Премиерот Христијан Мицкоски изјави дека Владата со интерес ги следи најавите за постепена интеграција во Европската Унија, по предлогот на германскиот канцелар Фридрих Мерц, но посочи дека е рано за конкретни коментари додека иницијативата не стане официјална.

Одговарајќи на новинарско прашање, Мицкоски потврди дека ќе присуствува на Самитот ЕУ – Западен Балкан во Тиват, каде што очекува да слушне повеќе детали за предложените идеи и концепти.

– Тие размислувања и идеи ги слушаме подолго време, но не би можел да зборувам ништо додека не станат официјални. Канцеларот Мерц најави ваков развој на настаните уште на состанокот на Берлинскиот процес во Лондон минатата година и јас тоа го коментирав тогаш, дека ќе се појавуваат нови предлози и нови можности за регионот – изјави Мицкоски.

Тој нагласи дека Владата сака прво да ги слушне конкретните детали од иницијативата.

– Она што можам да го кажам во овој момент е дека сме љубопитни да дознаеме повеќе каква е идејата. Претпоставувам дека тоа ќе се случи на самитот во Тиват од 4 до 5 јуни. Јас ќе бидам таму и со нетрпение очекувам да ги слушнам овие концепти и идеи. Откако ќе имаме повеќе суштина, тогаш ќе можеме да зборуваме и во јавност – рече Мицкоски.

The post ЉУБОПИТНИ СМЕ ДА ДОЗНАЕМЕ ПОВЕЌЕ ЗА ИДЕЈАТА НА МЕРЦ Мицкоски очекува детали на самитот во Тиват appeared first on plusinfo.mk.

Mакедонија до февруари ќе ги заврши домашните задачи за „роаминг како дома“ во ЕУ, а останатото ќе биде лобирање и договор, рече вечерва министерот за дигитална трансформација Стефан Андоновски.

Тој не смета дека Црна Гора и Албанија пред Македонија ќе ја добијат оваа поволност зашто, како што истакна, сиот ангажман зависи од секоја држава поединечно.

– И тогаш кога првпат ја спомнав оваа замисла и идеја, беше дека ние мораме да си ги завршиме нашите домашни обврски и тие ќе ги завршиме до февруари. Останатото ќе биде лобирање и договор на ниво Македонија – ЕУ и Западен Балкан – ЕУ – нагласи министерот во интервју за емисијата „360 степени“ на МРТ 1.

Според него, она што Македонија треба да го заврши се четири регулативи пренесени во Законот за електронски комуникации, во една измена, и дополнително еден или два подзаконски акти.

– Ова прашање е едно од најважните кои нè засегаат и сметам, барем според мое мислење, е на ниво на визната либерализација, затоа што навистина се чувствува придобивката да бидете дел од поширокиот европски простор и во рамки на телекомуникацискиот свет. За нас беше топ-приоритет, но во ниту еден момент не бевме поставени во групата на Украина и Молдавија, кои први го започнаа процесот што беше инициран и од војната во Украина и од напливот на бегалци од Украина кон Полска и кон останатите држави на Европската Унија – напомена Андоновски.

Како што потенцира министерот, има две страни во договарањето за „роаминг како дома“ – едната е политичка, а другата е завршувањето на домашната задача.

– Политичкиот аспект потекна како проект од Украина и поради тоа тие беа ставени на брза лента и нивниот процес е завршен, а тие можат да ги користат услугите од оваа година. За нас, како и за Црна Гора и Албанија, беше најавено дека процесот ќе се одвива во текот на 2026 година, доколку ние ги имаме исполнето домашните обврски – рече министерот.

На прашањето дали станува збор за нефер и непринципиелен однос на ЕУ или за отсуство на иницијативност од земјите од регионот, вклучувајќи ја и Македонија, тој е дециден дека воопшто не се работи за отсуство на иницијативност.

– Не, не би се согласил дека е отсуство на иницијативност, зашто првпат се повика Европската Унија да обезбеди еднакви роаминг-услови за Македонија и за регионот уште на почетокот на Берлинскиот процес, кога тоа беше овозможено за државите од Западен Балкан, што значи дека и моите претходници и претходните влади се обидувале на некој начин да дискутираат, но ќе дојдам до тоа дека, за жал, не беше завршена домашната задача. Вториот аспект, политичкиот, сметам дека потекна од Украина поради кризата и беше вграден во договорите со Украина и со Молдавија во моментот кога тие беа потпишани. Кај нас и кај Црна Гора и Албанија нема потпишано таков вид договор, што значи ќе треба билатерално да се договараме. Во нашите договори за стабилизација и асоцијација не стојат прашањата на роаминг како можност за ослободување. Околу домашната задача – ние требало уште од 2018 година да го приспособиме европскиот комуникациски код. Тоа е еден голем законик на Европската Унија, во нашиот Закон за електронски комуникации, и уште четири други регулативи – две од 2016 година, една од 2018-2019 и една од 2022 година. За жал, ниту една од овие регулативи не биле пренесени во македонското законодавство. Ние направивме голем чекор со донесувањето на Законот за електронски комуникации во текот на 2025 година и на крајот на 2025 дополнително го доусогласивме – објасни министерот.

The post ДО ФЕВРУАРИ ЌЕ ГИ ЗАВРШИМЕ ОБВРСКИТЕ ЗА РОАМИНГ КАКО ДОМА ВО ЕУ Потоа следи лобирање до договор со Брисел appeared first on plusinfo.mk.

Патот на Западен Балкан кон европското семејство треба да се забрза, а Грција ќе се погрижи во оваа насока со низа иницијативи, порача министерот за надворешни работи на Грција, Јоргос Герапетритис во изјава за државната телевизија ЕРТ по учеството на Самитот на Берлинскиот процес во Лондон.

Шефот на грчката дипломатија истакна дека Берлинскиот процес е „исклучително важен форум, што се однесува на иднината на Западен Балкан и иднината на самата Европа“.

Тој уште еднаш ја повтори поддршката на Грција, велејќи дека земјата отсекогаш била предводник на процесот на евроинтеграција на Западен Балкан, „а денес повеќе од кога било е во првите редови на иницијативите“.

– Западен Балкан, што во моментов е на пат кон Европската Унија, треба да забрза. Но и Европската Унија ќе треба да направи сè што е во нејзини раце за регионот да стане место на мир и просперитет. А за да се случи тоа, единствениот сигурен пат е европското семејство. Тоа е неопходност, што станува сè поочигледна денес, со толку предизвици, со големи бранови на универзални проблеми, кои нè погодуваат, со национализмите, кои се развиваат. Патот кон европското семејство треба да се забрза. И Грција ќе се погрижи во оваа насока со низа иницијативи – нагласи Герапетритис.

Тој посочи дека разговарале и за миграцијата и за безбедносните предизвици, не само за физичката безбедност, туку и за хибридните закани. Додаде дека постои криза со храна, климатска криза, здравствени кризи, но и дека „моментално се наоѓаме во исклучително тешка состојба со повеќекратни предизвици“.

– Она што секојдневно го констатираме е дека кризите, од национални или регионални, стануваат сè повеќе глобални, а проблемите од локални или регионални сè почесто стануваат геополитички. Оваа трансформација создава уште поголема сложеност во меѓудржавните односи. Единственото решение што би го зајакнало просперитетот во регионот, со поголема придобивка за повеќемина, поголема конвергенција меѓу народите и државите, би била интеграцијата, патот на Западен Балкан кон европското семејство. Делиме заеднички предизвици, имаме големи заеднички проблеми и треба заедно да се справиме со нив – порача Герапетритис.

На маргините на Самитот на Берлинскиот процес за Западен Балкан што се одржува во Лондон, грчкиот министер за надворешни работи имал неколку средби меѓу кои и со премиерот Христијан Мицкоски.

Од Министерството за надворешни работи на Грција на профилот на Икс објавија фотографии на Герапетритис со премиерот Мицкоски, со премиерот на Косово, Албин Курти, со генералниот секретар на Регионалниот совет за соработка, Амер Капетановиќ и со генералниот секретар на ОБСЕ, Феридун Синирлиоглу.

The post ГРЦИЈА ЌЕ СЕ ПОГРИЖИ ДА СЕ ЗАБРЗА ПАТОТ НА ЗАПАДЕН БАЛКАН КОН ЕУ Интеграцијата е решение за многу актуелни кризи, вели Герапетритис appeared first on plusinfo.mk.

На маргините на Самитот за Западен Балкан оддржавме тет-а-тет средба со британскиот премиер Кир Стармер. Разговаравме за унапредување на билатералните односи, поддршката на Обединетото Кралство за европската перспектива на регионот и за зајакнување на економската соработка, објави премиерот Христијан Мицкоски на Фејсбук.

„Главата цел е Берлинскиот процес, односно средбите на највисоко ниво кои се одржуваат во текот на денот. Берлинскиот процес го организира лично премиерот Кир Стармер. Сериозно сме посветени на реализација на Договорот Влада со Влада“, објави Мицкоски.

Претходно тој се сретна со неговиот хрватски колега Андреј Пленковиќ и со директорката на ЕБРД Одил Рено-Басо.

„Остварена средба со хрватскиот колега Андреј Пленковиќ на која дискутиравме за европската перспектива и напредокот на реформските процеси. Хрватска е наш голем пријател и силен поддржувач на патот кон ЕУ“, објави Мицкоски.

За средбата со Рено-Басо, пак, премиерот објави дека зајакнувањето на економските и трговските односи останува еден од приоритетите на работата на Владата.

„На денешната средба со Одил Рено-Басо, директор на ЕБРД, разговаравме за економската состојба во државата, како и продлабочување на соработката и развој на нашата земја. Остануваме посветени за развој и раст на Македонија и сите граѓани“, напиша премиерот Мицкоски.

The post МИЦКОСКИ НА ТЕТ-А-ТЕТ СРЕДБА СО СТАРМЕР Зајакнува економската соработка со Обединетото Кралство appeared first on plusinfo.mk.

Во рамките на престојот во Лондон, премиерот Христијан Мицкоски оствари средба со неговото кралско височество, Кралот Чарлс III.

Премиерот информираше дека разговорот бил искрен и содржаен, а темите опфатија пријателството меѓу Македонија и Обединетото Кралство, стабилноста, развојот и заштитата на природата – области на кои Кралот Чарлс III со години посветува особено внимание.

„Разговаравме за пријателството помеѓу Македонија и Обединетото Кралство, за стабилноста, развојот и заштитата на природата, области на кои Кралот со години им посветува големо внимание. Оваа средба е признание и почит, но и поттик да продолжиме по патот на заедничките вредности, довербата и партнерството“, напиша Мицкоски на својот профил на Фејсбук.

Средбата се одржа во рамките на Самитот за Западен Балкан – Берлински процес, кој годинава се организира во Лондон под покровителство на британскиот премиер Кир Стармер.

Покрај Мицкоски, македонската владина делегација ја сочинуваат вицепремиерот и министер за транспорт Александар Николоски, министерот за надворешни работи и надворешна трговија Тимчо Муцунски, министерката за финансии Гордана Кочоска Димитриеска и министерот за евроинтеграции Орхан Муртезани.

– Главната цел на дводневната работна посета на Обединетото Кралство е Берлинскиот процес, односно средбите на највисоко ниво кои ќе се одржат во текот на денешниот ден. Берлинскиот процес го организира премиерот Кир Стармер и повторно ќе имаме чест, во краток период од само пет до шест месеци, премиерот Мицкоски да разговара со премиерот Стармер – изјави Николоски по средбата.

На самитот во Лондон ќе бидат сумирани постигнатите резултати и утврдени приоритетите за наредниот период во рамките на регионалната интеграција на Западен Балкан.

Берлинскиот процес започна во 2014 година, по иницијатива на тогашната германска канцеларка Ангела Меркел, со цел зајакнување на политичката, економската и инфраструктурната соработка меѓу земјите од Западен Балкан и нивно постепено приближување кон Европската Унија.

The post 📷 ИСТОРИСКИ МОМЕНТ ЗА МАКЕДОНИЈА Мицкоски се сретна со Кралот Чарлс III во Лондон appeared first on plusinfo.mk.

На денешниот Самит на министрите за надворешни работи на Западен Балкан и земјите – членки на ЕУ, вклучени во Берлинскиот процес, Велика Британија најави мобилизирање на финансиски средства за справување со мрежите за илегална имиграција и зајакнување на кибер-одбраната против ризикот од руско мешање во регионот.

Шефицата на британската дипломатија, Ивет Купер, изјави дека Велика Британија ќе мобилизира 10 милиони фунти (околу 11,5 милиони евра) за „иновативни програми“ насочени кон борба против илегалните мрежи за миграција на Балканот.

– Знаеме дека безбедноста на Западен Балкан влијае врз безбедноста на цела Европа и на нашата безбедност овде во Велика Британија – истакна Купер.

Дополнително, таа најави дека четири милиони фунти ќе бидат насочени кон зајакнување на капацитетите за кибер одбрана на земјите од регионот за заштита од руското мешање.

Дводневниот министерски состанок, кој почна синоќа со прием организиран од Купер, се одржува како дел од Берлинскиот процес, дипломатска иницијатива започната во 2014 година со цел забрзување на процесот на пристапување кон Европската унија на шесторката од Западен Балкан: Албанија, Босна и Херцеговина, Косово, Македонија, Црна Гора и Србија.

Средбата служи и како подготовка за самитот на лидерите од Западен Балкан во Лондон на 22 октомври, каде ќе се дискутираат следните чекори за интеграција во ЕУ и зајакнување на безбедноста во регионот.

– Со овие инвестиции, обезбедуваме дека земјите од Западен Балкан ќе имаат алатки да се борат против илегалната имиграција и сајбер заканите, а со тоа и целиот регион ќе биде посигурен – додава Купер.

The post БРИТАНИЈА ЈА ЗАЈАКНУВА БЕЗБЕДНОСТА НА ЗАПАДЕН БАЛКАН 11,5 милиони евра за борба против илегалната имиграција и руското мешање appeared first on plusinfo.mk.

Регионалната соработка, европските перспективи на земјите од Западен Балкан и заедничките безбедносни предизвици се главните теми на кои дискутираа министрите за надворешни работи во рамките на Берлинскиот процес, меѓу кои и македонскиот министер Тимчо Муцунски.

На состанокот што се одржува во Белфаст, министерот Муцунски во своето обраќање ја нагласи потребата од заеднички одговор на современите безбедносни ризици – хибридни и сајбер закани, дезинформации, миграции, нелегално финансирање и организиран криминал, кои дополнително влијаат на безбедноста и на стабилноста, поткопувајќи ги институциите и јавната доверба.

„На состанокот беше истакнато дека политиката на проширување на Европската Унија претставува витална рамка за трансформација на општествата и за унапредување на добрососедските односи, демократските стандарди и владеењето на правото. Заедничко беше констатирано дека постепената интеграција, Планот за раст и Заедничкиот регионален пазар значајно го приближуваат Западен Балкан до Европската Унија и го прават пристапниот процес поопиплив за граѓаните“, соопшти Минстерството за надворешни работи и надворешна трговија.

The post ПОТРЕБЕН Е ЗАЕДНИЧКИ ОДГОВОР ПРОТИВ ХИБРИДНИТЕ ЗАКАНИ Министерот Муцунски на состанок на Берлинскиот процес во Белфаст appeared first on plusinfo.mk.

Само обединета Европска Унија која нема да биде блокирана од поединечни земји членки, може во кризни времиња целата своја тежина да ја стави на вагата на глобалната политика, изјави германската министерка за надворешни работи Ана Бербок говорејќи за евроинтеграцијата и европската перспектива на Република Северна Македонија.

На заедничката прес-конференција по билатералната средба со македонскиот шеф на дипломатијата Тимчо Муцунски во Берлин, Бербок изјави:

– Нам како Германија ни е посебно важно, да напредуваме во квалификуваното мнозинство, а не само во едногласното одлучување, што би значело дека во пристапниот процес би можеле да одлучуваме со мнозинско, а не едногласно одлучување.

Потенцирајќи ја силната поддршка од Германија и фактот дека македонската влада посветено напредува во реформскиот процес, германската министерка Бербок ја спомена важноста на реформите во правосудството, борбата против корупција и зајакнување на правната држава.

Бербок ја нагласи и улогата на Македонија во регионалните иницијативи и притоа додаде дека Република Северна Македонија до сега преземала сериозна одговорност, пред се во рамки на „Берлинскиот процес“, а потоа и во мултилатералните иницијативи на меѓународната сцена, односно во Советот за човекови права на Обединетите Нации и Извршниот совет на организацијата за забрана на хемиско оружје.

Средбата во Берлин претставува прва средба меѓу двајцата министри откако Муцунски ја презеде министерската позиција во Министерството за надворешни работи и надворешна трговија(МНРНТ).

Македонскиот шеф на дипломатијата изрази убедување дека деблокадата на евроинтегративниот процес преку одржување на втората меѓувладина конференција и итен почеток на преговорите не само што ќе ја зајакне европската реформска агенда во Регионот, туку истиот ќе го направи и многу поотпорен на влијанијата од трети земји.

Притоа тој нагласи дека деблокирањето на нашиот евроинтеграциски процес е прашање од стратешки и безбедносен интерес, како за Регионот, така и за постојаните заложби на ЕУ.

– Германија е предводник на европската перспектива на нашата земја и на целиот регион, а силниот фокус на спроведување на реформите останува во центарот на пристапот на новата влада – нагласи Муцунски.

Тој изрази благодарност за континуираната поддршка и ангажманот на Германија за досега постигнатиот напредок на нашата земја на патот кон ЕУ, како и за посветеноста на Германија за забрзување на целокупниот процес на интегрирање на земјите од Западен Балкан, особено во рамки на иницијативата на Берлинскиот процес.

Фокусот на разговорите на средбата беше за одличните политички и економски односи помеѓу двете земји и цврстото партнерство во изминатите 30 години од воспоставувањето на дипломатските односи, за поддршката на Германија на нашиот евроинтегративен пат, како и за други актуелни теми од регионален и европски безбедносен аспект.

Меѓу другото, Муцунски истакна и дека Германија е клучен политички и економски партнер на нашата земја и еден од најголемите трговски партнери во годините наназад, при што изрази очекување за натамошно јакнење на економското партнерство меѓу двете земји и зголемување на обемот на трговска размена преку нови форми на заемна соработка.

The post ОБЕДИНЕТА ЕУ БЕЗ БЛОКАДИ ОД ПОЕДИНЕЧНИ ЧЛЕНКИ Бербок и Муцунски го потврдија партнерството меѓу Скопје и Берлин appeared first on plusinfo.mk.

„Овој план отвара нови перспективи за македонската економија“, истакна премиерот.

Мицкоски посочи дека со отворање на регионалниот пазар, нашите компании ќе имаат пристап до поголеми пазари, ќе можат да зголемат своите капацитети и да создадат нови работни места.

– Ова е важен чекор во идниот просперитет на нашата земја. Македонија се позиционира како активен партнер во процесите на регионална соработка и европска интеграција – рече премиерот Мицкоски.

The post НОВ ЧЕКОР КОН ЕДИНСТВЕНИОТ РЕГИОНАЛЕН ПАЗАР Македонија и земјите од Западен Балкан потпишаа Акционен план 2025-2028 appeared first on plusinfo.mk.

„Учествував во првата сесија од „Берлинскиот процес” посветен на регионалната соработка и заедничкиот регионален пазар, што е форма за поблиска соработка и операционализирање на стратегијата за економски развој на државите од Балканот. Ние мора да го пронајдеме нашиот интерес во отворање на нови можности и пазари за нашите компании, нови форми на соработка и обезбедување на посигурна иднина“.

The post 📷 МОРА ДА ОТВОРИМЕ НОВИ ПАЗАРИ ЗА КОМПАНИИТЕ Мицкоски учествуваше на првата сесија од Берлинскиот процес appeared first on plusinfo.mk.