The post 📽️ „БЕ-ЕМ-ВЕ“ ИМ ДОВЕРИ ВИСТИНСКА РАБОТА НА ЧОВЕКОВИДНИ РОБОТИ Не ги заменуваат луѓето, туку работат покрај нив appeared first on plusinfo.mk.

Македонија треба да работи на експанзија на извозот, порачуваат дел од економските експерти, коментирајќи го економскиот раст на државата. Долг период растот се базира на финалната потрошувачка, а увозот во земјава традиционално е поголем од извозот на македонски стоки и услуги. Во вредноста на извозот пак, доминираат автомобилската и рударската индустрија. Додека автомобилската индустрија започна постојано да доживува потреси, особено во Германија која ни е најголем трговски партнер, енормен раст забележува рударството на глобално ниво.

Новата т.н. „геополитика на минерали“, високо ги крена цените на критичните минерали на светските берзи. Кај нас се активни само четири рудници за металични руди, а сериозна најавена инвестиција е рудникот за бакар во Иловица. Бакарот достигнува цени од над 13 илјади американски долари за еден тон, а според геолошките истражувања на локалитетот има над 700 илјади руден концентрат, со потенцијал за извоз од над 10 илјади тони бакар на годишно ниво.

Доколку се земе предвид дека во согласност со новиот поскап Тарифник за концесиски надоместоци, „4% од пазарната вредност на бакар по тон во секој тон произведен бакарен концентрат од страна на концесионерот“ завршува во државниот буџет, тогаш значително ќе се зголеми македонскиот извоз. Дури, според проекциите на инвеститорот, рудникот за бакар во Иловица има потенцијал да биде меѓу топ-3 извозни компании во државата, со просечен годишен извоз од над 200 милиони евра.

Инаку, како што пишува специјализираниот портал извоз.мк, во текот на април од Македонија биле извезени 335 илјади тони стоки во вредност од 784 милиони евра. Вредноста на извозот во април бележи раст од 16,3% во споредба со истиот месец лани, додека извезените количини се зголемени за 9,1%. Во истиот период, увозот изнесувал 1,16 милијарди евра, што претставува раст од 21,7% во однос на април минатата година. Покриеноста на увозот со извозот во април изнесувала 67,6%, што е намалување во споредба со 70,7% колку што изнесувала во април лани. Трговскиот дефицит достигнал 375 милиони евра и е зголемен за 34% во однос на истиот месец минатата година.

Експертите се согласни дека владите од изминатиов период користат „ист мотор“ за економскиот раст, односно потрошувачката, наместо да го стимулираат извозот.

– Ако ние базираме економски раст на потрошувачка, а сме земја со економија која е целосно увозно зависна, ние целосно се препуштаме на милост и немилост на трговците коишто ќе увезуваат и ќе ни продаваат суровини и крајни производи коишто ги конзумираме и како граѓани и како компании. Тоа е голем ризик за една економија. Ако било која влада сака да заузда некои процеси тука, треба на долг рок да ги гледа овие промени и да обезбеди посигурна економска иднина, со цел да произведува повеќе од тоа што е финална потрошувачка – оцени Виктор Митевски, директор на Здружение за истражувања и анализи, во неодамнешното издание на „Вин-вин“.

– Потребна е голема промена на мастер планот. Идејата, која одамна ја зборуваме, е дека мора да прифатиме, односно најисплатливо за Македонија е да го прифати моделот на раст базиран на експанзија на извозот. Не на личната потрошувачка, туку на експанзија на извозот – истакна универзитетскиот професор Ванчо Узунов.

Значењето на рударството за економијата беше потенцирано и во Стратегијата за минерални суровини 2026-2046.

Според експертите на МАНУ, македонската економија како мала отворена економија треба да работи на градење на модел кој ќе биде базиран на извоз каде секторот рударство и вадење на камен ќе има свој придонес, имајќи го предвид фактот дека овој сектор е извозно ориентиран и неговиот придонес може да биде од исклучителна важност.

The post МАКЕДОНИЈА ДА РАБОТИ НА ЕКСПАНЗИЈА НА ИЗВОЗОТ Рударството и автомобилската индустрија предничат во битката со увозот appeared first on plusinfo.mk.

Нова инвестиција на компанијата „Џаво отомотив“ во ТИРЗ Тетово, која се очекува да отвори речиси 500 работни места, објавија денеска премиерот Христијан Мицкоски и министерот за економија и труд, Бесар Дурмиши. Како што рекоа Мицкоски и Дурмиши на прес-конференцијата во Владата, инвестицијата вредна 20 милиони евра е уште една потврда за атрактивноста на Македонија како дестинација за странските вложувачи, но и за довербата што тие ја имаат во нашата економија.

– Станува збор за браунфилд-инвестиција, која ќе почне со закуп на постоечки објкект од 8.000 квадратни метри, а капацитетите ќе се прошируваат до 21.000 квадратни метри до 2028 година. До 2030 година компанијата планира да инвестира речиси 21 милион евра. Целокупното производство на контролни кабли од Турција и Словачка ќе се реализира во Тетово, што е потврда за довербата на инвеститорот во македонската економија, нашата работна сила и за деловната клима – истакна Мицкоски.

Годишниот планиран извоз на компанијата е 45 милиони евра.

Според министерот за економија и труд, Бесар Дурмиши, инвестицијата е потврда дека Македонија станува сè попривлечна за компании што носат современи технологии, нови производствени капацитети и квалитетни работни места. Одлуката на компанијата дел од производството да пренесе во нашата земја, напомена Дурмиши, е силен сигнал за довербата во македонската економија.

– Покрај отворањето нови работни места, овој инвестициски проект ќе значи зголемен извоз, трансфер на нови технологии и дополнителна додадена вредност на македонската економија. По иницијалните преговори, кои траеја повеќе од една година, денес се испраќа јасна порака – дека Македонија и натаму е атрактивна дестинација за странските инвеститори – истакна Дурмиши.

Мултинационалната корпорација „Џаво отомотив“ работи во индустријата за автомобилска опрема, дизајнира и произведува безбедносни производи, како и разни механизми и оперативни кабли за многу водечки производители на автомобили.

Освен во Турција, компанијата е присутна и во Канада, Германија и во Словачка.

The post ИНВЕСТИЦИЈА ОД 20 МИЛИОНИ ЕВРА ВО ТИРЗ ТЕТОВО Ќе се отворат речиси 500 нови работни места appeared first on plusinfo.mk.

Денеска објавуваме нова странска инвестиција во ТИРЗ Тетово – компанијата Џаво Отмотив, глобален производител за автомобилската индустрија со повеќе од 40 години искуство, ќе инвестира околу 20 милиони евра и ќе отвори до 412 нови работни места, објави премиерот Христијан Мицкоски на Фејсбук.

„Од Тетово ќе се произведуваат автомобилски компоненти за светски познати брендови, а извозот на компанијата во полн капацитет ќе достигне 45 милиони евра годишно. Ова е уште една потврда дека довербата во македонската економија расте, дека инвеститорите ја препознаваат стабилноста и дека државата повторно станува атрактивна дестинација за нови вложувања. Ние не ветуваме фабрики – ние отвораме фабрики. Не ветуваме работни места – создаваме работни места. Не зборуваме за развој – го реализираме“, објави Мицкоски.

Нови инвестиции, нови работни места, нова вредност за македонската економија, Македонија забрзува, потенцира премиерот Мицкоски.

The post ЏАВО ОТОМОТИВ ЌЕ ВЛОЖИ 20 МИЛИОНИ ЕВРА ВО МАКЕДОНИЈА Во Тетово ќе се произведуваат автомобилски компоненти за светски брендови appeared first on plusinfo.mk.

Милијардерот и сопственик на автомобилската компанијата „Тесла“ Илон Маск упати критики кон европската автомобилска индустрија која, според него, не инвестира доволно во иновации и бавно ги развива новите модели. Тој смета дека иднината на транспортот е јасно дефинирана – електрични и автономни автомобили.

Тој смета дека денешните модели на автомобили не носат технолошки напредок споредено со оние од пред неколку години.

– Не мислам дека има доволно иновации во автомобилската индустрија. Денешните автомобили се многу слични на оние од пред пет години, нема голема разлика – вели Маск.

Тој ја нагласува електрификацијата на сообраќајот како клучна насока на развој.

– Дваесет години велам дека автомобилската индустрија мора да се електрифицира. Дури и без еколошки проблеми, електричните автомобили се едноставно подобри од автомобилите со мотор со внатрешно согорување. Тие се поедноставни, поефикасни, потивки и ја намалуваат емисијата на штетни материи во градовите. Целиот копнен транспорт треба да биде електричен, сите бродови, а на крајот дури и авионите – вели Маск.

Покрај електрификацијата, Маск е убеден дека автономното возење ќе игра клучна улога во иднината на мобилноста. Според него, производителите мора значително повеќе да инвестираат во развој на системи што им овозможуваат на возилата да возат независно.

– Возењето автомобил што не е електричен и не е автономен, за 10 години ќе биде како јавање коњ или повикување со телефон на преклопување. Сè уште има луѓе што јаваат коњи и сигурно сè уште има луѓе со телефони на преклопување, но тоа е реткост – вели Маск.

The post ЗА 10 ГОДИНИ ВОЗЕЊЕТО АВТОМОБИЛ ШТО НЕ Е ЕЛЕКТРИЧЕН ЌЕ БИДЕ КАКО ЈАВАЊЕ КОЊ Маск ѝ забележува на автомобилската индустрија дека не е доволно иновативна appeared first on plusinfo.mk.

Денеска имавме многу успешни и инспиративни средби, со голем број мултинационални компании, за теми кои што беа опфатени од областа на енергетиката, здравството и високата технологија – рече премиерот Христијан Мицкоски во своето видео обраќање од Давос, по првиот ден на Светскиот економски форум, каде учествува со делегација од Македонија.

– Се разбира, од нашата страна беа претставени можностите за инвестиции во Македонија, во македонската економија, нешто што ќе значи додадена вредност за македонските граѓани.

Но, тоа на кое што би сакал посебно да се задржам е вториот дел од денот, односно панелот за енергетика, каде што бев активен учесник и говорник, заедно со секретарот за енергетика на САД, г. Рајт. Панел, каде учество имаше буквално целото светско водство во енергетскиот бизнис, компании кои што доаѓаат од сите континенти, компании чии што обрти се движат во рамките на илјадници милијарди. Таму разговаравме за очекувањата и плановите за развој на енергетиката во годините кои што следат, пред се енергетиката од областа на производство на електрична енергија.

– Зошто токму областа на производство на електрична енергија? Тоа што можам да го заклучам како резултат на овој панел за енергетика се три работи:

– Првата работа е дека во годините кои што следат, потребата од енергија во светот ќе расте, но два ипол пати побргу ќе расте потребата од електрична енергија. И тука, ние како Македонија, како држава, не смееме да бидеме нем набљудувач, туку треба да бидеме активен чинител и активен учесник и тука повторно треба да ги рестартираме сите оние можеби заборавени енергетски проекти од минатото, како што се Чебрен и Галиште, Бошков Мост и останатите. И да го понудиме потенцијалот за инвестиции во обновливи извори на енергија на голем број од инвеститорите кои покажаа несомнен интерес во дискусиите по завршувањето на панелот.

– Втора работа која што исто така е значајна е дека во следните десет години производните капацитети кои што треба да бидат изградени, кои што треба да произведуваат електрична енергија во светот, ќе треба да произведат вкупно 40 000 терават часови електрична енергија. Колкава е таа количина електрична енергија? Тоа е пет ипол илјади пати повеќе отколку што денес Македонија троши електрична енергија и некаде отприлика толку колку што денеска САД, Канада, ЕУ и Јапонија заедно трошат. Зошто е ова потребно? Затоа што во годините кои што следат развојот на човештвото ќе опфаќа развој на вештачка интелигенција, а со тоа и развој на центрите за податоци или т.н. дата центри, кои што работат, не на енергија, туку на електрична енергија.

– Тоа се трите факти кои што се многу важни и ние како држава тој чекор треба да го следиме и во таа насока да ја развиваме нашата економија. Од економија која што се темелеше на развој на автомобилската индустрија, да го диверзифицираме своето портфолио и да бидеме значаен чинител, имајќи ги предвид перформансите и потенцијалот што го нудиме во делот и секторот на енергетика. Јас сум убеден дека тоа како држава можеме да го направиме. Јас сум убеден дека ние како држава ќе успееме во таа намера – вели Мицкоски во своето видео-обраќање.

The post 🎥 ОД АВТОМОБИЛСКАТА ИНДУСТРИЈА МАКЕДОНИЈА ГО СЕЛИ ФОКУСОТ НА ЕНЕРГЕТИКАТА Мицкоски вели дека земјава нема да биде нем набљудувач на светските процеси appeared first on plusinfo.mk.

Со три странски компании кои пројавиле интерес за инвестиции и отварање на фабрики во земјата завршени се преговорите, а станува збор за капацитети во автомобилската, потоа индустријата на високи технологии и фармацевтска индустрија, потврди денеска претседателот на Владата, Христијан Мицкоски.

– Веќе три се завршени со преговори и потврдени. Донесена е одлука, во вредност од прилика од 110-120 милиони евра во првата фаза, со отприлика 1.500 вработувања, кога ќе го достигнат полниот капацитет – посочи Мицкоски во одговор на прашање.

Македонскиот премиер Мицкоски истакна дека се преговара со уште десет странски инвеститори.

– Преговараме со уште десет – дел во енергетика, дел во индустрија на високи технологии, дел во автомобилска индустрија итн. Цениме дека тие ќе додат вредност во економијата на државата, подвлече премиерот Мицкоски денеска кој присуствуваше на промоција на 120 нови полициски возила во Министерството за внатрешни работи.

The post МИЦКОСКИ НАЈАВИ ТРИ СТРАНСКИ ИНВЕСТИЦИИ ВРЕДНИ ОКОЛУ 120 МИЛИОНИ ЕВРА Можни се нови 1.500 вработувања appeared first on plusinfo.mk.

Германската автомобилска индустрија изгуби повеќе од 48.700 работни места во период од една година, според најновите бројки од германската статистичка служба Дестатис.

Регистриран е пад од околу 6,3 проценти од вкупната работна сила во секторот, соопшти институтот, додавајќи дека бројот на вработени на крајот од третиот квартал од 2025 година изнесувал 721.400, што е најниско ниво од вториот квартал од 2011 година, објави Дојче Веле.

Според Дестатис, автомобилската индустрија останува втор најголем индустриски работодавач во Германија, по машинството, кое вработува 934.200 работници.

Вкупниот број на индустриски работни места во земјата се намали за 2,2 проценти во споредба со претходната година, но загубата во автомобилскиот сектор значително го надминува просечниот тренд.

Податоците покажуваат каде се наоѓаат кризните жаришта во германската индустрија, додаде Себастијан Дулин, директор на Институтот за макроекономија и економски истражувања во Фондацијата Ханс Беклер. Сепак, генерално, губењето на работни места остана умерено во споредба со падот на производството и нарачките.

Иако барометарот за деловна клима за германската автомобилска индустрија значително се подобри во октомври, според Институтот ИФО со седиште во Минхен, целокупното расположение останува неповолно. На пример, производителот на камиони и автобуси МАН планира да намали околу 2.300 работни места во Германија.

The post ГЕРМАНСКАТА АВТОИНДУСТРИЈА СЕ ТОПИ! За една година изгубила 48.700 работни места appeared first on plusinfo.mk.

Две странски компании од автомобилската индустрија најавија дека ќе ја напуштат Македонија, објави порталот Бизнисвести.мк.

Според најавите, американската компанија „Аптив“ ќе ја затвори својата фабрика во Скопје најдоцна до крајот на 2026 година. Компанијата, која произведува електронски компоненти за автомобилската индустрија, веќе почнала со процес на постепено намалување на обемот на работа и прераспределба на производството кон други држави.

Исто така, американскатат компанија „Дура аутомотив системс“ објави дека ќе го прекине своето производство во Македонија, поради намалување на нарачките од главниот клиент, што довело до финансиски притисок и невозможност за одржување на тековните производствени капацитети.

Според порталот, двете компании, чии погони биле лоцирани во Технолошко индустриската зона Бунарџик, заедно имале околу илјада вработени.

Најавите за заминување на двете американски компании од Македонија го кометнираше и премиерот Христијан Мицкоски на новинарско прашање за време на неговата денешна посета на ТИРЗ Бунарџик.

– Ќе има компании кои што ќе се отвораат и ќе има компаниии кои што ќе се затвораат, и домашни и странски, и тоа не тереба да се сфаќа како крај на светот. Ние како Влада се обидуваме и умешни сме во тоа да привлечеме што е можно повеќе компании. Веќе имаме неколку што се во процес на завршување на преговори, до крајот на годината и то 4 или 5 такви компании, за веќе да потпишат договори со Владата. Очекувам нови над 1.000 работни места кои што би се креирале само како разултат на овие договори – рече Мицкоски, кој присуствуваше на отворање на нов погон на компанијата „Костал“.

The post ДВЕ АМЕРИКАНСКИ КОМПАНИИ СИ ОДАТ ОД МАКЕДОНИЈА Причина е намалување на нарачките appeared first on plusinfo.mk.

Во услови на интензивирање на дебатата околу забраната за продажба на автомобили со мотори со внатрешно согорување во ЕУ од 2035 година, како дел од амбициозните зелени цели на блокот за намалување на емисиите на јаглерод диоксид, група здравствени организации и медицинските професионалци упатија заедничко писмо до Европската комисијата во која ги нагласуваат здравствените ефекти од евентуалното укинување на оваа мерка.

Дебатата ја интензивираше европската автомобилска индустрија, која од самиот старт се противи на забраната на продажбата на возила со мотори со внатрешно согорување, сега иницирајќи идеја ЕУ да се откаже од ваквиот план.

На средба со претседателката на Европската комисија, Урсула фон дер Лајен минатиот месец претставници на автоиндустријата посочија дека забраната ќе го зголеми притисокот врз овој сектор во услови на нелојалната конкуренција на кинеските производители на електрични возила и на американските царини за увозот на автомобили од Европа.

Европската автоиндустрија за својот предлог доби поддршка од водечките земји производители на возила, Германија и Италија, при што германскиот канцелар Фридрих Мерц дури ја оцени забраната како „грешка“.

Во вакви услови, Фон дер Лајен најави дека Европската комисија ќе ја забрза постапката за преразгледување на одлуката за забрана на продажбата на автомобили со мотори со внатрешно согорување.

Но, на ова реагираше европската индустрија за електромобили, која предупреди дека укинувањето на забраната ќе има неповолно влијание врз пазарот на електрични возила во ЕУ, како и дека од тоа корист би имале конкурентите од трети земји и би биле поткопани инвестициите во овој сектор.

Дополнително, група десничарски и конзервативни европратеници иницираа дебата во Европскиот парламент посветена на поддршка на идејата за укинување на забраната, при што беше повторена познатата реторика за постоење на „зелена идеологија“ и квалификацијата на Зелениот договор како „најголема измама во ЕУ“.

Во сите овие дискусии прашањето се сведе на заштита на европската автомобилска индустрија и на одржување на нејзината конкурентност, од една страна, и на заложбите за зелена транзиција и остварување на целите за климатска неутралност, од друга страна. Во сенка падна прашањето за здравствените ефекти од забраната.

Поради ова, групата здравствени организации и медицински професионалци во своето писмо до Еврокомисијата посочуваат дека во целата дебата се занемаруваат ефектите што по здравјето на луѓето би ги предизвикало укинувањето на забраната, пред сè, оние поврзани со загадувањето на воздухот.

Во писмото се наведува дека емисиите на гасови од возилата со мотори со внатрешно согорување се еден од најголемите загадувачи на воздухот.

Загадениот воздух е одговорен за повеќе од 300.000 предвремени смртни случаи во Европа секоја година, а Европската агенција за животна средина го нарекува „најголемиот ризик по здравјето на животната средина во Европа“, се вели во писмото.

Авторите на писмото посочуваат дека загадениот воздух влијае на речиси сите видови болести, меѓу кои се истакнуваат срцевите заболувања, мозочните удари, ракот на белите дробови, астмата, деменцијата, дијабетесот и замастувањето на црниот дроб.

Лошиот воздух може да доведе и до компликации во бременоста и да го наруши развојот на децата. Дополнително, на него се најранливи најмладите и најстарите припадници на општеството.

Изложеноста на загаден воздух значително го зголемува ризикот од неплодност. Тоа се резултати од првата студија за проучување на опасноста по населението.

Според студијата на ЕРЈ Опен Ресрч, објавена минатиот месец, при вдишување на загаден воздух, ситните ПМ2,5 честички преку белите дробови успеваат да навлезат во крвотокот и бидејќи се многу мали, слободно циркулираат низ него.

Овие честички можат „да се залепат“ за црвените крвни зрнца, чија примарна функција е да го транспортираат кислородот од белите дробови до остатокот од телото, и на тој начин овие загадувачи се шират низ целиот систем и доспеваат до сите органи.

Истражувањата покажуваат дека загадувањето на воздухот е алармантно во повеќето земји од Централна и од Источна Европа, но и во Италија, при што регистрираните количества на ПМ2,5 честички се многу повисоки од дозволеното ниво на Светската здравствена организација (СЗО) од 5  микрограми на кубен метар.

ПМ2,5 честичките, според студијата, се виновни за повеќето смртни случаи поврзани со загадувањето на воздухот, на што се надоврзуваат и голем број други загадувачи, кои исто така придонесуваат за предвремена смртност и болести.

Врз основа на ова се оценува дека е потребна промена на пристапот во дебатата околу забраната на возилата за внатрешно согорување, во која сега здравјето најчесто се става во втор план.

„Тоа апсолутно треба да се промени. Секој треба да дише, па затоа никој не е безбеден, а многу од споменатите болести придонесуваат за пониска продуктивност на работниците, предизвикувајќи спирала во големите индустрии“, се нагласува во писмото.

The post А, ШТО Е СО ЗДРАВЈЕТО НА ЛУЃЕТО? Профитот и политиката се во прв план, се бара ауспусите да чадат и после 2035 година appeared first on plusinfo.mk.