Иранската прехранбена индустрија има доволно капацитет за да ги задоволи домашните потреби и покрај воената криза. Ова го изјави Рашид Азизпур, генерален секретар на Здружението на прехранбената индустрија.

Тој нагласи дека производството на храна во земјата ја надминува домашната побарувачка.

– Производствениот капацитет на иранската прехранбена индустрија ја надминува домашната побарувачка. Потребните суровини за производство во следните неколку месеци веќе се обезбедени – изјави Азизпур за новинската агенција Ирна, пренесува „Техеран тајмс“.

Според него, земјата не се соочила со недостиг на основни прехранбени производи од почетокот на конфликтот.

– Од почетокот на наметнатата војна, во ниту еден момент не сме се соочиле со недостиг на прехранбени производи – рече Азизпур.

Сепак, предупреди дека растечките трошоци за транспорт и енергија ќе извршат силен притисок врз пазарот.

Во меѓувреме, иранската војска испрати силно предупредување до САД и нивните сојузници.

Портпарол на иранската армија изјави дека пристaништата во регионот ќе станат легитимни цели доколку бидат нападнати иранските пристанишни објекти.

Предупредувањето доаѓа по апелот на Централната команда на САД цивилите во Иран да се оддалечат од пристаништата долж Ормутскиот теснец.

Американската воена команда соопшти дека иранските власти користат цивилни пристаништа за воени операции. Поради тоа, објектите што се користат за воени цели може да го изгубат статусот на заштитени цивилни објекти според меѓународното право.

„Оваа опасна акција ги ризикува животите на невини луѓе“, се вели во пораката со предупредување.

The post TEХЕРАН ТВРДИ ДЕКА ИМА ХРАНА ЗА ДОЛГА ВОЈНА Се заканува со жесток напад ако бидат гаѓани иранските пристаништа appeared first on plusinfo.mk.

Американскиот претседател Доналд Трамп изјави дека војната со Иран може да заврши „наскоро“. Според него, нападите веќе уништиле голем дел од целите. Изјавата ја даде во краток телефонски разговор, објави порталот Аксиос.

– Практично немаме ништо што да гаѓаме. Неколку работи тука и таму… Ќе заврши кога јас ќе посакам – рече Трамп.

Иако Трамп сигнализира дека операцијата ги постигнала целите, американските и израелските претставници велат дека нема официјална директива за крај на борбите.Израелски и американски извори велат дека се подготвуваат за најмалку уште две недели напади врз Иран.

Израелскиот министер за одбрана, Израел Кац, порача дека операцијата ќе продолжи без временско ограничување.

Од друга страна, Си-Ен-Ен тврди дека Трамп планира да прогласи „лажен крај на војната“.

„Најблиските помошници на американскиот претседател Доналд Трамп веќе создаваат наратив за победа за војната во Иран, подготвувајќи се за денот кога ќе мора да се повлече од конфликтот. Белата куќа создава надреално сценарио во кое Трамп лично прогласува безусловно предавање на Исламската Република, дури и ако тоа не се совпаѓа со реалноста“, коментира Си-Ен-Ен.

Трамп, пак, оцени дека војната оди подобро од очекувањата.

– Војната оди одлично. Многу сме пред распоредот. Направивме повеќе штета отколку што мислевме дека е можно – рече тој.

Според него, Иран „плаќа цена за 47 години смрт и уништување“.

– Ова е одмазда. Нема да се извлечат толку лесно – додаде Трамп.

Првиот човек на Централната команда на САД, адмирал Бред Купер, изјави дека целта на операцијата е да се намали способноста на Иран да ја загрозува пловидбата.

– Американските сили демонстрираат разорна борбена моќ. Борбената моќ на САД расте, а на Иран се намалува – рече Купер.

Тој додаде дека бројот на ирански ракетни и дронски напади значително се намалил.

Кога ги објави првите напади на 28 февруари, Трамп ги наведе главните цели на воената операција: уништување на иранските ракети и ракетната индустрија, уништување на иранската морнарица, спречување на иранските сојузнички милиции да го дестабилизираат регионот и спречување Иран да развие нуклеарно оружје.

The post ПРАКТИЧНО НЕМА ШТО ПОВЕЌЕ ДА СЕ ГАЃА ВО ИРАН Војната ќе заврши кога јас ќе посакам, вели Трамп appeared first on plusinfo.mk.