СВР Битола поднесе кривична пријава против четири лица од Битола поради постоење основи на сомнение за сторени кривични дела „предизвикување омраза, раздор или нетрпеливост“, откако на 3 февруари годинава организирале ненајавен собир што прераснал во сообраќајна блокада и директни закани кон припадници на Министерството за внатрешни работи.

Пријавите се поднесени против М.Ф.(59), М.Р.(48), Д.Ф.(45) и Ј.Ф.(41), сите од Битола. Тие се товарат за сторени кривични дела „предизвикување омраза, раздор или нетрпеливост врз национална, расна верска и друга дискриминаторска основа” и „поттикнување”.

Како што се наведува во пријавата, групата со голем број граѓани го блокирала сообраќајот на патот во близина на Битола и во самиот град, предизвикувајќи нарушување на јавниот ред и мир. Во текот на собирот, дел од учесниците упатувале закани кон полицајците кои пристигнале да го регулираат сообраќајот и да ги растераат протестантите.

Исто така, во домот на еден од пријавените, друг учесник упатувал навреди кон министерот за внатрешни работи, при што се снимал со мобилен телефон, што е доставено како доказ во постапката. На истите лица им се става на товар дека со своите постапки поттикнувале омраза и нетрпеливост, што е казниво според македонското законодавство.

Полицијата и обвинителството ќе треба да утврдат дали протестот прераснал во кривично дело со оглед на тоа што собирот не бил пријавен, учесниците ја нарушиле јавната безбедност и упатиле закани кон службени лица.

Протестот на 3 февруари во Битола беше дел од пошироки немири поради одземање на возила што ги управувале лица без возачка дозвола. Група граѓани од ромската заедница најпрво го блокираа сообраќајот на обиколницата Ресен – Битола, запалија гуми и предизвикаа густ чад на коловозот. Потоа протестот продолжи пред Основниот суд и Општина Битола, каде учесниците изразија револт против контролите и мерките на полицијата.

Дел од учесниците, како што објавија медиумите, упатуваа жестоки и експлицитни закани кон полицајците дека ќе ги нападнат доколку тие се обидат да ги спроведат законот, да им ги одземат возилата или да ги растераат од блокадата. Некои од протестантите користеле вулгарни изрази и најавиле „тепачки и напади“ доколку полицијата се обиде да интервенира. Дел од демонстрантите потоа јавно се извинуваа и ги „повлекоа“ своите закани со видео-објави на социјалните мрежи.

The post ДЕМОНСТРИРАA „БЕЗ КОЧНИЦИ“, ЌЕ ОДГОВАРААТ ЗА ШИРЕЊЕ РАСНА ОМРАЗА Кривични пријави за четворица битолчани appeared first on plusinfo.mk.

„Лекцијата во СДСМ и целиот систем на СДСМ како партија, како поддржувачи, како поранешни експерти, не е научена. Би требало да се застане да се види до каде е ситуацијата, да се направи едно единство во државата. Мислам дека СДСМ мора да ја научи таа лекција и да престане да биде бомбаш- самоубиец со вакви настапи како на Андреј Жерновски или на други, за евроинтеграциите да бараат да биде променет Уставот. СДСМ нема политика којашто ја креира, не поминува кај Македонците”.

Вака изјави Наум Стоилковски од ВМРО-ДПМНЕ во „Вечерното шоу на Богдан Илиевски”. Зборувајќи за блокадите од страна на Бугарија на нашиот евроинтегративен пат Стоилковски објасни дека Македонија се наоѓа во ваква ситуација поради грешките направени од претходната власт.

– Грешка е направена од страна на претходната власт, којашто одеше отворено без размислување и покрај сите предупредувања дека не треба и дека ќе биде злоупотребено сето тоа и дека летвичката ќе се крева сè погоре и погоре.

Стоилковски претходно посочи дека приговорите и барањата од Бугарија се зголемуваат од времето кога Македонија влезе во НАТО.

–  Кога Македонија требаше да го смени Уставот, да го смени името за да влезе во НАТО и во Европска Унија, Софија немаше никаков проблем со ништо во рамки на добрососедството, кога влегуваше Македонија во НАТО немаше никаков проблем од страна на Бугарија, од тогаш наваму на три пати се појавува. Колку отворањето на Уставот сега понатаму ќе биде решение за тоа, и ќе се остава простор Софија во секои наредни предизборија да имаат нови и нови теми поврзани со национализмот.

The post ЛЕКЦИЈАТА ВО СДСМ УШТЕ НЕ Е НАУЧЕНА Погубните политики од минатото ѝ отворија простор на Бугарија да блокира appeared first on plusinfo.mk.

Американскиот претседател Доналд Трамп синоќа се закани дека ќе го удри Иран „многу посилно“ ако властите во Техеран одлучат да го блокираат снабдувањето со нафта во регионот.

– Нема да дозволам терористички режим да го држи светот како заложник и да се обиде да го спречи снабдувањето со нафта. Ако Иран направи нешто такво, ќе бидат погодени 20 пати посилно. Ако сакаат да ја играат таа игра, во ред, но подобро да не го прават тоа – рече американскиот претседател на прес-конференција во Флорида.

Трамп претходно ја опиша војната со Иран како „кратко патување“ и „мала екскурзија“ во говорот пред републиканските пратеници.

Тој, исто така, даде спротиставени изјави за целите на израелско-американската офанзива, велејќи дека САД нема да „запрат сè додека непријателот не биде целосно и крајно поразен“.

Трамп додаде дека американските сили започнале напади врз иранските постројки за производство на беспилотни летала и се пред уништување на иранските цели.

– Операцијата во Иран е многу пред нашиот првичен временски распоред. Блиску сме до завршување на турнејата. Војната ќе заврши кога Иран повеќе нема да има капацитет да развива оружје насочено кон САД, Израел или нашите сојузници за многу долго време – рече американскиот претседател, додавајќи дека САД можат да ја прогласат својата воена кампања за успешна, иако операцијата продолжува.

Трамп изјави дека војната со Иран започнала откако Техеран почнал да работи на нов објект за производство на материјали за нуклеарно оружје. Новиот објект, според Трамп, требало да ги замени постројките што САД ги бомбардирале минатата година.

– Но тие почнаа да работат на друг објект – поинаков објект, различен тип објект, заштитен со гранит – изјави тој.

Според Трамп, Техеран се обидувал да ја искористи „експоненцијално растечката закана од балистички ракети“ за да го направи речиси невозможно спречувањето на развојот на нуклеарно оружје.

Трамп изрази разочараност од изборот на Моџтаба Хаменеи за наследник на неговиот татко, ајатолахот Али Хаменеи, на позицијата врховен лидер на Иран.

Според американскиот претседател, тоа би значело „помалку или повеќе исто“ во земјата што, како што рече, се обидува да ја промени.

Тој оцени дека би било „несоодветно“ да коментира дали новиот лидер би можел да стане цел на смртоносен напад, како што се случило со неговиот татко.

The post „ПОДОБРО ДА НЕ ГО ПРАВАТ ТОА, ЌЕ УДРИМЕ 20 ПАТИ ПОСИЛНО“ Трамп му порача на Иран да не ја блокира нафтата appeared first on plusinfo.mk.

Обединетите Арапски Емирати се соочуваат со ризик од недостиг на храна поради конфликтот во Иран и поради нивната висока зависност од увоз, која достигнува 80% до 90% од нивните потреби.

Извршниот директор на една од најголемите логистички компании во светот презентираше загрижувачки информации дека Дубаи има залихи на свежа храна само за уште десет дена. Причината се прекинатите синџири на снабдување поради конфликтот со Иран.

Стефан Пол, директор на компанијата Kuehne and Nagel, во својата изјава за швајцарската телевизија SRF на 5 март, прочита податоци од синџирите на снабдување на неговата компанија. Дубаи и поширокиот регион на Заливот увезуваат помеѓу 80 и 90 проценти од нивната храна, а дури 70 проценти од храната за земјите од Заливот поминува низ Ормутскиот теснец.

Овој клучен теснец е затворен за комерцијален сообраќај од 28 февруари. Ситуацијата е дополнително отежната од фактот дека капацитетот за воздушен товар за Блискиот Исток се намали за 22 проценти помеѓу 28 февруари и 3 март, според податоците од компанијата Aevean, објавени од Ројтерс.

70% од храната минува низ Ормускиот теснец

Саудиска Арабија започна постепено да го укинува домашното производство на пченица во 2008 година и стана речиси целосно зависна од увозот. Денес, поради прекин на глобалниот превоз и затворен воздушен простор, земјите од Персискиот Залив што увезуваат 80 до 90 проценти од нивната храна се соочуваат со потенцијален недостиг и зголемување на цените.

Повеќе од 70 проценти од прехранбените производи во земјите од Советот за соработка во Заливот (GCC) се увезуваат преку Ормускиот теснец. Доколку војната продолжи, земјите од Заливот би можеле да се соочат со недостиг.

Аналитичарите велат дека земјите во тој регион ги диверзифицирале своите добавувачи и обезбедиле залихи за неколку месеци, но дека продолжените прекини би можеле да доведат до зголемување на цените и подолго време на испорака.

Клучно е пристаништето Џебел Али во Дубаи

Повеќето од клучните пристаништа во Заливот се наоѓаат на рутата што минува низ теснецот. Меѓу нив е и пристаништето Џебел Али во Дубаи, најголемото контејнерско пристаниште во регионот, кое наводно беше погодено од ирански напади оваа недела, со што операциите беа прекинати неколку часа.

Најголемо негативно влијание би била блокадата на Џебел Али, која опслужува околу 50 милиони луѓе во регионот.

Пристаништата на ОАЕ надвор од теснецот имаат ограничен капацитет. Хорфакан може да се справи со околу пет милиони ТЕУ (контејнер од 20 стапки со носивост од 4 тони), а Фуџаира помалку од еден милион, што не е доволно за да го замени капацитетот на Џебел Али или пристаништето Калифа во Абу Даби. Аналитичарите предупредуваат дека Катар, Кувајт, Бахреин и Ирак би биле ефикасно отсечени од директен пристап до морето и би зависеле од копнени патишта преку Саудиска Арабија, што би довело до скапи застои.

Резерви на основни производи има за 4 до 6 месеци

Властите на ОАЕ тврдат дека стратешките резерви за основни прехранбени производи ги покриваат потребите за четири до шест месеци. Тие ги повикаа граѓаните да пријават неоправдани зголемувања на цените. Вработените во супермаркетите велат дека полиците се претежно полни, но дека некои производи се надополнуваат побавно. Почетокот на иранските напади предизвика паника кај населението, што доведе до зголемено купување и привремено празнење на некои полици.

Во објави на социјалните медиуми некои купувачи укажуваат на нагло зголемување на цената на бананите. Експертите објаснуваат дека лесно расипливата храна како што се бананите е особено чувствителна на продолжените транспортни рути. Увозот на вакви производи по воздушен или по копнен пат дополнително би ги зголемил трошоците.

Земјите од Заливот инвестираа во модерни силоси во текот на изминатите две децении за складирање на стотици илјади тони стратешки житарки како што се пченица, ориз и масла за јадење. ОАЕ отворија силоси за жито во Фуџаира, на брегот на Индискиот Океан, надвор од Ормускиот Теснец, во 2016 година, со капацитет од околу 300.000 тони. Локацијата беше избрана за да се избегне Теснецот, со оглед на минатите ирански закани дека ќе го затвори за време на периоди на тензии со Западот.

Аналитичарите предупредуваат дека ќе биде потребна тесна координација за да се обезбеди сите шест членки на Персискиот Злив, како и Ирак, да избегнат сериозен недостиг на храна доколку конфликтот продолжи.

The post ДУБАИ ИМА ЗАЛИХИ ОД СВЕЖА ХРАНА ЗА УШТЕ 10 ДЕНА?! Земјите од Персискиот Залив се зависни од увоз на храна appeared first on plusinfo.mk.

Украинскиот претседател Володимир Зеленски ја повика Европската Унија да го одобри пакет-заемот од 90 милијарди евра (105 милијарди долари) за Украина, кој моментно е блокиран од Унгарија.

„Ова е вистинска финансиска гаранција за нашата безбедност и нашата отпорност и мора да се спроведе. Им благодарам на сите што работат за да се случи тоа“, истакна денеска Зеленски во видеообраќање на седницата на Европскиот парламент.

Заемот значително ќе придонесе за финансиските потреби на Киев во 2026 и 2027 година вклучувајќи 60 милијарди евра наменети специјално за украинската војска. Првично се очекуваше мерката за помош формално да биде одобрена од министрите за надворешни работи на блокот вчера откако сите лидери на ЕУ, вклучително и унгарскиот премиер Виктор Орбан, се согласија со заемот во декември.

Унгарија, поддржана од Словачка, сепак стави вето на финансиската помош, наведувајќи го запирањето на испораките на руска нафта преку нафтоводот „Дружба“ што поминува низ Украина. Тие го обвинуваат Киев за намерно блокирање на користењето на гасоводот од политички причини. Сепак, украинските власти велат дека прекинот во снабдувањето со нафта од крајот на јануари е резултат на руското бомбардирање. Унгарија, исто така, одби да го одобри 20-тиот пакет санкции на ЕУ против Русија.

Во својот говор, Зеленски го повтори својот повик до блокот да одреди конкретен датум за приклучувањето на Украина. Без јасна временска рамка, предупреди тој, рускиот претседател Владимир Путин ќе се обиде да го блокира приклучувањето на Украина во ЕУ „со децении со поделба на ЕУ, со поделба на Европа“.

The post ЗЕЛЕНСКИ АПЕЛИРА ДО ЕУ ДА ГО ДЕБЛОКИРА ЗАЕМОТ ЗА УКРАИНА Унгарија стави вето на 90 милијарди евра наменети за Киев appeared first on plusinfo.mk.

Македонија со години и години страда од вета добиени од земји членки на ЕУ. Од Брисел не уверуват дека тоа е нивно право кое мора да го прифатиме и да угодиме на тие што не кочат. Ама, во последно време внатре во ЕУ почнаа државите да си ставаат вета за други одлуки и сега види мајката – ветото било „злоупотреба”.

Последно такво кукање во Брисел се случи вчера кога министрите за надворешни работи на ЕУ не ја усвоија планираната одлука за заем на Украина од 90 милијарди евра како и намерата да се „бапне” нов пакет санкции против Русија. Унгарија и Словачка рекоа „стоп”, и на Брисел му се крена коса на глава од ветото.

Истите луѓе кои ни велеа низ годините дека ветото не е страшна работа и може да се тргне некогаш во иднината, сега вриштаат на сет глас за „проблем”, „самоволие” „парализа”. Кога Македонија беше блокирана со вето, тоа беше „европска процедура”. Кога ЕУ самата се блокира, тоа било недозволиво.

Македонија триесет години живее под ЕУ вето. Прво грчко – за знамето, па за името… Знамето се смени, името се смени, Уставот се смени, државата се преименува. Наместо крај на блокадите, следуваше француско „не”, нови методологии, нови условувања, па бугарско вето со барања што не ги поставува дури ниту окупатор на окупирана земја.

И пазете, сега кога премиерот Христијан Мицкоски не клечи како претходните премиери, туку ги прашува во Брисел – има ли крај ова со ветата – добива одговор дека тоа никој не може да му го гарантира и дека тој само мора да угоди на тие што ги ставаат ветата и да чека што ќе биде понатаму.

Сега, кога се во прашање други теми, други држави, одеднаш велат нема потреба да се чека, време е да се заобиколи ветото особено ако доаѓа од Унгарија. Чудо. Бугарија може да става вета, ама Унгарија не можело. Но, јасно е, Македонија е таа што е исклучокот, ако реши на пример Унгарија да ни става нам вета – тогаш тоа Брисел ќе го поздрави, а не да го критикува или заобиколува. Тогаш никој во ЕУ не би зборувал за злоупотреба на принципот на едногласност. Едноставно, Македонија е боксерска вреќа каде може секој да вежба – вето – ама, кога е за други работи Брисел увидува дека ударите болеле.

Па, одеднаш во ЕУ почнаа повици на реформа на гласањето за да се спречи „злоупотребата на принципот на едногласност”. Значи, кога ветото ја попречува бриселската агенда, тогаш треба да се менуваат правилата. И? Кога ќе ги сменат, ако ги сменат, за нас во Македонија кое правило ќе важи, новото дека нема едногласност или за нас ќе остане старото правило – кој сака вето може да ни стави? Впрочем, гледаме и сега кога се погласно се зборува дека неколку земји можеби ќе бидат примени во втората ЕУ – лига и за нив ќе важат две обврски: ускладување на надворешната политика со онаа на ЕУ, како и човековите права, за Македонија пак има едно плус бараење – да го смени и Уставот.

Затоа, прашањето повеќе не е дали Унијата треба да се реформира, треба сигурно, туку пред тоа дали конечно ќе си признае дека правилата, правдата и принципите не можат да важат само кога ѝ одговараат.

The post ЕУ почувствува дека ветото болело, ама на Македонија „нежно” ѝ го става и понатаму appeared first on plusinfo.mk.

Доналд Трамп објави дека воведува нова глобална царина од 10% по денешната одлука на Врховниот суд на САД, кој поништи голем дел од претходно воведените царини. Судот пресуди дека Трамп немал овластување да воведе царини врз основа на Законот за меѓународни економски овластувања во вонредни ситуации од 1977 година.

Тој потоа кажа дека ќе задржи многу од постоечките царини и најави нови царини според друг закон.

– Веднаш стапуваат во сила сите царини за национална безбедност според Член 232 и остануваат царините според Член 301. Тие постојат и остануваат во сила со полн ефект. Денеска ќе потпишам извршна наредба за воведување глобална царина од 10 проценти според Член 122, покрај нашите вообичаени царини што веќе се наплаќаат. Исто така, започнуваме неколку истраги за да ја заштитиме нашата земја од нефер трговски практики на други земји и компании – рече Трамп.

Овој потег ќе му овозможи на Трамп повторно да ги воведе своите глобални основни царини на 150 дена, а за продолжување на тој рок, ќе му треба одобрение од Конгресот.

Трамп кажа дека е разочаран од пресудата на Врховниот суд и дека одредени негови членови немале храброст да го направат она што е исправно за земјата. Пресудата беше донесена со 6-3 во гласови.

The post ТРАМП ВОВЕДЕ НОВА ГЛОБАЛНА ЦАРИНА ОД 10% Остануваат и многу од постоечките царини appeared first on plusinfo.mk.

Унгарскиот министер за надворешни работи, Петер Сијарто, објави дека Унгарија ќе го блокира пакетот заем од 90 милијарди евра за Украина сè додека земјата не ги обнови испораките на нафта преку нафтоводот „Дружба“.

Петер Сијарто нагласи дека ова е реакција на унгарската влада на одлуката на Киев да не го обнови протокот на руска нафта во Унгарија, иако, според Сијарто, нема технички пречки за ова.

Унгарскиот министер за надворешни работи рече дека украинската влада, во договор со Брисел и унгарската опозиција, ја уценува Унгарија со блокирање на нафтоводот со цел да го наруши снабдувањето со енергија и да предизвика нагло зголемување на цените на горивата на пумпите пред парламентарните избори.

– Нема да попуштиме на оваа уцена, нема да ја поддржиме војната во Украина, нема да им платиме на Украинците за војната, нема да дозволиме парите на унгарскиот народ да бидат испратени во Украина и нема да им дозволиме да ја зголемат цената на бензинот – нагласи Сијарто.

Портпаролот на Европската комисија на прес-конференција одговарајќи на прашања поврзани со загриженоста на Унгарија и Словачка, кои преку транспорт од оваа инфраструктура добиваат руска нафта рече дека само Украина може да одлучи дали и кога да се поправи нафтоводот „Дружба“

Портпаролот истакна дека не може да стане збор за вонредна состојба во снабдувањето и нема опасност од недостиг на нафта на краток рок.

– Ги уверуваме граѓаните на Унгарија и Словачка дека постојано работиме за да ja имаат неопходната енергетска безбедност – рече портпаролот.

Европската комисија планира следната недела да ги финализира правните процедури за заемот за Киев од 90 милијарди евра. Европските пратеници на пленарната седница во Стразбур на 11 февруари го одобрија овој заем за периодот 2026-2027 година.

– Истовремено, соработуваме со украинските власти за да овозможиме брза исплата откако ќе заврши законодавниот процес, и подготвуваме финансиска стратегија и услови за тоа финансирање – изјави европскиот комесар за економија Валдис Домбровскис.

The post УКРАИНА НАЈАВИ ВЕТО НА ЗАЕМОТ НА ЕУ ЗА УКРАИНА Ќе блокира 90 милијарди евра поради застојот на нафтоводот „Дружба“ appeared first on plusinfo.mk.

Неколку стотици жители на виничкото село Блатец денеска протестираа против изградба на хидроцентрала на реката Блатешница. Меѓу присутните имаше и постари луѓе и многу млади, кои застанаа заедно во, како што велат, одбрана на природата и локалните ресурси.

Демонстрантите истакнаа дека нивниот отпор не е од инает, туку од загриженост за водата, животната средина и иднината на местото. Порачаа дека нема да дозволат проект што може да го загрози регионот.

На протестот присуствуваше и градоначалникот на Општина Виница, Митко Костадиновски, кој им даде поддршка на жителите и најави институционална помош за побрзо решавање на ситуацијата.

Жителите велат дека протестите ќе продолжат додека не се обезбеди, како што наведуваат, заштита на природните богатства и интересите на локалното население.

The post ПРОТЕСТ ВО БЛАТЕЦ ПРОТИВ ХИДРОЦЕНТРАЛА НА БЛАТЕШНИЦА Локалното население во одбрана на реката и на животната околина appeared first on plusinfo.mk.

Врховниот суд на САД денеска го блокираше претседателот Доналд Трамп во користењето на законот за вонредни состојби за еднострано воведување сеопфатни царини за повеќето трговски партнери на САД.

Како што јави Фокс Њуз, со ова му е нанесен удар на претседателот „во случај фокусиран на една од неговите клучни економски политики – онаа што тој ја карактеризираше како прашање на ’живот или смрт‘ за американската економија“.

Со одлука од 6 спрема 3, судиите ги поништија царините на Трамп.

Врховниот суд ги сослуша усните аргументи во ноември во случајот за употребата на Меѓународниот закон за итни економски овластувања (ИЕЕПА) од страна на Трамп за спроведување на неговите царини за „Денот на ослободувањето“ (Liberation Day) кон повеќето земји, вклучително и глобална царина од 10 проценти и збир на повисоки, таканаречени „реципрочни“ царини за одредени нации.

Во април, Трамп го прогласи трговскиот дефицит на САД за „национална вонредна состојба“, а адвокатите на администрацијата го наведоа тоа како правна основа за повикување на ИЕЕПА, кој му дозволува на претседателот да одговори на „невообичаени и вонредни закани“ кога е прогласена национална вонредна состојба.

Врховниот суд се согласи да го преземе случајот минатата есен, откако пониските судови, вклучувајќи го и Судот за меѓународна трговија на САД (CIT) и Апелациониот суд на САД за федералниот округ, го блокираа обидот на Трамп да го користи ИЕЕПА за воведување увозни давачки.

Пониските судови побараа од Министерството за правда да објасни зошто Трамп се повикал на ИЕЕПА кога други, попрецизно приспособени статути донесени од Конгресот поконкретно се занимаваат со царините – вклучително и закони кои ги ограничуваат царините на одредени нивоа или поставуваат временски рамки подложни на ревизија од Конгресот.

Законот го овластува претседателот да го „регулира „увозот“ за време на прогласена национална вонредна состојба, но не го споменува зборот „царини“ – пропуст што беше во центарот на повеќечасовните аргументи пред високиот суд во ноември.

За време на усните аргументи во ноември, судиите ги притиснаа адвокатите на администрацијата за тоа дали ИЕЕПА се однесува на царините или даночните овластувања и какви заштитни механизми – доколку ги има – би ја ограничиле извршната власт доколку високиот суд пресуди во корист на Трамп.

Во аргументите, адвокатите на администрацијата им рекоа на судиите дека ИЕЕПА му дозволува на претседателот да го „регулира увозот“ на стоки, што според нив е практичен еквивалент на царина.

Но, судиите, вклучително и конзервативните именувани од Трамп, изгледаа скептични, прашувајќи ја администрацијата дали „некогаш имало друг пример во кој статут го користел тој јазик за да ја додели моќта“ што ја бара Трамп. Други конзервативни судии прашаа дали „економскиот еквивалент“ на царините – како што се санкциите, ембаргата, лиценците и квотите – може да биде користен од претседателот според законот, пишува Фокс Њуз.

Адвокатите на администрацијата на Трамп тврдеа во пониските судови дека ИЕЕПА му дозволува на претседателот да дејствува како одговор на „невообичаени и вонредни закани“ и во случаи кога е прогласена национална вонредна состојба. Трамп тврдеше дека длабоките и „континуирани“ трговски дефицити претставуваат национална вонредна состојба што е доволна за да ги активира неговите извршни овластувања според законот за вонредни состојби.

Министерството за правда побара од Врховниот суд да дозволи царините да останат во сила, предупредувајќи дека негирањето на овластувањето за царини на Трамп според ИЕЕПА „би ја изложило американската нација на трговска одмазда без ефикасна одбрана“.

Тужителите возвратија дека во 50-те години од неговото донесување, законот никогаш не бил користен од претседател за воведување царини. Тие исто така тврдеа дека, според признанието на самата администрација, трговскиот дефицит цитиран од Трамп опстојува речиси 50 години – факт за кој рекоа дека го поткопува неговото тврдење дека постои „невообичаена и вонредна“ трговска итност.

Тие тврдеа дека одобрувањето на употребата на ИЕЕПА од страна на Трамп за продолжување на неговите универзални царини драстично би ја проширило извршната власт на сметка на другите гранки на власта.

Тричлениот судиски совет на Судот за меѓународна трговија на САД едногласно гласаше претходно оваа година за блокирање на царините на Трамп да стапат во сила, пресудувајќи дека како врховен командант, Трамп нема „неограничено овластување“ да воведува царини според законот за вонредни состојби. Апелациониот суд на САД за федералниот округ исто така ја одби употребата на ИЕЕПА од страна на администрацијата.

The post ВРХОВНИОТ СУД НА САД ГИ БЛОКИРА ЦАРИНСКИТЕ ТАРИФИ НА ТРАМП Трговскиот дефицит не може да се смета за „вонредна состојба“ appeared first on plusinfo.mk.