Полициска интервенција во центар за баратели на азил во холандскиот град Зајст прераснала во хаотична сцена. Бремена жена била оттурната и паднала на земја. Во истиот момент нејзиниот сопруг се стрчал кон полицаецот и го нападнал.

Снимките од инцидентот брзо се прошириле на социјалните мрежи. Според локалните медиуми, мажот бил Палестинец кој претходно дознал дека членови на неговото семејство во Газа загинале во конфликтот. Емоциите кулминирале истата вечер.

Полицијата претходно била повикана во центарот по пријави за оштетување на имот и закани со нож. Жената само побарала да го придружува својот сопруг до притворниот центар. Тогаш дошло до турканицата.

Од полицијата соопштија дека видеата што кружат во јавноста не ја прикажуваат целата случка. Според нив, на снимките се гледа само дел од интервенцијата.

Истрагата за настанот е во тек.

The post 📽️ ИНЦИДЕНТ ВО ЦЕНТАР ЗА АЗИЛ ЈА РАЗБРАНУВА ХОЛАНДИЈА Полицаец турна бремена жена, следеше хаос appeared first on plusinfo.mk.

Претставниците на земјите-членки на ЕУ и Европскиот парламент рано утринава постигнаа договор за новите правила што им дозволуваат на земјите-членки да ги депортираат барателите на азил во „безбедни трети земји“, јави ДПА.

Спогодбата ќе овозможи испраќање на барател на азил во земја надвор од ЕУ што се смета за безбедна, дури и ако нема претходна врска со неа, на пример кога постои договор или аранжман помеѓу третата земја и државата на ЕУ.

Претходно, од барателите на азил се бараше да имаат тесна врска со таквата земја, како што се семејни врски или претходен продолжен престој таму, потсетува германската агенција.

Барателите на азил можеа да бидат депортирани во земји што никогаш не ги посетиле и со кои немаат семејни, културни или други врски. Меѓутоа, за малолетници без придружба, исклучокот што го бараат земјите на ЕУ останува на сила: врската со земјата во која се депортираат ќе продолжи да биде задолжителен услов.

Спогодбата сè уште мора формално да се усвои пред да стапи на сила, иако ова генерално се смета за формалност бидејќи преговарачите веќе се согласиле за компромис, пренесува ДПА.

Европскиот парламент вчера го отвори патот за преговори со десничарско мнозинство кое гласаше „за“. Поголемиот дел од поддршката дојде од пратениците од десниот центар и од десницата.

Прашањето за барање лична или правна врска со трета земја веќе беше дискутирано минатата година за време на преговорите за реформа на Заедничкиот европски систем за азил (CEAS).

Конечно е одлучено дека врската ќе остане задолжителен услов, но ќе биде предмет на преиспитување по одреден период.

– Илјадници мигранти се дават во Средоземното Море или се злоупотребени од шверцери на луѓе кои заработуваат богатство на нивна сметка. Од клучно значење е да преземеме мерки за да ги запреме факторите на привлекување кои одржуваат нездрав и нехуман систем – рече данскиот министер за имиграција Расмус Стоклунд.

The post КАКО ДА СЕ ДЕПОРТИРААТ БАРАТЕЛИ НА АЗИЛ ВО ТРЕТИ ЗЕМЈИ!? Европските земји усвоија заеднички правилник appeared first on plusinfo.mk.

Група земји, Хрватска, Германија, Белгија, Бугарија, Естонија, Франција, Финска, Ирска, Литванија, Латвија, Холандија и Полска, можат да побараат до крајот на 2026 година, во рамките на новиот механизам за солидарност на ЕУ, да не мора да прифаќаат дополнителни мигранти од други земји-членки.

Ова произлегува од анализата на комесарот за внатрешни работи на ЕУ, Магнус Брунер, за таканаречениот „фонд за солидарност“, кој треба да им олесни на земјите под висок миграциски притисок, како дел од реформата на политиката за азил на ЕУ. Според овој извештај, овие земји можат да се повикаат на фактот дека веќе се грижат за многу голем број баратели на азил за кои другите земји-членки на ЕУ всушност треба да бидат одговорни, пишува Дојче веле.

Поради мигрантскиот притисок во последните години, како и опасноста од нов притисок, овие држави ќе бидат делумно или целосно ослободени (доколку го побараат тоа) од други форми на солидарност, како што се плаќања во готово или материјални придонеси. Овие форми на поддршка теоретски можат да ги обезбедат земјите-членки на ЕУ кои не сакаат да примаат мигранти.

Анализата на Комисијата ги наведува Грција и Кипар, како и Шпанија и Италија, како држави кои ќе бидат погодни за солидарност од другите земји-членки на ЕУ следната година поради високиот миграциски притисок. Според извештајот, Грција и Кипар се соочија со непропорционален број пристигнувања во текот на изминатата година, додека Шпанија и Италија се оптоварени со големиот број бродови што пристигнуваат преку Медитеранот.

Комесарот за внатрешни работи на ЕУ, Магнус Брунер, коментирајќи ги резултатите од анализата, рече дека е јасно дека Германија веќе понела голем дел од товарот на солидарност пред да стапи во сила новиот пакт за азил. Според него, оваа земја-членка ќе има значителна корист од реформата на системот за азил и за миграција – особено благодарение на новите задачи за земјите-членки на надворешните граници.

Овие задачи вклучуваат регистрација на новодојденци, спроведување безбедносни проверки и нова гранична постапка. Реформата предвидува дека во иднина, одредени мигранти би можеле да бидат сместени во строго контролирани центри за прием, во услови слични на притвор по преминувањето на границата.

Комисијата издвои 250 милиони евра за дополнителна опрема на надворешните граници на ЕУ, како што се беспилотни летала за следење на границите.

Брунер нагласи дека построгата политика за азил веќе покажува резултати.

– Нелегалната миграција е намалена за 35 проценти во изминатата година – рече тој.

Извештајот, кој сега се презентира за прв пат, се смета за клучен чекор во спроведувањето на реформата на европскиот систем за азил (ГЕАС), кој вклучува механизам за солидарност за олеснување на товарот врз земјите-членки кои се особено погодени од миграцијата.

За таа цел, Европската комисија зеде предвид различни индикатори, како на пример, бројот на нелегални гранични преминувања, спасувања на море или барања за азил, како и економската сила и населението на секоја земја.

Според ГЕАС, земјите кои се особено оптоварени имаат право на солидарност од другите земји-членки на ЕУ, или преку прифаќање на мигранти или преку давање финансиски придонеси. Сепак, солидарноста може да се обезбеди и на други начини – на пример, со финансирање на проекти за борба против нерегуларната миграција во трети земји или со обезбедување материјална помош.

Целта на овој систем за балансирање е мигрантите да останат во земјата во која првпат пристигнуваат, наместо, на пример, да продолжат кон Германија. Земји како Грција или Италија, исто така, треба да спроведат забрзани процедури за азил на своите надворешни граници. За возврат, товарот треба да се олесни за земјите од ЕУ кои примаат најмногу мигранти.

Извештајот на Европската комисија ја претставува клучната основа за функционирање на овој механизам за солидарност. Предлозите на Комисијата за таканаречениот фонд за солидарност сега треба да бидат разгледани од земјите-членки. Државите, исто така, добија детални бројки што Европската комисија не ги објави јавно.

The post 12 ДРЖАВИ НЕ МОРА ДА ПРИМАТ НОВИ МИГРАНТИ ДО КРАЈОТ НА 2026 ГОДИНА Имаат право на пари и на помош, според новиот план на ЕУ appeared first on plusinfo.mk.

Германија воведува нови, построги мерки за намалување на големиот број мигранти кои пристигнуваат во земјата. Германскиот канцелар Олаф Шолц и 16 гувернери на сојузните покраини, денеска постигнаа компромисно решение за тоа прашање, кое беше голем политички проблем за власта.

Новите мерки вклучуваат забрзување на процедурите за азил, ограничувања на бенефициите за барателите на азил и поголема финансиска помош од федералната влада за државите и локалните заедници каде што пристигнуваат мигрантите.

По долгиот состанок што се одржа ноќта, Шолц го нарече договорот „историски момент“ кој покажува колку ова прашање станало товар за владата, пренесе Бета.

Бројот на нови барања за азил до крајот на септември годинава е за околу 73% поголем во однос на истиот период лани, покажуваат официјалните статистички податоци. Германија, исто така, прими повеќе од еден милион Украинци кои пристигнаа од почетокот на руската војна.

Сојузните држави и федералната влада утринава се договорија за промена на системот на трошоците за финансирање на барателите на азил.

Владата од следната година ќе плаќа годишен паушал од 7.500 евра за секој барател на азил, а не повеќе вкупен годишен износ од околу 3,7 милијарди евра. Барателите на азил ќе добиваат и помалку пари во иднина.

Контролите што Германија ги воспостави на своите граници со Швајцарија, Чешка, Полска и Австрија ќе бидат продолжени на неодредено време.

Повеќе од 250 илјади луѓе поднеле барање за азил во Германија во периодот од јануари до септември, во споредба со повеќе од 130 илјади во истиот период минатата година. Најголем дел од барателите на азил доаѓаат од Сирија, Авганистан и од Турција.

The post ГЕРМАНИЈА ВОВЕДУВА НОВИ ПОСТРОГИ МЕРКИ ЗА ДОСЕЛЕНИЦИТЕ Поголем филтер и помалку пари за барателите на азил appeared first on plusinfo.mk.

Човек навистина може да се запраша дали навистина ниту еден од припадниците на „загрозеното“ бугарско малцинство во Македонија, за кое интензивно трубат политичките лидери во Софија, и за чија заштита од наводната репресија, политички прогон и дискриминација, бугарскиот претседател Радев неодмна изрази готовност да ги испрати бугарските тајни безбедносни служби, не се решил да побара азилантска заштита и спас во „мајка“ Бугарија.

Она што јасно се забележува од статистиката на Евростат е дека македонски граѓани поднесуваат азилантски барања најмногу во западноевропските членки на ЕУ. Тоа што всушност е позитивно од читањето на статистичките податоци е дека бројките на азиланти од Македонија континуирано се намлауваат во последните години. Од 2016 година, кога се регистрирани вкупно 6.720 поднесени барања за азилантска заштита од македонски државјани, двојно помалку во 2018 година, па до осум пати помалата бројка во 2020 година – 840, а што секако е и резултат и на ограничените можности за влез на подрачјето на ЕУ поради пандемијата. И лани најпривлечни земји за македонските азиланти биле Германија (410 азилантски барања поднесни за првпат), Франција (240 барања), а по 55 биле поднесени во Шведска, Белгија и во Холандија. Во Италија, како и во Австрија, се регистрирани по 10 барања за азил.

Азилантските бранови од Балканот, вклучувајќи ја и Македонија, се значително намалени од периодот на воведување на визната либерализација со ЕУ пред десетина години. Баратели од Западен Балкан имаат најмалку шанси да добијат каква било меѓународна заштита или статус на азиланти. Пред сè станува збор за намалување на неосновани барања од страна на лажни азиланти, кои како „економски мигранти“, односно апликанти на кои не им е потребна виза за влез во Шенген-зоната, го оптоваруваат азилантскиот систем на ЕУ.

Стапката на признавање на азилантски статус во ЕУ е околу 33 отсто. Азил најчесто добиваат бегалци од Сирија, 85 отсто, Јемен, 82 отсто и Еритреја, 81 отсто, додека најниска стапка на одобрување азил имаат граѓаните на Македонија и Молдавците, со еден отсто, и Албанците со шест отсто. Македонците се исто така меѓу лицата кои најмногу повторно аплицираат откако ќе бидат одбиени. Една третина од македонските баратели го прави тоа и покрај фактот што има најмалку шанси да добие азил.

Поради тоа повеќе западноевропски земји како појдовна основа имаат список на безбедни држави, меѓу кои се и земјите од Западен Балкан, кои се сметаат за безбедни од аспект на азилантското право. Тоа практично значи дека граѓани од држави вклучени на таков список не можат да побараат азил повикувајќи се на политичко гонење и автоматски, односно по скратена постапка на разгледување на азилантски барања, се депортираат, без оглед што често се актуелизират и заложби за разјаснување на тоа колку овие држави навистина можат да бидат третирани како сигурни.

Таков список на безбедни држави е воведен во Германија во 2014 година, во Норвешка неколку години претходно, а во Шведска се очекува да стапи на сила на 1 мај годинава, со тоа што на списокот на шведскиот Миграциски завод како безбедни држави, меѓу другите, се наведени Македонија, Србија, Косово, Босна и Албанија.

И покрај таквите списоци барателите на азил и во иднина ќе добијат можност за индивидуална проверка на секој одделен случај, но разликата сега е што процедурата нема да трае со месеци, овозможувајќи им на азилантите да го злоуптребат системот, да ги ползуваат бенефитите и да „заработуваат илегално“ додека го чекаат одговорот на поднесените азилантски барања, туку и по само неколку дена ќе бидат враќани назад во земјите од кои дошле, со првите повратни летови.

Сепак, во рамки на ЕУ, и покрај кризата која се продлабочи по рекордно големите азилантски бранови во 2015 и 2016 година, и понатаму се гарантира дека секој има право да бара и да ужива во други држави азил од прогон, што е загарантирано и во Универзалната декларација на Обединетите нации од 1948 година.

Во тој контекст несомнено останува интересно прашањето, на кое со внимание би требало да се очекува одговор од бугарскиот државен врв, во колкав обем, како последица на репресија и поради страв од прогон или тортура, во Бугарија бараат заштита припадниците на „обесправеното бугарско малцинство“ во Македонија?

Во азилантската статистика на ЕУ нема податоци кои би укажувале на движења на бегалци во насока од Македонија кон Бугарија, која, впрочем, како полноправна ЕУ-членка веќе деценија и пол функционира и како дел од европскиот азилантски систем. Заклучоци во однос на таква проблематика не се понудени ни во најновиот годишен извештај на Стејт департментот за Македонија, и за Бугарија, туку се осудува политиката на Софија кон македонското малцинство во Бугарија.

Прашање за кое би била потребна посеопфатна анализа е во колкав обем всушност се бара азилантска заштита во други држави поради репресивниот и негаторски однос на бугарските власти, проследен со непочитување на слободата на здружување и одбивање да се регистрираат активистички групи на етнички Македонци во Бугарија?

Красимир Каракчанов, во негов провокативен стил, веднаш ги повика „никаквеците во американскиот Стејт департмент“ да си ја изострат диоптријата и да кажат „каде видоа македонско малцинство“ во Бугарија? Но, без оглед на дегутантните и деградирачки критики на бугарскиот вицепремиер, чија последица не е ништо повеќе отколку можеби краткотрајна состојба на шок, македонската дипломатија сега добива уште еден значаен повод да ја изостри на меѓународен план – сопствената диоптрија.

The post Македонски бегалци во Бугарија appeared first on plusinfo.mk.