Летото е период кога илјадници возачи тргнуваат на подолги патувања, но многумина забораваат на една важна работа, редовната ротација на повеќесезонските гуми. Според експертите, токму нерамномерното трошење на гумите може да влијае врз управувањето и сопирањето на возилото.

Повеќесезонските гуми стануваат сè попопуларни бидејќи ја елиминираат потребата од сезонска замена. Сепак, тоа не значи дека не бараат редовно одржување.

Предните гуми се трошат побрзо

Кај автомобилите со преден погон, кои се најзастапени на патиштата, предните гуми носат најголем товар. Тие управуваат со возилото, ја пренесуваат силата на моторот и учествуваат во сопирањето.

Поради тоа, предните гуми се трошат значително побрзо од задните, што може да доведе до намалена стабилност и подолг пат на сопирање.

Ротација на секои 10.000 до 15.000 километри

Според германскиот автомобилски клуб АДАЦ, повеќесезонските гуми треба да се ротираат на секои 10.000 до 15.000 километри.

Возачите кои најчесто возат низ град, на кратки релации или управуваат со потешки возила, како електричните автомобили, треба почесто да ја проверуваат нивната состојба.

Експертите советуваат, ако се заменуваат само две гуми, новите секогаш да се поставуваат на задната оска, додека постарите, доколку се во добра состојба, се преместуваат напред.

Не заборавајте и на притисокот

Освен ротацијата, важна е и редовната проверка на притисокот во гумите, особено пред подолго патување. Неправилниот притисок може да предизвика побрзо трошење, послабо сопирање и поголема потрошувачка на гориво.

Експертите препорачуваат редовна контрола и на длабочината на шарата, бидејќи и најквалитетните повеќесезонски гуми ја губат ефикасноста кога ќе се истрошат.

The post НАЈЧЕСТАТА ГРЕШКА СО ПОВЕЌЕСЕЗОНСКИТЕ ГУМИ Пред да тргнете на одмор проверете една работа appeared first on plusinfo.mk.

Многу возачи во лето речиси постојано го користат копчето за рециркулација на воздухот, без да знаат дека тоа може да создаде проблем во кабината. Експертите предупредуваат дека предолгото користење на оваа функција може да го зголеми нивото на јаглерод диоксид и да влијае врз вниманието на возачот.

Рециркулацијата му овозможува на клима-уредот да го користи воздухот што веќе се наоѓа во кабината, наместо да внесува свеж воздух однадвор. Така автомобилот побрзо се лади и системот троши помалку енергија.

Функцијата е особено корисна кога надвор има високи температури, непријатни мириси или издувни гасови.

Но, проблемот настанува кога ова копче останува вклучено подолго време.

Што се случува во кабината?

Во затворен простор, патниците постојано издишуваат јаглерод диоксид. Ако нема доволно прилив на свеж воздух, неговото ниво постепено се зголемува.

Последиците можат да бидат замор, поспаност, намалена концентрација и побавни реакции. Ризикот е уште поголем кога во автомобилот патуваат повеќе лица.

Докторката Кристобел Акинола на социјалните мрежи предупреди на можните последици од долготрајната рециркулација. Таа опиша случај во кој патници станале поспани за време на патување, а возачот изгубил контрола врз возилото.

Сепак, овој конкретен случај не е независно потврден и треба да се сфати како предупредување, а не како докажан настан.

Истражувањата потврдуваат зголемување на CO₂

Истражувања покажуваат дека долготрајната рециркулација може значително да го зголеми нивото на јаглерод диоксид во кабината.

Студија објавена во списанието „Environmental Science and Pollution Research“ укажува дека оваа функција не треба да се користи предолго, особено кога во возилото има повеќе патници.

Поради тоа, експертите препорачуваат рециркулацијата да се користи кратко време, најчесто за почетно разладување на загреан автомобил, а потоа да се овозможи внесување свеж воздух.

На овие знаци треба да внимавате

Современите автомобили често имаат системи што автоматски го следат квалитетот на воздухот и самостојно го регулираат режимот на работа.

Сепак, возачите треба да бидат внимателни ако почувствуваат необјаснив замор, поспаност или ако прозорците почнат да се замаглуваат. Тоа може да биде знак дека во кабината нема доволно свеж воздух.

The post ОВА КОПЧЕ ГО КОРИСТАТ СИТЕ ВОЗАЧИ, А МОЖЕ ДА БИДЕ ОПАСНО Честа грешка зад воланот кај возењето во лето appeared first on plusinfo.mk.

Од денеска, 7 јули, во Европската Унија стапуваат во сила нови правила што значително ги менуваат стандардите за безбедност кај новите автомобили. Сите новопроизведени патнички автомобили (категорија М1) и лесни комерцијални возила (категорија N1) што ќе се продаваат на европскиот пазар мора задолжително да бидат опремени со напредни системи за активна безбедност.

Станува збор за втората фаза од Општата регулатива за безбедност (GSR2), со која Европската комисија има за цел значително да го намали бројот на сообраќајни несреќи и да обезбеди поголема заштита за возачите, патниците, пешаците и велосипедистите.

Иако првиот дел од регулативата почна да се применува во јули 2024 година и важеше само за новите модели што тогаш првпат се појавија на пазарот, од 7 јули 2026 година правилата се задолжителни за секое ново произведено возило, без разлика кога моделот добил хомологација.

Една од најзначајните новини е задолжителното вградување на напредни системи за автоматско сопирање во итни случаи (AEB). Покрај препознавањето на други возила, овие системи сега мора да детектираат и пешаци и велосипедисти кои се движат пред автомобилот и, доколку возачот не реагира навреме, самостојно да ги активираат сопирачките.

Посебно внимание привлекува и системот за следење на вниманието на возачот (ADDW). Со помош на инфрацрвени камери и сензори поставени во кабината, системот ја следи положбата на главата и насоката на погледот на возачот, и дење и ноќе. Ако возачот го тргне погледот од патот подолго од 3,5 секунди при брзина над 50 километри на час, или повеќе од шест секунди при брзина меѓу 20 и 50 километри на час, автомобилот автоматски ќе активира звучно и визуелно предупредување.

Европската комисија нагласува дека овие системи работат локално, во самиот автомобил. Не користат надворешни биометриски бази на податоци, не вршат препознавање лица и не ги складираат или пренесуваат снимките надвор од возилото, со што се гарантира заштита на приватноста.

Покрај електронските технологии, новите стандарди носат и конструктивни измени. Производителите ќе мора да обезбедат подобра директна видливост за возачите со намалување на „мртвите точки“, како и поголеми површини со ламинирано безбедносно стакло, што ја зголемува заштитата на патниците и пешаците при евентуален судир.

Регулативата воведува и нови барања за следење на состојбата на гумите. Покрај контролата на притисокот, новите системи ќе можат да го следат и абењето на шарите, со цел навремено да предупредат на ризик од губење на безбедноста при возење.

Задолжителна опрема од 7 јули

– Напреден систем за автоматско сопирање со препознавање пешаци и велосипедисти,

– Систем за следење на вниманието на возачот,
– Подобрена директна видливост за возачот,

– Нов систем за следење на абењето на гумите,

– Проширени површини со безбедносно ламинирано стакло за поголема заштита на патниците и пешаците.

Од Европската комисија посочуваат дека новите стандарди се дел од стратегијата „Визија нула“, чија крајна цел е до 2050 година бројот на загинати и тешко повредени во сообраќајни несреќи на европските патишта да се сведе на минимум.

The post НОВИТЕ АВТОМОБИЛИ ВО ЕУ ВЕЌЕ НЕМА ДА БИДАТ ИСТИ Задолжителни системи што сами реагираат при опасност appeared first on plusinfo.mk.

Министерот за внатрешни работи Панче Тошковски, заедно со претседателот на Републичкиот совет за безбедност на сообраќајот Горан Ангеловски, денеска на граничниот премин Табановце, заедно со министерот за внатрешни работи на Србија Ивица Дачиќ и вршителот на должност директор на Агенцијата за безбедност во сообраќајот на Србија Бранко Стаматовиќ, официјално ја означија првата заедничка превентивна кампања „Вози одморен“.

Кампањата има цел да ја подигне свеста кај возачите за опасностите од замор зад воланот, особено во екот на летната туристичка сезона кога значително се зголемува сообраќајот на Коридорот 10, од граничниот премин Табановце до граничниот премин Богородица.

Во своето обраќање, Тошковски истакна дека оваа заедничка превентивна акција е уште една потврда за успешната соработка меѓу двете соседни и пријателски држави.

– Заедно со нашите колеги од Србија испраќаме силна порака дека превенцијата е најдобриот начин за заштита на човечките животи. Возачите кои во овие жешки денови тргнуваат на подолги патувања треба да бидат одморени и во текот на патувањето да прават пауза на секои два до три часа, во траење од најмалку 15 минути. Потребно е да внесуваат доволно вода, да ги почитуваат сообраќајните правила, особено ограничувањата на брзината. Најголем дел од сообраќајните несреќи се случуваат поради замор на возачите или поради пребрзо возење. Затоа сметам дека ова е исклучително важна кампања, бидејќи човечкиот живот нема цена. Ако успееме да спасиме барем еден живот, тоа ќе биде успех за сите нас – истакна Тошковски.

Министерот потсети дека со воведувањето на системот „One Stop“ со Србија, времето на чекање на граничниот премин Табановце е значително намалено.

– Од неколкучасовни задржувања, денес чекањето е сведено на најмногу половина час, иако бројот на патници е зголемен за 15 до 20 проценти – рече Тошковски.

Тој упати апел до сите возачи кои транзитираат по Коридорите 8 и 10 низ Македонија, нагласувајќи дека системот „Безбеден град“ е целосно функционален и ги евидентира сите сообраќајни прекршоци.

– Секој прекршок сторен по 1 февруари 2026 година, од пуштањето на системот во функција, ќе биде евидентиран и санкциониран, без разлика дали возилото има македонски или странски регистарски таблички. Наскоро ќе започне и вториот чекор од системот, кој предвидува доставување на казните и до возачите со странски регистарски таблички, а токму овој граничен премин ќе биде меѓу првите каде што тоа ќе се применува – нагласи Тошковски.

Министерот за внатрешни работи на Србија, Ивица Дачиќ, оцени дека заедничката иницијатива е пример за успешна регионална соработка во интерес на безбедноста на сите учесници во сообраќајот.

Тој ја потенцираше одличната соработка меѓу двете министерства и полициски служби во сите области на безбедноста.

– Наш приоритет е да биде спасен секој човечки живот, особено животот на најмладите. Затоа апелираме до сите возачи да патуваат одморени и одговорно, особено кога тргнуваат на долги летни патувања – порача Дачиќ.

Во рамките на кампањата, на возачите кои минуваа низ граничниот премин Табановце им беа поделени шишиња вода, едукативни летоци со совети за безбедно возење и промотивен материјал со препораки за спречување на сообраќајни незгоди предизвикани од замор.

Од Министерството посочуваат дека оваа превентивна акција е дел од заедничките напори на македонските и српските институции за намалување на бројот на сообраќајни несреќи и заштита на животот и здравјето на сите учесници во сообраќајот за време на летната сезона.

The post 📽️ ТОШКОВСКИ И ДАЧИЌ ОД ТАБАНОВЦЕ ЈА ПОЧНАА КАМПАЊАТА „ВОЗИ ОДМОРЕН“ Македонија и Србија со нова кампања за спасување животи appeared first on plusinfo.mk.

По сè почестите случаи на небезбедно користење на електричните тротинети, Собранието ги усвои измените на Законот за безбедност на сообраќајот на патиштата, со кои се воведуваат построги правила за нивното учество во сообраќајот.

Во изминатиот период граѓаните сè почесто укажуваа на несовесно управување со електрични тротинети, особено од страна на малолетници кои неретко се движат со брзина поголема од дозволената, превезуваат по две или три лица на едно возило и учествуваат во сообраќајот без заштитна опрема, создавајќи опасност и за себе и за останатите учесници во сообраќајот.

Со измените, кои беа донесени по скратена постапка, се регулира користењето на лесните електрични возила, категорија во која спаѓаат и електричните тротинети.

Една од најважните новини е ограничувањето на максималната дозволена брзина на 20 километри на час, во согласност со препораките на Европската Унија за регулирање на овој вид превозни средства.

Истовремено, се зголемува и минималната возраст за управување со електричен тротинет. Наместо досегашните правила, отсега овие возила ќе смеат да ги управуваат само лица кои имаат наполнето најмалку 18 години.

Измените предвидуваат и значително заострување на казнената политика. Освен парични казни, во одредени случаи ќе биде можно и одземање на електричниот тротинет.

Таквата мерка ќе се применува доколку со тротинет управува малолетно лице, ако се надмине дозволената брзина, ако се превезува друго лице на возилото или ако возачот управува под дејство на алкохол.

Со законот се усогласени и прекршочните одредби со новите правила, а целта на измените е да се зголеми безбедноста во сообраќајот и да се намали бројот на прекршоци и несреќи во кои учествуваат електричните тротинети.

Во рамки на 109 седница Собранието попладнево донесе закон за изменување и дополнување на Законот за испитување и жигосување, односно обележување на огненото оружје и муницијата, по скратена постапка и со европско знаменце.

На истата седница беше донесен и Законот за јавни претпријатија и трговски друштва во сопственост или со учество на Македонија, по скратена постапка.

Во Собранието денеска седници ќе одржат собраниската Комисија за прашања на изборите и именувањата и Комисијата за надзор над спроведување на мерките за следење на комуникациите.

Заменик министерот за економија и труд, Марјан Ристески, претходно на матичната собраниска комисија појасни дека управувањето со јавните претпријатија, трговските друштва во државна сопственост се одвива во рамки на поставената правна и институционална структура, која се карактеризира со повеќе надлежни институции и различни законски решенија. Притоа, додаде, не е воспоставен целосен интегриран пристап во вршењето на сопственичките функции на државата, ниту пак постои јасно разграничување на улогата во управувањето што влијае врз координацијата, транспарентноста и ефикасноста во работењето на овие субјекти. ​

– Дополнително, управувањето и следењето на работата на претпријатијата не се во целост унифицирани, а достапноста на податоци и информации за нивното работење е ограничена. Од овие причини се укажува потреба од понатамошно уредување на правната рамка со цел да се обезбеди поефикасно, транспарентно, отчетно управување со претпријатијата во државна сопственост и што ќе биде содржина на овој закон – додаде Ристески.

Според пратеничката од опозициската СДСМ Сања Лукаревска, со овој закон се концентрира конролата кај извршна власт, особено кај Министертсвото за економија и труд, кое, рече таа, станува центар на моќ и централна кадровска и управувачка инстиутуција за државните претпријатија, кои досега беа распределени во повеќе ресори.

Пратениците денеска работеа и по дневниот ред од 105. седница, на која го донесоа Законот за ратификација на изменувањето и дополнувањето на Договорот за изменување и пристапување кон Централноевропскиот договор за слободна трговија, во согласност со Одлуката на Мешовитиот комитет на Централноевропскиот договор за слободна трговија за олеснување на електронската трговија, донесена на 9 октомври 2024 година.

Потпретседателот на Собранието, Антонијо Милошоски, ја прекина седницата, за продолжението ќе биде дополнително соопштено.

The post ВЕЌЕ НЕМА ВОЗЕЊЕ ПО 2-3 ЛИЦА НА ТРОТИНЕТ Забрана за малолетници и конфискација за најтешките прекршоци appeared first on plusinfo.mk.

„Ние сме свесни дека оваа мерка е строга и дека е висока. Но истата ја предлагаме со една и единствена цена, да ги заштитиме младите учесници во сообраќајот. Анализите на МВР покажуваат дека во повеќе од половината во несреќите со електричните тротинети, истите биле управувани од лица од 16 и 17 годишна возраст“.

Вака истакна координаторот на пратеничката група на ВМРО-ДПМНЕ Никола Мицевски за предложените законски измени со кои се предвидува минималната старосна граница за управување ваков вид возило да биде 18 години, а максимлната брзина 20 километри на час согласно препораките на Европската Унија.

Тој истакна дека регулацијата на овие лесни електрични возила сè уште е фрагментирана во земјава, анализите покажуваат дека во периодот од 2024 година до мај 2026 година, на патиштата низ државата во пријавени сообраќајни незгоди учествувале 2.352 возачи на мопеди, електрични тротинети и моторцикли. Од вкупниот број настрадани возачи на мопеди, електрични тротинети и моторцикли, 46 загинале, 585 се здобиле со тешки телесни повреди, а 1.347 со полесни телесни повреди.

– Токму затоа, ние го предлагаме ова решение, но оставаме простор за идни измени во согласност со анализите кои што ќе произлезат од ефектите од овој закон. Истовремено, се заострува казнената политика за сторители на  прекршоци, предвидени со законот при што во конкретни случаи, покрај изречената глоба, се предвидува и привремено одземање на возилото, за возење на малолетен возач, пречекорување на дозволената брзина, превезување на друго лице или возење под дејство на алкохол, во времетраење од 30 дена.

Предлог измените на Законот за безбедност во сообраќајот кој пратениците ќе го носат по скратена постапка откако се стави на дневен ред на собраниската седница.

The post ПРЕДЛОГ ЗАБРАНА ЗА ЕЛЕКТРИЧЕН ТРОТИНЕТ ЗА МАЛОЛЕТНИЦИ Во половина од несреќите учествувале 16 и 17-годишници appeared first on plusinfo.mk.

Уште една сообраќајна несреќа се случи на нелегалниот пешачки премин во скопската населба Бит Пазар, место кое со години важи за една од најризичните точки за пешаците во главниот град.

Во несреќата што се случила вчера попладне, автомобил удрил жена и маж кои го преминувале коловозот. Двајцата се здобиле со телесни повреди и биле пренесени на лекарска помош, но според првичните информации нивните животи не се во опасност.

На местото на настанот интервенирале екипи на Итната медицинска помош и полициски службеници, кои извршиле увид и работат на целосно утврдување на околностите под кои се случила несреќата.

Инцидентот повторно ги отвори прашањата за безбедноста на оваа локација, каде во изминатите години се регистрирани десетици сообраќајни незгоди со пешаци.

Жителите и случајните минувачи велат дека проблемот е одамна познат и дека е неопходно итно решение.

„Ги видов само кога паднале, не видов подалеку, но велат дека дошле од тука и таму. Тука треба да се постават семафори, нема друг начин“, изјави еден граѓанин кој бил во близина на местото на несреќата.

Граѓаните бараат преминот конечно да биде легализиран и соодветно обележан со бели линии, вертикална сигнализација и семафори, со цел да се намали ризикот од нови сообраќајни незгоди и да се зголеми безбедноста на пешаците.

The post 📽️ ДВАЈЦА УДРЕНИ СО КОЛА НА „ДИВИОТ“ ПРЕМИН КАЈ БИТ ПАЗАР Жена и маж завршија под тркалата на автомобил appeared first on plusinfo.mk.

Министерот за внатрешни работи Панче Тошковски најави засилени контроли и нови мерки за подобрување на безбедноста во сообраќајот, откако статистиката за изминатиот месец покажала загрижувачки број жртви на македонските патишта.

Гостувајќи во емисијата „Топ Тема“ на Телма ТВ, Тошковски истакна дека од вкупно 12 лица кои загинале во сообраќајни несреќи во текот на минатиот месец, дури пет биле мотоциклисти.

– За тројца од загинатите сум сигурен дека не носеле кацига. Ги замолувам сите кои управуваат мотор секогаш да носат кацига. Таа не се носи заради другиот, туку заради себе, бидејќи спасува живот – порача Тошковски.

Министерот нагласи дека полицијата ќе дејствува многу построго кон возачите кои ги прекршуваат правилата и ја загрозуваат безбедноста на другите учесници во сообраќајот.

– Ќе бидеме максимално репресивни кон сите кои дивеат по улиците и патиштата. Безбедноста на граѓаните мора да биде приоритет – рече Тошковски.

Тој посебно се осврна и на електричните тротинети, кои ги оцени како сериозен безбедносен проблем.

Според него, Министерството веќе анализира искуства од повеќе европски земји, а во подготовка се и законски измени кои би можеле да донесат построги правила за нивно користење.

– Мислам дека треба да одиме со порадикални решенија, особено во делот на забраните, воведување старосна граница и можеби регистрација на електричните тротинети. Тие претставуваат огромен предизвик за безбедноста во сообраќајот и очекувам конкретни решенија во најбрз можен рок – изјави Тошковски.

Министерот најави дека реформите во сообраќајната сфера ќе продолжат и во наредниот период, со цел намалување на бројот на сообраќајни несреќи и жртви на патиштата.

The post ЌЕ СЕ РЕГИСТРИРААТ ЛИ ТРОТИНЕТИТЕ? Тошковски најави радикални мерки и казни за несовесните возачи appeared first on plusinfo.mk.

Министерството за внатрешни работи и Републичкиот совет за безбедност на сообраќајот на патиштата започнаа заедничка кампања насочена кон поголема безбедност на корисниците на електрични тротинети, откако во изминатиот период е забележан пораст на бројот на сообраќајни незгоди и повреди поврзани со овој вид превоз.

Преку видео-едукативен спот, институциите ги потсетуваат граѓаните на законските правила за управување со електрични тротинети, но и на ризиците што ги носи неодговорното учество во сообраќајот.

Во кампањата е вклучено и сведоштво од лице кое доживеало несреќа додека управувало е-тротинет, како и стручно мислење од лекар кој укажува на сериозните последици што можат да настанат при падови и судири.

„Целта е да ја подигнеме свеста кај граѓаните, особено кај младите, за одговорно користење на електричните тротинети. Со почитување на правилата и користење на заштитна опрема може значително да се намали ризикот од повреди и сообраќајни незгоди“, велат од МВР и РСБСП.

Од институциите посочуваат дека електричните тротинети стануваат сè попопуларно превозно средство, но предупредуваат дека нивното користење бара исто ниво на одговорност како и управувањето со другите возила во сообраќајот.

Кампањата има за цел да поттикне побезбедно однесување на возачите на е-тротинети и да придонесе кон намалување на бројот на повредени лица на улиците.

The post 📽️ Е-ТРОТИНЕТОТ НЕ Е ИГРАЧКА, ТУКУ ВОЗИЛО Болниците се полнат со повредени, институциите со аларм до возачите. appeared first on plusinfo.mk.

Европските земји сѐ повеќе вложуваат во напредни системи за контрола на сообраќајот, а најновата генерација „паметни камери“ носи сосема нов пристап во надзорот на возачите.

За разлика од класичните радари кои ја мерат само брзината на движење, новите уреди користат вештачка интелигенција, камери со висока резолуција и системи за препознавање на регистарски таблички, овозможувајќи истовремено откривање на повеќе сообраќајни прекршоци.

Станува збор за таканаречени „8 во 1“ камери, кои автоматски можат да регистрираат:

– пречекорување на дозволената брзина;

– користење мобилен телефон додека се управува возило;

– неносење сигурносен појас;

– минување на црвено светло;

– неправилно свртување;

– непрописно менување сообраќајна лента;

– возење во спротивна насока;

– други прекршоци што ги препознава системот.

Новите системи имаат уште една предност – не бараат голема инфраструктура покрај патиштата. Тие можат да бидат поставени на столбови, надвозници или други постојни објекти, а во исто време контролираат повеќе коловозни ленти и возила што се движат во двата правци.

Според експертите, главната цел на ваквата технологија е да се подобри безбедноста во сообраќајот и да се намали бројот на сообраќајни несреќи предизвикани од невнимание на возачите.

Шпанија е меѓу првите европски земји што ќе ја воведат новата технологија. Градот Памплона веќе набави четири радари со вештачка интелигенција, кои треба да бидат пуштени во употреба во текот на јуни по завршувањето на постапката за сертификација.

Секој од уредите чини околу 20.000 евра, а ќе бидат поставени на неколку локации низ градот со цел да се зголеми ефикасноста на контролата на сообраќајот.

Се очекува ваквите системи во наредните години да се прошират и во други европски земји, што би можело да означи почеток на нова ера на дигитален надзор на патиштата.

The post 8 КАЗНИ СО НОВИТЕ „СУПЕР КАМЕРИ“ НА ЕВРОПСКИТЕ ПАТИШТА Паметните радари стануваат кошмар за возачите appeared first on plusinfo.mk.