Ниту еден македонски граѓанин на територија на Иран досега не побарал помош од Министерството за надворешни работи и надворешна трговија (МНР НТ), а шефот на дипломатијата Тимчо Муцунски уверува дека сите ресурси се подготвени доколку има потреба од евакуација и покрај тоа што немаме резидентно дипломатско конзуларно претставништво во таа држава.

– Во моментов од нас не е побарана помош од ниту еден македопнски граѓанин на територија на Иран – изјави денеска министерот за надворешни работи и надворешна трговија Тимчо Муцунски.

Тој потсети дека МНР НТ пред неколку дена објави повик во кој ги информираше граѓаните дека не треба да патуваат во Иран поради влошената безбедносна состојба.

– Таму има навистина тенденција на влошување на безбедносната состојба и објавивме повеќе контакт телефони од МНР и од нашата Амбасада во Анкара, Република Турција кои можат да помогнат да се мобилизира државата доколку постои потреба од евакуација на наши граѓани. Со Иран билатералната соработка не е на највисоко ниво, тоа го знаете, немаме резидентно дипломатско конзуларно претставништво во таа држава, но сите наши ресурси се подготвени да ги ставиме на располагање доколку има потреба од евакуација на наши граѓани – рече Муцунски, на новинарско прашање при посетата на Стопанската комора за информатички и комуникациски технологии МАСИТ.

Поради влошената безбедносна состојба во Исламската Република Иран, МНР НТ завчера упати апел до македонските граѓани, кои се наоѓаат на територијата на оваа држава, да ја напуштат земјата при првите можни и безбедни услови. Истовремено, апелираше и да се одложат сите патувања во Иран, кои не се неопходни.

Како што информираа од Министеството, веќе се ставени на располагање негови капацитети за асистенција на државјаните на Република Северна Македонија преку 24-часовниот СОС-дежурен телефон +389 75 268 736, електронската адреса globalsos@mfa.gov.mk , како и преку дежурниот телефонски број на дипломатско-конзуларното претставништво на Република Северна Македонија во Анкара: +90 539 456 97 10.

The post МАКЕДОНЦИ ВО ИРАН НЕ СЕ ЈАВИЛЕ ЗА ЕВАКУАЦИЈА Муцунски уверува дека ресурсите се подготвени appeared first on plusinfo.mk.

Координаторот на Советничката група на ВМРО-ДПМНЕ во Општина Карпош, Христо Саракинов, реагираше по повод новиот инцидент со падната фасада во скопската населба Козле, нагласувајќи дека ситуацијата отвора сериозни прашања за безбедноста на граѓаните и институционалната одговорност.

– Станува збор за сериозен настан кој, за среќа, помина без повредени, но со јасна порака, безбедноста на граѓаните мора да биде приоритет – порача Саракинов.

Тој потсети дека ова не е прв ваков инцидент, бидејќи и пред неколку години во истата населба, на само неколку стотини метри од новото место, фасада се урнала во речиси идентични околности.

Според Саракинов, станува збор за фасади кои биле дел од програмата за енергетска ефикасност, реализирани во време на градоначалникот на Карпош, Стевчо Јакимовски. Поради сериозноста на случајот, координаторот на ВМРО-ДПМНЕ побара институционална постапка за целосно утврдување на причините за овие несреќи.

Во своето обраќање, тој постави неколку клучни прашања:

– Дали изведбата била согласно со сите технички стандарди?

– Кој вршел стручен надзор врз изведбата?

– Дали е потребна итна дополнителна ревизија на слични објекти во општината?

– Апелирам до градежната инспекција да ги разгледа двата инцидента и да даде извештај за нив. Побаруваме од Општина Карпош целосна контрола на сите згради каде што имало фасадни интервенции во последните години – истакна тој.

Саракинов нагласи дека реакцијата не е политичка, туку грижа за секојдневната безбедност на граѓаните.

– Во име на граѓаните, бараме вистина, но и корективен пристап кон грешките од минатото – додаде тој.

Општината сè уште не се има официјално изјаснето за најновиот инцидент, а од граѓаните се очекува со зголемено внимание да ги пријавуваат сите сомнителни состојби околу стамбените објекти.

The post ПОВТОРНО ПАДНА ФАСАДА ВО КОЗЛЕ Советникот Саракинов бара институционална истрага и системска контрола appeared first on plusinfo.mk.