Убер вложува милијарди во автомобили без возачи, но неговата математика покажува дека иднината на превозот можеби сепак нема да биде без луѓе. Компанијата пресметува дека комбинацијата од роботакси и човечки возачи може да биде поисплатлива од флота составена исклучиво од автономни автомобили.

Причината е едноставна. Роботаксито создава трошоци и кога нема патник. Возилото треба да се купи, одржува и осигурува, а компанијата плаќа и за инфраструктурата што му е потребна, пишува Аксиос.

Возачот, од друга страна, ја чини платформата само кога работи.

Затоа Убер не ги гледа автономните возила како целосна замена за луѓето, туку како дополнување на постојната понуда. Повеќе достапни автомобили би значеле пократко чекање и пониски цени, што според компанијата би требало да привлече и повеќе патници.

– Економската исплатливост на роботаксијата сè уште не е докажана. Ниту една компанија сè уште не заработува пари, ниту некој ги користи во огромен обем – вели Сарфраз Маредија, шеф за автономна мобилност и испорака во Убер.

Математиката особено доаѓа до израз кога побарувачката нагло расте. Наместо Убер да поседува огромна флота што поголем дел од денот би стоела паркирана, човечките возачи можат да се вклучат кога има сообраќаен шпиц, концерт, натпревар или лошо време.

Слична логика има и Лифт. Роботаксијата би го преземале основниот дел од секојдневната побарувачка, а луѓето би служеле како дополнителен капацитет кога на улиците одеднаш се потребни повеќе автомобили.

Добар пример се доцните ноќни часови. Токму тогаш автономните автомобили најчесто би се полнеле бидејќи струјата е поевтина. Кога ќе се затворат баровите и нагло ќе порасне побарувачката, товарот може да падне врз човечките возачи.

И поделбата на патувањата може да биде различна. Роботаксијата главно би преземале пократки градски релации, додека луѓето би добивале подолги и попрофитабилни возења.

Но математиката што му одговара на Убер не мора да им одговара и на сите негови возачи. Компанијата признава дека најпогодени може да бидат луѓето што возат за дополнителна заработка.

Дел од нив би останале без работа, а други би морале да возат подолго за да заработат колку претходно.

The post УБЕР ВЛОЖУВА МИЛИЈАРДИ ВО РОБОТАКСИ, НО НЕ СЕ ОТКАЖУВА ОД ВОЗАЧИТЕ Еве што вели математиката на компанијата appeared first on plusinfo.mk.