Борис Кондарко Archives - plusinfo.mk

ФИЛИПЧЕ ГО ИЗБРА МАРИЧИЌ ЗА ПРЕТСЕДАТЕЛ НА ДИК Ја одложувал одлуката до последен момент

плусинфо — Sat, 17 Jan 2026 18:59:06 +0000

Бојан Маричиќ, поранешен вицепремиер за евроинтеграции, ќе го преземе местото претседател на Државната изборна комисија (ДИК). Одлуката, според висок партиски функционер, ја донел претседателот на СДСМ, Венко Филипче, и попладнево ја испратил до Собранието пишува телевизија 24.

Според истиот извор, Филипче ја одложувал одлуката до последен момент, за на крај да го избере Маричиќ за прв човек на ДИК. Во меѓувреме, екс заменичката за правда Викторија Аврамовска Мадиќ, Марија Митановска, сопруга на Примослав Димовски, и пратеничката од СДСМ Даниела Марковска, ќе му го продолжат мандатот на Борис Кондарко, но овојпат како член на комисијата.

Одлуката доаѓа откако во понеделникот, Комисијата за избори и именувања ја потврди листата на пријавени кандидати за позициите во ДИК.

The post ФИЛИПЧЕ ГО ИЗБРА МАРИЧИЌ ЗА ПРЕТСЕДАТЕЛ НА ДИК Ја одложувал одлуката до последен момент appeared first on plusinfo.mk.

МИРЕН ВТОР КРУГ НА ЛОКАЛНИТЕ ИЗБОРИ Излезноста до 18:30 часот е 45,7%, најмногу гласале во Росоман, најмалку во Сарај и Чаир

плусинфо — Sun, 02 Nov 2025 18:41:01 +0000

Според официјалните податоци на Државната изборна комисија (ДИК), до затворањето на гласачките места во вториот круг од локалните избори 2025 година, своето право на глас го искористиле 325.691 гласач, што претставува 45,71 проценти излезност на државно ниво.

Претседателот на ДИК, Борис Кондрако, истакна дека гласањето во најголем дел поминало мирно и без поголеми инциденти, а резултатите од вториот круг ќе бидат објавени по завршувањето на пребројувањето на гласовите.

Излезност по општини до 18:30 часот: Росоман 77.51%, Лозово 75.6%, Дојран 72.78%, Демир Капија 72.64%, Конче 70.93%, Пробиштип 70.59%, Ранковце 69.34%, Крушево 68.6%, Валандово 63.6%, Чешиново-Облешево 62.5%, Дебарца 60.56%, Чучер-Сандево 59.19%, Долнени 55.61%, Неготино 55.07%, Македонска Каменица 55.03%, Зрновци 54.07%, Македонски Брод 54.05%, Брвеница 53.21%, Могила 52.82%, Кичево 51.34%, Карпош 48.09%, Виница 47.19%, Центар 46.14%, Студеничани 46%, Тетово 44.35%, Аеродром 42.72%, Дебар 41.21%, Кисела Вода 40.95%, Кочани 40.44%, Струга 40.14%, Боговиње 39.29%, Ѓорче Петров 35.5%, Куманово 33.43%, Гази Баба 30.98%, Шуто Оризари 30.75%, Бутел 26.98%, Чаир 13.71%, Сарај 11.45%.

– Во Град Скопје, каде се гласа во десет општини, од вкупно 474.304 запишани гласачи, на гласање излегле 160.131 гласач, што претставува 33,82% излезност – рече претседателот на ДИК.

– Излезноста се движи во очекувани рамки и изборниот ден помина во фер и демократска атмосфера. Конечните податоци за излезноста до 19 часот ќе бидат објавени по 23 часот, кога се очекува да бидат познати и првичните резултати по општини – изјави Кондрако.

The post МИРЕН ВТОР КРУГ НА ЛОКАЛНИТЕ ИЗБОРИ Излезноста до 18:30 часот е 45,7%, најмногу гласале во Росоман, најмалку во Сарај и Чаир appeared first on plusinfo.mk.

ЕЛВИС БАЈРАМ И ДРУГИ ЧЛЕНОВИ НА СЕМЕЈСТВОТО БАЈРАМ АГИТИРАЛЕ ПРЕД ИЗБИРАЧКО МЕСТО Биле набљудувачи, ДИК им ги одзеде акредитациите

плусинфо — Sun, 02 Nov 2025 15:03:36 +0000

Државната изборна комисија денеска на 151. седница донесе одлука за одземање на акредитациите на осуммина домашни набљудувачи затоа што постапиле спротивно на Изборниот законик и на Кодексот за набљудување.

Станува збор за домашни наљудувачи во општина Шуто Оризари, за кои во текот на денот ДИК добила пријава за злоупотреба на беџовите за домашни набљудувачи, односно агитирање во училиште пред гласачките места.

– Регистрирани биле следниве лица: Елвис Бајрам, кандидат за градоначалник од Сојузот на Ромите во првиот круг, Сеат Исмаил, кандидат за советник во Шуто Оризари, Валентина Бајрам, сестра на Елвис, Шабан Бајрам, Габриел Бајрам, Решад Сокол, кандидат за советник на Општина Шуто Оризари, Ќамуран Реунаред, Алмир Сали, кандидат за советник во Општина Шуто Оризари. На овие лица ДИК им издала акредатации за набљудување, согласно доставените податоци до нас и констатиравме дека овие лица го пречекориле Кодексот за набљудување за лица кои треба непристрасно да се однесуваат на гласачките места и вршеле агитирање на гласачките места – изјави претседателот на ДИК, Борис Кондарко.

Тој посочи дека ДИК го известило МВР за овој настан, бидејќи тие агитирале надвор од гласачкото место, каде ДИК не е надлежна. По одземањето на акредитациите, додаде Кондарко, ќе ја известат Општинската изборна комисија во Шуто Оризари и избирачките одбори да не им дозволуваат влез на овие лица во избирачките места и во објектите на гласање, односно дека не смеат да се повикуваат на акредитациите и на беџовите кои претходно им се дадени од ДИК.

Државната изборна комисија расправаше и по два приговори за остварување на правото на глас, при што во двата случаи утврди дека лицата се запишани во Избирачкиот список и до 19 часот можат да го остварат своето право.

Едниот приговор беше поднесен од лицето Трајче Камчев од општина Центар и како што беше посочено, по проверката на стручната служба е утврдено е дека лицето е запишано во Избирачкиот список на избирачкото место 1354 во Општината, поради што приговорот е одбиен.

Членовите на ДИК расправаа и по приговор стигнат по електронска пошта од лицето Ќемал Исмаилоски од Кичево, кој приговара дека не бил пронајден во уредот за биометриска идентификација. Приговорот, освен до ДИК е испратен и до Народниот правобранител и до државното Обвинителство. Кондарко посочи дека по проверката на стручната служба и на ИТ секторот е утврдено дека лицето е запишано во Избирачкиот список и во уредот за биометриска идентификација.

Членот на ДИК, Александар Даштевски побара воопшто да не се произнесат по овој приговор, бидејќи тој е доставен од електронска адреса, која не е од овластено лице и можеби не е лично од приговарачот. Даштевски додаде дека исто така е доставен и до Омбудсманот и до Обвинителство и поради тоа, според него, воопшто не треба да се одлучува во ДИК, а Обвинителство треба да утврди дали приговорот е од тоа лице или се злоупотребени лични податоци.

Кондарко истакна дека Обвинителството го има овој мејл и може да ги испита останатите околности, кои не се однесуваат на ова избирачко право, а оти во ДИК е надлежна за правото на глас.

Тој исто така посочи дека досега во ниту едно избирачко место не е забележано оневозможување на остварувањето на правото на гласање.

The post ЕЛВИС БАЈРАМ И ДРУГИ ЧЛЕНОВИ НА СЕМЕЈСТВОТО БАЈРАМ АГИТИРАЛЕ ПРЕД ИЗБИРАЧКО МЕСТО Биле набљудувачи, ДИК им ги одзеде акредитациите appeared first on plusinfo.mk.

ДОСЕГА НЕМА ПРИЈАВИ ЗА НЕРЕГУЛАРНОСТИ ПРИ ГЛАСАЊЕ Прифатени се 4 приговори за гласачко право, одбиени се 3

МИА — Sat, 01 Nov 2025 15:22:29 +0000

Државната изборна комисија (ДИК) информира дека денешното гласање на болни и изнемоштени лица и затвореници се одвива непречено, без пријавени потешкотии, проблеми или поплаки.

– Се спроведува гласањето, навреме е започанто, немаме никаков проблем ниту со изборен материјал и изборни органи, немаме никакви забелешка, приговор, поплака или други информации. Надлежни овластени лица претпладнево беа на терен на одредени општински изборни комисии – информираше Борис Кондарко, претседател на ДИК на продолжението на 151. седница.

Дополни дека гласовите од денешното гласање нема да се бројат одделно, туку ќе бидат запечатени и приклучени кон утрешното гласање, по што ќе се објават како дел од вкупните резултати. Воедно, најави дополнително соопштение за денешниот одѕив по завршување на гласањето.

Во рамки на продолжението на 151. седница, ДИК разгледа и неколку приговори за остварување на избирачко право. Четири приговори беа усвоени, со што на пријавителите кои не биле евидентирани во соодветните избирачки списоци им се признава правото на глас, бидејќи ги исполнуваат законските услови. Од друга страна, 3 приговори беа одбиени како неосновани поради тоа што лицата или веќе се запишани во избирачкиот список, или немаат живеалиште на територијата на државата.

Во однос на набљудувањето на изборниот процес, ДИК потврди дека се акредитирани вкупно 1.622 набљудувачи, од кои 957 домашни, 651 меѓународни и 14 странски новинари.

Своето избирачко право денеска го остваруваат 4.826 болни или немоќни лица, 1.256 лица во 14 казнено-поправни установи и 214 лица сместени во 13 центри за вонсемејна грижа.

Во вториот круг од локалните избори 2025 утре се гласа за градоначалници во 32 општини и во Градот Скопје, како и на три избирачки места во Шуто Оризари за советници.

Право на глас имаат 1.013.375 граѓани.

The post ДОСЕГА НЕМА ПРИЈАВИ ЗА НЕРЕГУЛАРНОСТИ ПРИ ГЛАСАЊЕ Прифатени се 4 приговори за гласачко право, одбиени се 3 appeared first on plusinfo.mk.

СЕКОЈ ЗБОР МОЖЕ ДА БИДЕ КАЗНЕТ, ПОЧНУВА ИЗБОРНИОТ МОЛК Кондарко со апел до партиите и медиумите, но и до граѓаните да излезат на гласање

плусинфо — Fri, 31 Oct 2025 14:15:05 +0000

Претседателот на Државната изборна комисија (ДИК), Борис Кондарко, денеска упати апел до сите учесници во изборниот процес и до медиумите да го почитуваат изборниот молк кој започнува вечерва на полноќ, во пресрет на вториот круг од локалните избори. Тој ги охрабри граѓаните да го искористат своето демократско право и да излезат на гласање.

– Ги повикуваме сите учесници во изборниот процес да го почитуваат изборниот молк, кој започнува по полноќ, како и сите изборни правила во текот на утрешниот ден кога гласаат болните и изнемоштените лица во своите домови, затворениците и старите лица во домовите за стари лица. Апелираме сите граѓани слободно и одговорно да го остварат своето право на глас. Гласањето е лично и тајно, согласно процедурите на ДИК – изјави Кондарко.

Тој додаде дека сите изборни комисии – избирачките и општинските – треба строго да ги почитуваат законските процедури и насоките во однос на постапката за гласање и утврдувањето на резултатите.

– Важно е навремено и правилно да се постапува со доверливиот и недоверливиот изборен материјал – нагласи претседателот на ДИК.

ДИК информираше дека во текот на утрешниот ден ќе објави три соопштенија за текот и излезноста на гласањето на болните, изнемоштените и лицата во установи, чии резултати нема да бидат објавени пред недела, туку заедно со останатите гласачки места.

Во недела, на 2 ноември, Комисијата ќе објавува информации на секои два часа за отворањето на гласачките места и излезноста на гласачите. Прес-конференција со податоци за излезноста ќе се одржи по 19 часот, а првичните неофицијални резултати ќе почнат да пристигнуваат веднаш по потпишувањето на записниците. Очекувањата се дека завршната прес-конференција ќе се одржи околу 23 часот, кога ќе бидат објавени сите поединечни резултати.

Првичните официјални резултати од гласањето ќе бидат објавени в понеделник попладне, кога ќе започне и рокот за евентуални приговори.

На денешната седница, ДИК одобри акредитации за уште 29 набљудувачи од здружението „Wake up“. За вториот круг се акредитирани вкупно 1.598 набљудувачи – 933 домашни, 651 меѓународни и 14 странски новинари.

The post СЕКОЈ ЗБОР МОЖЕ ДА БИДЕ КАЗНЕТ, ПОЧНУВА ИЗБОРНИОТ МОЛК Кондарко со апел до партиите и медиумите, но и до граѓаните да излезат на гласање appeared first on plusinfo.mk.

ДИК ГО ЧЕКА СУДОТ Утре конечни резултати, но Обвинителството може да се вклучи за Шуто Оризари

плусинфо — Mon, 27 Oct 2025 16:57:38 +0000

Државната изборна комисија (ДИК) утре ќе ги објави конечните резултати од првиот круг на локалните избори, одржани на 19 октомври. Како што најави претседателот Борис Кондарко на денешната 150. седница на Комисијата, резултатите ќе бидат објавени за сите општини поединечно, откако ќе заврши постапката по тужбите поднесени пред Управниот суд.

„Планиравме резултатите да бидат објавени денеска, но постапките пред Управниот суд сè уште траат и дел од рочиштата се закажани за доцна вечерва. Затоа ќе ја продолжиме седницата утре, кога ќе ги објавиме конечните резултати за сите општини“, изјави Кондарко.

Тој додаде дека во текот на утрешниот ден Комисијата ќе го објави и прегледот на општините каде што нема поднесени тужби и каде гласањето е завршено, како и општините во кои ќе се одржи втор круг на избори.

Разрешени избирачки одбори во Шуто Оризари

На денешната седница, членовите на ДИК донесоа одлука за разрешување на членовите на избирачките одбори во две избирачки места во Општина Шуто Оризари, каде што Управниот суд го поништи гласањето.

„Сметаме дека се направени пропусти при спроведувањето на изборната постапка. Затоа мораме да интервенираме и да назначиме нови избирачки одбори кои ќе го спроведат гласањето во вториот круг. За избирачкото место 2962 се однесува постапката за избор на градоначалник, а за избирачкото место 2966 – за избор на советници“, изјави претседателот на Комисијата.

Според него, ДИК нема да ангажира избирачки одбори од Општинската изборна комисија Шуто Оризари, туку искусни членови од други општини кои успешно го спровеле првиот круг од изборите.

„Ова е порака дека нема да се толерира никакво незаконито работење. Членовите на избирачките одбори кои направиле пропусти не само што ќе бидат разрешени, туку ќе бидат преземени и сите неопходни мерки за заштита на изборниот процес“, додаде Кондарко, упатувајќи дека Обвинителството може да ја разгледа документацијата и евентуално да отвори постапка.

Над 1.500 акредитирани набљудувачи

Вкупниот број на акредитирани набљудувачи за локалните избори изнесува 1.565. Од нив, 94 се домашни, а 651 меѓународни набљудувачи. Меѓу нив има и 14 странски новинари.

Комисијата денеска одобри дополнителни шест набљудувачи за Европскиот парламент и 97 за Здружението за развој на општествено-социјални иновации „Вејк ап“ – Скопје.

Дополнително, ДИК донесе одлука за определување авансни средства во висина од 8.000 денари по рута за вработените кои се задолжени за транспорт на доверливиот изборен материјал и уредите за биометриска идентификација.

Комисијата, исто така, разгледа девет приговори за лично избирачко право. По извршената проверка, три приговори беа одбиени како неосновани, а шест беа прифатени.

The post ДИК ГО ЧЕКА СУДОТ Утре конечни резултати, но Обвинителството може да се вклучи за Шуто Оризари appeared first on plusinfo.mk.

ГЛАСАЊЕТО Е ПРОДОЛЖЕНО ДО 20.40 ЧАСОТ ВО ЕДНО МЕСТО ВО КАРПОШ Се заглавил уредот за читање податоци

плусинфо — Sun, 19 Oct 2025 18:03:28 +0000

Гласањето е продолжено до 20.40 минути во избирачкото место 2603 во општина Карпош, поради тоа што откажал уредот за читање на личните карти. Таму гласачите се идентификуваат со УВ ламба и спреј.

– Имало проблем со заглавена смарт картичка, уредот не можел да се замени – рече претседателот на ДИК, Борис Кондарко, вечерва на прес конференција.

Продолжување на гласањето во други избирачки места низ државата нема.

The post ГЛАСАЊЕТО Е ПРОДОЛЖЕНО ДО 20.40 ЧАСОТ ВО ЕДНО МЕСТО ВО КАРПОШ Се заглавил уредот за читање податоци appeared first on plusinfo.mk.

ИСПРАВЕНА Е ПЕЧАТНАТА ГРЕШКА ВО ГЛАСАЧКИТЕ ЛИВЧИЊА ВО НОВО СЕЛО Гласањето на болните се одвива непречено, вели претседателот на ДИК

плусинфо — Sat, 18 Oct 2025 12:55:49 +0000

Исправена е печатната грешка во гласачките ливчиња во Општина Ново Село и материјалот е веќе доставен. Гласањето таму за болните ќе се одвива непречено и сите ќе го остварат своето право на глас до крајот на денот, рече денеска претседателот на Државната изборна комисија (ДИК) Борис Кондарко.

Како што истакна Кондарко, одговорајќи на новинарски прашања по јавната седница на ДИК, денешното гласање генерално се одвива без никакви проблеми, материјалот е навреме дистрибуиран од општински изборни комисии до соодветните избирачки одбори и граѓаните непречено го остваруваат своето избирачко право.

– Досега немаме никакви приговори и забелешки од ниту една општинска изборна комисија и од ниту едно избирачко место – потенцира Кондарко.

Според него, засега податоци за излезноста нема зашто гласањето трае до крајот на денот, а кога ќе заврши, ДИК ќе објави колку од пријавените лица за гласање во домашни услови и во старски домови го оствариле своето гласачко право.

– Пред завршување на гласањето, околу 16 часот, ќе објавиме пресек, а по завршување на гласањето ќе објавиме и целосен процент на излезност – објасни претседателот на ДИК.

Тој потсети дека не денеска, туку утре ќе бидат објавени резултатите од гласањето на овие категории лица.

– Така е по Изборниот закон и тоа е праксата на сите избори. Ливчињата од денешното гласање поединечно се ставаат во посебен запечатен плик и во гласачката кутија. Гласачките кутии и пликовите денеска не се отвораат и нема да се објават како резултати, туку се бројат утре, по завршување на гласањето заедно со сите други ливчиња во соодветните избирачки одбори и се евидентираат во соодветните ОИК. Резултатот од денешното гласање се брои заедно со гласачките ливчиња, се евидентира и ќе се објави утре по 20 часот – подвлече Кондарко.

The post ИСПРАВЕНА Е ПЕЧАТНАТА ГРЕШКА ВО ГЛАСАЧКИТЕ ЛИВЧИЊА ВО НОВО СЕЛО Гласањето на болните се одвива непречено, вели претседателот на ДИК appeared first on plusinfo.mk.

РОДИТЕЛИТЕ НА ЗАГИНАТИТЕ ВО „ПУЛС“ ГО МЕНУВААТ ПРИСТАПОТ Нема секојдневни блокади, но маршевите продолжуваат секоја сабота

плусинфо — Thu, 16 Oct 2025 11:24:56 +0000

Родителите на трагично загинатите во дискотеката „Плус“ информираа дека секојдневните блокади привремено ќе бидат прекинати, но Маршевите за правда ќе продолжат секоја сабота, како симбол на нивната упорност и борба за вистината.

Причината за ваквиот чекор е што денеска беше закажана главната расправа за трагедијата во кочанската дискотека „ПУЛС“, во која загинаа 63 лица, а над 200 беа повредени, ќе започне на 19 ноември во 9:30 часот, во судницата при КПУ „Идризово“, соопшти денеска Основниот кривичен суд – Скопје.

„Ние, родителите и семејствата на починатите деца, соопштуваме дека со големо внимание ќе го следиме судскиот процес, со единствена цел – да се открие вистината и да се обезбеди правдата за младите животи што беа изгубени во трагедијата што засекогаш го промени нашето општество“, стои во соопштението на семејствата.

Тие порачаа дека очекуваат институциите да ја покажат својата човечност и совест.

„Очекуваме фер, транспарентен и непристрасен процес, во кој секој што има одговорност ќе ја понесе. Нашата болка е вечна, но нашата борба е и за сите идни генерации – никогаш повеќе да не се повтори ваква трагедија“, додаваат родителите.

Семејствата апелираат до јавноста и медиумите да го следат процесот со внимание, бидејќи, како што велат, ова не е само судење за еден пожар, туку и „судење за човечноста, совеста и одговорноста“.

The post РОДИТЕЛИТЕ НА ЗАГИНАТИТЕ ВО „ПУЛС“ ГО МЕНУВААТ ПРИСТАПОТ Нема секојдневни блокади, но маршевите продолжуваат секоја сабота appeared first on plusinfo.mk.

ПОЛА МЕТАР ГЛАСАЧКО ЛИВЧЕ! Стартуваше дистрибуцијата на изборниот материјал

плусинфо — Thu, 16 Oct 2025 09:29:45 +0000

Државната изборна комисија (ДИК) денес ги започна доставите на изборниот материјал за локалните избори на 19 октомври, а меѓу испратените 4.613.438 гласачки ливчиња има едно кое шокира со должина од 500 милиметри, или половина метар.

Според изјава на претседателот на ДИК, Борис Кондарко, изборниот материјал, кој вклучува листи, гласачки ливчиња, записници и други доверливи документи, се дистрибуира низ целата земја преку 17 тимови на ДИК и со поддршка од МВР.

– Согласно законските рокови и планот на ДИК, денеска од печатницата „Киро Дандаро“ во Битола, ДИК врши дистрибуција и примопредавање на целокупниот доверлив изборен материјал до сите 80 Општински изборни комисии (ОИК) и комисијата на Град Скопје. Испечатени се вкупно 4.613.438 гласачки ливчиња — потсети Кондарко.

Според Вангел Талевски, генерален директор на печатница „Киро Дандаро“ — Битола, причината за огромната должина се должи на тоа што гласачките ливчиња комбинираат повеќе изборни категории (градоначалник, советници, град Скопје и Совет на Скопје) и се подготвени со двојна заштита (видлива и невидлива).

– Доверливиот материјал го испечативме во рекордно време, два дена пред зададениот рок. Најдолгото ливче е 500 милиметри бидејќи листите беа прилично долги, но материјалите ги подготвивме соодветно на барањата на ДИК и се заврши добро – изјави Талевски.

Во подготовките, станало јасно дека во едниот избирачки список се запишани 1.832.415 избирачи, а ќе се отворат 3.474 избирачки места низ земјата. ДИК информира дека шест избирачки места нема да функционираат, бидејќи нема население таму.

Дистрибуцијата денеска обединува не само ливчињата, туку и 254.262 страници избирачки списоци, 8.692 оригинални записници, како и 8.330 примероци на Браeјево писмо за лицата со оштетен вид.

Оваа необична големина на гласачко ливче веќе провоцира прашања за практичноста на гласањето: дали луѓето ќе можат лесно да го држат, фолдираат или менуваат за да го употребат.

The post ПОЛА МЕТАР ГЛАСАЧКО ЛИВЧЕ! Стартуваше дистрибуцијата на изборниот материјал appeared first on plusinfo.mk.