Македонски државјанин е фатен при обид за криумчарење десет преносни компјутери од марката DELL во вредност од речиси 13 илјади евра при влез во државата на граничниот премин Богородица, соопшти Царинската управа.

Случајот e откриен од царинските службеници кои, поради основано сомнение, извршиле претрес на возило во сопственост на рент-а-кар компанија, управувано од осомничениот. При контролата, на различни места во возилото биле пронајдени нови лаптопи од марката DELL.

Во предистражната постапка спроведена од страна на Одделението за истраги е утврдено дека осомничениот, откако во Солун од карго-компанија подигнал десет преносни DELL компјутери, со намера да ги криумчари, на паркинг простор во Грција ги скрил на различни места во возилото со кое патувал.

Против лицето е поднесена кривична пријава до ОЈО Гевгелија поради основано сомнение за сторено кривично дело криумчарење, казниво по Кривичниот законик.

Царинската управа, како што наведува, продолжува со активностите насочени кон заштита на финансиските интереси на државата и обезбедување услови за фер економија.

The post ТОВАРИЛ 10 СКАПИ ЛАПТОПИ ВО СОЛУН И ТРГНАЛ На Богородица падна плен тежок 13.000 евра appeared first on plusinfo.mk.

На најпрометниот граничен премин на пат кон Грција, „Богородица“ – „Евзони“, утрово туристите чекаат околу еден час, при што не сите поминуваа низ системот EES, јави Фокус.

Патниците кои ја преминале границата во раните утрински часови денеска известуваат дека доцнењето на граничниот премин кон Грција било помеѓу 40 и 65 минути.

Фотографирањето се прави главно само за оние кои сè уште не се во системот EES, другите поминуваат побрзо, обично со отпечаток од десната рака, велат туристите кои ја преминале грчката граница.

Целосната имплементација на системот EES на шенгенските граници официјално започна на 10 април, но грчките власт најавија негова привремена суспензија кога бројот на возила на граничниот премин е преголем.

The post ЧЕКАЊЕТО НА „БОГОРОДИЦА“ ОД 40 МИНУТИ ДО ЧАС Дигиталните проверки се забрзуваат appeared first on plusinfo.mk.

Уште еден продолжен викенд, уште една нервоза на границата кон Грција. Илјадници македонски граѓани и вчера со часови чекаа на граничниот премин „Богородица“, каде што повторно се создадоа километарски колони поради новиот европски систем за контрола на патници.

Гужвите започнале уште во раните утрински часови, а во текот на денот колоните постојано се зголемувале. Дел од патниците сведочеле дека за излез од Македонија и влез во Грција чекале и по неколку часа, додека возилата се движеле многу бавно.

Причината за метежот е новиот европски Систем за влез/излез (EES), кој постепено се применува на границите на Европската Унија. Наместо класично удирање печати во пасошите, сега патниците од земји што не се членки на ЕУ, меѓу кои е и Македонија, поминуваат низ дополнителна електронска регистрација.

При првиот влез во Грција, системот бара фотографирање, земање отпечатоци од прсти и дигитална проверка на податоците, што значително го забавува целиот процес на граница.

Грчкиот министер за заштита на граѓаните, Михалис Хрисоходис, изјави дека примената на системот ќе продолжи и покрај реакциите и поплаките од повеќе земји. Според него, проблемот дополнително го создава и застарената инфраструктура на граничните премини во Грција, која не може брзо да одговори на новите процедури.

Новите правила имаат цел да овозможат подобра контрола на престојот во Европската Унија, да спречат злоупотреби и да ја зајакнат безбедноста на границите, но во пракса засега носат долги чекања и нервоза кај патниците, особено за време на празници и викенди кога фреквенцијата е значително поголема.

Според информациите од терен, се очекува метежот да продолжи и во текот на целиот викенд, особено во утринските часови кога најголем број граѓани заминуваат кон грчките летувалишта.

The post КИЛОМЕТАРСКИ КОЛОНИ ВЧЕРА НА „БОГОРОДИЦА“ Новиот систем за влез во Грција ги заглави Македонците со часови appeared first on plusinfo.mk.

За утре, петок, се очекува зголемен метеж на граничните премини кон Грција, особено на премините Богородица и Дојран, каде што во одредени периоди може да има чекање од неколку часа поради зголемен сообраќај на туристи и почеток на викенд и сезонски патувања.

Според најавите, засилен проток на возила се очекува уште во раните утрински часови, при што најголеми задржувања може да има во периодите на најголем туристички наплив, кога голем број патници од Македонија и регионот се упатуваат кон грчките летувалишта.

Граничните служби најавуваат редовно функционирање на премините, но апелираат на трпение и почитување на сообраќајната регулатива, со оглед на тоа што ваквиот сезонски метеж е вообичаен во периоди на засилен туристички сообраќај.

Патниците се советуваат да тргнуваат порано и да се информираат за состојбата на граничните премини, со цел да се избегнат подолги задржувања и колони возила на влез и излез од државата.

The post ОДИТЕ ЗА ГРЦИЈА, БИДЕТЕ ПОДГОТВЕНИ НА ДОЛГО ЧЕКАЊЕ НА ГРАНИЦА! Се очекува метеж за продолжениот викенд appeared first on plusinfo.mk.

Златна плочка со проценета вредност од околу 4,5 милиони денари е запленета од страна на царинските службеници на граничниот премин Богородица, откако при детална контрола била пронајдена скриена во обувка на патник.

Според информациите од Царинската управа, автобус кој сообраќал на релација Гостивар–Истанбул бил издвоен за контрола, по што бил извршен претрес на еден македонски државјанин поради основани сомневања.

При проверката, во чевелот на патникот била пронајдена златна плочка тешка 848 грама, внимателно обвиткана во хартија. Според царинските службеници, обидот за криумчарење бил извршен на начин што плочката прво била чувана во облека, а потоа скриена во обувката пред самата контрола.

Против осомничениот е поднесена кривична пријава за криумчарење, а случајот е предаден на Јавното обвинителство во Гевгелија.

The post ЗЛАТНА ПЛОЧКА СКРИЕНА ВО ЧЕВЕЛ Македонец фатен со речиси килограм злато на Богородица appeared first on plusinfo.mk.

Криумчар на мигранти е уапсен во близина на границата со Грција, откако полицијата открила пет лица од Виетнам скриени во возило.

Акцијата се случила ноќеска околу 02:30 часот во атарот на селото Богородица, каде полицијата запрела патничко возило „тојота корола“ со италијански регистарски ознаки. Зад воланот бил 48-годишен скопјанец, кој, според сомневањата, превезувал мигранти.

При контролата биле пронајдени пет лица од Виетнам, кои нелегално се движеле низ државата.

По наредба на јавен обвинител, осомничениот е задржан во полициска станица, а против него ќе следува кривична пријава.

Мигрантите се пренесени во Прифатно-транзитен центар „Винојуг“, каде ќе им биде обезбеден понатамошен третман.

The post СКОПЈАНЕЦ ПРЕВЕЗУВАЛ ПЕТ ЛИЦА ОД ВИЕТНАМ Приведен криумчар, мигранти сместени во центар appeared first on plusinfo.mk.

Вкупно девет службени пиштоли, украдени на 5 јануари од просториите на ЈП „Паркови и зеленило“ во Скопје, беа пронајдени во автомобил „шкода октавија“, сопственост на правно лице од Прилеп, при царинска контрола на граничниот премин „Богородица“.

– Основното јавно обвинителство Гевгелија донесе наредба за спроведување истражна постапка против жител на Прилеп, кој на 14 јануари го изнајмил возилото од компанијата и со него се обидел преку граница да ги пренесе полуавтоматските пиштоли, скриени во фабричкиот простор помеѓу лимот и тапацирот на автомобилот – се наведува во соопштението од Обвинителството.

Од сериските броеви е утврдено дека станува збор за оружјето што претходно било украдено од службените простории на ЈП „Паркови и зеленило“ – Скопје и регистрирано како службено оружје на обезбедувањето во скопското претпријатие.

Јавниот обвинител до судијата на претходна постапка доставил предлог за определување мерка притвор за осомничениот за кривично дело еовластено изработување, држење, посредување и тргување со оружје или експлозивни материи од член 396 став 4 во врска со став 1 од Кривичниот законик.

The post ДЕВЕТТЕ ПИШТОЛИ ФАТЕНИ НА БОГОРОДИЦА, БИЛЕ УКРАДЕНИ ОД ЈП „ПАРКОВИ И ЗЕЛЕНИЛО“ Прилепчанец се обидел да ги прошверцува во Грција appeared first on plusinfo.mk.

На шест часа, почнувајќи од 17 часот по македонско време (18 часот по локално време), грчките земјоделци и денеска ќе го блокираат граничниот премини Евзони кон нашата земја за влез и излез од Грција, јави дописничката на МИА од Атина.

Блокадата се очекува да трае до полноќ по грчко, односно 23 часот по македонско време, и како и досега, ќе се однесува на сите видови возила: товарни, автомобили и автобуси.

Грчките земјоделци и вчера попладне во истиот период го блокираа граничниот премин, а во однос на плановите за следните денови, според информациите на МИА, исто како и досега, одлуките ќе ги носат во последен момент, особено сега кога изразија подготвеност во вторник да се сретнат со грчкиот премиер.

На ГП Ники (ГП Меџитлија), како што соопшти АМСМ, има забрана за движење товарни возила, која ќе трае до утре до 10 часот.

Вчера претпладне, земјоделците во цела Грција ја почнаа најавената 48-часовна блокада во целата земја, меѓутоа по новата покана за дијалог и средба упатена од владата, решија да повлечат дел од блокадите што се на споредните патишта, но сепак тракторите остануваат паркирани на автопатиштата.

Портпаролот на грчката влада, Павлос Маринакис, вчера упати покана до земјоделците во вторник да се сретнат со грчкиот премиер Кирјакос Мицотакис, но со два предуслова: прво, делегацијата на земјоделците да ги претставува сите блокови и, второ, дијалогот да се одржи со отворени патишта.

Владината покана ја прифатија земјоделците, а утре напладне ќе одржат состанок со учество на претставници од сите блокови за да ја одредат делегацијата што во Атина ќе се сретне со Мицотакис, како и темите и барањата што ќе ги иницираат на состанокот.

Грчката влада во средата детаљно ги објасни мерките за земјоделците, а ставот е дека нема простор за дополнителни мерки за поддршка.

Протестите на земјоделците во Грција почнаа на 30 ноември и траат над 40 дена со секојдневни блокади на низа локации во целата земја.

The post БЛОКАДАТА СО ТРАКТОРИ НА БОГОРОДИЦА ПОЧНУВА ВО 5 ПОПЛАДНЕ Грчките земјоделци ќе протестираат до полноќ appeared first on plusinfo.mk.

Сообраќајот на државните патишта се одвива во зимски услови, по претежно суви коловози. Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата, информира Авто-мото сојузот на Македонија.

АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.

На Граничниот премин Меџитлија/Ники има забрана за движење на товарни возила до утре до 10:00 часот. Сообраќајот за патнички моторни возила ќе се одвива со нормален тек.

Од синоќа, сообраќајот на Граничниот премин Богородица/Евзони е пуштен за сите видови возила.

АМСМ потсетува дека во сила е законската обврска за задолжително поседување на зимска опрема во возилата, без оглед на моменталната временска состојба.

The post ПРЕМИНОТ БОГОРОДИЦА Е ПУШТЕН ЗА СИТЕ ВОЗИЛА На Меџитлија има забрана за товарни возила appeared first on plusinfo.mk.

Сообраќајот на граничните премини Евзони и Ники кон нашата земја за влез и излез од Грција, во следните денови, до петок ќе се одвива непречено, со оглед на тоа што грчките земјоделци одлучиле привремено, поради Божиќ, да ги стават во мирување блокадите, според грчката новинска агенција АНА-МПА, но тракторите ќе останат паркирани на границите, јави дописничката на МИА од Атина.

На граничниот премин Евзони (Богородица) земјоделскиот блок со над 300 трактори беше поставен на 1 декември, а сообраќајот секојдневно се блокираше на неколку часа, првично претпладне и попладне, а во изминатиот период само во попладневните часови.

Според АНА-МПА во текот на денот тракторите и земјоделските возила поставени на средината на коловозот ќе бидат тргнати и земјоделците ќе ги паркираат на левата и десната страна, со што целосно ќе се ослободат сообраќајните ленти и ќе се овозможи непречено минување на товарни возила, туристички автобуси и на патнички автомобили.

Сепак земјоделците ќе останат и планираат таму да ги поминат празниците, но без да се попречува нормалното одвивање на сообраќајот.

Слична е ситуацијата и на Ники (Меџитлија) каде што земјоделците одлучиле до петок да не го блокираат сообраќајот.

Од друга страна, остануваат, барем во текот на денешниот ден, блокадите на граничните премини Промахонас и Ексохи кон Бугарија, но само за товарни возила.

Во однос на блокадите низ цела Грција, целта на земјоделците во пресрет на Божиќ е да ги отворат автопатите за граѓаните непречено да стигнат до нивните дестинации, но без при тоа да ги повлечат целосно тракторите.

Нивниот план е тракторите да останат паркирани на крајот на автопатите, за што полицијата смета дека не е безбедно на таков начин да се одвива сообраќајот.

The post ДО ПЕТОК ПРООДНО, НЕМА БЛОКАДИ НА БОГОРОДИЦА Грчките трактори ќе пaркираат по страна до новиот протест appeared first on plusinfo.mk.