Осум лица загинаа, а седуммина се повредени во пожар во дом за стари лица во Велики Борк, во белградската општина Бараево, јави Радио телевизија Србија (РТС).

Mинистерот за труд, ветерани и социјални работи во Владата на Србија, Немања Старовиќ, изјави дека од пожарот се евакуирани 13 лица.

Тој за РТС изјави дека, според првите прелиминарни податоци, постојат индиции дека пожарот е подметнат.

Тој додаде дека домот има важечка дозвола за работа и за барање за заштита од пожари. Тој изјави и дека е обезбедено итно сместување за евакуираните.

Вршителот на должноста началник на Одделот за вонредни состојби на Министерството за внатрешни работи на Србија, Лука Чаушиќ, за РТС изјави дека во домот престојувале 30 лица.

Седум повредени лица, како што наведе, биле преземени од Брза помош и пренесени во Военомедицинската академија (ВМА) и во Ургентниот центар.

Според него, по добиена пријава на 20 јануари, во 03.32 часот, единиците на Секторот за вонредни состојби веднаш биле испратени на местото на настанот и го констатирале пожарот во напредна фаза.

Пожарот е изгаснат. Во гаснењето учествувале голем број пожарникари и противпожарни возила.

– Сè уште бараме да видиме дали има остаток од извор кој би можел да предизвика дополнителен пожар, а причината ќе се утврди во наредните часови – рече Чаушиќ.

Како што додаде тој, домот за стари лица се наоѓа далеку од фреквентни патишта, но противпожарните бригади пристигнале брзо, а на повредените им била укажана помош во најкраток можен рок.

Бараево е една од 17-те белградски општини. Се наоѓа на 30 километри југозападно од центарот на Белград.

The post СЕ ЗАПАЛИ СТАРЕЧКИ ДОМ ВО БЕЛГРАД, ЗАГИНАА 8 ЛИЦА Постои сомнеж дека пожарот е подметнат appeared first on plusinfo.mk.