Рекордно учество од 55.627 волонтери и повеќе од 645.000 килограми собран отпад на територијата на сите општини во Македонија – ова се резултатите од годинешнава, петта еколошка акција „Генералка викенд“ што се одржа од 9 до 11 мај. Во тридневната акција беа вклучени повеќе од 600 владини и невладини организации и институции, со логистичка и партнерска поддршка од голем број компании, обединети во заедничка цел за почиста и поздрава Македонија.

Според резултатите ова е најмасовната и најуспешната екоакција во Македонија.

– Ја поздравувам иницијативата „Генералка викенд“ како најмасовна волонтерска акција. Ние како Влада и како Министерство за животна средина и просторно планирање ги поддржуваме сите акции во кои се покажува силна иницијатива, јака волја, инклузивност и желба да бидеме дел од промените со кои ќе се овозможи подобра иднина за нас и за следните генерации. На нашиот пат кон Европа, треба да се однесуваме европски. Министерството за животна средина активно работи на воспоставување на системот на интегрирано и одржливо управување со отпадот – вели министерот за животна средина Изет Меџити.

Во рамки на акцијата беше организирана и едукативната иницијатива „Генералка викенд – Еко час“, реализирана во партнерство со Министерството за образование и наука и УНИЦЕФ. Во неа беа вклучени повеќе од 36.000 ученици и 1.900 наставници, кои низ различни активности во своето опкружување придонесоа за почиста животна средина, а резултатите од нивниот труд беа презентирани во училиштата.

Врз основа на меморандумот во траење од 10 години, кој Министерство за земјоделство, шумарство и водостопанство и Национални шуми го потпишаа со „Мен енд Маунтен“ во 2022 година, договорено е секоја година по завршувањето на „Генералка викенд“ во ноември да се реализира вториот дел од волонтерската акција наречена „Сончева Гора“ што е акција за пошумување. Според договорот, на секои 10 килограми собран отпад државата посветува по едно дрво од годишните планови за пошумување.

– Нашето земјоделство е директно зависно од квалитетот на природните ресурси, а секоја активност што го заштитува животниот простор влијае и на подобрувањето на квалитетот на производите што ги добиваме од природата. Ние сме посветени на продолжување на поддршката за вакви иницијативи кои имаат долгорочен ефект на општеството и животната средина – вели Борче Серафимовски, државен секретар во Министерството за земјоделство, шумарство и водостопанство.

Во рамките на овие акции за пошумување, во изминативе 4 години беа засадени над 125.000 садници на различни голи локации: околу езерото Младост во Велес, селото Ќојлија во општина Петровец, во близина на мегалитската опсерваторија Кокино и во општина Старо Нагоричане.

Почнувајќи од 2021 година, досега, во екоакцијата учествувале над 100.000 волонтери, а собран е повеќе од 1,5 милион килограми отпад.

– Континуитетот и растот на „Генералка викенд“ низ годиниве се доказ дека ваквите еко-иницијативи може да имаат сериозно позитивно влијание во општеството. Резултатите постигнати во изминативе 5 години покажуваат дека кога ќе се здружат граѓаните, институциите и бизнис-секторот промената е неизбежна. Вредноста на оваа акција не е само во бројките, туку во градењето свест, бидејќи ова не е прашање само на чиста околина туку и на создавање култура на одговорност и грижа – вели Снежана Савиќ-Димовска директор во „Пивара Скопје“.

По повод 5-годишниот јубилеј на „Генералка викенд“ од 17 јуни почнува патувачка изложба која ќе биде поставена во сите ЕУ центри во земјата. Патувачката изложба ќе започне во Тетово, а потоа ќе патува во Струга, Битола, Струмица, Велес, Крива Паланка и ќе заврши во Скопје, во ноември годинава.

„ГЕНЕРАЛКА ВИКЕНД е доказ дека со посветеност и преданост можеме заедно да создадеме чуда. И покрај сите проблеми во нашата земја, луѓето покажуваат дека имаат моќ за обнова. Благодарност до волонтерите и луѓето во општините“, се заблагодарија Гордана Софија и Ханес Јекл од Мен енд Маунтен.

Главен стратешки партнер на „Генералка викенд“, четврта година по ред е Пивара Скопје, а поддршка има и од официјалните партнери: Пакомак, Нула отпад, Шпаркасе банка, ЕВН Македонија, Макстил, Бучим Боров Дол, Саубермахер и Костал. Акцијата, која е во организација на Мен енд маунтен беше поддржана и од ЗЕЛС и Црвениот крст.

The post РЕКОРДНИ 55.627 ВОЛОНТЕРИ СОБРАА 645 ТОНИ ОТПАД „Генералка викенд“ е најмасовна екоакција што создава нова свест и еколошка култура appeared first on plusinfo.mk.

Позитивни коментари од бизнис заедницата откако вчера се донесе Буџетот за 2025 година, во кој вкупните приходи се планирани на ниво од 358,8 милијарди, а расходите на ниво од 400,2 милијарди денари. Буџетскиот дефицит е проектиран во апсолутен износ од 41.350 милиони денари, односно на 4 проценти од БДП, а планираниот раст на економијата е 3,7 проценти.

Имено, претседателот на Стопански комори Бранко Азески во вчерашното гостување во емисијата Отворено студио на МТВ на која учествуваа и претседателот на Владата Христијан Мицкоски, министерката за финансии Гордана Димитриеска Кочоска, како и претставниците од останатите стопански комори, рече дека буџетот кој го проектираше Владата е развоен и значи борба за подобра иднина за граѓаните и бизнисот.

– Конечно одиме кон таа работа, развоен буџет. Јас претставувам тука компании кои се моќни и финансиски консолидирани и они имаат потреба од раст, они се заинтересирани за нови инвестициони циклуси, а тоа со овој буџет го насетуваат дека ќе се случи. Второ, ние сите треба да бидеме максимално определени, и владата и бизнисот и сите чинители, дека отворање на нов инвестициски циклус значи и подобар живот за граѓаните, фирмите, за државата – објасни Азески.

Според Азески дуплирана е ставката за економски политики, додавајќи дека минатата година истата била 40, а сега е 8 милиони, како и дека 250 милиони одат во локалната самоуправа, а 250 милиони евра одат во бизнисот, што според него конечно се креира развоен наместо социјален буџет.

– Дуплирана е ставката за економски политики преку министерството за економија којашто минатата година беше 40, а оваа година е 80 милиони низ разни програми. 250 милиони евра одат во локалната самоуправа, 250 милиони евра ќе дојдат во бизнисот итн. Ова сето зборува дека конечно е свртена страницата и е трасиран патот за формирање на развоен, на местото на социјален буџет којшто 30 години го негувавме и не ни донесе раст поголем од 1,8% – дополни Азески.

Азески нагласи дека доколку Владата е доследна и ги испочитува сите ставки во делот на отворање на нов инвестициски циклус тогаш ќе се поттикне растот на градежништвото, за коешто рече дека е моторна сила за раст на економијата.

– Ако Владата е доследна и ги испочитува сите ставки во делот на отворање на нов инвестициски циклус, ќе остане само едно прашање, а тоа е ветувањето дека 51% од градежните работи на големите проекти ќе бидат наши компании, со што ќе се поттикне растот на градежништвото коешто е моторна сила за растот на економијата и тоа ќе придонесе да влеземе во еден оптимизам кој досега го немавме – заклучи Азески.

За разлика од опозициската СДСМ која изминатиот период го критикуваше земениот унгарски креди и обвинуваше за недомаќинско работење, бизнис заедницата ја поздрави одлуката на Владата за понудените 250 милиони евра од унгарскиот заем на бизнисот со поволни услови и истакна дека толку евтин кредит под вакви услови не се случил 30 години.

Имено, претседателот на Сојуз на Стопански комори Трајан Ангелковски во вчерашното интервју во Отворено студио истакна дека тој е втора генерација во бизнис секторот во неговото семејство, не се памети да се случило да плати толку ниска камата, потенцирајќи дека кредитот според овие параметри е повеќе од поволен.

– Јас сум втора генерација во бизнис секторот кај мене во семејството. Татко ми ја основа компанијата и ние во триесет и нешто години корпоративно ниеднаш немаме користено кредит за нашата фирма со рочност од 15 години. 1,95 до сега не ни се има случено да платиме толку ниска камата. Дефинитивно кредитот според овие параметри е повеќе од поволен – истакна Ангеловски.

Тој исто така сподели и лично искуство од неговата компанија која имала готов проект, но истиот стоеше во фиока, но ваквиот поволен кредит ги охрабрува да продолжат со плановите и да инвестираат.

– Сега ќе кажам ситуација во нашата компанија. Ние имаме спремна градежна дозвола, спремен проект. Две или три години поради нашата субјективна процена дека може да не е вистинско време да се инвестира проектот стоеше во фиока. Овој кредит не охрабрува да ние влеземе во инвестиција неколку милионска којашто, знаете секоја инвестиција носи со себе вработувања, инвестиции, нови машини, нова опрема, нови извозни аранжмани итн. Така да секоја поддршка на стопанството ние апсолутно ја поддржуваме и сметаме дека секој денар којшто ќе биде вложен во македонското стопанство ќе се врати повеќекратно – потенцираше Ангеловски.

И претседателот на Стопанската комора на Северозападна Македонија Менди Ќура исто така го поздрави ваквиот потег на Владата додавајќи дека само најавата дека ќе има 250 милиони евра за бизнисот и 250 милиони евра за општините го регулира банкарскиот пазар на каматите кои после ковид кризата беа високи.

– Само најавата дека ќе има 250 милиони евра за бизнис заедницата и 250 милиони за општините се стабилизира банкарскиот пазар во делот на каматите, затоа што после ковид кризата имавме високи стапки на каматните стапки од 5,6,7% и беа огромна тежина за бизнисот. Ова е за поздравување – вели Ќура.

Инаку, минатиот месец Владата и банкарскиот сектор се договорија за каматата за парите од унгарскиот кредит наменет за бизнисот.

– Договорена е каматна стапка од 1,95 проценти, до три години грејс период и до 15 години рок на отплата во зависност од потребите на компаниите. Ценам дека е ова историски договор со историска најниска каматна стапка – изјави тогаш премиерот Мицкоски.

The post ПОДОБРА ИДНИНА ЗА БИЗНИСОТ И РАСТ НА ЕКОНОМИЈАТА Бизнис секторот со пофалба за Буџетот за 2025 година appeared first on plusinfo.mk.

На обуката учествуваа 33 претставници од 28 различни компании и индустрии од Битола, кои имаа можност да ги унапредат своите знаења и да се запознаат со најдобрите практики за воведување системи за бизнис интегритет.

„Сесиите ги водеа експерти од врвни компании, кои споделија примери од практиката и методологии за воспоставување транспарентност и корпоративна одговорност. Програмата вклучуваше предавања и практични сесии за воведување етички програми, управување со ризици и примена на алатки за спречување на корупција. Секоја компанија учесник доби сертификат за учество, како и електронски материјали со дополнителни насоки за воведување интегритет во своите компании“, информираат од Стопанската комора.

Обуката во Битола е дел од серијата активности што Стопанската комора ги организира низ повеќе градови ширум земјата, со цел поттикнување на култура на интегритет во приватниот сектор.

„Овие активности се дел од заложбите на Комората за развој на деловната етика, која носи значителни придобивки за компаниите, вклучувајќи поголема доверба кај деловните партнери, инвеститорите и клиентите, како и долгорочна одржливост и успех на пазарот“, велат од Комората.

Програмата „Граѓаните против корупцијата” е предводена од Македонскиот центар за меѓународна соработка, поддржана од американскиот народ преку Агенцијата на САД за меѓународен развој (УСАИД), а се реализира преку Конзорциум на разновидни учесници, меѓу кои и Комората како претставник на приватниот бизнис сектор.

The post ГРАДЕЊЕ ДЕЛОВНА ЕТИКА И КОНКУРЕНТНОСТ Успешно одржана обука за бизнис интегритет во Битола appeared first on plusinfo.mk.

Според стопанските комори, енергетската криза дополнително го усложни економскиот амбиент и ги покажа и слабостите на системот. Но, врз работењето на компаниите силен одраз имаа и политичките случувања по локалните избори.

– Судејќи од оваа перспектива, можеби има простор да се констатира успешна година, но, за жал, економијата е многу покомплексен и сложен сегмент. Не се сите компании членки во некоја од коморите, што значи дека треба да имаме предвид уште многу други параметри за да дадеме таква констатација. Поради корона пандемијата, економијата и бизнисот претрпеа штети од кои се уште не закрепнале. Во споредба со 2020 година имаме над 2 000 компании помалку и секако, синџирот на снабдување е значително ослабен. Сепак, токму во период кога изгледаше дека се движиме позитивно кон закрепнување и враќање во нормала, не погодија енергетската криза и инфлацијата. Енергетската криза е сериозен проблем – вели за МИА извршниот директор на Стопанската комора на северозападна Македонија (СКСЗМ), Дрилон Исени.

Во однос на најавите за можен ценовен шок, Исени нагласува дека тоа ќе биде генерален проблем не само за компаниите, туку и за потрошувачите. Доколку тоа сценарио се случува, економската активност и куповната моќ може значително да се намали.

– Со зголемувањето на цените автоматски може да се намали побарувачката, а со тоа да ослаби и синџирот на снабдување, што значи дека компаниите ќе произведуваат или увезуваат помалку за домашниот пазар. Покрај ова намалување на обемот на работа, компаниите се соочуваат и со енормно зголемени фактури на енергенси што значи дека колатерален ефект ќе биде намалувањето на работните места. Всушност, не само компаниите, туку никој не е подготвен за ценовниот шок што може да се случи. Државата има воспоставено механизми за спречување на каква било злоупотреба од страна на компаниите, но од друга страна нема механизми или мерки за нивно помагање – истакнува директорот.

Тој додава и дека ако кризата трае, а најверојатно ќе биде така, државата ќе треба да ги субвенционира ранливите социјални категории за справување со поскапувањето на основните производи за тие да не се претворат во „супериорни добра“ што ќе можат да ги обезбедат само граѓаните чии примања се зголемени.

– Во 2022 година треба да се фокусираме на надминување на кризата. Пред се, треба да се повлечат некои од одлуките на Владата како што се недела неработен ден, замрзнување на цените на основните производи. Да се воведе итна мерка за поддршка на социјално ранливите категории, враќање на долговите на државата кон бизнисите, враќање на ДДВ во најбрз можен рок. Цела администрација треба да се насочи кон поддршка на политиките за обновлива енергија, како и кон целосно искористување на буџетските капитални расходи при што ќе имаме поголеми придобивки во економски аспект – вели Исени и информира дека членките на СКСЗМ 2021 година ја заокружиле со успех. Некои дури и ги надминале своите очекувања, а ретки се тие што имаат негативен биланс.

Претседателот на Стопанската комора на Македонија – Турција (MATTO), Ајдован Адемоски смета дека пролонгираната здравствена и економска криза, ефективноста на политиките за ограничување на економската штета од пандемијата, развојот на финансиските услови и движењето на цените на добрата и услугите, како и на капацитетот за прилагодување на економијата, се главни причини за неизвесноста околу закрепнувањето на економијата.

– Трендот на неизвесност ќе продолжи и во следната 2022 година во која се очекуваат дополнителни и негативни последици од пандемијата. Обидувајќи се да се справат со енергетската и економската криза на глобално ниво, компаниите се принудени да бараат решенија за обезбедување на потребните количини енергенси по најдобри можни цени во услови кога вредноста на струјата на светските берзи се продава и до пет пати поскапо од онаа која се набавуваше пред само неколку месеци. Моменталната состојба е прилично загрижувачка, бидејќи некои од големите компании кои можат да набават струја по 90 евра за мегават час, не можат тоа да го направат зашто немаат дозволи за увоз. Има некои фирми кои преку матичните компании од други земји може да добијат струја, но не можат тоа да го направат, бидејќи немаат механизам за пренос во нашата електро мрежа, а има и помали компании кои немаат начин како да увезат електрична енергија иако можат да ја платат – подвлекува Адемоски.

Покрај мерките и активностите за заздравување на економијата, потребно е, вели, да се креираат механизми кои ефикасно ќе ја стимулираат економската активност во насока на повисок и одржлив раст на среден рок. Акцентот во креирањето на политиките, според него, треба да се стави на инвестиции за дигитализација на услугите и поддршка на растот и развојот на компаниите.

– Согласно политиките и мерките на Владата со цел решавање на енергетската состојба и економско закрепнување на компаниите, бизнис секторот очекува брзо справување со проблемите, враќање на состојбата пред пандемијата и ефикасно реализирање на Планот за забрзан економски раст за 2022-2026 година донесен во октомври оваа година. Воедно, се следи реализацијата на донесените пакет мерки насочени кон справување со негативните последици врз економијата – објаснува претседателот на МАТТО и уште еднаш повторува дека компаниите кои во моментов напредуваат, во услови на светска пандемија, се оние кои всушност реагирале брзо на промените.

Како и во 2020 година, така и во 2021-ва, укажува Адемоски, пандемијата продолжи да ги менува начините на кои компаниите се принудени да се прилагодуваат за да обезбедат опстанок со што помали последици во работата.

– Со развивање нови трендови и воведување модифицирани технологии, компаниите и понатаму се принудени да пронаоѓаат начини за поефикасна подготовка на своите бизниси за 2022 година. Иако компаниите континуирано ги следат промените на пазарот и трансформациите кои влијаат врз нивниот бизнис, за многу компании во 2022 година ќе биде и понатаму важно да се преструктуираат или соодветно да го менуваат деловниот модел. Во претходните две пандемиски години, 2020 и 2021 година, имаше многу сектори кои беа целосно трансформирани, како што е угостителството и фирми кои организираат (менаџираат) настани. Така на пример, рестораните, односно дел од нив понудија услуги по посочени протоколи од надлежните институции се со цел да можат да опстанат на пазарот. Генерално, бидејќи компаниите мораа брзо да ги прилагодат своите активности со работење од далечна и работа од дома се наметна своевиден стандард кој повеќето компании ги принуди да го преиспитуваат својот деловен модел. Со работењето од далечна зависно од видот на бизнисот кај некои фирми дојде до зголемување на продуктивноста, додека кај други овој модел не се покажа идеален. Со воведувањето на видео конференциите, средбите лице в лице (состаноци, презентации, обуки) кои вклучуваат и дополнително време и трошоци за патувања, во 2021 година веќе не се стандард, туку избор и исклучок – истакнува Адемоски.

Тој потсетува и дека за бизнис секторот недостатокот на работна сила и натаму е исклучително сериозен проблем. Неопходно е да се стави фокус на ова прашање и да се помогне со цел креирање мерки и активности за задржување на младите, како и на квалитетната и квалификувана работна сила во државата.

Според претседателот на Стопанската комора на Северна Македонија, Бранко Азески, покрај актуелната енергетска и здравствена криза, горлив проблем остануваат и борбата со сивата економија и корупцијата, гасификацијата, поддршката на извозните компании и регулирањето на процедурите за издавање градежни дозволи кои директно влијаат врз инвестициите.

– Тоа се четирите приоритети на кои ќе се фокусираме, а секако тука е и прашањето за оспособување кадри за потребите на бизнисот кој ќе биде константно третиран во наредното десеттлетие. Овие проблеми не се нови и нивното решавање бара многу енергија и истрајност. Но, кога имаш економска, финансиска, здравствена, енергетска и политичка криза во исто време, акцентот се става само на едно – да преживееме. Ни се сугерираше и пред почетокот на пандемијата – хибернација, бидејќи никој не знае до кога ова ќе трае – потенцира Азески.

Според него, годината беше тешка, а кризите станаа составен дел од нашите животи и работење.

– Ова што во моментов го имаме беше над моите очекувања, зашто во такви услови да имаш вакви бројки е право чудо. Нормално дека тоа има своја цена и одраз брз буџетот. Но, токму продолжувањето на кризата ме прави да бидам помалку оптимист од секогаш. Тука морам да ја надополнам и политичката криза во која влеговме по локалните избори, што имаше силен одраз врз работењето на компаниите и создавањето подобар амбиент за стопанисување. Констатацијата на бизнис секторот е дека треба да се стремиме кон намалување на трошоците, зголемување на приходите и мислам дека како држава треба да бидеме крајно внимателни – нагласува Азески.

Во однос на енергетската криза, ставот на Азески е дека освен што го усложни и онака комплицираниот економски амбиент, ги покажа и слабостите на системот.

– Енергетската криза која почна од средината на 2021 година како продолжение на здравствено-економската криза предизвикана од ковид-19, само го усложни и така сложениот економски амбиент во кој државата функционира уште од 2008 година и ги покажа слабостите на системот на државата. Без стратегија за енергетскиот сектор, без инвестиции во изминатите 30 години, во услови на лошо менаџирање и висока партизација во целиот изминат период, само го потврди фактот дека без сопствени енергенси или без континуирано и стабилно снабдување од увоз, стопанскиот развој на земјата е доведен под знак прашање – дециден е претседателот на најстарата и најголема бизнис асоцијација.

Стопанските комори и во оваа прилика укажаа дека при носењето на секоја одлука, Владата треба да го консултира бизнисот, особено во ваков период – на здраствена, енергетска и економска криза.

The post КАКО БИЗНИС СЕКТОРОТ ЈА ОЦЕНУВА ЛАНСКАТА ГОДИНА? Енергетската криза ги покажа слабостите на системот appeared first on plusinfo.mk.

– Кон иницијативата веќе се приклучија повеќе од 200 претставници од приватниот сектор, кои преку проектот ги зајакнаа своите знаења и вештини да ја препознаат и спречат корупцијата. Претставниците на наши лидерски компании кои применуваат системи за интегритет штитејќи се од корупција на настанот ќе ги споделат своите искуства. Релевантни институции меѓу кои и заменик-претседателот на Владата задолжен за борба против корупцијата и криминал, одржлив развој и човечки ресурси, претставници на Делегацијата на ЕУ, стопански комори и граѓански организации кои работат во областа за спречување на корупцијата ќе бидат дел од овој настан. Ќе се обратат и врвни учесници од странство (Швајцарија, Бугарија, Босна и Херцеговина) со кои домашните компании ќе може да ги споделат своите искуства и да добијат стручни совети – велат организаторите.

Учесниците ќе говорат за системите за интегритет што ги применуваат за да се штитат од корупцијата и од нејзините неповолни влијанија.

– Ефективното справување со корупцијата во бизнис секторот е можно само преку соработка на сите сектори во општеството. Покрај тоа што е важно компаниите да ја прифатат својата одговорност и да се проактивни во превенирање и спречување на корупцијата, неопходно е институциите на системот да изградат политики што ќе ги препознаваат и наградуваат компаниите со интегритет и ќе го санкционираат коруптивното однесување. Преку проектот воспоставивме ефективна платформа за дијалог помеѓу јавните институции, коморите, бизнис здруженијата и граѓанските организации којашто ги идентификува овие предизвици и можности и развива предлог-политики коишто ќе овозможат бизнис опкружување без толеранција кон корупцијата. На конференцијата учесниците ќе имаат можност активно да се вклучат во овој дијалог – вели Никица Кусиникова, извршен директор на Конект, организатор на конференцијата.

Според програмскиот раководител на Конект, Виктор Мирчевски, корупцијата лесно може да го уништи бизнисот.

– Преземањето заштитни мерки во сопствениот двор и учеството во борбата против корупцијата веќе не е само избор, туку реално очекување и потреба на вистинскиот бизнис. Учесниците на конференцијата ќе имаат уникатна можност да осознаат што бизнисите низ Европа и кај нас прават за да се справат и заштитат од корупцијата. Посебна вредност е учеството на мрежите на Глобалниот договор на Обединетите нации – најголемате светска иницијатива за оджлив и одговорен бизнис. Говорници на највисоки раководни позиции од Швајцарија и Лихтеншајн, Бугарија и Босна и Херцеговина, а секако и од нашата земја ќе ги споделат своите искуства и експертиза – вели Мирчевски.

На конференцијата ќе биде претставен придонесот на проектот кон проценка на транспарентноста, отчетноста и ризиците од корупција во јавните претпријатија, развојот на меѓусекторски механизми за дијалог за намалување на корупцијата во бизнисот, пристапот до локални алатки за зајакнување на интегритетот и засилување на капацитетите на приватните бизниси за спречување и борба против корупцијата.

Сите заинтересирани можат своето учество да го потврдат на konekt@konekt.org.mk по што ќе добијат информации за онлајн просторот на конференцијата.

The post Пријавете се на онлајн Конференција за спречување на корупцијата во бизнис секторот appeared first on plusinfo.mk.

Ова во интервју за МИА го посочи премиерот Зоран Заев, кој говореше за натамошните перспективи на реформите во институциите сега со скратени буџети и рецесија, но и за тоа дали тој има храброст за елиминирање на рамковни и партиски вработувања.

– Буџетот за 2021 е изгласан и во него има средства за сите предвидени реформски и економски процеси. И сега треба да се одработи, многу да се работи, секој од нас да даде максимум, а тоа важи и за секој од државните службеници. И ете го реперот – кој е спремен да одработи и да биде сервис на граѓаните од кои е платен, не треба да се грижи за ништо. Се разбира, дел од администрацијата природно ќе гравитира кон бизнис секторот, а дел ќе се пензионира согласно законските рамки. Во секој случај, владината политика е јасна – администрацијата ќе се намалува и ќе станува се поуслужна кон граѓаните – нагласува Заев.

Вели Владата, која ја предводел и во овој и во претходниот мандат, работи врз принципите дека нема да има отпуштања заради реваншизам. Напротив, додава тој, влеговме во процес на длабока реформа на јавната администрација.

– Отворивме процес за создавање стручна и ефикасна, отчетна и транспарентна администрација која ќе обезбеди квалитетни услуги за граѓаните и бизнис-секторот и ќе ги заштити нивните права. Со примена на принципите на праведност и стручност при вработувањето и објективност при унапредувањето и наградувањето на вработените во јавната администрација, Владата на Република Северна Македонија создава администрација која ќе се ослободи од партиските спреги и ќе се посвети на решавање на проблемите на граѓаните и деловните субјекти, почитувајќи ги начелата на законитост и непристрасност при вршењето на должноста – нагласува Заев во интервјуто за МИА.

The post Заев: Дел од администрацијата ќе оди во бизнис секторот appeared first on plusinfo.mk.