарушувања можат да бидат преместени во психијатриски одделенија со висок степен на обезбедување. Таму, тие имаат статус на пациенти, а не затвореници. Трансферот доаѓа откако Рудакубана наводно нападнал судски службеник со топла вода во затворот Белмарш во мај минатата година.

Болницата Бродмур во Беркшир е најстарата од трите болници со висок степен на обезбедување во Велика Британија и во неа биле сместени некои од најозлогласените криминалци во Велика Британија, како што се Рони Креј и серискиот убиец Питер Сатклиф, познат како Јоркширскиот Мевосек.

Според Законот за ментално здравје, службениците на Министерството за правда мора да ја прифатат препораката на клиничките експерти за префрлање на затвореник во затворен објект.

Затвореник во болница со висок степен на обезбедување мора да учествува во третман и во терапија, што е предуслов за какво било разгледување на враќање во затвор или ослободување. Доколку се процени дека повеќе не му е потребен болнички третман, законот дозволува негово брзо враќање во затвор.

The post УБИЛ ТРИ ДЕВОЈЧИЊА НА РАБОТИЛНИЦА ЗА ТАНЦ Британија го преместува од затвор во психијатриска болница appeared first on plusinfo.mk.

Иран му се закани на британското кралско семејство и изјави дека воздухопловната база во Велика Британија е „легитимна цел“ откако САД извршија воздушни напади врз ирански цели користејќи ја воената база РАФ Ферфорд (RAF Fairford) во Глостершир.

Според текстот, американскиот претседател Доналд Трамп распоредил бомбардер Б-1 во РАФ Ферфорд за да изврши, како што е наведено, „одбранбени напади“ против Техеран.

Извори за Аксиос изјавиле дека авионот бил користен за напад врз ирански воени цели.

Се тврди дека новиот британски премиер Енди Бернам се согласил да продолжи со политиката што им дозволува на американските сили да ја користат базата само за, како што е наведено, „одбранбени напади“, објавува Блумберг.

Иранските претставници остро реагираа и во соопштение ја обвинија британската монархија за историска одговорност за настаните на Блискиот Исток.

„Ја предупредуваме британската монархија, која е главната причина за несреќите на народите од нашиот регион и има темна историја на поделба на исламските земји, масакри, наметнување авторитарни влади и, пред сè, организирање на окупацијата на Палестина и создавање на израелската Накба, како и учество во неодамнешните агресии на САД и ционистичкиот режим против Иран, да не ја влошува дополнително својата позиција“, се вели во соопштението.

Британската влада реагираше со изјава дека нејзините вооружени сили се подготвени да ја бранат земјата од каков било напад.

„Нашите вооружени сили се подготвени да го заштитат Обединетото Кралство од каков било вид напад, без разлика дали на наша територија или од странство. Обединетото Кралство е подготвено 24 часа на ден, седум дена во неделата да се брани“, изјави портпаролот на британската влада, пренесе Би-би-си.

Тој додаде дека одбраната се базира на повеќеслоен систем за воздушна и ракетна одбрана обезбеден од Кралската морнарица, Британската армија и Кралските воздухопловни сили, користејќи низа напредни способности и во тесна соработка со сојузниците од НАТО.

The post ИРАН Ѝ СЕ ЗАКАНИ НА БРИТАНИЈА ДЕКА СТАНУВА „ЛЕГИТИМНА ЦЕЛ“ Од нејзини бази полетуваат американските бомбардери appeared first on plusinfo.mk.

Енди Бурнам денеска ќе стане седмиот британски премиер во последната деценија, преземајќи ја функцијата во период на сериозни предизвици и со ограничено време да остави политички белег.

Бурнам ја презема премиерската функција од непопуларниот, Кир Стармер, само две години откако лидерот на лабуристите ја врати партијата на власт по 14 години владеење на конзервативците со убедлива изборна победа.

Откако кралот Чарлс Трети му довери мандат за формирање нова влада, 56-годишниот Бурнам се очекува денеска да го одржи првиот говор пред седиштето на британскиот премиер во „Даунинг стрит“, по заминувањето на Стармер.

Неговиот тим најави дека новиот премиер ќе ги претстави приоритетите за враќање на довербата во владата и подобрување на животниот стандард на граѓаните, во услови на продолжена криза со трошоците за живот. Меѓу главните цели се поттикнување на економскиот раст и пренесување поголеми овластувања кон регионалните заедници.

Се очекува во текот на денот да бидат објавени и новите владини именувања, а најголемо внимание привлекува прашањето кој ќе ја наследи Рејчел Ривс на функцијата министер за финансии.

Бурнам, поранешен градоначалник на поширокиот регион Манчестер, познат и како „Кралот на Северот“, се искачи на чело на Лабуристичката партија по оставката на Стармер минатиот месец. Пратениците во него гледаат како најдобра можност партијата да го спречи растот на десничарската партија „Реформ Ју-Кеј“ на Најџел Фараж.

Меѓу најголемите предизвици за новиот премиер ќе бидат слабеењето на економскиот раст, високите трошоци за државното задолжување, големите расходи за социјалната заштита и проблемот со илегалната миграција преку Ламанш, што ја зголеми поддршката за партијата на Фараж.

Дополнителен притисок претставуваат нестабилните цени на енергенсите поради војната меѓу САД и Иран, како и непредвидливата политика на американскиот претседател Доналд Трамп.

Бурнам најави „радикална“ промена на, како што го оцени, „премногу централизираниот“ политички систем и економски модел, со цел поголема сигурност за граѓаните – стабилни работни места, достапни домови и подобри услови за живот во локалните заедници.

Стармер на крајот на јуни објави дека се повлекува од премиерската функција и од лидерската позиција во Лабуристичката партија по серија политички скандали, погрешни чекори и промени во ставовите кои ја нарушија неговата позиција.

Сепак, и Бурнам се соочува со ограничен простор за маневрирање поради бавниот економски раст, високиот јавен долг и строгите буџетски правила кои бараат балансирање меѓу јавната потрошувачка и приходите од даноци.

Церемонијата на примопредавање на функцијата ќе започне со посетата на Стармер на Бакингемската палата, каде формално ќе му ја врати довербата на кралот, по што Бурнам ќе биде примен од монархот пред да го одржи првиот говор како премиер.

Бурнам беше пратеник од 2001 до 2017 година и извршуваше министерски функции во владите на Тони Блер и Гордон Браун. По враќањето во Парламентот пред само четири недели, тој има околу три години да ги спроведе најавените промени, пред изборите најавени за 2029 година, на кои анкетите му даваат предност на Фараж и неговата партија.

Бурнам минатата недела им порача на своите поддржувачи дека неговото преземање на раководството на лабуристите е „последна шанса“ партијата да ги исправи работите, додавајќи дека има „план“ за иднината на Велика Британија.

The post БРИТАНИЈА ИМА НОВ ПРЕМИЕР Енди Бурнам доaѓа на местото на Кир Стармер appeared first on plusinfo.mk.

Велика Британија стравува дека нема да има доволно минерали за да ја покрие побарувачката од индустријата, која е неопходна за да се постигнат целите од зелената транзиција. Потребата од литиум, бакар и други минерали, неколкукратно ќе се зголеми до 2040 година. Додека Британија го поттикнува рударството на островот, Македонија не може да се пофали со нов рудник, иако изобилува со бакар. Во наоѓалиштето за бакар Иловица, утврдени се околу 500 милиони тони руда, во кои, според проценките, има 410.000 тони бакарна руда. Па така, пресметките, но и планот на инвеститорот предвидуваат просечно годишно производство на над 10.000 тони бакар во Иловица. Доколку ова се преведе во бројки, рудникот во Иловица, на инвеститорот „Еуромакс ресоурсес“, ќе биде во топ 3 извозни компании во Македонија.

Пред само неколку месеци британски инвеститори остварија средби со претставници од Министерството за енергетика, рударство и минерални суровини, но нема детали околу проектите за кои се разговарало и дали меѓу темите бил и македонскиот бакар. Истражувањата на Британскиот геолошки истражувачки центар покажуваат дека Велика Британија најверојатно ќе остане зависна од увоз на критични минерали и покрај тоа што го стимулира домашното рударство, па ќе мора да бара поддршка од земји партнери.

„Брзиот раст на производство на електричните возила, ветерните турбини и фотоволтаиците значи дека, на краток рок, примарното снабдување со минерали кое се експлоатираат директно од земјата ќе остане од суштинско значење за задоволување на секторите во раст и пополнување на празнините во снабдувањето. Ова вклучува континуирана зависност од увоз на литиум, бакар, никел, кобалт, манган и ретки земни елементи и ја нагласува важноста на диверзификацијата на синџирот на снабдување, одговорното снабдување и стратешките меѓународни партнерства“, оценува Британскиот геолошки истражувачки центар.

На неодамнешната Конференција за рударството во Обединетото Кралство, беше потенцирано дека природниот капитал на земјата претставува економска можност од огромни размери, но сепак останува исклучителен предизвик да се обезбедат финансии за проекти за критични минерали.

„Тука во Корнвол, никогаш не сме ја загубиле нашата гордост кога станува збор за минералите, но сега повторното оживување на рударството ја враќа надежта во нашите заедници. Не станува збор само за работни места, туку и за развој на инфраструктура и општествени подобрувања, и ова е возбудливо време ако добро ги изиграме картите. Сепак, сега треба да ја искористиме големата поддршка за нашата индустрија и да преземеме холистички пристап кон истражувањето, експлоатацијата, преработката, развојот на вештини и рециклирањето на минерали за да се осигураме дека Корнвол ќе се справи со предизвикот и ќе се придружи на останатите проекти низ Велика Британија за обезбедување на домашни резерви на критични минерали што ни се потребни за да го живееме модерниот живот“, истакна во обраќањето пратеникот Перан Мун.

Според инвеститорите, сега е време да се започнат рударските проекти.

„Најдоброто време да се засади дрво беше пред 20 години, а второто најдобро време е сега, па затоа мора да се здружиме за да развиеме индустрија за критични минерали во Велика Британија без понатамошно одложување. Треба да овозможиме долгорочни инвестиции за да ги забрзаме проектите за минерали, да го поттикнеме производството, да ја овозможиме енергетската транзиција и да му бидеме од корист на локалното население низ целата земја“, нагласи основачот на „Корниш Литиум“, Џереми Вратхол.

Инаку, во британската „Визија 2035 – Стратегија за критични минерали“, е истакнато дека очекуваат дека до 2035 година годишната побарувачка за бакар да се удвои, додека побарувачката за литиум да се зголеми за 1.100%. Како што економиите низ целиот свет ја спроведуваат зелената транзиција, побарувачката за овие минерали само ќе се зголемува, бидејќи енергетските извори и транспортот стануваат сè позависни од технологијата со ниски јаглеродни емисии. На глобалниот пазар, како што се додава во документот, во последниве години сме сведоци на сè поконцентрирани синџири на снабдување со преработка и рударство и таквата концентрација значи дека синџирот на снабдување е особено ранлив на шокови како што се природни катастрофи, војна или геополитички последици.

The post РУДАРСТВОТО ЈА ВРАЌА НАДЕЖТА НА ЗАЕДНИЦАТА Британија стимулира нови окна за бакар, а кај нас инвестициите како Иловица се саботираат appeared first on plusinfo.mk.

Британскиот државјанин Метју Ешли Фостер-Смит (46) е обвинет за бруталното убиство на популарната колумбиска инфлуенсерка Наталија Виљалба (36), чие тело, според истрагата, го сокрил во куфер, а потоа се обидел да создаде алиби тврдејќи дека во моментот на злосторството гледал натпревар од Светското првенство.

Случајот предизвика голем шок во Колумбија и повторно ја отвори дебатата за насилството врз жените во оваа јужноамериканска земја.

Фостер-Смит, кој потекнува од британскиот град Борнмут, беше уапсен во Еквадор по меѓународна потерница, под сомнение дека ја убил Виљалба во нејзиниот стан во елитен дел на Богота.

Според истрагата, злосторството било извршено на 18 јуни. Телото на инфлуенсерката било пронајдено неколку дена подоцна, скриено во куфер и оставено во бањата, под туш што сè уште течел.

Мајката на жртвата изјавила дека последен пат разговарала со својата ќерка токму на 18 јуни. Три дена подоцна, по истекот на резервацијата за станот, персоналот задолжен за одржување влегол во апартманот и ја открил морничавата сцена.

Во текот на истрагата, безбедносните камери го снимиле Фостер-Смит како носи постелнина во пералната на зградата, непосредно по исчезнувањето на Виљалба.

Во меѓувреме, осомничениот веќе ја напуштил Колумбија и заминал во Еквадор.

Само неколку часа пред да биде уапсен, Фостер-Смит телефонски контактирал со британскиот весник „Сан“, тврдејќи дека има цврсто алиби.

– Го гледав натпреварот Англија – Хрватска на големо платно во ирски паб. По натпреварот отидов во трговски центар, се прошетав, купив сладолед, а потоа се вратив да следам и други натпревари – изјавил тој.

Осомничениот дополнително тврдел дека добивал смртни закани од локални криминални групи поради долгови и дека се подготвувал да се врати во Велика Британија кога бил уапсен на аеродромот во Кито. Во тој момент веќе бил предмет на црвена потерница на Интерпол.

Колумбиското обвинителство наведува дека Фостер-Смит ја убил Виљалба, се обидел да ги прикрие трагите од злосторството, а потоа избегал од земјата.

Градоначалникот на Богота, Карлос Фернандо Галан, изјави дека апсењето е резултат на координирана акција на колумбиските и британските власти.

– Овој грозоморен случај нема да остане неказнет – порача Галан.

Фостер-Смит и претходно бил осудуван. На почетокот на оваа година бил ослободен од затвор, каде што издржувал казна поради прогонување, а во 2020 година добил 18 месеци затвор затоа што ја следел својата поранешна партнерка и објавувал интимни материјали без нејзина согласност.

Потсетување на случајот со Валентина Треспаласиос

Начинот на кој било сокриено телото на Наталија Виљалба потсети на уште едно злосторство што ја потресе Колумбија.

Во јуни 2024 година, американскиот државјанин Џон Пулос беше осуден на 42 години и осум месеци затвор за убиството на својата девојка, познатата колумбиска диџејка Валентина Треспаласиос.

Тој ја задавил 21-годишната девојка во јануари 2023 година, а потоа го сокрил нејзиното тело во куфер и го фрлил во контејнер во Богота. И Пулос се обидел да избега од земјата, но бил уапсен во Панама и екстрадиран во Колумбија.

Според независната Колумбиска опсерваторија за фемицид, во 2023 година во земјата биле регистрирани 630 убиства на жени поради родово базирано насилство.

Податоците на Фондацијата „Правда за сите“ покажуваат дека до крајот на мај 2024 година биле евидентирани 109 случаи на фемицид, при што во 69 случаи сторител бил сегашен или поранешен партнер на жртвата.

Овие бројки ја вбројуваат Колумбија меѓу земјите со највисоко ниво на насилство врз жените и повторно ја отвораат дебатата за потребата од поефикасна заштита на жртвите.

The post УБИЛ ИНФЛУЕНСЕРКА, ЈА СКРИЛ ВО КУФЕР ПА СМИСЛИЛ НЕВЕРОЈАТНО АЛИБИ Тврдел дека во тоа време гледал натпревар Англија – Хрватска appeared first on plusinfo.mk.

Британското Министерство за одбрана покрена истрага откако руската фрегата „Адмирал Григорович“ испука предупредувачки истрели во правец на британска цивилна јахта која ѝ се приближила на околу 500 метри во Ламанш, јужно од островот Вајт, пренесоа денеска британските медиуми.

Според наводите на весниците „Телеграф“ и „Гардијан“, инцидентот се случил околу 20 наутички милји јужно од островот Вајт, надвор од британските територијални води. Во инцидентот немало повредени ниту материјална штета, а британските власти оценија дека станува збор за „изолиран инцидент“.

Портпаролот на британското Министерство за одбрана потврди дека се проверуваат информациите за настанот во Ламанш. Британската јахта го продолжила своето патување по инцидентот, додека патролен чамец од бродот на британската Кралска морнарица „HMS Tyne“ бил упатен кон пловилото за да собере информации и да ја провери безбедноста на членовите на екипажот.

Инцидентот се случи два дена откако британските специјални сили за првпат пресретнаа и запреа санкциониран руски нафтен танкер од „флотата во сенка“, „Смиртос“, во Ламанш. Од октомври 2025 година, и француската воена морнарица спроведе четири слични операции против руски танкери, со цел да се намалат приходите од извозот на нафта со кои, според наводите на западните земји, се финансира војната во Украина. Сепак, воени извори изјавија за „Гардијан“ дека денешниот инцидент не е поврзан со пресретнувањето на танкерот во текот на викендот.

Русија вечерва потврди дека воен брод испукал предупредувачки истрели во Ламанш кон британска јахта „која опасно се приближувала“, јави ТАСС.

Руското Министерство за одбрана го потврди инцидентот, наведувајќи во соопштение дека екипажот на фрегатата „Адмирал Григорович“ во 12:45 часот по московско време забележал дека цивилната едрилица под британско знаме „Брајт Фјучер“ се приближува опасно блиску до бродот со вклучен мотор. Морнарите прво испукале ракети и дале звучни сигнали, но јахтата го продолжила својот курс кон фрегатата, доближувајќи и се на 150 метри. Командантот на рускиот воен брод потоа дал наредба да се испукаат предупредувачки истрели, по што британскиот брод веднаш почнал да се оддалечува. Никој не бил повреден.

„Екипажот на фрегатата ’Адмирал Григорович‘ дејствувал во строга согласност со меѓународните правила за навигација и ги презел сите потребни мерки за да спречи инцидент“, нагласи руското Министерство за одбрана.

The post РУСКА ФРЕГАТА ОТВОРИ ОГАН КОН БРИТАНСКА ЈАХТА!? Инцидент во Ламанш, Лондон води истрага appeared first on plusinfo.mk.

Премиерот на Велика Британија, Кир Стармер најави дека владата ќе воведе забрана за користење на социјални мрежи за деца помлади од 16 години.

Тоа претставува една од најстрогите мерки во областа на заштита на малолетниците во дигиталниот простор.

Стармер денеска истакна дека социјалните мрежи можат да имаат сериозно негативно влијание врз менталното здравје на децата и оти пласираните содржини често носат ризици од зависност.

Тој нагласи дека одредени платформи за игри ќе бидат ослободени од забраната, но и тие ќе мора да воведат построги механизми за заштита на малолетници, особено во однос на комуникацијата со непознати лица.

The post БРИТАНИЈА ЌЕ ГИ ЗАБРАНИ СОЦИЈАЛНИТЕ МРЕЖИ ЗА ДЕЦА ПОД 16 ГОДИНИ Одредени платформи за игри ќе бидат ослободени од забраната appeared first on plusinfo.mk.

Повеќе од 300 мигранти, кои минатото лето се упатиле кон Велика Британија, биле киднапирани, мачени и добивале закани дека присилно ќе им бидат одземени органи – дознава Би-би-си.

Минатото лето групи мигранти од ирачки Курдистан летале за Либија, каде што биле однесени во комплекс, а подоцна затворени по наводен спор во врска со плаќањето помеѓу либанската милиција и ирачкиот шверцер Ноа Арон.

Според информациите, милицијата барала 5.000 долари за секој заложник, а семејствата биле предупредени дека „исплатата ќе се изврши со бубрег“ ако парите не бидат платени за кратко време.

Во јануари 110 заложници биле вратени дома со авион организиран од ирачката влада и не е познато колкумина сè уште се во притвор.

Поранешни затвореници рекле дека биле држени „во тесни простории, со речиси 180 лица со кои ја делеле ќелијата“, а се знае дека најмалку еден заложник починал.

Таткото на еден од заложниците изјави за Би-би-си дека групата на Арон му наплатила на неговото семејство илјадници долари за да организира патување до Велика Британија, кое вклучувало патување низ Северна Африка и преку Медитеранот до Европа.

Тој исто така покажа фотографија од својот син, на која се гледа лузна за која се стравува дека е од присилно отстранување органи.

Поранешните затвореници исто така споделија вознемирувачки и насилни видеа, од кои едно прикажува млад човек кому му е кажано дека го носат на лекар за да му го отстранат бубрегот.

„Не видовме сонце шест месеци. Беше толку тесно што сите мораа да спијат седејќи. Сите затвореници делеа еден тоалет, а кој ќе останеше предолго, ќе беше претепан“, рече 16-годишно момче.

На заложниците им се даваше парче леб дневно само ако нивните семејства им исплатеа на киднаперите дополнителни суми пари, објави Би-би-си.

Висок функционер на Министерството за внатрешни работи на регионалната влада на Курдистан, Хемин Мерани, рече дека и покрај ризиците, протокот на нелегални мигранти од ирачки Курдистан кон Европа не запре повикувајќи ги заложниците да ги споделат своите искуства со своите роднини за да ги одвратат од истото патување.

Ноа Арон моментно издржува 10-годишна затворска казна во Франција за други кривични дела поврзани со перење пари и шверц.

Деталите за овие киднапирања се појавија за време на истрагата на Би-би-си за Кард Џафа, за кој се верува дека работел со Арон во минатото.

Џафа и Арон се од истиот град Ранџа, во Курдистан, регион познат по „преполните активни мрежи за шверц“, се наведува во извештајот на Чатам Хаус.

The post АКО НЕМАШ ПАРИ, ЌЕ ПЛАТИШ СО БУБРЕГ! Повеќе од 300 мигранти киднапирани и малтретирани на пат кон Британија appeared first on plusinfo.mk.

Маж во своите 30-ти години е уапсен откако седум лица се здобиле со сериозни повреди кога автомобил удрил во пешаци во градот Дерби, Англија.

Автомобилот, црн „сузуки свифт“, удрил во повеќе луѓе во Фриар Гејт околу 21:30 часот синоќа, соопшти полицијата во Дербишир.

На седум лица им била укажана помош на самото место, и биле пренесени во болница со низа сериозни повреди, кои не се опасни по живот, додаде полицијата.

Мажот, кој е по потекло од Индија, бил пронајден кратко по инцидентот и уапсен под сомнение за обид за убиство, предизвикување тешки повреди со опасно возење, нанесување тешки телесни повреди со умисла и опасно возење, соопшти полицијата.

Тој останува во полициски притвор, пренесе ДПА.

The post ИНДИЕЦ СО АВТОМОБИЛ УДРИЛ ВО ПЕШАЦИ ВО АНГЛИЈА Повредени се 7 лица appeared first on plusinfo.mk.

Британските специјалци ќе можат да се качуваат и да ги запираат бродовите од руската „флота во сенка“ додека минуваат низ водите на Обединетото Кралство, најави премиерот Кир Стармер, пренесува ДПА.

Стармер изјави дека Велика Британија ќе им се придружи на северноевропските сојузници во пресретнувањето на танкерите, во обид уште посилно да се справат со бродовите кои ги прекршуваат санкциите.

Оваа одлука премиерот ја донесе за време на патувањето за Хелсинки, на самитот на Обединетите експедициски сили (ЈЕФ) – воена коалиција од 10 земји предводена од Лондон, која ги вклучува и Данска, Естонија, Финска, Исланд, Летонија, Литванија, Холандија, Норвешка и Шведска.

Руската „флота во сенка“, составена од над илјада застарени танкери, превезува нафта под туѓи знамиња за да ги избегне западните санкции.

– Путин ги трие рацете поради војната на Блискиот Исток бидејќи мисли дека повисоките цени на нафтата ќе му ги наполнат џебовите. Затоа одиме уште посилно против неговата флота, за да ја изгладнеме неговата воена машина – порача Стармер.

Неодамна, Финска, Шведска и Естонија веќе пресретнаа сомнителни танкери во Балтикот, а затворањето на британските води ќе ги принуди руските бродови на подолги и поскапи рути.

The post БРИТАНИЈА СЕ ЗАКАНИ ДЕКА ЌЕ ЗАПЛЕНУВА РУСКИ ТАНКЕРИ На удар ќе биде „флотата во сенка“ appeared first on plusinfo.mk.