Барбара Удовичиќ не планирала да стане интернет-феномен. Пред само неколку месеци, 51-годишната Риечанка, новинарка, телевизиска уредничка и водителка и професорка по психологија, едноставно почнала да снима кратки видеа во својата работна соба. Во февруари хрватските медиуми известуваа дека за само неколку дена нејзините видеа собрале 12,5 милиони прегледи. Во март бројката веќе надминала 75 милиони, а до август нејзината содржина стигнала до речиси една милијарда прегледи.

Сè почнало сосема случајно, откако се разболела нејзината 13-годишна женка-булдог, Берта. Барбара морала да земе боледување за да се грижи за неа, а бидејќи, како што самата вели, е човек кој тешко мирува, барала начин да го исполни времето. Тогаш ѝ паднала на памет идејата за подкаст во поинаков формат. Седнала во работната соба, почнала да зборува пред камера, а 15-годишната ќерка Соња ѝ помогнала видеата да стигнат на социјалните мрежи. За само два дена снимила околу 200 кратки видеа.

Но, она што ја направило различна не е продукцијата, туку темите. Барбара отворено зборува за сопствениот живот – за разводот, посвојувањето деца, болеста, мајчинството, стравовите, уморот, љубовта и односите меѓу луѓето. Не се обидува да изгледа совршено, ниту на публиката ѝ нуди формули за среќа. Иако е професорка по психологија, категорично нагласува дека не е терапевтка и дека не сака сериозни животни проблеми да се решаваат преку социјалните мрежи.

– Не нудам решенија бидејќи често ни самата ги немам – е еден од нејзините ставови.

Интересот бил толку голем што луѓето почнале да ѝ испраќаат стотици пораки дневно. Во март раскажала дека бројот на пораки понекогаш надминувал неколку стотици во еден ден, а нејзините видеа веќе се гледале и надвор од Хрватска – луѓе ѝ пишувале и на руски и француски јазик.

Паралелно со видеата, Барбара ја завршила и книгата на која работела со години. „Bedra puna riže“ е нејзиниот книжевен првенец, но не е класичен прирачник за самопомош. Книгата зборува за љубовта, односите, животните одлуки, загубите и личниот раст, без „токсична позитивност“ и без ветување дека постои едноставен рецепт за подобар живот. Интересот бил огромен: првата тиражна серија од 2.000 примероци била распродадена за само четири дена, а првите две изданија, вкупно 5.000 примероци, биле распродадени за неколку дена.

Сега приказната продолжува и во живо. Барбара подготви формат „Barbara Unplugged“, околу 70-минутно сценско раскажување во кое сама ќе стои пред публиката, без гости, телевизиски формат, монтажа или повторување на снимените сцени. Првата изведба е закажана за 19 септември во Кастав, место со лично значење за неа, а на 2 октомври следува настап во загрепскиот „Керемпух“, по што е најавена регионална турнеја. На сцената ќе има и приказни кои досега не ги споделила со публиката.

„Barbara Unplugged“ е авторски сторителинг формат замислен како интимна и многу лична средба меѓу Барбара и публиката. Не е претстава. Не е стендап. Не е предавање. И не е промоција на книга. Барбара не глуми никого и не презема никаква улога. На сцената го носи токму она поради што публиката почна да ја следи – својот поглед на луѓето, односите и животот, но овојпат без екран меѓу неа и публиката.

– Со месеци зборував во камера, најчесто сама, додека од другата страна на екранот беа луѓе кои не можев да ги видам. Сега за првпат сакам да ги видам. Не сакам да направам претстава, ниту на луѓето да им кажувам како треба да живеат. Сакам еден час да седнеме заедно и да разговараме за животот таков каков што навистина е. Без филтри, без улоги и без потреба на крајот од сè да имаме совршен заклучок. Веројатно ќе кажам и неколку работи поради кои подоцна ќе се прашувам зошто сум ги кажала пред полна сала. Но, веројатно токму во тоа е поентата – вели Барбара Удовичиќ.

Интересот на луѓето го објаснува велејќи дека станува збор за тоа што таа не им ветува промена, туку нуди препознавање.

– Тоа, во светот на хиперпродукцијата и постојаното делење совети, стана поретко од кога било. Кога ќе престанеме да нудиме одговори, луѓето почнуваат да се препознаваат себеси – вели таа.

Погледнете го видеото подолу и веднаш ќе ви стане јасно за што станува збор.

View this post on Instagram

 

A post shared by Barbara Udovičić (@barbara_udovicic)

The post 📽️ НЕ СОЛИ ПАМЕТ И РЕЦЕПТИ ЗА УСПЕШЕН ЖИВОТ, РАСКАЖУВА ОБИЧНИ НЕШТА ВО КОИ СИТЕ СЕ ПРЕПОЗНАВАМЕ Која е Барбара Удовичиќ, жената која го освои регионот? appeared first on plusinfo.mk.