Во продолжение е изјавата на премиерот Ковачевски, пренесена во целост:

„Денеска сме во посета на фабриката за производство на масло за јадење „Брилијант” во Штип и овој производител покрива значаен дел од пазарот на масло за јадење во нашата земја.

Со рестартирањето на производството на „Брилијант”, од страна на нашата реномирана компанија „Витаминка”, овој производствен капацитет влезе во нова фаза од своето работење и отвори нови перспективи за развој. Така, оваа инвестиција добива многу поголемо и пошироко значење, а за „Витаминка” значи можност за развој и освојување на нови пазари.

Во овој период на тешка економска криза домашните капацитети за производство на основни прехранбени производи меѓу кои и маслото за јадење, се ставени во полн капацитет, а мерките кои што беа донесени од Владата имаат за цел да се избегнат ценовните шокови и да се заштити животниот стандард на граѓаните.

Токму во таа насока Владата изминатиот период донесе одлуки за повластена тарифа на електрична енергија пониска од берзанската, со што влијаеме на намалувањето на цените на основните прехранбени производи.

Според податоците кои ги објавивме неделава вкупно 518 субјекти, од кои 235 производствени капацитети на основни прехранбени производи се пријавија за снабдување со електрична енергија со пониски цени преку „ЕСМ Продажба” и тие ќе бидат снабдувани со струја по цена од 85 евра за мегават час, која треба да влијае на намалување на цените на основните прехранбени производи.

Од 1 декември оваа година треба да ги видиме првичните резултати на пазарот од оваа мерка. Воедно  очекуваме да продолжи намалувањето на цените во интерес на потрошувачите, и според сите параметри реално е да очекуваме намалување за најмалку 10%.

Ќе ја искористам оваа прилика да повторам дека никој нема да биде оставен сам да се справува со последиците од кризата оваа зима и дека институциите посветено работат на изнаоѓање на решенија за предизвиците кои се а наметнаа за економската и енергетската криза.

Исто така, би напоменал дека за компаниите од прехранбениот сектор најважно е да имаат домашна суровина, затоа ставаме силен фокус на зголемување на примарното земјоделско производство. Конкретно во случајот на домашното производство на сончоглед. Обезбедивме и продолжуваме да обезбедуваме во иднина навремена исплата на субвенциите и други мерки за зголемување на површините за производство на земјоделски производи.

И оваа година пред почетокот на новата сеидбена сезона за сончогледот ги исплативме субвенциите, за да можат земјоделците навреме да сеат, за да имаат пари за производствените трошоци. Платежната агенција исплати над 450 милиони денари субвенции за полјоделски култури меѓу кои и за сончогледот и маслодајната репка на над 24.000 земјоделци.

Во ова време на глобална криза навремено и неселективно даваме финансиска поддршка за земјоделците, им помагаме кога е најпотребно, го стимулираме земјоделското производство, даваме поддршка за развој и обезбедуваме сигурност и за земјоделците и за преработувачите.

Во таа насока е и новиот модел за распределба на земјоделските субвенции, кој што ќе значи решавање  сите долгогодишни проблеми на земјоделците, брз систем за исплата на субвенциите и спречување злоупотребите и сивата економија.

Конкретно, досегашниот систем според кој земјоделците добиваа субвенции без да прикажат дека оствариле производство, се заменува со нов „decoupling систем”. Со новиот модел, ги мотивираме земјоделците да произведат повеќе храна, нешто што е многу важно во услови на светска економска и енергетска криза.

Како што реков, струја, енергенси и храна, мора да има, за сите. И на тоа секојдневно и активно работиме, и така и ќе биде и во иднина.

Исто така сакам да истакнам дека „Витаминка” е еден од нашите најзначајни производствени капацитети во делот на основните прехранбени производи и сакам да се заблагодарам за соработката која што ја имавме со менаџментот на фабриката како Влада. Особено во месеци март, април и мај оваа година кога знаете дека постоеја забрани за извоз на основни суровини од страна на земјите од регионот, меѓутоа низ контакти кои што ги правевме и ние како Влада и јас како претседател на Влада со соседна Србија, менаџментот на компанијата, успеавме да обезбедиме суровини доволно за да може да се задоволи домашниот пазар.

Исто така сакам да истакнам дека фабриката Витаминка е една од далекугледите фабрики во нашата држава и тие веќе имаат инсталирано фотоволтаични централни во рамки на своите капацитети при што 30% од потребите на струја ги задоволуваат од сопствено производство на електрична енергија од обновливи извори на енергија. Тоа е за пофалба и пример за сите други производствени и услужни капацитети во државата.

Врз основа на такво управување со компанијата, навистина вешто во услови на криза и се она што Владата го правеше веќе сме сведоци дека онаа максимална цена која што беше достигната за маслото за јадење од 152 денари е доведена, спуштена е на ниво од 113 денари. Исто така треба да бидеме свесни дека во финалната цена на рафинираното масло за јадење голем удел има цената на суровината а цената на суровината е исклучително погодена од војната која што се води во Украина со нападот на Русија врз Украина. 35% од светското производство на основни суровини кои ги користи „Витаминка” се произведуваат во Украина и неможноста да се направат посеви во Украина заради константите ракетирања на целата територија во Украина влијае на зголемување на берзанските цени и на сончогледот и на пченицата и на сите други основни суровини потребни за прехранбената индустрија.

Од тие причини сакам да искажам почит кон менаџментот на „Витаминка” и на сите други производствени капацитети за основни прехранбени производи во државата и на сите нивни вработени.

За крај би сакал да им посакам уште многу успеси на менаџментот на „Витаминка”, на „Брилијант” чиишто и менаџери и вработени ме запознаа со овој високо софистициран и навистина на врвно светско ниво процес. Да им посакам уште многу инвестиции и успех во развојните планови.”

The post ОЧЕКУВАМЕ ОСНОВНИТЕ ПРОИЗВОДИ ДА ПОЕВТИНАТ НАЈМАЛКУ 10 ОТСТО Премиерот вели дека повластената струјна тарифа ќе влијае на цените appeared first on plusinfo.mk.

„Во првиот квартал од годинава, „Витаминка“ како компанија покажа одговорност поради економската криза и ја задржа цената на ниско ниво долг временски период. Претходната цена на ‘брилијант’ беше 125 денари за литар, со што внимаваме и важно ни беше да нема големи ценовни скокови за граѓаните. Но, изминативе недели ситуацијата се смени во однос на набавката на суровина од Бугарија и од Украина, кои останаа единствени алтернативни пазари за нас. Нерафинираното масло од овие пазари е со значително повисока цена што се одрази и врз малопродажната цена на маслото. И покрај покачувањето, цената на ‘брилијант’ е најниска од сите производители на масло на македонскиот пазар. Истовремено, компанијата доследно ги почитува препораките и се раководи според насоките на Владата за справување со економската криза“, се наведува во соопштението од „Витаминка“.

Новото сурово масло кое е набавено од Бугарија, Романија и од Украина чини околу 2.200 евра за тон, а пред три до два месеца цената се движела од 1.200 до 1.500 евра за тон. Малопродажната цена на маслото, што е берзански производ, зависи од движењата на цените на светските берзи.

Поради увозот од Србија, кризата со маслото за јадење се смирува и нема потреба граѓаните да прават залихи, додаваат од „Витаминка“.

The post ПОСКАПЕА СУРОВИНИТЕ ОД УКРАИНА И ОД БУГАРИЈА „Витаминка“ објасни зошто скокна „брилијантот“ appeared first on plusinfo.mk.

Како што изјави за МИА директорот на фабриката Коста Ташков, новата цена е резултат на покачувањето на цената на суровината.

Според него, новото сурово масло кое е набавено од Бугарија, Романија и  Украина чини околу 2.200 евра за еден тон, а пред три до два месеца суровото масло на светските берзи се движело од 1.200 до 1.500 евра за тон.

На прашањето дали ќе има ново зголемување на цената на маслото за јадење, Ташков одговори дека тоа ќе зависи од цената на светската берза. Тој смета дека во моментов кризата со зејтинот се смирува поради увозот од Србија и апелира граѓаните да не прават залихи.

Со поскапувањето, „Брилијант“ ја изедначи цената на зејтинот со онаа на останатите македонски производители.

Анализите покажуваат дека македонските граѓани месечно трошат околу 2,5 милиони шишиња зејтин.

The post ПОСКАПЕ ЗЕЈТИНОТ „БРИЛИЈАНТ“ Литарот се продава по 135 денари appeared first on plusinfo.mk.

Компаниите производители на масло за јадење во земјава велат дека мерката нема да ја промени моменталната ситуација на пазарот без стабилизирање на цената на маслото согласно реалните берзански цени и ограничување на продажбата во маркетите. Дел од нив, имаат проблем и со набавка на суровина за производство (сурово сончогледово масло) поради забранетиот извоз од Србија, а дополнителни количини не можат да набават од други земји.

Владата ја укина царината за увоз на масло за јадење како мерка со која очекува да се стабилизира пазарот на овој производ поради зголемената побарувачка од граѓаните кои изминатиот период ги празнат полиците во маркетите од страв дека нема да ја има оваа намирница. Со ваквата мерка од владата очекуваат и цената на маслото за јадење да се намали за најмалку 20 отсто, бидејќи досега за овој производ се пресметуваше царина по стапка од 29 отсто.

Претходно владата ја укина и маржата за овој производ, па очекувано е дека покрај паниката кај граѓаните и трговците да се причина за предизвиканата криза со снабдувањето со масло за јадење бидејќи немаат есап да го продаваат. Тие изминатиов период молчат околу овие владини мерки. Дел од нив, се обидоа да ја ограничат продажбата поради паниката на граѓаните, но беа казнети од инспекторите.

Денеска, пак, министерот за економија Крешник Бектеши соопшти дека е одлучено да се ограничи продажбата на сончогледово масло за јадење во трговските објекти.

Компаниите производители на рафинирано масло за јадење сметаат дека мерката за увоз на масло без царина нема да влијае на моменталната ситуација на пазарот, бидејќи вистински излез од кризата со високата цена на маслото за јадење може да има само со стабилизирање на цената согласно реалните берзански цени.

– Излезот од моменталната криза го гледаме во стабилизирање на цената на маслото согласно реалните берзански цени. На долгорочен период кризата за храна допрва почнува и единствениот излез го гледаме во домашно производство на суровина односно сончогледово семе и намалувањето на зависноста од увоз за овој основен прехранбен продукт. Ние како единствена фабрика во државата за преработка на сончогледово семе последниве години водиме кампања за враќање на сончогледот на македонските полиња со договорно производство и финансирање на семенскиот материјал и гарантиран и навреме исплатен откуп на сончогледот. Нашиот капацитет за преработка на семе е доволен за задоволување на потребите на пазарот од сончогледово масло за јадење за 11 месеци во годината – велат од „Кристал 1923“-Велес.

Сашо Наумоски, генерален извршен директор на „Витаминка“ од Прилеп во чиј состав работи фабриката за масло за јадење „Брилијант“ вели дека прво е потребно да се тргне рампата за увоз од Србија за да се овозможи увоз на сурово масло, да се ограничи продажбата на масло за јадење во продавниците, а потоа да се размислува за зголемување на производството на сончоглед во земјава.

– Ургентно е потребно тргање на рампата и обезбедување непречен проток и увоз од Србија, што верувам дека може да се случи секој момент, исто така решение што веднаш ќе даде резултат е ограничување на продажбата. Затоа што ако нема непотребно купување големи количини од странски државјани како и складирање количини од нашите граѓани, македонските производители можат редовно и доволно да го снабдуваат пазарот. А како решение на подолг период секако е обезбедување поголемо домашно производство на сончоглед. Во секој случај проблемот побрзо би се решил кога Владата би соработувала со нас и да ни помогне на нас производителите за снабдување со сурово масло, да се обезбедат средства затоа што сите се соочуваме со недостиг на обртен капитал затоа што сега цената на суровината е четири пати повисока – вели Наумоски.

Според него, и покрај бесцаринскиот увоз тешко оди набавката на сурово масло за јадење бидејќи и европските земји го немаат, а договореното со партнерите во Србија не може да стигне поради забраната за извоз од страна на Србија.

– Вообичаено работиме на принцип на предвремена набавка на суровини што го обезбедува тековното производство за следните неколку месеци и моментално имаме производство и го снабдуваме пазарот со потребните количини. Во моментов веќе е договорена и поголем дел платена количина од 4 500 тони од српски партнер, за што чекаме да биде дозволен извоз. А за да не дојде до недостиг на масло за јадење во следниот период, се трудиме да најдеме начини за обезбедување суровина од Бугарија, Украина, Романија. Иако овие пазари се поскапи, сепак во моментов се единствената опција. Затоа, за да нема влијание врз крајната цена на маслото за нас приоритетен пазар е српскиот – вели Наумоски.

Од „Кристал 1923“, пак, велат дека моментално немаат недостиг на суровини бидејќи ги увезуваат од Бугарија.

– Во моментов „Кристал 1923“ – Велес како единствен производител на масло од сончогледово семе во земјава и еден од трите производители на рафинирано масло за јадење нема недостиг на суровини. Моментално истите ги увезуваме од Бугарија – велат од компанијата.

И од двете компании велат дека потрошувачката на масло за јадење во земјава е двојно, а во одредени периоди и тројно зголемена, но дека и покрај тоа тие редовно го снабдуваат домашниот пазар со овој производ.

– Редовно и континуирано го снабдуваме пазарот и со зголемување на побарувачката и ние го зголемивме производството. Ако вообичаено трошевме по 1000 тони месечно, сега со зголемената побарувачка, потрошувачката е двојно зголемена. Моменталната потрошувачка на дневно па и неделно ниво е тешко да се предвиди, само во овие 13 дена од април имаме три пати повеќе продадено од истиот период лани. Тешко е да се предвиди затоа што постојано се менува а голем удел во тоа има и фактот што освен нашите граѓани, кои панично купуваат, затоа што маслото кај нас има најниска цена, чест е случајот да доаѓаат од Грција, Бугарија и Албанија и да купуваат големи количини масло за јадење. И затоа можеби Владата треба да размисли да воведе ограничување на продажбата во продавниците – вели Наумоски.

Тој додава дека поради недостиг на масло за јадење и во другите европски земји компанијата има барање за извоз од некои од нив.

– Сите земји во ЕУ имаат недостаток на масло за јадење и таму цените се многу повисоки од кај нас и затоа ние секојдневно имаме барања за извоз од Италија, Австрија, Германија, Грција … – вели Наумоски.

Од Министерство за економија при објавата на одлуката за укинување на царината најавија дека сончогледово масло ќе се увезува од Турција и од Бугарија. Се очекува во текот на неделава Србија да ја повлече забраната за извоз со што ќе се подобри состојбата со снабдувањето.

„Потребата да се укине царинската стапка за увоз на масло од сончоглед за јадење до 31 мај 2022 година е да се задржи тековната состојба на домашниот пазар од можноста на сериозни нарушувања поради недостаток на стоки, неопходно потребни за производството, преработката и за животот и здравјето на граѓаните, до новата реколта, како и дополнителен стимул за одржување на снабдување на домашниот пазар од растот на цените“, ја појасни владината одлука министерот за економија Крешник Бектеши.

Според него, целта мерката е заштита на домашниот пазар и граѓаните во време на криза за да се избегнат шпекулативни дејствија на трговците и производителите и за заштита на домашното производство, домашниот пазар и граѓаните.

Тој денеска соопшти и дека вчера е одлучено да се ограничи продажбата на масло за јадење во трговските објекти.

– За да се одржува тековната состојба на домашниот пазар со масло од сончоглед за јадење во продавниците и да се избегне нарушувања од непотребна појава на недостаток на масло од сончоглед за кај трговците на мало, ограничувањето по купувач ќе важи до 31 мај 2022 година – наведе во соопштението Министерството за економија.

The post СО ЦАРИНА ИЛИ БЕЗ МАСЛОТО ЗА ЈАДЕЊЕ ГО НЕМА ВО МАРКЕТИТЕ Производителите велат побарувачката e двојно зголемена appeared first on plusinfo.mk.

Според истражувањето, „Стоби флипс“ на „Витаминка“ го има највисокото учество кај потрошувачите во споредба со сите останати брендови во оваа категорија и предводи со 80% препознатливост, а во категоријата сончогледово масло доминантното учество наспроти другите брендови е на „Брилијант“ со 53% препознатливост.

Со одговарање на прашањето кој според потрошувачите, е најпознатиот бренд во одредена категоријата, тие можеле да одговорат за сите брендови присутни во малопродажбата и во маркетите.

Истражувањето на македонскиот пазар како независно е спроведено од специјализираната агенција за истражување и консалтинг Инсајдер ИД, на репрезентативен примерок од 1.250 активни потрошувачи на територијата на целата земја и со фокус на 18 категории производи за широка потрошувачка. Освен за препознатливоста на брендовите, Инсајдер ИД веќе пет години по ред спроведува истражување и за преферираните ланци на маркети.

The post ИСТРАЖУВАЊЕ „Стоби флипс“ и „Брилијант“ – најпознати брендови на македонскиот пазар appeared first on plusinfo.mk.

„Станува збор за врвни масла добиени директно од маслинки со механичка обработка. Свежо собраните маслинки се по потекло од маслинови плантажи во близина на Атина. Маслото се одликува со светла и јасна зелена боја, како и со богат вкус со кадифена текстура. Extra virgin (ладно цедено маслиново масло) е достапно во стаклено шише од 750мл, додека Помас маслиново масло и Микс од масла за салата се пакувани во 2л. пакување за домаќинства и 5л. пакување за ХоРеКа. Во краток временски период ќе бидат достапни и во пакување од 1л“, велат од „Витаминка“.

Студиите покажуваат дека масните киселини и антиоксиданти во маслиновото масло можат да понудат многу моќни здравствени придобивки, вклучително и намален ризик од срцеви заболувања. 

Екстра девственото маслиново масло какво што е Brilliant Extra virgin е најмалку обработен или рафиниран тип и  се смета за најздрав вид маслиново масло.

The post Три нови масла од брендот „Брилијант“ на „Витаминка“ за подобар вкус во вашата чинија appeared first on plusinfo.mk.