Новиот селектор на македонската фудбалска репрезентација, Гоце Седлоски, вечерва го означи почетокот на мини-подготовките за мартовските бараж натпревари на гостински терен за пласман на Светското првенство кое ова лето ќе се одржи во САД, Канада и Мексико.

Македонската репрезентација на 26 март во Копенхаген ќе ѝ гостува на Данска, со цел да го изненади фаворитот и да обезбеди пласман во финалето од баражот. Во евентуалното финале, Македонија би се соочила со победникот од дуелот меѓу Чешка и Ирска. Поразените селекции од двата дуела ќе играат меѓусебно на 31 март, во Прага или Даблин.

Дефанзивецот на Борац Бања Лука, Себастијан Херера, кој доби дебитантски повик, не го криеше задоволството:

– За мене ова е нешто најголемо што може да се случи во кариерата – да го облечам дресот на Македонија. Чест и огромно задоволство е што сум тука. Ќе дадам сè од себе за да помогнам. Ова го посакував долго време и среќен сум што конечно дојде моментот. Најважно е да бидеме тим. Знам дека на мојата позиција Езгијан Алиоски има големо искуство и тоа е дополнителна мотивација. Очекувам тежок натпревар. Данска е силна, но се фокусираме на нас. Верувам дека натпреварот е 50-50 и дека сè зависи од нас. Одиме максимално мотивирани и се надевам на позитивен резултат – зошто да не и пласман во финале – изјави Ерера за официјалниот сајт на ФФМ.

Покрај него, дебитантски повик добија и напаѓачот на Сиетел, Дени Мусовски, како и стоперот на Шкендија, Имран Фетаи.

Повратниците во репрезентацијата се Бобан Николов од Вардар, Љупче Дориев од узбекистански Согдиана и Егзон Бејтулаи од косовска Дрита.

The post СЕДЛОСКИ ГИ СОБРА РЕПРЕЗЕНТАТИВЦИТЕ Македонија тргнува по место на Мундијалот appeared first on plusinfo.mk.

Селекторот на италијанската фудбалска репрезентација, Џенаро Гатузо, изјави дека е целосно фокусиран и „опседнат“ со целта да обезбеди пласман на Светското првенство 2026, откако Италија ги пропушти двата последни мундијалски турнири.

Италија не успеа да избори директен пласман на Мундијалот, но ќе добие нова шанса преку европскиот плејоф. Во март, во Бергамо, „аѕурите“ ќе играат полуфинален натпревар против Северна Ирска, додека во другото полуфинале ќе се соочат Велс и Босна и Херцеговина. Победниците од овие дуели ќе се сретнат во финалето, каде ќе се решава патникот на Светското првенство.

Гатузо посебно се осврна на болното искуство од 2022 година, кога Италија беше елиминирана од македонската репрезентација.

– Не смееме да ја повториме истата грешка како пред четири години против Македонија. Во модерниот фудбал нема лесни натпревари и секој противник заслужува максимален респект – изјави италијанскиот селектор.

Италија нема настап на Светско првенство повеќе од една деценија. По неуспехот да се квалификува за СП 2018, „аѕурите“ во 2022 година беа запрени токму од Македонија, која славеше со 1-0 во бараж-натпреварот одигран во Палермо.

– Мојата опсесија е Италија повторно да игра на Светско првенство. Мораме да се вратиме таму каде што припаѓаме. Тоа мора да го сакаме по секоја цена и да не дозволиме стравот и притисокот да нè вратат назад – порача Гатузо.

The post МАКЕДОНИЈА СÈ УШТЕ Е КОШМАР ЗА ИТАЛИЈАНЦИТЕ Гатузо со јасна порака, нема лесни натправари во баражот appeared first on plusinfo.mk.