бојан маричиќ Archives - plusinfo.mk

Каква порака праќа Филипче со инсистирањето Маричиќ да биде претседател на ДИК?

Никола Тасев — Wed, 28 Jan 2026 13:37:57 +0000

Со двотретинско мнозинство, Собранието го избра новиот состав на Државната изборна комисија. На предлог на СДСМ (оти опозицијата треба да го води ова тело) за претседател е избран Бојан Маричиќ.

Тој е дипломиран правник на Правниот факултет во Скопје, а последната државна функција му беше во владата на СДСМ како потпретседател за евроинтеграции.

Од тоа време Маричиќ остана запаметен по две работи. Скоро секој ден бараше Македонија да го смени Уставот, како и тоа што силно ја уверуваше јавноста дека нашата земја почнала преговори за пристап кон ЕУ.

Тој на пример пред 3 години вака зборуваше околу македонските евроинтеграции и неговите заложби за тоа:

„Знаеме што правиме и со која цел – за сигурен и добар живот на сите наши граѓани. Сега гледаме дека и ЕУ испорачува“, тврдеше Маричиќ и повторуваше скоро секој втор ден дека Македонија мора да го смени Уставот оти така барале странците.

Тој и останатите во неговата влада прво ветија на ЕУ дека ќе го сменат Уставот, а потоа кога дојде прашањето дали имаат двотретинско мнозинство Маричиќ даде легендарен одговор: „Прашање од милион долари е тоа“.

Дали Маричиќ сега е променет или ќе продолжи во исто темпо и начин да работи останува нејасно. Како што е нејасно и дали СДСМ немаше поквалитетен кандидат за важното место прв човек на ДИК или пак Венко Филипче праќа јасен сигнал до домашната и до странската јавност дека не ја напушта старата политика.

The post Каква порака праќа Филипче со инсистирањето Маричиќ да биде претседател на ДИК? appeared first on plusinfo.mk.

БОЈАН МАРИЧИЌ Е НОВ ПРЕТСЕДАТЕЛ НА ДИК Собранието ги изгласа измените во Кривичниот законик

МИА — Wed, 28 Jan 2026 11:28:55 +0000

Собранието на денешната 83. седница, со 83 гласови „за“ го избра Бојан Маричиќ за претседател на Државната изборна комисија (ДИК). За потпретседател е избран Абдуш Демири, а за членови на Комисијата Александар Даштевски, Ангелчо Ристов, Светлана Карапетрова, Борис Кондарко и Дитмире Шеху.

Во продолжение на седницата за членови на Комисијата и заштита од дискриминација пратениците ги избраа Лимко Бејзароски и Наташа Амдију. Претседателот на Собранието Африм Гаши соопшти дека кандидатката Џинан Ахмед се откажала од кандидатурата.

Собранието го донесе Законот за изменување и дополнување на Кривичниот законик. Со донесувањето на овој закон, според подносителите од владеачката ВМРО-ДПМНЕ, се отстрануваат идни евентуални штетни последици од законските измени на овој законик донесени во септември 2023 година и се подобруваат одредени одредби со што врши усогласување со европските и меѓународните стандарди кои се однесуваат на борбата против организираниот криминал и корупција. Пратениците на Левица беа против законското решение со образложение дека се носи во интерес на функционерите од владеачкото мнозинство.

Пратениците не го прифатија предлог законот за изменување на Законот за енергетика поднесен од Левица со кој се бара укинување на Регулаторната комисија за енергетика (РКЕ), а нејзините надлежности да поминат во Министерството за енергетика.

The post БОЈАН МАРИЧИЌ Е НОВ ПРЕТСЕДАТЕЛ НА ДИК Собранието ги изгласа измените во Кривичниот законик appeared first on plusinfo.mk.

ФИЛИПЧЕ ГО ИЗБРА МАРИЧИЌ ЗА ПРЕТСЕДАТЕЛ НА ДИК Ја одложувал одлуката до последен момент

плусинфо — Sat, 17 Jan 2026 18:59:06 +0000

Бојан Маричиќ, поранешен вицепремиер за евроинтеграции, ќе го преземе местото претседател на Државната изборна комисија (ДИК). Одлуката, според висок партиски функционер, ја донел претседателот на СДСМ, Венко Филипче, и попладнево ја испратил до Собранието пишува телевизија 24.

Според истиот извор, Филипче ја одложувал одлуката до последен момент, за на крај да го избере Маричиќ за прв човек на ДИК. Во меѓувреме, екс заменичката за правда Викторија Аврамовска Мадиќ, Марија Митановска, сопруга на Примослав Димовски, и пратеничката од СДСМ Даниела Марковска, ќе му го продолжат мандатот на Борис Кондарко, но овојпат како член на комисијата.

Одлуката доаѓа откако во понеделникот, Комисијата за избори и именувања ја потврди листата на пријавени кандидати за позициите во ДИК.

The post ФИЛИПЧЕ ГО ИЗБРА МАРИЧИЌ ЗА ПРЕТСЕДАТЕЛ НА ДИК Ја одложувал одлуката до последен момент appeared first on plusinfo.mk.

НИЕ НЕ СМЕ НАИВНИ КАКО ОСМАНИ, МАРИЧИЌ И КАКО КОВАЧЕВСКИ На Мицкоски не му се брза со предлогот за уставни измени со одложено дејство

плусинфо — Wed, 30 Oct 2024 12:22:36 +0000

„Ние не сме наивни како Бујар Османи, Бојан Маричиќ и како Димитар Ковачевски“.

Ова беше одговорот на премиерот Христијан Мицкоски на новинарско прашање за тоа дали размислува да доостави предлог за уставни измени со одложено дејство во Собранието без да биде уште формирана влада во Бугарија или сепак ќе се чекаат сигнали.

– Наивно би било тоа. Таков потег унилатерален би значел целосно загрозување на и онака загрозените евроиинтеграции поради авантурите на претходната влада, евроинтеграции на Македонија како држава. Се разбира дека треба да се добие било каков сигнал за да одиме чекор напред. Нема да влеземе во било каква авантура, инаку можевме тоа многу порано да го направиме ако бевме почетници во оваа работа. Не сме ниту Бујар Османи, ниту Бојан Маричиќ, ниту како Димитар Ковачевски да бидеме лековерни и наивни и да веруваме на интересите на трети страни. Наш интерес е македонските граѓани, државата, евроинтегративните процеси и тука стоиме во првата линија и ќе ги браниме – изјави Мицкоски.

Тој рече дека никогаш нема да го засрамат граѓанинот и имаат заедничка цел, а тоа е Македонија еден ден да биде дел од европското семејство.

The post НИЕ НЕ СМЕ НАИВНИ КАКО ОСМАНИ, МАРИЧИЌ И КАКО КОВАЧЕВСКИ На Мицкоски не му се брза со предлогот за уставни измени со одложено дејство appeared first on plusinfo.mk.

МАРИЧИЌ САКАЛ ДА ЛЕТА ОД СКОПЈЕ ДО НИШ Еве како владиниот авион ја спасувал коалицијата меѓу СДСМ и ДУИ

плусинфо — Mon, 23 Sep 2024 12:20:07 +0000

Ивица Томовски, директор на служба за општи и заеднички работи во „Дејли Клик“ на ТВ21 откри две злоупотреби на владиниот авион од минатата влада.

Првиот е кога тогашниот министер Бојан Маричиќ барал со него да лета од Скопје до Ниш, а вториот кога Талат Џафери го барал авионот додека е на сервис, и било побарано веднаш да биде вратен во Скопје, за да не се распаднела коалицијата СДСМ – ДУИ, открива Томовски.

– Има еден обид за злопотреба и една класична злоупотреба на авионот. Како на пример Бојан Маричиќ кога го барал авионот да лета од Скопје до Ниш, а побрзо и поекономично е да стигне до Ниш со возило. И за среќа е одбиен од службата. И вториот случај е кога од страна на Талат Џафери бил побаран владиниот авион во миговите кога бил тој на вонреден сервис во Нирнберг. И додека е авионот на сервис, пилотите одат во САД каде вежбаат на симулатор за летање, по што пилотот добил телефонски повик брзо да се врати во Скопје со авионот. Тој им одговорил дека е расклопен и дека е на сервис и дека не може да се врати, му рекле како знае да го склопи и веднаш да дојде во Скопје, во спротивно ќе се распаднела тогашната коалиција СДСМ – ДУИ. Значи има загрозување на безбедноста на пилотите, патниците кои понатаму ќе летаат со тој авион само да не се распадне коалиција – рече Томовски.

The post МАРИЧИЌ САКАЛ ДА ЛЕТА ОД СКОПЈЕ ДО НИШ Еве како владиниот авион ја спасувал коалицијата меѓу СДСМ и ДУИ appeared first on plusinfo.mk.

ОПОЗИЦИЈАТА ЌЕ СЕ „ТЕПА“ ЗА ДИК И ЗА 2 КОМИСИИ ВО СОБРАНИЕ Чии 18 пратеници вредат повеќе – на СДСМ или на ДУИ?

Мартин Богатиноски — Thu, 23 May 2024 10:32:30 +0000

Државната изборна комисија, Комисијата за заштита на слободите и правата на граѓанинот, како и Комисијата за финансирање и буџет се трите собраниски тела чии претседатели ги назначува опозициската партија која на парламентарните избори освоила најмногу пратенички места.

Но, со оглед на тоа што вчерашното прегласување во неколку општини ѝ откина еден пратеник на ДУИ и сега партијата на Али Ахмети има ист број пратеници (18) со партијата на Димитар Ковачевски, очигледно влегуваме во ситуација која би можела да значи почеток на нова „тепачка“ помеѓу ДУИ и СДСМ за тоа чиј кадар ќе претседателствува со комисиите.

Секако, голема улога играат и прогнозите на ВМРО-ДПМНЕ дека најмалку двајца пратеници од коалицијата Европски фронт би преминале од опозиција на власт, но како што објаснуваат оттаму, тоа не значи дека ДУИ ќе падне на 15 пратеници, туку дека договорените пратеници ќе си останат во својата пратеничка група и ќе делуваат во корист на власта само по потреба.

– Преговорите се во тек и со сигурност ќе има пратеници од опозицијата кои во иднина ќе соработуваат со власта. Засега се двајца од Европски фронт и двајца од коалицијата на СДСМ. Но, тоа не значи дека тие целосно ќе го променат дресот, туку ќе си останат во својата пратеничка група, ама ќе ја даваат поддршката за власта кога ќе има таква потреба. Тоа значи дека Европски фронт ќе влезе во Собрание со 18 пратеници, исто како и СДСМ – брифираат извори од ВМРО-ДПМНЕ.

Според упатените, проблемот лежи во тоа што и во самиот собраниски Деловник нема прецизно толкување, односно не е предвидено како треба да се делува во ситуации кога повеќе опозициски партии имаат изедначен број мандати, туку е наведено само „претседател на комисија се избира од редот на пратениците од опозицијата“.

Многу полесно ќе беше, додаваат тие, доколку имаше одредба: „претседател на комисија се избира од редот на опозицијата со најмногу пратеници или со најмногу освоени гласови на изборите“.

Како што дознаваме од партиски извори, битката за освојување на претседателското столче во Државната изборна комисија веќе е започната, а најзаинтересирани за оваа позиција се Бојан Маричиќ од СДСМ и Кренар Лога од Европски фронт.

The post ОПОЗИЦИЈАТА ЌЕ СЕ „ТЕПА“ ЗА ДИК И ЗА 2 КОМИСИИ ВО СОБРАНИЕ Чии 18 пратеници вредат повеќе – на СДСМ или на ДУИ? appeared first on plusinfo.mk.

МАРИЧИЌ НЕ УСПЕА ДА ОСВОИ МАНДАТ Ова се 18-те пратеници на СДСМ

плусинфо — Thu, 09 May 2024 10:49:29 +0000

Вицепремиерот за европски прашања Бојан Маричиќ не успеа повторно да добие столче во македонскиот Парламент, откако неговата СДСМ во Изборната единица 1, во која тој беше четврти на листа, со добиени 25.730 гласа, зеде само три мандати – коносителите на листата лидерот на партијата Димитар Ковачевски и лидерката на ЛДП Моника Зајкова, како и Даниела Николова, која и досега беше пратеничка на СДСМ.

Маричиќ предмалку преку Фејсбук им го честиташе на победниците за успехот, а на граѓаните и на институциите за демократските и мирните избори.

Тој додаде дека СДСМ како опозиција ќе биде постојано тука за потребите на развојот, да иницираат но и го поддржат тоа што им треба на граѓаните.

„Јас лично, со цел свој капацитет, со цела своја енергија, посветеност и знаење, ќе се вложам во заздравувањето и реформите на СДСМ како партија која искрено ја сакам и со гордост и припаѓам, бидејќи во овој момент каузите за кои целиот свој живот сум се борел се загрозени и со ослабена подлога и база“, наведува Маричиќ.

Инаку, СДСМ, како втора најголема македонска партија, освои речиси тројно помалку пратенички места од ВМРО-ДПМНЕ.

Во ИЕ 2 мандат освоија само Оливер Спасовски и Фатмир Битиќи, додека партијата најлошо помина во шестката, каде пратеничко место доби само досегашната министерка за одбрана Славјанка Петровска.

Во ИЕ 3 носителката Сања Лукаревска освои 4 мандати, заедно со Љупчо Николовски, Горан Мисовски, Благој Бочварски. Најдобро помина поранешниот министер за здравство Венко Филипче кој во ИЕ 4 освои 5 мандати. Од тука како пратеници на опозициона СДСМ влегуваат и Јованка Тренчевска, Миле Талевски, Соња Мираковска и Борче Цветков.

Слабо помина и претседателот на Собранието Јован Митрески, кој со својата коносителка на листата во ИЕ 5, министерката за култура Бисера Костадиновска Стојчевска освоија 3 мандати. Нив ќе им се придружи помалку познато име за македонската јавност – Митко Трајчулески.

The post МАРИЧИЌ НЕ УСПЕА ДА ОСВОИ МАНДАТ Ова се 18-те пратеници на СДСМ appeared first on plusinfo.mk.

СО ОВА РАКОВОДСТВО НА СДСМ НЕМА СОРАБОТКА, НИ КОАЛИЦИЈА! Терминот „европски“ се злоупотребува и се монополизира, вели Карапејовски од ЗНАМ

плусинфо — Sat, 20 Apr 2024 17:12:06 +0000

„И покрај тоа што СДСМ има прекрасни членови и симпатизери, со ова раководство нема да можеме да соработуваме и да коалицираме“, напиша Бобан Карапејовски, носител на листа во Изборната единица 1 од Движење ЗНАМ – За наша Македонија, на неговиот фејсбук профил по денешната средба со Бојан Маричиќ.

„Денеска на Бојан Маричиќ од СДСМ му ја дадов изборната програма Манифест за Македонија на нашиот претседателски кандидат Максим Димитриевски. Денешната кратка случајна средба ја искористив за да го реафирмирам ставот искажан од претседателот на Движењето ЗНАМ дека, за жал, и покрај тоа што СДСМ има прекрасни членови и симпатизери, со ова раководство нема да можеме да соработуваме и да коалицираме. Жалам што во кампањата терминот „европски” се злоупотребува и се монополизира. Нашите црвени линии за промената на Уставот, македонскиот народ, јазик, историја и култура се основниот услов за соработка со која и да е политичка партија по изборите“ – напиша Карапејовски.

The post СО ОВА РАКОВОДСТВО НА СДСМ НЕМА СОРАБОТКА, НИ КОАЛИЦИЈА! Терминот „европски“ се злоупотребува и се монополизира, вели Карапејовски од ЗНАМ appeared first on plusinfo.mk.

МАРИЧИЌ И ОСМАНИ СЕ СКАРАА ЗА СРЕБРЕНИЦА „Не може да фрлиме дамка врз целиот српски народ!“

плусинфо — Thu, 18 Apr 2024 09:17:14 +0000

По најавата на шефот на дипломатијата Бујар Османи за коспонзорството на Македонија во резолуцијата на ОН за геноцидот во Сребреница, првиот вицепремиер за европски прашања, Бојан Маричиќ, вели дека односот на земјата кон Сребреница е јасно дефиниран со Декларација во Собранието во 2010 година.

Според Маричиќ, одговорноста треба да биде индивидуална, а не колективна.

– Ставот на Македонија е многу јасен и утврден со соопштение на Собранието на почетокот на 2010 година, кога нашето Собрание едногласно ја поддржа резолуцијата на ЕП за Сребреница, каде што беше осудена како геноцид. Меѓутоа, мора да разликуваме две работи, едната е во Сребреница, но таа дамка не може да се фрли врз целиот српски народ или Србија. Одговорноста кон Сребреница мора да се индивидуализира и затоа има судови и меѓународни трибунали, тоа мора да биде по име и презиме, за во никој случај да не се поврзува со цел народ или цела држава – рече Маричиќ.

За најавата на Османи дека на седницата на Владата ќе предложи повлекување на земјава од иницијативата Отворен Балкан, Маричиќ вели дека треба да продолжат сите иницијативи кои се во корист на граѓаните на Македонија.

Членството во Отворен Балкан, смета тој, не треба да се политизира.

The post МАРИЧИЌ И ОСМАНИ СЕ СКАРАА ЗА СРЕБРЕНИЦА „Не може да фрлиме дамка врз целиот српски народ!“ appeared first on plusinfo.mk.

📷 „СЕДИ МИРЕН, НЕ СИ ВО ФОРИНО!“ Вака се слика за пасош во Брисел

плусинфо — Wed, 14 Feb 2024 14:16:56 +0000

Министерот за надворешни работи Бујар Османи заедно со техничкиот премиер Талат Џафери и со првиот вицепремиер Бојан Маричиќ, денеска во Брисел ја посети Амбасадата на Македонија, каде што покрај другите конзуларни услуги за нашите државјани, преку мобилната станица се врши сликање и земање на биометриски податоци за издавање патни исправи.

Фотографијата на којашто се гледа како тројцата функционери внимателно, дисциплинирано и без да трепнат го следат процесот на фотографирање на еден нашинец, наиде на исмејување на социјалните мрежи.

„Премиер и двајца министри гледаат во човек што се слика за пасош во Брисел“, гласеше еден од коментарите на Фејсбук.

Инаку, како што е наведено во соопштението на Министерството за надворешни работи, Џафери, Маричиќ и Османи разговарале со наши државјани кои се наоѓаа во просториите на Амбасадата и ги увериле дека се прават максимални напори да не се соочуваат со никаков проблем во државата каде што живеат, поради обврската за обновување на личните документи која произлегува од Договорот од Преспа.

The post 📷 „СЕДИ МИРЕН, НЕ СИ ВО ФОРИНО!“ Вака се слика за пасош во Брисел appeared first on plusinfo.mk.