Претседателот на САД Доналд Трамп најави дека ќе го разгледа новиот план што Иран го достави за ставање крај на војната. Пораката ја објави на платформата Truth Social, со изразен сомнеж кон иницијативата.

„Наскоро ќе го разгледам планот што Иран штотуку ни го испрати, но не можам да замислам дека тој би бил прифатлив со оглед на тоа што тие сè уште не платиле доволно висока цена за она што му го направија на човештвото и на светот во изминатите 47 години“, напиша Трамп.

Иако е во сила неограничен прекин на огнот, разговорите не напредуваат. Главниот спор се однесува на нуклеарните амбиции на Иран и контролата врз Ормускиот Теснец.

Иранската државна агенција ИРНА објави дека Техеран доставил нов предлог до САД преку посредници во Пакистан.

Иранскиот министер за надворешни работи Абас Арагчи остварил телефонски разговори со колеги од регионот. Според државниот радиодифузер ИРИБ, темата била „нови иницијативи поврзани со завршувањето на војната“.

Детали за иницијативата не се објавени.

САД и Израел почнаа напади врз Иран на 28 февруари. Техеран возврати со контранапади врз Израел и врз заливските држави. Потоа во голема мера ја блокираше Ормуската Теснина, која е клучна за глобалната трговија.

The post ТРАМП ЌЕ ГО РАЗГЛЕДА ИРАНСКИОТ ПЛАН ЗА МИР „Уште не платиле за тоа што го правеа 47 години“ appeared first on plusinfo.mk.

Премиерот на Израел нареди интензивни дводневни воздушни напади врз Иран во обид уништи што е можно повеќе од воената индустрија на земјата пред Вашингтон да се движи кон прекин на огнот, објави „Њујорк тајмс“ во средата.

Потегот доаѓа отако израелските власти го виделе американскиот план од 15 точки, пишува медиумот. Според Тел Авив планот не ги адресира доволно нуклеарните и ракетните капацитети на Иран. Ова дополнително ја зголемува нервозата во Тел Авив.

„Што е можно побрзо“

Според „Њујорк тајмс“, директивата од израелскиот премиер Бенјамин Нетанјаху била издадена по состанок во воениот штаб, каде што врвните команданти презентирале кои цели сè уште се оперативно достижни. Нетанјаху побарал тие да бидат погодени што е можно побрзо, додека прозорецот за воена акција сè уште е отворен.

Израелските претставници стравуваат дека американскиот претседател Доналд Трамп може во секој момент да иницира мировни преговори, со што би се ставила точка на конфликтот, без да се исполнат клучните израелски цели.

Нема потврда за планот со 15 точки

Планот, кој циркулира во медиумите, предизвика сомнежи и во Вашингтон. Портпаролката на Белата куќа, Каролин Ливит, повика на претпазливост.

– Има елементи на вистина во него, но некои од приказните што ги прочитав не беа целосно фактички – изјави таа, додавајќи дека Белата куќа не го потврдила официјално документот.

Одлуката е во рацете на Трамп

И покрај воените операции, Израел се соочува со клучно ограничување. Одлуката за завршување на војната е во рацете на Трамп.

Во меѓувреме, израелските службеници остануваат поделени. Некои сакаат барем уште една недела за да разработат поширок список на цели, додека други се залагаат за порано завршување.

Три службеници, според „Тајмс“, забележаа дека најзначајните воени придобивки дојдоа во првата недела, кога порасна загриженоста на светската јавноста за можна економска криза.

Контакти преку посредници?

Конфликтот, кој започна на 28 февруари, веќе однесе повеќе од 1.340 животи, вклучувајќи го и врховниот лидер на Иран, Али Хамнеи. Иран возврати со напади низ регионот, нарушувајќи ги нафтените текови и воздушниот сообраќај.

Во меѓувреме, САД направија еден чекор назад. Трамп ги одложи нападите врз иранската енергетска инфраструктура и изјави дека имал добра комуникација со Техеран. Ова беше демантирано од иранската страна.

Подоцна, западните медиуми објавија дека Иран доставил свои барања до САД меѓу кои и барање за отшета за војната, гаранции дека конфликт нема да се повтори и задржување на целата балистичка програма, спротивно на американските барања.

The post НЕТАНЈАХУ БРЗА ДА НАПАДНЕ ПРЕД МОЖЕН ПОТЕГ НА ТРАМП Израел удира 48 часа пред евентуално примирје appeared first on plusinfo.mk.

Новиот врховен лидер на Иран, ајатолахот Моџтаба Хамнеи, ги отфрли предлозите за смирување на тензиите од медијаторите од две земји.

– Не е вистинско време за мир сè додека САД и Израел не паднат на колена, не прифатат пораз или не платат репарации – изјавил Хамнеи, според висок ирански функционер цитиран од Ројтерс.

„Многу сериозна одмазда“

Според истиот извор, посредници им предложиле на иранските власти намалување на тензиите. Се разгледувал и можен прекин на огнот со САД.

Предлогот бил доставен до иранското Министерство за надворешни работи. Но новиот врховен лидер го одбил.

Хамнеи го одржал и првиот состанок за надворешна политика откако бил избран на функцијата. На состанокот, според изворот, било решено Иран да се одмазди „многу сериозно“ на САД и на Израел.

Моџтаба Хамнеи неодамна беше избран од Советот на експерти. Тој го наследи својот татко, ајатолахот Али Хамнеи, кој беше убиен во напад.

Каде се лекува Моџтаба?

Од неговиот избор па досега не се објавени нови фотографии. Дел од иранските претставници тврдат дека тој бил полесно повреден во нападот.

Американски извори, пак, тврдат дека повредите биле посериозни.

Во етерот се јавија шпекулации дека Хамнеи е на лекување во Москва на лична покана од претседателот на Русија Владимир Путин.

Амбасадорот на Иран во Русија, Казем Џалали, ги негираше овие наводи, објави руски ТАСС.

„Теснецот да остане затворен“

Американско-израелската војна против Иран трае повеќе од две недели. Според проценките, најмалку 2.000 луѓе загинале.

Ормускиот теснец и натаму е во голема мера затворен. Тоа ги зголеми цените на енергијата и предизвика страв од нов инфлаторен бран.

Во својата прва јавна порака, прочитана на државната телевизија, Хамнеи порача дека теснецот треба да остане затворен како средство за притисок врз „непријателите на Иран“.

The post РАНО Е, ПРВО САД И ИЗРАЕЛ ДА ПАДНАТ НА КОЛЕНА Моџтаба одбил примирје предложено од 2 земји appeared first on plusinfo.mk.

Кабинетот на израелскиот премиер, Бенјамин Нетанјаху, објави фотографија со тврдење дека го прикажува моментот кога наредил ликвидација на високи ирански функционери.

Според Израел, во ист напад се ликвидирани Али Лариџани, шефот на Врховниот совет за национална безбедност на Иран и Голам Реза Солејмани, компандант на Басиџ познат кого Израел го нарекува „режимскиот месар“.

Додека Израелските одбранбени сили потврдуваат дека го нападнале Али Лариџани во рамки на воздушните удари на три града во Иран, иранските медиуми тврдат дека Лариџани „за неколку минути“ ќе се обрати со порака.

„Режимскиот месар“

Во истиот напад загинал и Голам Реза Солејмани. Тој шест години ги предводеше силите Басиџ, паравоена формација тесно поврзана со Иранската револуционерна гарда.

Под негова команда силите Басиџ ги задушуваа антивладините протести. Организациите за човекови права ја обвинуваат формацијата за употреба на боева муниција против демонстранти и за мрежа на тајни центри за притвор.

Photo: Prime Minister Benjamin Netanyahu ordering the elimination of senior Iranian regime officials. pic.twitter.com/av6rIqNOFt

— Prime Minister of Israel (@IsraeliPM) March 17, 2026

Kој е Али Лариџани?

Али Лариџани важи за еден од највлијателните политичари во Иран. Тој со години е дел од внатрешниот круг на власта во Техеран.

Моментално го предводи Врховниот совет за национална безбедност. Телото ги координира клучните одлуки за одбраната, нуклеарната програма и надворешната политика.

Претходно бил претседател на иранскиот парламент. Работел и како министер за култура. Бил и главен преговарач во нуклеарните разговори со западните сили.

Лариџани се смета за прагматичен конзервативец со силни врски со безбедносните структури и со Револуционерната гарда. Поради тоа, евентуалната потврда за неговата смрт би претставувала тежок удар за политичкото и безбедносното раководство на Иран.

Напади во Техеран, Шираз и во Тебриз

Израелската војска соопшти дека десетици борбени авиони учествувале во координирани напади врз Техеран, Шираз и Тебриз.

Во Техеран биле погодени командни центри на иранските безбедносни сили. Меѓу целите биле седиштето на Министерството за разузнавање и бази на милицијата Басиџ.

Нападите вклучувале и складишта и лансирни позиции за беспилотни летала. Цел биле и ракетни позиции и системи за воздушна одбрана.

Во Шираз бил нападнат штаб на иранската Команда за внатрешна безбедност и складиште за ракети. Во Тебриз биле уништени делови од системот за воздушна одбрана.

The post 📷 НЕТАНЈАХУ ЛИЧНО НАРЕДИЛ, ОБЈАВИ И ФОТКА Лариџани и „месарот на режимот“ убиени во ист напад? appeared first on plusinfo.mk.

Нова фаза од конфликтот меѓу САД и Иран се наѕира на хоризонтот. Американскиот министер за одбрана Пит Хегсет најави дека денес, 10 март, ќе се изведе најинтензивниот бран напади од почетокот на војната.

– Денес повторно ќе биде нашиот најинтензивен ден на напади во Иран, најмногу борбени авиони, најмногу бомбардери и најмногу напади – рече министерот.

Тој додаде дека интензивните воздушни операции веќе дале резултати. Според американските претставници, серијата напади значително ги намалила иранските ракетни и беспилотни капацитети.

– Од друга страна, Иран испукал најмалку ракети во последните 24 часа од почетокот на конфликтот – рече Хегсет.

„Ова не е 2003 година“

Американскиот министер нагласи дека САД нема да се впуштат во долготрајна војна како во Ирак.

– Ова не е 2003 година. Не е ни блиску. Нашата генерација војници нема да дозволи тоа да се случи повторно – рече Хегсет.

Тој порача дека Вашингтон нема да учествува во „бесконечно градење на нации“ и во „мочуриштата“ кои, според него, ги одбележале претходните американски администрации.

– Тие денови се мртви – рече министерот.

HOLY CRAP! SecWar Pete Hegseth just said today will be the US military’s LARGEST striking campaign against Iran seen to date

At the same time, Iran’s missile strikes are PLUMMETING to their lowest yet

“You see, this is NOT 2003!”

“Today will be yet again our most intense… pic.twitter.com/vUCwAFHkTT

— Eric Daugherty (@EricLDaugh) March 10, 2026

Библиски цитат на крајот од обраќањето

На крајот од своето обраќање Хегсет се осврна на жртвите во војната. Тој спомена дека уште еден американски војник бил убиен по иранските одмазднички напади врз американски бази на Блискиот Исток.

Министерот го заврши говорот со стих од Библијата.

– Благословен да е Господ, карпа моја. Тој ги вежба рацете мои за војна, а прстите мои за битка. Тој е карпа моја, тврдина моја, избавител мој и штит во кого се засолнувам – цитираше Хегсет од Псалм 144.

Тој најави дека нападите врз Иран ќе продолжат и во следните денови од конфликтот.

The post ДЕНЕС ЌЕ БИДЕ НАЈИНТЕНЗИВНИОТ НАПАД Ова нема да биде долга војна како во Ирак, вели Хегсет appeared first on plusinfo.mk.

Судир меѓу два сојузника ја тресе трансатлантската политика. Доналд Трамп остро го нападна британскиот премиер Кир Стармер. Причина станува британската воздржаност во првиот бран напади врз Иран.

Американскиот претседател Доналд Трамп и британскиот премиер Кир Стармер телефонски разговараа за ситуацијата на Блискиот Исток. Разговорот се случи во сенка на остри критики од Вашингтон кон Лондон.

Причина за судирот стана одлуката на британската влада да не дозволи американските сили да ги користат британските бази во првиот бран напади врз Иран. Трамп со денови го критикува Стармер.

– Тој не е како Винстон Черчил – порача Трамп, алудирајќи на историскиот британски лидер.

По најавите дека Велика Британија размислува да испрати носач на авиони на Блискиот Исток, Трамп реагираше со иронија.

– Малку е доцна да се праќаат бродови, нели? Не ни требаат луѓе што се приклучуваат на војни откако веќе сме победиле.

Трамп порача дека САД не зависат од британска помош за победа во војната против Иран.

Британскиот премиер Кир Стармер се обиде да ја намали тензијата меѓу двете земји. Тој изјави дека Велика Британија и САД тесно соработуваат и разменуваат разузнавачки информации.

Стармер објасни дека првично одбил да дозволи користење на британските бази бидејќи сакал да се увери дека воената акција е законска и внимателно испланирана.

Подоцна сепак даде зелено светло за користење на базите на РАФ Ферфорд во Глостершир и на островот Диего Гарсија во Индискиот Океан.

Овој викенд четири американски бомбардери слетаа во Ферфорд. Базите веќе се користат за она што Лондон го нарекува „специфични одбранбени операции“ против ирански ракетни позиции.

The post ПОБЕДИВМЕ, ДОЦНА Е ДА ПРАТАТ БРОДОВИ Трамп го исмеа Стармер, вели „тој не е Черчил“ appeared first on plusinfo.mk.

Македонските државјани кои беа евакуирани од Израел поради воениот конфликт на Блискиот Исток вечерва се очекува да пристигнат во Скопје. Според информациите од Министерството за надворешни работи и надворешна трговија, авионот со патниците, кои се враќаат преку Египет, треба да слета на Меѓународниот аеродром Скопје околу 20 часот.

На аеродромот евакуираните граѓани ќе ги пречека заменик-министерот за надворешни работи и надворешна трговија, Зоран Димитровски.

Од ресорното министерство информираат дека процесот на враќање на македонските државјани од регионот продолжува и во наредните денови. Според нивните податоци, досега 505 македонски граѓани се обратиле за помош до Амбасадата на земјава во Абу Даби, 31 лице во Кувајт, 14 во Бахреин и 141 лице во Доха.

Од Министерството посочуваат дека се подготвува и следната фаза од евакуацијата.

„Во следните денови се очекува да започне реализацијата на враќањето на македонските државјани од Обединетите Арапски Емирати, како и на граѓаните кои се наоѓаат во Катар, Бахреин и Кувајт, за кои е предвидено враќање со организирани летови преку Кралството Саудиска Арабија. Процесот на евакуација се реализира согласно веќе разработен план, во согласност со безбедносните услови и во координација со надлежните институции“, информираат од Министерството.

Оттаму апелираат до сите македонски државјани кои се наоѓаат во погодените подрачја, а сè уште не стапиле во контакт со дипломатско-конзуларните претставништва, да го направат тоа во најкраток можен рок.

Граѓаните кои имаат потреба од помош можат да се јават на дежурните телефонски броеви во дипломатско-конзуларните претставништва или преку СОС-бројот на Министерството за надворешни работи и надворешна трговија.

The post МАКЕДОНЦИТЕ СЕ ИЗВЛЕКУВААТ ОД КРИЗНИОТ РЕГИОН Првата група евакуирани од Израел вечерва пристигнува во Скопје appeared first on plusinfo.mk.