Кога ја презедовме одговорноста да ја водиме државата, најдовме институции заглавени во мрежа од злоупотреби, клиентелизам и системска корупција, рече денеска премиерот Христијан Мицкоски во обраќањето пред Националниот комитет за спречување насилен екстремизам и борба против тероризам.

– Корупцијата не беше појава, беше правило. Правдата беше селективна. Владата беше сервис на моќни интереси, а не на граѓаните. Тоа беше сликата која ја наследивме. И затоа, една од првите и најрешителни борби што ја започнавме беше токму борбата против високата корупција. Во таа борба, денес имаме и прва поголема потврда од меѓународната заедница. По години на институционален мрак, извештајот на ГРЕКО, кој вчера беше објавен, е сигнал дека Македонија се движи напред, кон систем што функционира – рече Мицкоски.

Групата на држави против корупција на Советот на Европа (ГРЕКО) потврди дека Македонија ја напушта ерата на селективна правда и политичка недопирливост, додаде премиерот.

– Со затворањето на постапките за усогласување, ГРЕКО испрати јасна порака: дека постојат видливи резултати, конкретни подобрувања и силна политичка волја за прекин со старите практики. Ова не е само административно признание – ова е институционална пресвртница. Првпат по долго време, државата не е предмет на критика, туку на признание за сериозен напредок во борбата против корупцијата. Тоа ни дава поттик, но уште повеќе носи одговорност. Борбата против корупцијата не е декларација, туку системска промена што сега добива и меѓународна потврда – рече премиерот на седницата.

Работата на Националниот комитет за спречување насилен екстремизам и борба против тероризам има особено значење за стабилноста, безбедноста и отпорноста на државата, додаде тој.

– Правиме напор да создадеме систем што ќе ги препознава ризиците на време, ќе реагира ефикасно и ќе обезбеди долгорочна заштита на граѓаните. Насилниот екстремизам и тероризмот не се само закани по безбедноста – тие се индикатори на подлабоки слабости во системот. И затоа борбата со нив не може да биде изолирана, туку мора да се води паралелно со јакнење на институциите, на правната држава и на јавната доверба – рече Мицкоски.

Знаеме, додаде тој, дека екстремизмот, радикализацијата и насилството често цутат таму каде што државата е слаба, а институциите се корумпирани.

– Затоа, нашата стратегија е јасна: градење сигурна држава, со функционални институции, професионална полиција и со отпорно општество. Овој Комитет не е симболичен, туку оперативен инструмент. И очекувам од сите учесници, безбедносни, општествени, образовни и локални да дејствуваат координирано, без одлагање и без калкулации. Продолжуваме со иста сериозност, без еуфорија, но со целосна трезвеност. Затоа што борбата за стабилна, сигурна и правична Македонија не се добива со зборови, туку со дела – рече премиерот Мицкоски во своето обраќање пред Националниот комитет за спречување насилен екстремизам и борба против тероризам.

МАКЕДОНИЈА ДОБИ ЗАСЛУЖЕНА ПЕТКА ОД ГРЕКО Имплементирани се препораките за спречување корупција во власта и во полицијата

The post ВЛАДАТА БЕШЕ СЕРВИС НА МОЌНИТЕ, КОРУПЦИЈАТА ПРАВИЛО, СЕГА Е ПОИНАКУ Мицкоски задоволен што и ГРЕКО нотира дека се напушта ерата на селективна правда appeared first on plusinfo.mk.