На конкурсот, кој ќе трае до 25 јули, како што е наведено, може да биде пријавена и книга објавена двојазично, каде поетското творештво на македонски е оригинално создадено, односно, не е превод од друг јазик.

– Пријави можат да поднесат авторите или нивните издавачи со согласност од авторот, а еден автор или издавач може да учествува со неограничен број наслови. Пријавените поетски книги треба да се првообјавени во периодот за кој се доделува наградата и да не бидат претходно објавени на друг јазик. Можат да бидат пријавени само дела од еден автор, додека коавторски дела се неприфатливи. Книгите мора да имаат ISBN број – стои во конкурсот на СВП.

Според конкурсот, книги од членови на Управен и Надзорен одбор на СВП, директорот на институцијата, вработени или членови на жири-комисијата и нивни поблиски роднини нема да бидат прифатени.

Авторите или издавачите за учество на конкурсот мора да испратат шест примероци од книгата на адреса: НУ манифестација „Струшки вечери на поезијата“, поштенски фах 111, „Браќа Миладиновци“ бр.5, 6330 Струга, Република Северна Македонија.

The post СТРУШКИ ВЕЧЕРИ НА ПОЕЗИЈАТА ОБЈАВИ КОНКУРС Автори може да се пријават за наградата „Браќа Миладиновци“ за 2023 година appeared first on plusinfo.mk.

„Должни сме да информираме дека по направените измени во учебникот, кои им се сугерирани од страна на рецензентите, авторите до Националната комисија за учебници на ЦД го имаат доставено учебникот заедно со допис во кој е наведено дека се работи за финална верзија, а рецензентите, пак, имаат потпишано изјава дека нивните забелешки се имплементирани во истата.

Сите предизвици кои им настанале при изработката на учебникот, авторите и рецензентите требало да ги надминат со Националната комисија за учебници, која е надлежна за спроведување на процедурата за одобрување на учебници. Членовите на комисијата, всушност преку гласање одлучуваат за прифаќање, односно неприфаќање на одреден учебник. Во случајов, одлучиле учебникот со грешки да биде прифатен“ – соопшти Министерството за образование и наука.

The post КАБАЕТОТ Е КАЈ АВТОРИТЕ, РЕЦЕНЗЕНТИТЕ И КОМИСИЈАТА Министерството не чувстува вина за грешките во учебникот по историја? appeared first on plusinfo.mk.

На Фејсбук групата Петто одделение 2022/2023 тие велат дека по констатираните грешки, писмено се обратиле до надлежното Министерство за да се направат исправки, барем во електронските верзии на учебниците.

„Навистина ни е жал што во нашите напори да не испуштиме нешто суштинско, ние всушност сме пропуштиле да поминат вакви технички грешки, кои ја разбрануваа јавноста. Учебникот, кој е тема на дискусија, е предаден на регуларен конкурс од Педагошката служба уште во мај годинава. Сите сугестии што беа од техничка природа се земени предвид при подготовката на неговата финална верзија. Ниту ние авторите ниту рецензентите немаа можност да го прегледаат учебникот пред печатењето. Можеби ќе забележевме дека наместо V век, пишува V век пр. н.е.; дека при обработка и средување на текстот останала грешката за местоположбата на нашите соседи од исток и од запад или за мерните единици. И покрај тоа што е очигледно дека станува збор за технички грешки, затоа што, ако се прочита учебникот во целост и се анализира, педагошки, методолошки… ќе се забележи дека тој во целост ги следи наставната програма, методологијата за изработка на учебник и националните стандарди“, велат авторите во реакцијата.

Тие оценуваат дека е навредлива констатацијата оти авторките се неписмени, нестручни и некомпетентни. Ако е така, прашуваат тие, зошто немаше други автори за овој предмет, кои ќе бидат компетентни и гласни со дела, а не со коментари, кои се недолични и даваат политичка заднина на сè во општеството.

Оттука, ги замолија надлежните во МОН да ги коригираат електронските верзии на посочените места. Исто така, ги замолуваат наставниците да им објаснат на учениците дека во тие делови од учебникот има технички пропусти, како што им посочуваат и за сите други учебници во кои ќе констатираат грешка.

Авторките повикаа на почитување на нивната приватност, а истовремено апелираа до МВР да реагира на сите форми на насилство упатени кон нив и нивните семејства и на заканувачките пораки што ги добивале јавно.

„Ги замолуваме сите оние што навлегуваат во нашата приватност, споделуваат врски до нашите лични профили, оние што споделуваат наши фотографии без дозвола – да престанат. Со влегувањето на нашите профили и со недоличните коментари влегувате во нашите семејства, во кои има деца. Јавното линчување луѓе е средновековна практика, која сега е во модерна форма. Печатните и ненамерно направените грешки се исправаат. Ама насилството што се промовира на социјалните мрежи остава длабоки траги врз луѓето и нивните семејства. Сајбер-насилството е модерно силеџиство, кое го читаат деца и на тој начин директно се изложени на негативен пример, кој упатува страшна и многу загрижувачка порака. Секој може да навлезе во вашата приватност и да ви ги руши личниот и професионалниот интегритет што сте ги граделе со години“, велат авторките на учебникот.

„ОФ МОРИ МАЈКО, КАКВИ ГЛУПОСТИ НИ УЧАТ ДЕЦАТА“ Учебник за 5-то одделение тврди дека Македонија на запад граничи со Бугарија (ФОТО)

The post ПРЕСТАНЕТЕ ДА НЀ НАВРЕДУВАТЕ ДЕКА СМЕ НЕПИСМЕНИ Авторките на учебникот по Историја велат дека грешките се направени од брзање appeared first on plusinfo.mk.

Отворениот повик за работилницата со Туе Стен Милер е наменет за режисери и продуценти со кратки или долгометражни креативни документарни проекти во развој што се продуцирани или копродуцирани во Северна Македонија, Албанија, Босна и Херцеговина, Бугарија, Грција, Косово, Романија, Словенија, Србија, Турција, Хрватска и Црна Гора.

Работилницата ќе се одржи од 20 до 22 август и ќе содржи групна сесија и мастерклас, индивидуални сесии и групна сесија и презентација на проектите. Сите сесии од работилницата ќе се одржат во живо во Скопје, на англиски јазик. Работилницата е бесплатна. Учесниците треба сами да си ги покријат трошоците за пат и сместување.

Пријавата за учество се пополнува преку формулар објавен на веб-страната на „МакеДокс“, а рокот за пријава е до 15 јули 2022.

Отворениот повик за проекти на МакеКоПроДокс форум 2022 е наменет за продуценти/автори со долгометражни креативни документарни проекти.

– Форумот има за цел да развие стратешки план за зајакнување на копродукциите на документарниот филм помеѓу земјите од Балканот. На форумот ќе присуствуваат претставници од 12 регионални филмски агенции, документарни филмски професионалци и 10 проекти во различна фаза на продукција. Четвртото издание на МакеКоПроДокс форумот ќе се реализира во хибридна форма на 22 и 23 август – велат од „МакеДокс“.

За учество на форумот може да аплицираат продуценти/автори на документарни филмови со аудиовизуелни проекти во фаза на продукција или постпродукција од Северна Македонија, Албанија, Босна и Херцеговина, Бугарија, Грција, Косово, Романија, Словенија, Србија, Турција, Хрватска и Црна Гора.

Менторскиот дел за проектите се состои од работилница за пичинг со Бриџид O’Шеа, основач на Документарната асоцијација на Европа, како и пичинг сесии и еден-на-еден состаноци.

Изборот на доставените проекти ќе го изврши комисија за проценка, земајќи ги предвид критериумите за подобност. Резултатите ќе бидат објавени преку електронска пошта и на веб-страната на „МакеДокс“ не подоцна од 1 август.

Фестивалот на креативен документарен филм „МакеДокс“ ќе се одржи од 18 до 25 август во Скопје, фокусот на тринаесеттото издание на „МакеДокс“ е ставен на развој на идеи.

The post ЈАВЕН ПОВИК НА МАКЕДОКС ЗА РЕЖИСЕРИ, ПРОДУЦЕНТИ, АВТОРИ Ментори се Туе Стен Милер и Бриџид O’Шеа appeared first on plusinfo.mk.

Пендаровски, како што информираат од неговиот кабинет, во своето обраќање говореше за критериумите и различните аспекти кои ги опкружуваат архитектите денес, соочени со предизвикот да реализираат успешно и естетско дело кое ќе му пркоси на забот на времето и ќе ја има во себе премисата – градба по мерка на човекот.

– Македонските архитекти често се соочуваат и со дополнителни предизвици – со барањата на инвеститорите, со апетитите на урбаната мафија или, како што имавме ситуација во време на едноумието, а и до пред некоја година, да треба да задоволуваат небулозни идеолошко-политички барања – рече претседателот Пендаровски.

Во тој контекст претседателот Пендаровски ја нагласи потребата од овозможување услови архитектурата да ја исполнува својата примарна цел и да го облагородува просторот, но и нашите животи.

– Затоа, како заедница сме обврзани да придонесеме за творечката слобода и за професионалниот интегритет на македонските архитекти – рече Пендаровски.

Честитајќи за годинашното најуспешно реализирано архитектонско дело, Пендаровски изрази уверување дека ќе ги надминеме сите предизвици наметнати од Ковид-19 и ќе можеме да се фокусираме на создавање и креирање, на творештво и градење.

The post ДЕТСКА ГРАДИНКА ВОЛКОВО Авторите Конески и Спасевска од Пендаровски ја добија Големата награда за архитектура appeared first on plusinfo.mk.

Во оваа година, во која вчера се навршија сто години од раѓањето на Блаже Конески, си бев ветила почесто да му се навраќам, а и да пишувам за него и за неговото творештво, пишува Кица Колбе за Дојче веле.

Често ја читав книгата на Цане Андреевски, „Разговори со Конески“, затоа што мислата на Конески е неверојатно актуелна и инспиративна. Иако, како секоја македонска писателка и македонски писател, јас сум постојано во дијалог со Конески. Затоа што тој е длабоко поврзан со мојот мајчин јазик, на кој пишувам. Ме восхитува неговиот литературен стил, кој е благородно едноставен и јасен, близок по скромноста до народното творештво, но и проникнат со интелектуалноста само до една многу пријатна мера.

Грижата за јазикот треба да ја делат сите

Вчера, додека трагав во мислите по македонски еквивалент на еден германски збор, а притоа проверував дали веќе постојат зборотворбите што ми се чинеа најсоодветни, ми стана јасно колку е присутен македонскиот јазик во дигиталната сфера. Си помислив, тоа сигурно ќе му се допаднеше на Конески! Не само што пишувам со лаптоп со македонска поддршка, што не беше возможно пред десетина години, туку и во базата од податоци во интернетот македонскиот јазик е присутен во многу значајни контексти. Тој е застапен не само во автоматскиот преведувач на Гугл, туку и во неколку други преведувачи. За жал, го нема во одличниот преведувач Дипл (https://www.deepl.com/translator). Се разбира, уште посуштествен за присутноста на македонскиот јазик во интернетот е Дигиталниот речник на македонскиот јазик (http://drmj.eu). Тој е одлично помагало за сите што имаат желба да го зголемат своето македонско лексичко богатство, но и да ги освежат своите знаења за македонскиот правопис. Имено, откако постојат социјалните мрежи, тие станаа огледало за писменоста или неписменоста на нејзините корисници. Често најревносните бранители на македонската нација и на македонскиот јазик не го познаваат доволно ниту правописот. Тие потврдуваат со својот негативен пример дека јазикот не се брани на барикади, ниту со патриотски пароли, туку со непрекинатото збогатување на личната јазична култура. А тоа го чиниме постојано читајќи и пишувајќи. Пред сè, читајќи добра македонска литература. Кон средината на осумдесеттите на Конески му било јасно дека грижата за јазикот во јавната комуникација (кон која денес припаѓаат и социјалните мрежи!) треба да ја делат сите.

Македонскиот јазик може да биде загрозен само одвнатре

Во актуелната политичка состојба која настана по бугарското вето, полезно е да се потсетиме на значењето кое Конески ѝ го припишува на литературата за афирмацијата на македонскиот јазик. Додека бугарските политичари во Брисел постојано поставуваат услови за именувањето на македонскиот јазик, оспорувајќи ја неговата самобитност, на македонските политичари не им паѓа на памет да аргументираат во одбрана на македонскиот јазик со помош на македонската литература. Таа најдобро сведочи за самобитноста на македонскиот јазик. Јазикот на кој е преведен Шекспир и Толстој, Томас Ман и Франц Кафка, Пруст и Достоевски, не е дијалект, ниту обична „литературна норма“ на бугарскиот. Затоа што од бугарски се преведени на македонски неброени автори. Да беа идентични двата јазика, не ќе имаше потреба од превод. Од Конески ние, денешните Македонци, може да научиме дека „од нас зависи дали нашата јазична средина ќе биде загрозена или не.“ Тоа значи дека никој не може да го загрози македонскиот јазик однадвор. Уште помалку кога веќе постои македонска држава. Македонскиот јазик може да биде загрозен само од неговите говорители и пишувачи. Тие што не го познаваат правилниот правопис, а веруваат дека го бранат македонскиот јазик со патриотска реторика, не го заштитуваат, туку го загрозуваат, затоа што го инструментализираат, претворајќи го во средство за политичка пресметка со противникот.

Дали во годината на Конески се запрашавме – колку ние денес сме способни да ја изградиме одбраната на македонскиот јазик пред цела ЕУ токму преку македонската литература? Конески истакнува дека во неколкуте децении по војната има огромен напредок во македонската литература и наука. „Земете ја само литературата, земете ја македонската проза.Четириесет и петтата година воопшто ја немаше. Некои мали раскази. Скромни. А денеска ние имаме многу добри романи, што можат да стојат во секоја литература.” Според Конески, засилената прозна продукција говори за процес кој водел кон континуиран подем. „А што во нашата средина има луѓе недоволно и образовани и самосвесни да ги ценат тие успеси и да ја читаат таа литература, и да се воспитуваат на неа, и својот јазик да го градат на неа – тоа е друго прашање. Тоа е прашање на самата зрелост на нашата средина”, заклучува Конески. Всушност, прашањето за самата зрелост на „нашата” македонска средина е денес многу поактуелно одошто беше во осумдесеттите. На Конески му било јасно дека културните средини со постара традиција секако имаат поголеми дострели. „Ама наша задача не е да се потчиниме на таа ситуација, ами да се трудиме колку што можеме да го достигнеме она рамниште, што е постигнато сегде во културниот свет“, препорачува тој. Така не се однесувале тие кои не се радувале на успесите во својата средина поради инфериорното чувство што го имале пред великоста на дострелите на други културни средини.

Да се создаваат пријатели на македонскиот јазик

Во кусиот опис на состојбата на духот кон средината на осумдесеттите, Конески ги детектира двата доминантни става кон нештата во македонското секојдневие: дефетизмот и конструктивниот реализам. Вториот е очигледно животниот став на Конески. Тој реалистично ги проценува скромните дострели на македонската култура, поставувајќи ги во релација со тоа какви биле почетоците 45-тата. Во тој контекст, за него досегашните постигнувања треба уште повеќе да мотивираат кон нови дистрели. Овој конструкртивен реализам, кој не ја разубавува стварноста, денес тешко успева да го победи дефетизмот на изреката „не нѐ бива за ништо”. Конески знае дека високите цели не се постигнуваат преку ноќ. Уште повеќе, тие бараат многу пожртвуваност и работа, нешто што не ги восхитува дефетистите, затоа што тие често шират дух на летаргија. Конески е критичен и кон „љубовта” на Македонците за историските митови. „Тоа зависи од чувството за добар вкус, дали човек ќе настапи така или не. Јас лично тие работи не ги сакам.“ Тие работи се наклоноста кај многу народи, не само кај Македонците, „за стотина години или двесте почетокот да го поместат наназад “, вели за потрагата по претходници во далечното минато. „Потребно ни е ние да работиме. Потребно ни е да бидеме ефикасни, на пример, во Охрид денеска, а не да правиме од Охрид и она што било и она што не било.”

Блаже Конески навистина беше великан. Затоа што ја поседуваше меѓу Македонците ретката скромност на големите творци, која денес ни е насушно потребна. Насушно потребен ни е и неговиот самопрегор за највисоките македонски државни и културни интереси. Барем во неволјата во која се најде македонското општество по бугарското вето, требаше да почнеме да учиме од неговата мудрост. Тој, имено, се трудеше да создава пријатели на македонскиот јазик во големите слависти во целиот свет. Не со „поданички” дух, туку со достоинството на скромните и чесните творци. Ние денес немаме веќе лекторати за македонски јазик во најпознатите универзитети во Европа, затоа што нема веќе интелектуалци и творци во Македонија со авторитетот на Конески, кој градеше мостови и освојуваше верни пријатели.

The post Конески и грижата за јазикот appeared first on plusinfo.mk.

Жири-комисијата во состав: Оливера Николова (претседателка), Зоран Анчевски, Калина Малеска, Живко Гроздановски и Катерина Богоева (претставник на Фондацијата) ќе го соопшти лауреатот на годинашната награда „Роман на годината“, која се доделува под генерално покровителство на „Комерцијална банка“ АД; Скопје, следниот понеделник, на 15 март, на прес-конференцијата во кафе-книжарницата „Буква“ во Скопје, информираат од Фондацијата „Славко Јаневски“.

Наградата „Роман на годината“ годинава се доделува по 22-ри пат и таа се состои од плакета, оригинална статуетка и паричен износ од 150 илјади денари.

The post Еден од овие 5 романи ќе биде прогласен за „Роман на годината“ appeared first on plusinfo.mk.