Во однос на блокирањето на работата на Собранието од опозицијата, Џафери, во интервју за РСЕ, вели дека Собранието функционира и ќе функционира.

– Во секој случај по одлуката за блокирање тоа си е право на опозицијата, како инструмент да го искористи во Собранието, тоа е во доменот на дискусиите што се одвиваат и во работните тела и на пленарната седница. Не може да има целосна блокада на Собранието, затоа што може да не ги разгледаат точките што се на комисиите што тие ги водат, но другите комисии кои ќе ги разгледаат точките секако има услови да се разгледаат на пленарни седници, а пленарната седница според Деловникот е планирана и има тајминг на почеток и крај на дискусијата, така што Собранието ќе продолжи непречено да работи и по однос на оние точки за коишто има предуслови, според Деловникот, да се работи – изјави Џафери.

Во однос на уставните измени, Џафери, вели дека тоа не се обврски на мнозинството или на Собранието, туку тоа се обврски што државата ги преземала на патот за отворање на претпристапните преговори и на патот за полноправно членство за НАТО.

– Значи потребата за уставни измени не е заради потребата на мнозинството или не знам на кого, туку потреба на државата за да може да си го преземе и да го изоди патот, кој впрочем е определен пред три децении да се изоди со сите предизвици што ги има државата на тој пат. И во тој контекст сметам дека сите треба да рефлектираат по однос на интерес на државата и на граѓаните, а не по интерес на политичките партии и во смисла на дневна политика, борба за гола власт да се менува власта, туку во секој случај која и власт да дојде ќе мора да го изоди тој пат – нагласува Џафери.

За тоа дали очекува некој од пратениците на ВМРО-ДПМНЕ да гласа за уставните измени, Џафери нагласува дека не прави пресметки дали некој ќе може вака или онака да се однесува во однос на она што е општо добро за државата и за граѓаните.

– Очекувам политичките партии, како претставници на граѓаните да рефлектираат во смисла на она што е интерес на граѓаните коишто ги претставуваме, во тој контекст очекувам – изјави Џафери.

The post И ШТО АКО БЛОКИРА ВМРО-ДПМНЕ: Џафери е спокоен, Собранието непречено ќе си работи appeared first on plusinfo.mk.

Засега, ни мнозинството, ни претседателот на Собранието, Талат Џафери, немаат одговор како ќе функционира Собранието ако секој закон биде затрупан со илјадници амандмани.

Неизвесно е дали мнозинството ќе најде чаре за функционално Собрание сега или ќе се чека страстите да стивнат по летниот одмор на пратениците, па од септември да бараат решение. Но, и по одморот на пратениците во август, можно е Собранието да остане заглавено бидејќи кон крајот на септември треба да почне кампањата за локалните избори, кои треба да се одржат во втората половина на октомври.

Ако се следи досегашната практика законодавниот дом да не заседава 20 дена колку што трае предизборната кампања, тоа ќе значи дека е можно Собранието да профункционира дури по локалните избори, ако власта најде чаре за купиштата амандмани што ги најави Левица.

Пратеникот на Левица, Борислав Крмов, вчера ја најави блокадата на законодавниот дом.

– Почнуваме со целосна блокада на Собранието, со блокада на сите закони којшто се предложени од мнозинството и од Владата за целосна парализа на Собранието поради пуштање на закони по скратена постапка, дискриминација на неалбанските пратеници и за да се заузди злоупотребата на европското знаменце – рече Крмов.

И ВМРО-ДПМНЕ смета дека мнозинството и Владата го злоупотребуваат европското знаменце и како што велат, кога ќе видат дека некој закон не може да помине на легален начин во Собранието му ставаат европско знаменце со што ја ускратува расправата.

Од претседателот на Парламентот не добивме одговор што како прв меѓу еднаквите ќе преземе за Собранието да може да работи.

Од СДСМ велат дека допрва ќе следат консултации со претседателот Џафери, односно прво да ја видат намерата на Левица како ќе оневозможува носење на законите дали преку поднесување на илјадници амандмани или преку маратонски говори. Сепак од СДСМ се убедени дека нема да дозволат блокада и нефункционирање на Собранието.

Ни пратеникот на СДСМ, Костадин Костадинов, на новинарско прашање не одговори како ќе ја спречат парализата на законодавниот дом најавена од левица. Тој само констатира дека на Левица не ѝ е првпат да прави обиди за блокада.

– Не е само законот за државјанство којшто опозицијата, мислам и на Левица и на ВМРО-ДПМНЕ, се обидуваат да го блокираат. Станува збор за партија која има двајца претставници во Парламентот и ако добро анализираме ќе видиме дека ги нема на работа. Во комисиите каде практично се креираат законските решенија го имаат целосното деловничко право да подобруваат текстови на закони, но наместо тоа, двајцата пратеници решиле да блокираат. Тие заедно со ВМРО-ДПМНЕ блокираат сè и тоа наликува на политичари од поранешни векови. Не на модерни политичари. Тоа е пример како модерен политичар не треба да изгледа – рече Костадинов.

Од Алијанса за Албанците, која претходно блокираше закони поради блокадата на нивниот закон за државјанство, сега велат дека што и да прави Левица не може да го изблокира законот бидејќи тој е со европско знаменце, односно за три дена расправа мора да се донесе.

Актуелниот собраниски состав повеќе пати се соочува со блокади на закони, така што јавноста беше сведок дека едвај се носеа и законските решенија за коронакризата, како и пакетот закони за справување со пандемијата.

The post Левица ќе го стави Собранието во аут до локалните избори во октомври!? appeared first on plusinfo.mk.