Венко Филипче изјави: „Не сме чуле никаде од Бугарија дека го негира нашиот идентитет.” Тоа би било помалку зачудувачко кога бугарските позиции навистина би биле нејасни, имплицитни или дипломатски прикриени. Но, тие со години се експлицитно формулирани во официјални државни документи, парламентарни декларации и позиции формално доставени до Европската Унија. Не станува збор за изјави кои треба да се толкуваат, да се бараат меѓу редови или да се извлекуваат од дипломатски разговори. Тие се јавно достапни, писмено фиксирани и институционално обврзувачки. Оттука, просто е неверојатно да се тврди дека нешто не е кажано кога тоа со години континуирано се повторува на најформален можен начин. Ги анализирам овие прашања со години, вклучително и преку анализи објавени во угледни меѓународни академски списанија, и фактите се недвосмислени: оној што не слушнал, не слушнал затоа што не сакал да слуша.

Да почнеме со основите. Националната рамковна позиција на Бугарија од 2019 година и парламентарната декларација усвоена истата година не се став на одредена влада или партија. Тие претставуваат обврзувачка државна доктрина што ја обврзува секоја бугарска влада. Оваа доктрина содржи три конкретни и јасно формулирани тврдења: дека македонската историја пред 1944 година е „бугарска историја“, дека македонскиот јазик е „бугарско наречје во некогашната југословенска република“ и дека македонската нација е вештачка конструкција создадена по 1944 година преку „пренапишување на историјата на дел од бугарскиот народ“ врз основа на „антибугарска идеолошка конструкција“ под „југословенски тоталитаризам“. Значи, во официјалниот бугарски дискурс, македонскиот национален идентитет се третира како изобличување на бугарскиот идентитет – конструкција чија легитимност, според таа логика, зависи од одржувањето на таа „антибугарска идеолошка конструкција“. Кога ќе се отстрани таа „антибугарска идеолошка конструкција“ тогаш логички исчезнува и легитимноста за постоење на посебен македонски идентитет. Ако ова не е негирање, тогаш зборот сосема го губи своето значење.

Но, негирањето не останува само на рамниште на владини позиции и парламентарни декларации. Тоа е оперативно – вградено во конкретни механизми со мерливи последици. Македонските организации во Бугарија остануваат забранети и покрај повеќекратните пресуди на Европскиот суд за човекови права, а Бугарија не спровела ниту една од нив. Земја членка на Европската Унија нема имплементирано пресуди на европски суд што директно се однесуваат на правото на организирање на македонската заедница на нејзина територија. Ова е конкретна и мерлива форма на негирање на македонскиот идентитет во практика.

Особено илустративна е логиката зад самото барање за уставни измени. Пописот во Македонија од 2021 година евидентираше 3.500 граѓани што се изјасниле како Бугари по етничка припадност, а само околу 1.500 го посочиле бугарскиот јазик како мајчин. Сепак, Бугарија во суштина не бара уставно признавање на оваа пописно евидентирана заедница. Наместо тоа, тврди дека над 100.000 македонски граѓани треба да бидат третирани како дел од бугарската уставна категорија – врз основа на тоа што поседуваат бугарски пасоши добиени преку бугарскиот режим на дијаспорско државјанство. Тој режим е изграден врз доктрината дека Македонците се од бугарско потекло и затоа имаат право на бугарско државјанство доколку го потврдат тоа потекло. Со други зборови, пасошката шема е директно продолжение на самото негирање: прво се тврди дека Македонците се всушност Бугари, а потоа бројот на оние што прифатиле такви пасоши – под силни практични поттикнувања поврзани со предностите на поседување пасош на земја-членка на ЕУ – се користи како аргумент за уставно реструктурирање. Целиот механизам се потпира врз негирањето на македонскиот идентитет, а не врз неговото уважување.

Вториот протокол (записник), усвоен во 2022 година во рамките на таканаречениот француски предлог, го институционализира овој притисок во самата архитектура на пристапниот процес. Со вградувањето на обврските што произлегуваат од член 12 од Договорот за добрососедство во петтиот параграф од Преговарачката рамка на ЕУ, заедно со Копенхагенските критериуми, условеноста поврзана со историјата и идентитетот ќе добива процедурална видливост на секоја меѓувладина конференција откако ќе започнат преговорите за членство – а бидејќи секоја таква конференција бара едногласност, Бугарија го задржува структурното вето на секој чекор. Притоа, застојот во Историската комисија поради крајно спротивставените позиции на двете страни околу историските толкувања Протоколот (записникот) ги третира како доказ за „недоволен напредок“ на Македонија. Во истиот контекст, Бугарија испрати и официјална декларација до Европската Унија во која експлицитно повторува дека терминот „македонски јазик“ за неа означува регионална, односно дијалектна варијанта на бугарскиот јазик.

Во официјалната бугарска рамка, секое македонско историско тврдење што го потврдува континуитетот на македонската посебност пред 1944 година може да биде окарактеризирано како израз на „антибугарска идеолошка конструкција“ па дури и говор на омраза, со оглед на тоа дека Протоколот воопшто не го дефинира тој поим. Академското и јавното афирмирање на македонскиот историски идентитет на тој начин се претвора во повод за приговори во пристапниот процес. Овие барања како и завршување на целата работа на Историската комисија според Протоколот треба да се исполнат до членството на Македонија во ЕУ. А ваквите барања, пак, не можат да се исполнат без суштинско прифаќање на бугарската доктринарна рамка – односно без признавање дека македонскиот идентитет е во својата основа бугарски.

Тврдењето на Филипче е особено неодржливо кога ќе се погледнат хронологијата и изворите. Националната рамковна позиција е усвоена во 2019 година. Парламентарната декларација – исто така во 2019 година. Бугарското вето кон крајот на 2020 година беше оправдано токму со „недоволен напредок“ во Историската комисија. Бугарскиот парламент во мај 2025 година повторно едногласно потврди дека „европскиот консензус“ ги вклучува протоколите што ги операционализираат историските и идентитетските барања. Бугарскиот министер за надворешни работи истата година експлицитно изјави дека уставните измени не се единствен услов – тие се само еден од условите. Ова не се измислици за потребите на домашните политички битки туку официјални бугарски документи, позиции и изјави.

Разбирам дека постои искушение прашањето за европската интеграција да се сведе на тврдење дека постои само еден услов, дека тој услов е едноставен и дека сè друго е политичка манипулација. Но, одговорноста кон граѓаните бара радикално поинаков пристап. Тие заслужуваат точна слика за тоа со што навистина се соочува Македонија. А таа слика покажува дека Бугарија не само што го негира македонскиот идентитет, туку тоа негирање го претвори во структурна алатка на условеност вградена во самиот процес на европска интеграција. Оној што „не слушнал никаде“ за ова, или не ги прочитал јавно достапните документи, или свесно избрал да не ги чита. Ниту едното ниту другото не е оправдување за коментирање прашања од ваква тежина со толкава доза цинизам, ниту, пак, преправањето дека проблемот не постои ќе придонесе тој сам од себе да исчезне.

Авторот е универзитетски професор и доктор на политички науки

(Објавено на веб-сајтот Солуција.мк)

The post „Не сме чуле никаде“ – или не сакале да слушнат? appeared first on plusinfo.mk.

Пратениците на СДСМ и Коалицијата, денеска поднесоа иницијатива за основање на Анкетна комисија за трагедијата во Кочани, на којашто се придружија и пратениците од Левица а беше дел и од барањата на семејствата на загинатите и повредените, се вели во соопштението од СДСМ.

„Анкетната комисија треба да ја утврди целата вистина, како и на кој начин била загрозена безбедноста на присутните во објектот во Кочани, да ги утврди институционалните пропусти, прекршувањата на законските одредби, како и да лоцира политичка одговорност.

Врз основа на наодите, пратениците предлагаат Анкетната комисија да изготви и на Собранието да му поднесе Извештај најдоцна еден месец по завршување со работа.

Ги повикуваме сите пратеници од сите политички партии да ја поддржат оваа иницијатива, активно да учествуваат во процесот, Собранието што поскоро да ја формира и Анкетната комисија да започне со работа“, се вели во иницијативата.

The post СДСМ И ЛЕВИЦА ЗАЕДНО ЈА ПОДНЕСОА ИНИЦИЈАТИВАТА ЗА КОМИСИЈА ЗА КОЧАНИ Предлагаат да се изготви извештај за трагедијата appeared first on plusinfo.mk.

„Ова е јасен знак дека кога Бугарија е обединета, кога сите наши европратеници, институции и политички сили дејствуваат заедно можеме да постигнеме резултати и да го браниме националниот интерес на највисоко ниво во Европа! Посебна благодарност до Андреј Ковачев и нашето семејство – Европската народна партија!“,

Вака изјави поранешниот бугарски премиер и лидер на партија ГЕРБ Бојко Борисов за гласањето за Извештајот за Македонија во Европарламентот, јави агенцијата БГНЕС. Со гласањето Европарламентот ги отфрли сите текстови поврзни со „македонскиот идентитет и јазик“ од извештајот.

– Во последните недели одржав голем број разговори со европски лидери и претставници на водечки политички семејства во ЕУ. Јасно објаснив дека европските документи не треба да се користат за националистичка пропаганда, туку треба да им служат на вистината и добрососедството. Драго ми е што гласот на Бугарија беше слушнат – додаде Борисов.

Поранешниот бугарски премиер и актуелен влијателен политичар вели и дека покрај ситуацијата им подава рака на пријателите од Северна Македонија.

– Повторно им подавам рака на нашите пријатели во Северна Македонија – да продолжиме заедно напред, врз основа на почитување и спроведување на Договорот за пријателство и добрососедство. Во мене и во лицето на Бугарија, тие секогаш ќе имаат искрен и близок партнер.

Европарламентот усвои извештај за Македонија, во кој се избришани сите делови каде стои „македонски јазик“ и „македонски идентитет“.

Известувачот за Македонија од Европарламентот, Томас Вајц, за усвојувањето на извештајот пред пратениците изјави дека „за жал, некои бугарски европратеници го искористија извештајот за домашни цели“, пишува Вајц.

The post БУГАРИЈА ОБЕДИНЕТА ВО АНТИМАКЕДОНСКАТА ПОЛИТИКА Бојко Борисов им се заблагодари на европратениците appeared first on plusinfo.mk.

Известувачот за Македонија во ЕП, Томас Вајц, ги искара бугарските пратеници кои го киднапираа извештајот за домашни цели. Ја пофали Македонија како лидер на Западен Балкан по реформите, нагласувајќи дека проширувањето треба да биде процес базиран на заслуги, врз основа на Копенхашките критериуми и ја повика Македонија да ги спроведе потребните реформи. Потенцираше и дека нејзиното пристапување е неправедно блокирано предолго поради билатерални спорови, поттикнувајќи ја јавната фрустрација и разочарување од ЕУ.

– Денеска го усвоивме првиот извештај за земјата од 2022 година. Македонија е лидер во регионот, покажувајќи вистинска посветеност на вредностите на ЕУ, вклучително и историска промена на името и смели реформи. Но, нејзиното пристапување е неправедно блокирано предолго поради билатерални спорови, поттикнувајќи ја јавната фрустрација и разочарување од ЕУ. Извештајот нагласува дека проширувањето треба да биде процес базиран на заслуги, врз основа на Копенхашките критериуми и ја повикува Македонија да ги спроведе потребните реформи. Ги повикувам сите политички партии во Македонија да се вклучат во конструктивен дијалог за да се постигне потребниот консензус, што би го зајакнал мултиетничкиот карактер на земјата и би го забрзал напредокот во ЕУ. Како известувач, неуморно работев за добро избалансиран и непристрасен извештај за демократскиот напредок на оваа земја. За жал, некои бугарски европратеници го киднапираа извештајот за домашни цели – изјави Вајц во Европарламентот.

The post НЕКОИ БУГАРСКИ ПРАТЕНИЦИ ГО КИДНАПИРАА ИЗВЕШТАЈОТ ЗА ДОМАШНИ ЦЕЛИ Вајц ја искара Софија, го пофали Скопје appeared first on plusinfo.mk.

Ексминистерот за финансии и политички аналитичар Џевдет Хајредини појасни дека само Македонците можат да одлучуваат за македонските идентитетски прашања.

,,Во врска со прашањaта за идентитетот, историјата и македонскиот јазик, право да одлучува има само македонскиот народ. Албанците нивната одлука треба да ја поддржат”, посочува Хајредини во својата објава на социјалната мрежа Фејсбук.

The post САМО МАКЕДОНЦИТЕ МОЖАТ ДА ОДЛУЧУВААТ ЗА ИСТОРИЈАТА И ЗА МАКЕДОНСКИОТ ЈАЗИК Хајредини посочи дека Албанците треба да го поддржат македонскиот народ appeared first on plusinfo.mk.

Ниту сум имала намера, ниту некогаш ќе направам такво нешто да употребам вето за да навредам некој јазик, ниту пак сум се водела од партиски совети, изјави денеска претседателката Гордана Сиљановска-Давкова во врска со ветото што го стави на Законот за заштита на децата.

Во изјава за медиумите дадена денеска по литургијата во Соборниот храм во Скопје, Сиљановска-Давкова рече е должна да ги почитува Уставот и законите.

– Објаснив дека не сум законодавец, нема да предложам решение, не сум Уставен суд, значи нема да го оценувам преку ветото, само упатив повик уште еднаш да се разгледаат членовите 9 и 10 и уште еднаш да се размисли дали ваквиот начин на полагање и добивање лиценца нема да внесе или да отвори простор за дискреционо овластување. Не сум јас пристрасната, туку партиите кои посегаат по квалификации. Јас само тргнав од еден ноторен уставен и правен факт дека најпрво во самиот закон има одредба во која се вели дека меѓу останатото начинот на полагањето и начинот на издавањето на лиценците се уредува со акти на министерот. Во членовите 9 и 10 има одредби што мислам дека треба парламентарниот состав да ги преобмисли – изјави Сиљановска-Давкова.

Она на што укажува, како што појасни, е и тоа што во предложеното законско решение, формулацијата најмалку 20%, не е како што е во Уставот и во законите.

– Ако пратениците одлучат да го задржат ова решение, јас ќе морам да го потпишам законот, но не мислам дека ова е намерно, претпоставувам дека дошло до превид – изјави Сиљановска-Давкова.

За нејзината постапка, како што рече, ја информирала Владата и надлежните министри.

По непотпишувањето на указот од страна на претседателката, од Владата информираа дека законот ќе се доработи и ќе се достави во Собранието во закониските ркови.

Денеска и премиерот Христијан Мицкоски во изјава за медиумите го потврди ова.

– Како што сум информиран, станува збор за членовите 9 и 10 и тие така што се формулирани се спротивни на Уставот и на Законот за јазиците така што мислам дека е рутина и формалност. Ќе бидат корегирани и ќе бидат согласно Уставот и Законот за јазици и очекувам дека успешно ќе бидат усвоени. Мислам дека малку несмасно е тоа направено. Тоа е една формулација којашто ќе се надмине. Инаку се знае дека службен јазик на целата територија на државата е македонскиот јазик, но сите оние кои ќе побараат и на албански да биде формуларот за полагање, тоа сега ќе биде прецизно формулирано согласно Уставот и законите и ќе биде овозможено – изјави Мицкоски пред Соборниот храм во Скопје.

СИЉАНОВСКА НЕ СТАВИ ПОТПИС, СЕ ОГЛАСИ ВЛАДАТА Законот за заштита на децата ќе биде доработен

The post НЕМА ДА УПОТРЕБАМ ВЕТО ЗА ДА НАВРЕДАМ НЕКОЈ ЈАЗИК Спорни се членовите 9 и 10 во Законот за заштита на децата appeared first on plusinfo.mk.

Ова го порача од Брисел премиерот Христијан Мицкоски, кој во престолнината на Европската Унија предводи владина делегација во чиј состав се министерот за надворешни работи и надворешна трговија, Тимчо Муцунски, министерот за европски прашања, Орхан Муртезани, неговиот советник за надворешни работи, амбасадорот Марковски, и шефот на кабинет, Владимир Нелоски.

Мицкоски, како што се посочува во соопштението од владината прес-служба, денеска го започнал работниот ден со билатерален состанок со заменик претседателката на Европската Комисија и одговорна за надворешна политика и одбранбени прашања, Каја Калас.

– На состанокот разговаравме за сите оние стравови и за сето она што ние како држава и како народ моравме да го направиме во минатото, во име на тие исти европски вредности, и дека никогаш повеќе не смееме, не само поради нас туку и поради вредностите коишто ги споделуваме со Европската Унија, да разговараме за билатерални прашања, за идентитетски прашања, како и дека никогаш повеќе никој нема право да го оспорува нашиот многувековен идентитет и нашиот мајчин, македонски јазик којшто има многувековни корени – истакнал Мицкоски.

Посетата продолжува со билатерални средби на премиерот Мицкоски со премиерот на Полска, Доналд Туск, кој ќе биде следниот претседавач на Европска Унија, предвидена е и билатерална средба со премиерот на Шпанија, Педро Санчез, по што ќе учествува и на официјалниот Самит на Европската Унија со Западен Балкан.

– Очекувам навистина позитивни впечатоци, тука сме да ги браниме македонските интереси и македонскиот идентитет, а и истовремено да испратиме порака дека нашето место, веќе неколкупати тоа сме го потврдиле и го заслужуваме, е токму тука, да бидеме рамноправна и полноправна членка на Европската Унија – вели премиерот Мицкоски.

Имплементацијата на Планот за раст на Западниот Балкан, напорите за регионална интеграција, како и можностите за натамошно унапредување на постепената интеграција меѓу Европската Унија и регионот, ќе бидат главни теми на денешниот Самит ЕУ-Западен Балкан.

На работната вечера на Самитот, лидерите ќе разговараат и за геополитичкиот контекст и за предизвиците што ги засегаат ЕУ и регионот на Западниот Балкан. Претседателот на Европскиот совет, Антонио Кошта, кој ќе претседава со Самитот, во поканата за собирот посочува дека „сегашниот геополитички контекст бара да се даде нов моментум на работата на ЕУ со земјите од регионот“.

Премиерот Мицкоски утре ќе учествува и на Самитот на Европската народна партија (ЕПП), кој ќе се одржи пред средбата на шефовите на држави или влади на членките на ЕУ.

ЕУ ДА ЈА ЗАБРЗА ИНТЕГРАЦИЈАТА НА МАКЕДОНИЈА Мицкоски се сретна со високата претставничка Каја Калас

The post РАЗГОВАРАВМЕ ДЕКА НИКОЈ НИКОГАШ ВЕЌЕ НЕ СМЕЕ ДА ГО ОСПОРУВА НАШИОТ ИДЕНТИТЕТ Мицкоски сподели детали од состанокот во Брисел appeared first on plusinfo.mk.

– До 11 декември сигурно остануваме, а за понатаму дополнително ќе се решава. Денеска има состанок на Централното претседателство, има и координација на лидерите од Европскиот фронт каде што ќе се одлучува за следните чекори – рече Османи.

Како што посочи Османи, повикот за „Стража на јазикот“ значи одбрана на мултиетничка Северна Македонија, бидејќи, како што рече, ова не е само кауза на Албанците.

— Повикот за одбрана на јазикот е до сите, меѓутоа не само на јазикот, туку ова е повик за стража на мултиетничка, демократска и европска Северна Македонија, така што ова не е само кауза на Албанците, овде очекувам секој човек од добра волја, којшто смета дека требаше досега да ги надминеме прашањата кои што се однесуваат на основните права на етничките заедници и да градиме држава и општество кое што цели кон Европската унија, но, за жал, ретроградни сили се обидуваат да не вратат назад, предизвикувајќи го најсветото за граѓаните – рече Османи.

Според него, Уставниот суд извршува наредби од владејачката ВМРО-ДПМНЕ, која, како што рече, во партиската програма има забрана за етничка припадност.

– Жал ми е што како земја кандидат за членство во Европската унија имаме Уставен суд којшто нарачува партиска програма, знаете дека одлуката да се забрани етничката припадност е пишано во програмата на ВМРО-ДПМНЕ и се реализира со наредба на партијата преку Уставен суд – рече Османи.

The post ДУИ НА СОСТАНОК ЌЕ ГИ ОДЛУЧИ СЛЕДНИТЕ ЧЕКОРИ Османи од „стражата“ порача дека ова не е само кауза на Албанците appeared first on plusinfo.mk.

ЕУ на различни начини се обидува да ја унапреди повеќејазичноста во Европа, така што целта околу која се фокусираат таквите напори е секој ЕУ-граѓанин, освен својот мајчин јазик, да владее уште два јазика. Јазичната реалност во Европа се потпира врз мошне разгранет и раширен мултилингвизам. Во Европа се зборуваат околу 225 „домашни“ јазици. Кон таа бројка треба да се додадат и јазиците на имигрантите, доселениците, така што, според некои истражувачи, вкупната бројка изнесува некаде околу 300 јазици кои се користат во Европа.

Но она што се случува во голем број ЕУ-членки е дека еднојазичноста се смета за сосема нормален и правилен модел на јазична политика. Голем број земји се чини се вртат се повеќе внатре кон себе. Екстремната десница во изминатите години постигнаа успех на изборите во низа земји, а како резултат на таквиот развој се засилија и националистичките ветришта. За јазичната политика во Европа тоа е лоша работа. Една од последиците на заострувањето на толеранцијата во однос на користењето на сопствениот јазик, е дека многумина кои зборуваат малцински јазици можеби не се осмелуваат да го употребуваат својот јазик во јавен простор во градовите.

„Обединети во различноста“ е мотото на Европската Унија, врз кое по сѐ изгледа сѐ повеќе паѓа сенка. Повеќејазичноста во Европската унија е принцип кој е формулиран и прифатен како дел од Повелбата за формирање на Европската Економска Заедница од 1958 година. Повеќејазичноста во институциите на ЕУ со тоа е прогласена како еден од главните принципи за почитување и обединетост во различноста, пред се со цел да се избегне доминација на една земја на штета на друга. Притоа секој граѓанин на ЕУ има право документите на Унијата да ги чита на јазик што ги разбира.

Но, од друга страна, со процесот на проширување на Европската Унија и постојаното приклучување на нови земји членки, повеќејазичноста, всушност, станува гломазен проект, кој Унијата ја чини милијарди евра, предизвикува застој во работата, усложнување на механизмите за превод и комуникација, така што многумина сметаат дека постепено се претвора во сериозен баласт, наместо да функционира, според изворната замисла, како олеснувачки инструмент.

Оние што заговараат исклучивост во јазичната проблематика на најширок план во општестевната комуникација, по правило се противници на употребата и поддршката на користење на јазиците и културите на различни имигрантски групи. Но фокусирањето врз решенија кои во преден план подразбираат функционална еднојазичност, е во исто време насочено и против сите јазици на националните малцинства и нивните култури.

Во Финска, на пример, тоа се случува преку критиките и анимозитетот со кој екстремно-десничарската и националистичка партија Вистински Финци настапува во Парламентот, обидувајќи се да ја редуцира и минимизира традиционалната двојазичност во Финска, каде што јазикот на финските Швеѓани (помалку од шест отсто од населението) е во рамноправна употреба со мнозинскиот фински јазик.

Како одговор на таквите политички заложби, неодамна во Националната библиотека во Хелсинки беше отворена изложба, по повод Европската недела на јазиците, на популарни книги за деца и млади во превод не само на шведски, туку и на сите 24 официјални јазици во ЕУ.

Веќе е повеќепати констатирано дека обесправените малцинства во Европа не добиваат никаква помош од ЕУ. Унијата постепено го губи својот кредибилитет во областа на заштитата на малцинските права. Пред неколку години една граѓанската иницијатива на унгарското малцинство во Романија не беше прифатена и поддржана од Европската комисија. Во кампањата во врска оваа иницијатива беа собрани милион потписи, со цел да се поттикне ЕУ да го унапреди законодавството за заштита на малцинствата и нивното право на образование, култура, регионална политика и учество во медиумското информирање. Но и покрај таквите силни притисоци, ништо позначајно не се има случено во Брисел на овој план. Зошто тогаш би се изразувало уверување дека ЕУ би можела да покаже решителност и одблиску да се позанимава со проблемите на кои е изложено македонското малцинство во Бугарија?

Одговорот на Европската комисија на споменатата граѓанска иницијатива на унгарското малцинство во Романија, бил, како што многумина оцениле, „целосно неверојатен“. Од една страна во одговорот на Брисел било нагласено дека ЕУ ги штити правата на малцинствата, но истовремено е констатирано дека недостасува правен основ за да се бранат таквите права. Тоа е веројатно и најголемиот проблем со целиот ЕУ-апарат. Во свечени говори и изјави гласно се декларираат таквите европски вредности, но во пракса, всушност, ништо не се случува.

Каква е тогаш вредноста на ЕУ доколку не може да интервенира против кршењето на човековите права? Европската комисија ја отфрли граѓанската иницијатива на Унгарците во Романија со образложение дека ѝ недостасува компетенција во доменот на законодавството за малцинствата, и дека за тоа прашање се грижи секоја земја-членка одделно. Но критичарите не го прифаќаат таквото образложение, бидејќи проблемот е во тоа дека спротивставените интереси меѓу државната власт и малцинските групи ја поттикнуваат дискриминацијата, а што е директно спротивно на оние вредности за кои ЕУ постојано тврди дека се залага.

На Каталонците и Баскијците, на пример, тоа мошне добро им е познато. На Македонците во Бугарија исто така. Напоредно на тоа, во Македонија пред неколку години беше усвоен Закон за двојазичност (во полза на малцинскиот албанскли јазик), кој иако поттикна низа контроверзи, и понатаму функционира.

ЕУ-проширувањето кон Исток неизбежно доведе до оживување на „подзаборавени“ малцински јазични и културни проблеми и извесни спорни прашања на границите, а со тоа и до појава на повеќе потенцијални жаришта на судири. Надежта беше, и сè уште е, дека ЕУ-членството ќе ги обврзе членките да ги решаваат проблемите со соседите и малцинствата на мирен начин, при што идеално решение би било сите земји со малцинства, вклучувајќи ги, се разбира, и земјите кандидатки од Западен Балкан, да бидат примени во полноправно членство, и со тоа во голема мера да се „деактивира“ историскиот набој на дискриминација на националните малцинства.

Јасно е дека оттаму и доаѓа стравувањето на Бугарија од можното полноправно членство на Македонија во ЕУ. Оттаму и тврдото вето на Бугарија пред македонските европски аспирации, поттурнувајќи го во скутот на Брисел својот фамозен услов, или подобро речено лажен изговор и уцена, за неизоставно впишување на бугарското малцинство во македонскиот Устав. Колку е тешко да се разбере аверзијата која се создава околу тоа?

The post Аверзија во ЕУ против повеќејазичноста appeared first on plusinfo.mk.

„Овој ден е важен за подигање на свеста за правата на лицата со оштетувања на слухот и служи за поддршка на различноста во комуникацијата, а со крајна цел промоција на инклузијата на лицата со попреченост“, се наведува во соопштението од Канцеларијата на народниот правобранител.

Според Народниот правобранител, признавањето на знаковниот јазик како природно и основно средство за комуникацијата, е клучно за унапредување на инклузијата и еднаквоста во општеството на лицата со оштетен слух, а поддршката за неговото изучување и користење е важен чекор кон создавање општество во кое се почитува различноста и се вреднуваат лингвистичките и културолошките права на оваа заедница. 

Обединетите Нации кон крајот на 2017 година го прогласи 23 септември за меѓународен ден на знаковен јазик, кој има еднаков статус со сите говорни јазици.

Знаковниот јазик го користат 72 милиони луѓе ширум светот, а во Македонија има околу 7.000 глуви и наглуви лица кои го користат македонскиот знаковен јазик.

Македонската знаковна азбука е азбука со која се служи македонскиот знаковен јазик. Азбуката се состои од 31 знак што е еднакво на 31 глас во македонскиот јазик. Секоја буква има посебен знак и со нив се изразуваат основните елементи на знаковниот јазик. Карактеристично за знаковната збука е тоа што таа има два вида, односно знаковна азбука со една рака и знаковна азбука со две раце.

The post 23 СЕПТЕМВРИ – ДЕН НА ЗНАКОВНИОТ ЈАЗИК Како изгледа рачната азбука во македонскиот јазик? appeared first on plusinfo.mk.