Лидерот на СДСМ Венко Филипче објави „Фронт за вистина и правда“. Нулта толеранција за корупција и европска правда, иднина за младите, достоинствен живот за сите, подобар животен стандард и силно село и земјодолци се столбовите на Фронтот, кој Филипче го претстави на прес-конференција.

Клучниот столб на кој се темели програмата е нулта толеранција за корупција и дигитална транспарентност и опфаќа полна имплементација и проширување на соработката со Европското јавно обвинителство.

Во рамките на овој столб, предвидено е основање на национална антикорупциска дирекција според моделот на романскиот ДНА, потоа целосна дигитализација на јавните набавки, тендери и услуги, според естонскиот модел, задолжителна електронска декларација на имот, како и заштита и награда за свиркачи и регистар на црни листи.

– Граѓанин или вработен кој ќе пријави корупција добива 5 до 15% од вратените пари, плус целосна заштита на идентитетот и неговото работно место. Има анонимен онлајн канал, а моделот е по примерот на Естонија и САД. Со јавниот регистар на црни листи, секој осуден за корупција трајно се забранува да врши јавна функција или да учествува на државни тендерски постапки, ќе следуваат строги казни и конфискација на имот. Регистрот ќе биде јавно достапен онлајн. Моделот e од естонската и од романската праксa – објасни Филипче.

Во рамки на законските решенија, Филипче најави и целосен дигитален систем за контрола на имотот на функционерите со користење на вештачка интелигенција.

– Задолжителна електронска декларација на имот, која што ќе се обработува со систем на вештачка интелигенција. Од премиер до најнизок функционер на локално ниво, семејството, го пријавуваат целиот имот, сметки, акции и подароци над 100 евра”, потенцираше Филипче.

Тој објасни дека системот автоматски ќе ги споредува пријавените податоци со реалните примања на функционерите.

– Вештачка интелигенција, системот кој ќе се користи, ги споредува со примањата. Лажна или нецелосна декларација ќе биде предмет на кривична одговорност. Моделот е естонски, плус модел кој што се имплементирал во Сингапур. Ова не е само закон, ова е гаранција дека корупцијата ќе има име и презиме и датум на суд. Секој кој го прекршил законот ќе одговара – рече Филипче.

The post ВЕНКО ФИЛИПЧЕ ОБЈАВИ „ФРОНТ ЗА ВИСТИНА И ПРАВДА“ Вештачка интелигенција ќе му ги открива корумпираните функционери appeared first on plusinfo.mk.

Во вечерашното гостување во емисијата „Само вистина” на Канал 5 телевизија гостуваше пратеникот од редовите на ВМРО-ДПМНЕ Бојан Стојаноски кој дебатираше за многу актуелни теми меѓу кои и за состојбата во правосудството и случајот со апелацискиот судија каде полицијата пронајде 350 илјади евра во ѕид од неговата куќа, притоа истакнувајќи дека со реформи состојбата може да се промени и да се стави крај на корупцијата и поигрувањето со човечки судбини во областа на судството.

– Би сакал да ја поздравам оваа акција од институциите и да биде сфатена од оние коишто се судии во моментот да разберат дека криминалот не е исплатлив и дека некој конечно сака да расчистува со тој криминал, така да единствено нешто што сега се бара од нив е да судат по словото на законот и да постапуваат професионално. За да се промени состојбата во судството треба системски реформи кои ќе започнат од почеток по сите инстанци, тоа се прави со носење на законски решенија кои треба да пристигнат во парламентот. Ете до крајот на месецот од Владата ќе стигнат најверојатно три или четири закони од оние седум од Министерството за правда, кои треба да гарантираат сериозни реформи согласно европската агенда и на тој начин заедно со дебата со сите општествени чинители да направиме законски решенија кои што ќе гарантираат дека вакви луѓе повеќе ќе не можат да влезат во тие институции, а не пак да пресудуваат кон некого, затоа што ова не се само 350 илјади евра не е само ова корупција во системот ова се човечки судбини коишто досега биле уништувани но некој тоа го толерирал – рече Стојаноски.

Пратеникот истакна дека сите без разлика на тоа дали се обвинители или судии треба да ја сфатат пораката дека не се по моќни од другите луѓе, потенцирајќи дека е потребно да се фокусираат на професионалното работење, а не на криминалот.

– Затоа ова нека биде порака до сите оние коишто сметаат дека ако се судии и обвинители и не знам што во правосудниот систем се по моќни од поединецот, не туку сите треба да бидат еднакви пред правдата. Од овој момент натака мислам дека сите треба да ја сфатат, ако не ја сфатиле пораката дека времето на како до сега е завршено и дека треба да работат само професионално, а криминалот не се исплати затоа што сцените кои што ги гледавме со овој судија и со тој претходно мислам дека ќе се повторуваат ако не успееме да го исушиме тоа мочуриште – вели Стојаноски.

The post СУДИИТЕ МОРА ДА СФАТАТ ДЕКА КРИМИНАЛОТ Е НЕИСПЛАТЛИВ Мора да судат според словото на законот appeared first on plusinfo.mk.

Резултатите од анкетата беа соопштени на денешната обука „Бизнис интегритет“, која се одржа во Прилеп со компаниите од градот и регионот, организирана од Стопанската комора.

Потпретседателот на Стопанската комора Зоран Јовановски рече дека борбата против корупцијата и бизнис-интегритетот се теми за кои недоволно се зборува, а се од суштинско значење за секој кој има намера сериозно да се занимава со бизнис.

– Резултатите од анкетата се такви какви што се. Имаме многу голем простор да ги подобриме работите. Јас би издвоил два моменти. Првото е што 83 проценти од анкетираните компании сметаат дека корупцијата е еден од трите најважни проблеми во државава кој треба да ги решиме. Второ, дури 96 проценти од компаниите кои одговорија сметаат дека може да се има успех во борбата против корупцијата, што е охрабрувачки елемент. Притоа, тие делумно се вртат и кон себеси и велат дека имаат потреба да внесат, да вградат или да ги засилат своите механизми за спречување на корупцијата – рече Јовановски.

Јованка Кенкова Пјевац, предавач на обуката од Македонски телеком вели дека компанијата е пионер во имплементирањето на системи за интегритет. Потребно е да се усогласиме со намерите на ЕУ за борба против корупцијата, а има можност за индивидуални и заеднички мерки на компаниите.

– Мерките за самите компании се имплементирање на еден сеопфатен систем за интегритет, кој е комплексен. Покрај индивидуалните мерки на секоја компанија, постои простор за колективно дејствување. Тоа е една од формите на здружување на компаниите со кое може да го засилат своето влијание во борбата против корупцијата, особено во услови кога локалните законодавства слабо функционираат во тој дел – рече Кенкова Пјевац.

Претседателот на Регионалната стопанска комора од Прилеп, Никола Мариноски, смета дека се потребни казни и независен, стабилен судски систем.

– Ако се воспостави добар судски, мериторен систем, каде ќе може да се казнуваат таквите коруптивни дела, сметам дека ќе може да исчекориме напред. Ако државата воведе систем, најпрво на казни, односно судскиот систем да почне да казнува, тогаш ќе се намали оваа ендемска корупција во нашава држава – рече Марионски.

Обуката за „Бизнис интегритет“ на која учествуваа претставници на преку 30 компании е прва од ваков вид во земјава и е една од активностите на Стопанската комора за градење здрав економски амбиент. Тоа вклучува борба против корупцијата, борба против сивата економија, борба за владеење на правото. Проектот е финансиран од УСАИД.

The post ПРЕТХОДНАТА ВЛАСТ ИМ БАРАЛА ОД 1.000 ДО 10.000 ЕВРА МИТО ЗА УСЛУГИ НА ФИРМИТЕ Секоја втора фирма била соочена со корупција appeared first on plusinfo.mk.

Корупцијата е светски проблем

Корупцијата е масовна појава, не само кај нас. Слична е ситуацијата во целиот регион и е карактеристична за сите неразвиени и сиромашни земји, иако ја измислиле – богатите. Таму кај што ја има, прво покажува дека не функционираат институциите на системот и, второ, потврдува дека платите не ги покриваат основните потреби. Затоа е масовната раширеност. Со оглед дека промената на животниот стандард е невозможна на кус рок, излезот мора да се бара на институционална основа. Уништувањето на ова зло воопшто не е лесно, ама неговото радикално намалување е апсолутно можно, и тоа релативно брзо, само ако се има политичка спремност и решителност тоа да се постигне.

Ние веќе имаме одредени искуства, ама треба да се бараат и туѓите. Сигурно ги има. На сите наши амбасади треба да им се наложи да ги контактираат надлежните и да замолат за информации како тие се соочуваат со овој современ феномен. Врз добиените, и други релевантни информации, и сопствени искуства, треба да се изгради нашиот систем за борба.

Еве некои размисли на таа тема. Комисијата која веќе постои, треба веднаш, официјално, да ги регистрира сите локации, во коишто има, или може да има корупција. За никого не е спорно дека таа е масовна во полицијата, во здравството, во образованието… и каде не? Секаде. Веднаш треба да се започне и со подготвување на долгорочна стратегија, бидејќи борбата ќе трае и не смее да се прекинува. Треба да се донесе и соодветен документ со којшто сите центри каде што ја има, се задолжуваат да формираат свои тела (комисии?) за борба со корупцијата. Тогаш, во сите ентитети посочени како коруптивни дувла, ќе мора да се изработат акциски планови. Првиот може да биде генерален додека другите мора да бидат извршни, а тоа значи детални и секторски: месечни или тримесечни. Сето тоа мора да биде според локалните услови и потреби, во секое министерство, агенција или управа, во секое училиште и факултет, во секоја здравствена установа, во секоја општина… Сите инкриминирани институции ќе мора да подготвуваат и месечни, или тримесечни извештаи, за тоа што постигнале, со какви проблеми се соочувале… Извештаите, прво ќе се разгледуваат во самите институции а, потоа ќе се поднесуваат и на национално ниво.

Тендерите, централен проблем 

Ова значи суштинска промена на нашиот досегашен начин на соочување со корупцијата. Досега, таа се истражуваше отпосле, кога е веќе направена, а сега би се одело, пред сè – на нејзино спречување. Со оглед на ваквите задолженија, сегашната Комисија ќе треба целосно и темелно да се реорганизира и прошири. Веројатно, треба да прерасне и во некаква агенција.

Најголемата корупција во државава е секако сврзана со тендерите. Тие се даваат на „свои“ компании, главно со цел да се добие процент, било лично, било за партијата. Вториот главен центар се државните компании, вклучувајќи ги и комуналните. Најстрашниот нејзин облик е секако во градежништвото. Што мислите, зошто квалитетот на нашите улици и патишта, вклучувајќи ги и најсовремените автопати, е катастрофален? Зошто квалитетот на асфалтот е од најниска категорија? Затоа што во тендерот е вклучена корупција и нарачателите не можат да инсистираат на квалитет, бидејќи – земале пари! А, замислете: ако само на дел од улицата или патот, место пет ставите четири и пол сантиметри асфалт, колкав е ќарот? Или, ако квалитетот на асфалтот е 10 проценти полош од договорениот? Да не забораваме дека и агенциите за контрола на проектите во изградба, коишто се често дури и странски фирми, се длабоко навлезени во криминалот и добиваат свој процент. Големи пари се во прашање. Ако носителите на проектот се обидат да се однесуваат одговорно, и да вршат максимална контрола, извршителите ќе ги потсетат дека дале поткуп, и тука завршува приказната. Тоа е маѓепсан круг, во којшто ние живееме со години. Одете во Хрватска и веднаш ќе забележите дека тамошните патишта се барем двојно поквалитетни од нашите.

Комисија за контрола на „тендерџиите“

Горното правило важи за сите тендери. За било што. Вие ќе замете нелегална провизија и ќе ви пратат неквалитетна стока, а вие не приговарате. Така се полнат приватни џебови. Ова е светски проблем. Многу врвни државници завршиле во затвор заради корупција, најчесто во тендери за набавка на воена опрема. Таму е таа и најчеста, и највисока.

За надминување на корупцијата со тендерите, решение може да се бара во формирање на некакво тело на републичко ниво (комисија, агенција…?), со независни и непартиски врвни експерти, од разни области. Тоа би било надлежно за договарање на сите тендери на државните институции, коишто се со поголема вредност од, на пример – 50.000 евра. Висината треба да се прецизира. Веднаш би требало да се формира и тело коешто би вршело и перманентна контрола, над тендерџиите. Неспорно е дека може да се направи систем, којшто би ги минимизирал злоупотребите.

Кога сме веќе кај улиците и патиштата, да спомнеме и еден класичен пример, зад којшто најверојатно се крие тешка корупција, а последиците ги трпиме сите. Верувам дека мнозина се имаат уверено дека, во светот, кога ќе се одбележат улиците, пешачките премини и се’ друго, како и патиштата, со бела боја, тоа трае најмалку цела година, а веројатно и подолго. Кај нас, белата боја е видлива едвај два, три месеци, ако не и покусо. Тоа покажува дека изведувачите не користат права и соодветна бела боја туку разводнета со некаков фирнајс, чија цена е два, три пати, пониска. Ако немаше корупција, логично е дека нарачателите ќе бараа гаранција – колку ќе трае бојата и, ако не е така, ќе инсистираа операцијата бесплатно да се повтори. Вака, улиците, а со нив и градовите, ни се грди и не ни личат на ништо. Патиштата, пак, се небезбедни и опасни.

Паралелно, треба да се разработи и начин за пријавување на корупцијата, со гаранција за безбедноста на свиркачите. Ова може да изгледа бирократизирано, ама така ќе биде додека не се разработи целиот механизам. Клучно е дека и самото конституирање на еден ваков систем, дури и пред да започне да функционира – ќе ја намали корупцијата, којашто е веќе ендемска. Кога сите ќе бидат свесни дека се контролира, секој ќе се замисли пред да побара или даде рушвет.

Општа војна против корупцијата

Ова се само гласни размислувања и предлози како да се започне општа војна против корупцијата. Кога ќе се тргне во акција, многу полесно ќе се развива системот и ќе се предлагаат соодветни решенија. Во процесот, треба да се вклучат и невладините организации, можат да помогнат и пензионери со соодветно искуство…

Клучно е да се реши да се тргне во војна против корупцијата. Кога таа ќе започне, резултатите нема да изостанат. Главни носители треба да бидат припадници од опозицијата, која и да е таа, бидејќи, по правило, креатор на корупцијата е власта.

Гледаме дека дури и на САД им пукна филмот со нашата корупција. Од Амбасадата објавија дека во Скопје допатувал „тим за санкции“, којшто ќе се бори против корупцијата!? Подобар знак дека сме некадарни, не може да има. Потегот недвосмислено покажува дека не третираат како протекторат, ама… подобро вака, отколку никако.

Да потсетиме и на генијалниот премиер, Ли Кван-ју, којшто од неразвиена земја, од третиот свет, Сингапур го пренесе во првиот, групата на најразвиени. Во неговите мемоари, коишто станаа светски бестселер, тој многу јасно објасни: корупција ќе има се’ додека финансирањето на партиите е нетранспарентно и тајно. Сите коишто, под маса, пикаат пари во партиските каси, си ги добиваат назад и тоа со добра заработка. Тендерите се измислени за тоа. Ли е апсолутно во право: само со јавно финансирање на партиите, ќе се скинат корените на најголемата корупција.

The post Корупцијата, наша рак-рана appeared first on plusinfo.mk.

Ковачевски посочи дека тие прашања се адресирани во Програмата на Владата и во работата на институциите што се дел од Владата и во законските решенија што се поднесени, изгласани, а дел блокирани во Собранието, како и дека борбата против корупцијата е високо на неговата агенда.

Одговарајќи на новинарско прашање за негативните коментари на претставниците на меѓународната заедница за корупција во земјата, премиерот рече дека и тој исто така многу јасно рекол дека после решавањето на најкрупните прашања во политичкиот дел – зачленувањето во НАТО, склучувањето на договорите со соседните држави, отпочнувањето на преговорите, најкрупен проблем којшто останува да биде решен во наредниот период е борбата со корупцијата и унапредувањето на владеењето на правото.

Според него, надлежност на Владата е да обезбеди независно функционирање на сите истражни, обвинителски и судски органи во државата.

– Тоа се постигнува преку прво, обезбедување на независен буџет којшто секоја година се проектира и во услови на криза буџетот којшто се однесува на независните обвинителски и судски истанци во државата е предвиден согласно со нивните потреби. Второ, преку изработка на закони со коишто се уредува таа област, а коишто закони целосно се усогласуваат со законите на ЕУ. Тие закони се подготвени, усогласени со ЕУ, дел од нив се веќе донесени во Собранието, дел од нив се блокирани во Собранието заради блокадата која што ја прави опозицијата, меѓутоа се надевам дека и во тој дел ќе бидат изгласани и тие закони. Трето, многу важно – тоа е неселективната борба против корупцијата, рече Ковачевски.

Во изминатите 10 месеци, посочи тој, мене не можевте да ме видите некого да бранам доколку се испоставеше дека има одредени сомнежи за некој функционер кој е во надлежност на Владата, туку напротив секогаш ги повикував сите институции што се задолжени да испитаат одреден случај така и да постапуваат.

– Имаше дури и случаи кога одредени раководители коишто се во надлежност на Владата или поднесуваа оставки или беа сменети од позицијата се со цел да нема никаков субјективизам во работата на кој било орган во однос на одредени конкретни случаи – рече Ковачевски.

Корупцијата, како што кажа, е борба на целото општество, на сите нивоа на власта, бидејќи власта во државата е поделена – имаме извршна, законодавна, локална, судска власт и секој мора да го даде својот придонес кон врвно владеење на правото и врвна борба против корупцијата.

– Доколку ги погледнеме извештаите на меѓународните институции Северна Македонија има напредок. Тоа се гледа преку сите извештаи коишто се достапни, коишто ги прават меѓународни институции. Тој напредок е евидентен, од владеењето на демократијата во државата, транспарентноста на институциите – додаде Ковачевски, потсетувајќи дека Владата е оценета со стопроценти транспарентност во однос на она што треба да информира.

Побара сите институции да го следат тој пример и сите да бидат фокусирани, „бидејќи еден од најголемите проблеми на секое општество, а пред се на економии во развој како што е нашата и општества коишто претендираат да станат дел од ЕУ е владеењето на правото”.

– Доколку сметаат одредени истанци во државата, тука пред се мислам на независноста и судска и обвинителска власт итн. дека треба да се унапреди одредено законско решение тогаш Владата нормално е на располагање да ги изготви тие законски решенија. Секако дека Собранието е местото каде што тоа ќе се дискутира, соодветните комисии на Собранието. Доколку е потребен одреден стручен мониторинг за унапредување на работата исто така Владата стои на располагање, да побара ако треба и странска помош, експертска помош која што би била донесена и физички тука да присуствува во државата сето тоа е на располагање и јас сум стопроцентно на располагање за таква работа, рече Ковачевски.

The post КАЈ МЕНЕ НЕМА СЕЛЕКТИВНОСТ! Ковачевски вели дека борбата против корупцијата е високо на неговата агенда appeared first on plusinfo.mk.