Министерството за внатрешни работи води активна истрага за случајот на врсничко насилство во скопската населба Ѓорче Петров, во кој, според официјалните информации, веќе се повикани на разговор 14 лица, а за дел од нив ќе следуваат соодветни процесни дејствија. Министерот за внатрешни работи Панче Тошковски нагласи дека станува збор за сериозен проблем кој бара институционален, но и поширок општествен ангажман.

– Ова е сериозен проблем кој нè засега сите и кој ќе остане во фокусот на Министерството за внатрешни работи. Во однос на конкретниот случај за кој прашувате, запознаен сум дека се води истрага. Четиринаесет лица се повикани на разговор, а за дел од нив ќе следуваат соодветни процесни дејствија. Во рамки на предметот е вклучено и Јавното обвинителство и се постапува по насока на надлежен јавен обвинител – изјави Тошковски пред промоцијата на Протоколот за лица без државјанство во Клуб на пратеници во Скопје, дополнувајќи дека меѓу повиканите има и родители на ученичките вклучени во случајот.

Тој потенцираше дека јавноста ќе биде информирана за понатамошните чекори, но со внимателен пристап поради тоа што станува збор за малолетници. Истовремено министерот упати порака дека фокусот на врсничкото насилство не смее да се сведе само на репресија.

– Мораме сериозно и континуирано да бидеме фокусирани на овој тип криминалитет. Не само од аспект на Министерството за внатрешни работи, кое делува и превентивно и репресивно, туку преку вклучување на сите надлежни институции. Потребен е мултиинституционален и системски пристап. Апсолутно значајна е и улогата на родителите – нивната улога во воспитувањето, нивното однесување и нивната вклученост во образовниот процес на децата. Затоа упатувам апел до сите родители и општествени чинители да се фокусираме заедно на овој проблем. Тој постои, присутен е, дел од случаите излегуваат во јавноста, дел не, но тоа не значи дека не постојат – рече министерот.

Во врска со прашањето за проширување на ингеренциите на полицијата во борбата против семејното насилство, Тошковски најави значителни зајакнувања на ингеренциите и капацитетите на полицијата во борбата против семејното насилство, со фокус на потенцијалниот сторител и со цел поефикасна заштита на жртвите.

– Фокусот ќе биде на потенцијалниот сторител на насилство, без оглед дали е сопственик на објектот или не, и без оглед каде насилството е извршено. Ова претставува суштинска разлик  а во однос на досегашните решенија и е целосно усогласено со Истанбулската конвенција – нагласи Тошковски.

Тој информираше дека Министерството работи на зајакнување на интервенциските тимови и нивно технолошко опремување, вклучително и со современи интелигентни бодикамери.

– Целта ни е интервенциските тимови да бидат опремени со современи и интелигентни бодикамери, кои во реално време ќе ја снимаат фактичката состојба на терен. Со тоа ќе може непобитно да се утврди дали имало физичко насилство, закани или други дејствија – рече министерот.

Според него, ваквите решенија ќе обезбедат двојна заштита – и за жртвите и за полициските службеници кои професионално постапуваат. Паралелно, се развива и интелигентен систем кој ќе овозможи прибирање аудио и видео докази преку мобилни уреди, со согласност на жртвата, што дополнително ќе ја зајакне доказната постапка.

– Таквите докази ќе имаат значење и од репресивен и од превентивен аспект. Потенцијалните сторители ќе знаат дека не можат да избегнат одговорност, што ќе делува одвраќачки – истакна Тошковски.

Министерот додаде дека покрај технолошките решенија, се работи и на законски измени, јакнење на човечките капацитети, како и на вклучување граѓански организации како надзорен и советодавен механизам во институционалниот одговор.

На прашањата за неговиот став за случајот поврзан со филери и нелегални медицинско‑козметички постапки, Тошковски посочи дека околу сомнежите инспекциските служби се веќе на терен и постапките се во тек, без да се изнесуваат дополнителни детали за да не се наруши истрагата.

Во однос на прашањето за државјанството на избраните и именуваните функционери, тој повтори личен став дека функционерите треба да имаат едно државјанство, но нагласи дека евентуални промени мора внимателно да се анализираат од формално‑правен аспект.

The post 14 ЛИЦА СЕ ПОВИКАНИ НА РАЗГОВОР ЗА ВРСНИЧКОТО НАСИЛСТВО ВО ЃОРЧЕ ПЕТРОВ Истрагата е сериозна, потребен е внимателен пристап и одговор од институциите appeared first on plusinfo.mk.

Полициски службеници вчера вршеле проверки на ученици при влез во неколку средни училишта во Скопје. Од Министерство за внатрешни работи за Плусинфо велат дека станува збор за превентивна акција.

– По претходно изготвен план, полициски службеници од СВР Скопје вршат проверки во содејство со психолошко-педагошките служби во училиштата на дел од учениците при влез во сите средни училишта во Скопје. Проверките се од превентивен карактер чија цел е спречување на девијантни појави, како и откривање на евентуално носење наркотични средства и оружје. Безбедноста во училиштата е еден од приоритетите на полицијата – ни одговорија од МВР.

Според информациите, проверките се вршат на влезовите на училиштата и се насочени кон зголемување на безбедноста, а не се поврзани со конкретен инцидент.

Акцијата е дел од засилените активности на полицијата за превенција на насилство и недозволени предмети во образовните установи.

The post „ДАЛИ НОСИШ ДРОГА ИЛИ ОРУЖЈЕ ВО РАНЕЦ?“ Превентивна акција на полицијата во скопските средни училишта appeared first on plusinfo.mk.

Осумнаесетгодишник од тетовско е уапсен откако испраќал пораки со закани дека ќе постави бомби и ќе изврши убиства во средно училиште во Тетово.

Според информациите од СВР Тетово, случајот бил пријавен од професори од Средното медицинско училиште СМУ „Никола Штејн“, кои добиле информации од родители дека ученикот М.Р. испраќал вознемирувачки пораки до други ученици.

Полицијата веднаш презела мерки и, по добиена судска наредба, извршила претрес во дом и помошни простории во селото Палатица.

При претресот биле пронајдени повеќе предмети кои, според првичните информации, можеби потекнуваат од кривично дело.

Момчето е приведено и по целосно расчистување и документирање на случајот ќе биде поднесена соодветна пријава.

The post СЕ ЗАКАНУВАЛ СО УБИСТВА И СО ЕКСПЛОЗИИ Тетовската полиција приведе 18-годишник appeared first on plusinfo.mk.