Гувернерот Трајко Славески останува на ставот дека се потребни законски измени со кои ќе се регулира определувањето на провизиите на банките.

– Мојот став е познат уште од првиот ден на мојот мандат – услугите во платниот промет ги сметам како јавно добро, јавна услуга која по ништо не е различна од снабдувањето на граѓаните со електрична енергија, со вода, природен гас, телекомуникациски услуги – изјави денеска Славески по прес-конференцијата во Народната банка.

Според него, може да се земе пример од некои европски држави како на пример Хрватска која донесе закон со кој голем дел од банкарските услуги од платниот промет ги направи бесплатни како што се отворањето, водењето и затворањето на банкарските сметки или плаќањето на шалтери.

Тој вели дека во тек се разговори со Македонската банкарска асоцијација за на одредени категории граѓани како што се пензионери и лица со ниски примања, да им се намалат трошоците за банкарските услуги. По средбата што се одржала пред две недели, се очекуваат забелешки од банките на предлогот што им бил доставен од Народната банка.

За министерката за финансии Гордана Димитриеска-Кочоска која изјави дека банкарските провизии никогаш не биле регулирани со закон, Славески вели дека имаат коректни односи и дека е нормално некогаш да имаат различни гледишта.

– Имаме коректни односи на соработка. Може некогаш за предлозите да имаме различни гледишта, но секогаш тргнуваме од интересот на граѓаните – рече Славески.

По најавите на три големи и една помала банка дека ќе ги зголемат провизиите, реагираше гувернерот со апел до банките да не го прават тоа бидејќи нема основ за такво нешто со оглед на тоа дека заработките на банките од провизиите и каматните приходи се стабилни.

The post ЌЕ СЕ НАМАЛАТ ЛИ БАНКАРСКИТЕ УСЛУГИ ЗА ПЕНЗИОНЕРИТЕ? Славески бара законски измени за провизиите на банките appeared first on plusinfo.mk.

Гувернерот на Народната банка Трајко Славески изразува загриженост поради најавеното зголемување на надоместоците во платниот промет од страна на неколку банки во земјата, оценувајќи дека во моментот не постојат оправдани причини за ваков потег.

– Народната банка е непријатно изненадена од одлуката на дел од банките да ги зголемат надоместоците што ги плаќаат граѓаните и компаниите за услугите во платниот промет. Особено загрижува фактот што во повеќето случаи станува збор за двоцифрени процентуални зголемувања- вели гувернерот Славески.

Тој потсетува дека минатата година, на иницијатива на Народната банка и во соработка со банкарскиот сектор преку Македонската банкарска асоцијација, биле направени напори за намалување на одредени надоместоци, што дало позитивни резултати за корисниците на банкарските услуги.

– Сега сме сведоци на обратен процес за кој не гледаме економска оправданост. Ги повикувам банките кои најавија зголемување на провизиите во најкус можен рок да ги преиспитаат своите одлуки и да се откажат од најавените поскапувања- нагласи гувернерот.

Воедно, тој посочува дека Комисијата за заштита на конкуренцијата треба внимателно да ги следи случувањата во банкарскиот сектор и да оцени дали ваквото однесување упатува на координирано дејствување што би можело да биде на штета на клиентите.

Осврнувајќи се на можностите за институционален одговор, Славески истакнува дека Министерството за финансии и Народната банка треба да разгледаат подготовка на измени во законската рамка, по примерот на повеќе европски и други земји, со кои би се овозможило регулирање на висината на надоместоците што банките ги наплаќаат за услугите во платниот промет.

Притоа, тој појаснува дека Народната банка во моментов нема законска надлежност директно да ги регулира провизиите што ги наплаќаат банките.

– Иако во јавноста често постои перцепција дека Народната банка може да интервенира во висината на банкарските провизии, постојната законска рамка не предвидува таква можност. Регулирањето е оставено на пазарните механизми и конкуренцијата, но актуелните случувања укажуваат на потребата од преиспитување на овој пристап- вели Славески.

Според него, потребата од евентуално законско регулирање произлегува од фактот што платниот промет претставува услуга од јавен интерес, неопходна за секојдневното функционирање на граѓаните и компаниите.

– Платниот промет има карактеристики на услуга од јавна корист, слично како снабдувањето со електрична енергија, вода или природен гас, што дополнително ја отвора дебатата за соодветен модел на регулирање на надоместоците во оваа област- додава Славески.

The post НЕКОИ БАНКИ НЕОПРАВДАНО ГИ ЗГОЛЕМИЈА ПРОВИЗИИТЕ Славески ги повика да ги преиспитаат одлуките appeared first on plusinfo.mk.

Гувернерот на Народната банка Трајко Славески, преку објава на Твитер информираше дека кај големите банки е направен значаен прв чекор во насока на намалување на банкарските провизии.

-Големите банки не само што ги намалија провизиите во висина на намалените давачки, туку дополнително ги намалија и за 15, 20, па дури и 30%, откажувајќи се од дел од сопствената заработувачка. Постои јасна тенденција на намалување на провизиите – вели Славески.

Воедно, тој најави дека наскоро се очекува донесување на измените на Законот за платежни услуги, со кои значително ќе се прошират функциите на основната платежна сметка, во интерес на граѓаните.

Со законските измени, како што велат од Народната банка, ќе се овозможи дозволено пречекорување на основната платежна сметка, нејзино користење и од лица кои веќе имаат други сметки, проширување на пакетот бесплатни услуги во интерниот и меѓубанкарскиот платен промет, како и до четири бесплатни подигнувања готовина месечно од банкомати на други банки.

Дополнително, Народната банка предложи и приспособен пакет за микро трговците, со цел поттикнување на финансиската вклученост и натамошна дигитализација на плаќањата.

The post НАСКОРО ПОВЕЌЕ МОЖНОСТИ ЗА ПЛАЌАЊЕ СО ОСНОВНИТЕ ПЛАТЕЖНИ СМЕТКИ Подготвени се законските измени appeared first on plusinfo.mk.