На патниот правец од граничниот премин Евзони кон Солун веќе интензивно се работи на еден од најважните инфраструктурни проекти во Северна Грција. Механизација и отворени градилишта се забележуваат на голем дел од трасата, која во следните четири години треба да прерасне во современ автопат со физички одвоени коловози.

Не станува збор за изградба на сосема нов пат по друга траса, туку за темелна реконструкција и доградба на постојниот пат А1. Целиот правец Халастра–Евзони е долг околу 60 километри и претставува грчки дел од Коридорот 10, по кој најголем дел од македонските граѓани патуваат кон Солун, Халкидики и јужните делови на Грција.

Главните градежни работи се концентрирани на делницата долга околу 44 километри, од клучката Халастра/Аксиос до Поликастро. Постојниот пат на овој потег има по една широка сообраќајна лента и помошна лента во секоја насока, но нема физички одвоени коловози, што со години го прави еден од најризичните патни правци во Грција.

По завршувањето на проектот, автопатот ќе има два одвоени коловоза, по две сообраќајни ленти во секоја насока, ленти за принудно запирање и средишна разделна зона со заштитна ограда. Предвидени се контролирани влезови и излези, нови мостови и надвозници, како и реконструкција на клучките кај Аксиос, Гефира и Поликастро. Проектната брзина ќе изнесува 120 километри на час.

Последните 15 километри, од Поликастро до граничниот премин Евзони, веќе се изградени со два одвоени коловоза, по две ленти и лента за принудно запирање во секоја насока. Поради тоа, најголемиот дел од новата изградба се одвива јужно од Поликастро, додека на северниот дел се можни санација, одржување и приспособување на постојната инфраструктура.

Активни градежни фронтови има кај Поликастро и во зоната Халастра–Анатолико–Агиос Атанасиос, каде што се гради и нов мост. Според информациите објавени од грчките медиуми, на проектите за надградба на вертикалните патни оски се ангажирани околу 200 работници и стотина градежни машини.

Реконструкцијата треба да реши долгогодишен безбедносен проблем. Според податоците на грчката новинска агенција АПЕ-МПЕ и јавниот сервис ЕРТ, во сообраќајни несреќи на правецот Халастра–Евзони во последните 20 години загинале 50 луѓе, а 117 биле тешко повредени. Меѓу главните ризици се непостоењето средишна ограда, слабата осветленост, директните приклучоци и движењето на земјоделски машини.

Патот има големо значење и за грчката економија, бидејќи претставува главна копнена врска на Солун и Северна Грција со Северна Македонија, Србија и остатокот од Европа. Грчките локални власти го опишуваат Евзони како најфреквентниот копнен влез во земјата според бројот на посетители, со особено густ сообраќај во летната туристичка сезона.

Проектот е дел од 35-годишната концесија за „Егнатија Одос“ и нејзините три вертикални патни оски. Управувањето со мрежата на крајот од 2025 година го презеде компанијата „Неа Егнатија Одос“, зад која стојат грчката ГЕК ТЕРНА и француската Egis Projects. Концесионерот платил 1,275 милијарди евра, а во првите пет години се предвидени инвестиции поголеми од 420 милиони евра во обновување и надградба на патиштата.

Според последните информации од концесионерот, модернизацијата на правецот треба да биде завршена во рок од приближно четири години, односно до крајот на 2029 или во текот на 2030 година, ако работите се одвиваат според планот. По завршувањето, возачите од македонско-грчката граница до западниот влез во Солун ќе патуваат по целосно оформен автопат со одвоени насоки, со што ќе биде отстранет најопасниот дел од сегашната траса.

The post 🎥 ОД 2030 ГОДИНА ОД ЕВЗОНИ ДО СОЛУН ЌЕ ПАТУВАМЕ ПО АВТОПАТ? На трасата веќе се работи интензивно appeared first on plusinfo.mk.