Иако кандидатот Дарко Данев, професор на Машинскиот факултет во Скопје, освои поголем број гласови во ректорската трка на Универзитетот „Свети Кирил и Методиј”, функцијата ректор и натаму ќе ја извршува Биљана Ангелова.

Ваквиот исход произлегува од актуелниот модел на избори, утврден со важечкиот Закон за високо образование, кој предвидува специфичен систем на вреднување на гласовите по единици. Овој систем беше измислен во време кога министерка за образование од СДСМ беше професорката Рената Дескоска.

Според конечните резултати, Данев освоил 663 гласа, додека Ангелова добила 565, односно речиси 100 гласа помалку. Сепак, распределбата на гласовите по факултети и нивната тежина во вкупниот резултат довела до тоа Ангелова да го задржи мандатот.

Данев, според достапните податоци, остварил поединечна победа на повеќе факултети, и тоа (подредени по големина):

Економски факултет
Правен факултет
Филозофски факултет
Филолошки факултет
Медицински факултет
Факултет за физичка култура и јавно здравје
Природно-математички факултет
Машински факултет
Електротехнички факултет
Градежен факултет
Фармацевтски факултет
Факултет за драмски уметности
Факултет за ликовна уметност
Музичка академија

И покрај ваквата широка поддршка низ повеќе наставно-научни единици, изборниот систем овозможува резултатот да не се пресликува директно во конечниот избор на ректор.

Ова повторно ја отвора дебатата во академската јавност околу легитимноста на ваквиот изборен модел. Додека Ангелова има формален легалитет согласно законските процедури, дел од професорите и аналитичарите укажуваат дека недостига суштински легитимитет, имајќи предвид дека мнозинството гласови се на страната на противкандидатот.

Критиките се насочени кон нееднаквата тежина на гласовите, што според дел од академската заедница го нарушува принципот „еден професор – еден глас”. Според критичарите, актуелниот систем создава ситуација во која изборниот исход не ја одразува реалната волја на мнозинството наставно-научен кадар.

Се очекува ова прашање да биде дел од пошироките дискусии за реформите во високото образование, особено во контекст на најавените измени на законската рамка.

The post ПОБЕДИ ДАРКО ДАНЕВ, АМА БИЉАНА АНГЕЛОВА ЌЕ СИ ОСТАНЕ РЕКТОРКА Така е според словото на Законот за високо образование на Рената Дескоска appeared first on plusinfo.mk.