Австралија во ноември ќе почне голема програма за откуп на огнено оружје по нападот на плажата Бонди во Сиднеј, во кој во декември минатата година беа убиени 15 лица, соопшти сојузната влада.

Програмата најпрво ќе започне во сојузната држава Нов Јужен Велс на 2 ноември, соопштија австралискиот премиер Ентони Албанезе и премиерот на Нов Јужен Велс, Крис Минс. Сопствениците коишто ќе предадат пушки или пиштоли ќе можат да добијат надомест до 1.000 австралиски долари (околу 700 американски долари) за секое парче оружје.

Мерката е дел од националниот одговор по масовното пукање на 14 декември 2025 година за време на одбележувањето на еврејскиот празник Ханука на плажата Бонди. По нападот, левоцентристичката Влада на Албанезе во јануари годинава усвои законски измени со коишто се предвидуваат откуп на оружје, построги проверки при издавањето дозволи и дополнителни мерки против злосторства мотивирани од омраза.

Според властите, во нападот биле употребени моќни огнени оружја коишто биле легално набавени.

– Австралијците со право се гордеат со нашите закони за оружје, но факт е дека денес во Австралија има повеќе оружје отколку во времето на програмата за откуп по трагедијата во Порт Артур – изјави Албанезе.

Според податоците на Владата, минатата година во Австралија имало рекордни 4,1 милиони парчиња огнено оружје, од кои повеќе од 1,1 милион биле регистрирани во Нов Јужен Велс, најнаселената австралиска сојузна држава.

Новата програма ќе биде најголемата ваква иницијатива по кампањата спроведена по масакрот во Порт Артур, Тасманија, во 1996 година, кога вооружен напаѓач уби 35 лица. Трагедијата доведе до значително заострување на австралиското законодавство за поседување огнено оружје.

Властите на Нов Јужен Велс веќе воведоа сопствени ограничувања по нападот на плажата Бонди, меѓу кои и ограничување на четири парчиња огнено оружје по лице.

Според полицијата, нападот на плажата Бонди го извршиле татко и син, за коишто се верува дека биле инспирирани од џихадистичката група „Исламска држава“. Преживеаниот осомничен, 24-годишниот Навид Акрам, сè уште се нема изјаснето пред судот за обвиненијата против него, меѓу кои има и 15 обвиненија за убиство.

The post АВСТРАЛИЈА ЌЕ ПОЧНЕ СО ОТКУП НА ОРУЖЈЕ ОД ГРАЃАНИТЕ Се засилува превенцијата по нападот на плажата Бонди appeared first on plusinfo.mk.