Градот Скопје ги известува граѓаните дека на 11 јуни 2026 година, во четврток, во раните утрински часови ќе се изврши авионска дезинсекција против ларви од комарци на целото подрачје на градот.

Од Град Скопје посочуваат дека акцијата е дел од редовните мерки за заштита на јавното здравје и намалување на бројноста на комарците во летниот период.

„Доколку временските услови не дозволат реализација на дезинсекцијата, таа ќе се изврши првиот нареден ден кога ќе бидат поволни временските услови, во истиот термин“, информираат од Град Скопје.

Оттаму упатија и апел до пчеларите навремено да ги преземат потребните мерки за заштита на пчелите, со цел да се избегнат евентуални штети.

The post УТРЕ РАНО ЌЕ СЕ ПРСКА ПРОТИВ КОМАРЦИ Градот со важно предупредување за граѓаните и пчеларите appeared first on plusinfo.mk.

Предлог-законот за заштита од употреба на производи од тутун и сродни производи е резултат на широк консултативен процес со сите засегнати страни и не е подготвен ниту набрзина, ниту со наметнување решенија, изјави премиерот Христијан Мицкоски. Тој нагласи дека основната цел на законското решение е намалување на бројот на лица кои користат тутунски производи и подобрување на јавното здравје.

Говорејќи на состанок со еснафските здруженија и со други засегнати страни, на кој присуствуваше и министерот за здравство Азир Алиу, Мицкоски истакна дека во изработката на законот биле вклучени здруженија, производители, дистрибутери, угостители и сопственици на ресторани и на ноќни клубови.

Според него, конечниот текст е компромисно решение кое ги зема предвид различните интереси, иако не може целосно да ги задоволи сите страни.

– Не постои идеален закон од кој сите ќе бидат целосно задоволни. Важно е што низ дијалог успеавме да дојдеме до заедничко решение кое во голема мера ги регулира односите во оваа област – рече премиерот.

Тој најави дека Владата ќе инсистира на доследна примена на законот на целата територија на државата и предупреди дека нема да има привилегирани поединци, региони или угостителски објекти.

– Инспекциските служби ќе бидат ригорозни. Нема да има повластени и нема да има селективна примена на законот. Секој што нема да ги почитува прописите ќе биде санкциониран – порача Мицкоски.

Премиерот изрази очекување дека законското решение ќе биде ставено на владина седница во вторник и апелираше неговото усвојување да се реализира што е можно побрзо.

Тој оцени дека правилната и доследна примена на законот ќе придонесе за подобра заштита на здравјето на граѓаните и за намалување на употребата на тутунски производи.

Министерот за здравство АзирАиу рече дека е заокружена целокупната консултативна и институционална постапка за предлог-законот за заштита од употреба на производи од тутун или сродни производи.

– Ова не е закон што се носи набрзина, ниту закон што се носи без слушање на засегнатите страни. Напротив, ова е закон што помина низ широка, инклузивна, детална и аргументирана постапка на усогласување меѓу државните институции, со инспекциските и надзорните органи, со претставниците на тутунската индустрија, со угостителскиот сектор, со експертската јавност и со граѓаните преку можноста што ја имаа преку ЕНЕР – рече Алиу.

-Причината поради која ни е потребен нов закон произлегува од тоа што постојниот закон е донесен во 1995 година и, иако во меѓувреме имал девет измени, повеќе не одговара на денешната реалност. Денес не зборуваме само за класични цигари. Имаме електронски цигари, како и несогорливи тутунски производи кои се нови форми на употреба на никотин и тутун што технологијата постојано ги развива, истакна Алиу.

Според него, податоците се недвосмислени и тие се основата на јавно-здравствениот пристап.

– Тутунот е поврзан со над 3.600 смртни случаи годишно, односно околу 13 проценти од сите смртни случаи во државата. Економската загуба се проценува на 38 милијарди денари, односно над 600 милиони евра годишно, што претставува околу 5,16 проценти од БДП. Меѓу младите на возраст од 13 до 15 години, 13,6 проценти користат тутунски или никотински производи, што е највисока стапка од 2002 година. Дополнително, 73 проценти од младите пушачи не биле спречени да купат цигари поради нивната возраст. Истовремено, 86,9 проценти од младите поддржуваат забрана за пушење во затворени јавни простори – посочи министерот.

Ова, дополни, покажува дека станува збор за прашање на јавно здравје, заштита на децата, заштита на непушачите, заштита на работниците и создавање јасни правила во јавниот простор.

Алиу потенцира дека законот не го забранува производството, увозот, извозот или продажбата на тутунски производи, но, ја уредува нивната употреба и промоција таму каде што таа влијае врз здравјето на други луѓе.

– Новиот закон носи конкретни и мерливи придобивки. Обезбедува чист воздух во затворени јавни и работни простори. Ги опфаќа новите производи, вклучително електронските цигари и несогорливите тутунски производи. Ја зголемува заштитата на децата преку намалување на нормализацијата, присутноста во училиштата, заштита во приватно возило во присуство на дете, како и на 20 метри од влезовите на здравствени, образовни инстиутции и установи за деца. Законот ја затвора и сивата зона за терасите. Стариот закон само велеше дека пушењето е дозволено на тераси, без доволно јасни услови за нив. Новиот закон воведува јасни и спроведливи критериуми, како на пример, терасата мора да биде отворена од најмалку две страни – укажа Алиу.

Во делот на рекламирањето, промоцијата и спонзорствата, додаде Алиу, законот воведува сеопфатна забрана која ги опфаќа онлајн платформите, социјалните мрежи и инфлуенсерскиот маркетинг – канали што не постоеја кога се носеше стариот закон, а денес имаат силно влијание, особено врз младите.

– Посебно важно е што законот воспоставува функционален надзор. Наместо неколку органи со недоволно јасна поделба на надлежностите, новиот текст предвидува 14 надзорни органи со прецизно разграничени надлежности. Ова е важно затоа што законот мора да биде не само добро напишан, туку и спроведлив на терен – рече Алиу.

Во изминатиот период беа одржани 7 работни состаноци со претставниците на тутунската индустрија и 5 работни состаноци со претставниците на угостителскиот сектор. Текстот на законот беше усогласен со повеќе државни институции и со 14 инспекциски и надзорни органи за да има јасни правила, прецизни надлежности и функционална примена,.

Преку јавната расправа на ЕНЕР беа разгледани 58 коментари од граѓани, трговци, здруженија и од експерти.

– Во процесот имавме и значајна експертска поддршка од Светската здравствена организација, особено во делот на јавно-здравствените стандарди и обврските што произлегуваат од Рамковната конвенција за контрола на тутунот, за што изразувам искрена благодарност. Пред нас имаме текст што е резултат на комплексен процес на слушање, аргументирање и усогласување. Овој закон ги штити оние кои најмалку можат да се заштитат сами – децата, вработените и непушачите. Денеска ја финализираме оваа фаза од постапката. Следниот чекор е разгледување на предлог-законот на седница на Владата, а потоа, согласно процедурите, негово понатамошно процесирање во Собранието – рече министерот Алиу.

The post 🎥 ЗАКОНОТ ЗА ЗАШТИТА ОД ПУШЕЊЕТО Е КОМПРОМИСНО РЕШЕНИЕ Ќе нема привилегирани, ќе има строги контроли appeared first on plusinfo.mk.

Градот Скопје ги известува граѓаните дека на 01.06.2026 година (понеделник) и на 02.06.2026 година (вторник), во раните утрински часови ќе се изврши авионска дезинсекција против возрасни форми на комарци на подрачјето на градот Скопје.

Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин.

Градот ги известува пчеларите навреме да ги преземат потребните мерки за заштита на пчелите.

The post АВИОНСКО ПРСКАЊЕ ПРОТИВ КОМАРЦИ ВО СКОПЈЕ Пчеларите навреме да ги заштитат своите пчели appeared first on plusinfo.mk.

Министерството за здравство почнува координирани активности за јакнење на услугите на здравствените установи за откажување од тутунот.

Министерството во соработка со Светската здравствена организација и со Институтот за јавно здравје, Центрите за јавно здравје, локалната самоуправа, здравствените домови низ земјава ќе преземе чекори за поголема достапност на советувалишта за откажување од пушењето.

Фокус е ставен на младата популација, а Министерството за оваа цел ја ажурираше и листата на лекови за одвикнување од пушењето.

– Почнуваме координирани активности за зајакнување на услугите за откажување од пушење на локално ниво. Целта на овие активности е поголема достапност на советувалиштата што ги имаме на локално ниво, се со цел откажување од пушење, зајакнување на системот за упатување како и континуирана поддршка на овие лица со посебен фокус на младата популација во нашата држава. Сакам да потсетам за уште една значајна новина која ја воведуваме а тоа е дека министерството за здравство ја ажурираше есенцијалната листа на лекови и во неа првпат се ставени лекови за одвикнување од пушењето и контрацептивните средства, а тоа се трандермалните фластери и никотинските гуми за џвакање – рече министерот за здравство, Азир Алиу на денешната прес-конференција.

Целта е да се зголеми достапноста на лековите, да бидат препознаени од јавноста, фармацевтските компании, а матичните лекари да ги препишуваат.

– Паралелно, работиме на системско зајакнување на овој сегмент преку новиот предлог-закон за заштита од употреба на производите од тутун или сродни производи, со што со законското решение кое е усогласено со европските норми, тие регулативи, исто така овозможуваме долгорочно унапредување на заштитата на јавното здравје во нашата земја од овој аспект. Продолжуваме со нашите партнери СЗО, Институтот за јавно здравје со заеднички заложби за подигнување на јавната свест за откажување од пушењето и заштита на здравјето во нашата држава – рече Алиу.

Д-р Аким Али од Светската здравствена организација (СЗО) порача дека откажувањето од тутун спасува живот. Тој се осврна на младата популација во Македонија, но и во Европа кои коирстат нетрадиционални производи кои предизивикуваат зависност, посочувајќи дека тутунската индустрија еврлуирала, ги „максира“ проииводите за да им се доближи на младите.

– Предизвикот овде е што овие производи се особено привлечни за младите. Зад светлите бои, елегантното пакување и слатките вкусови лежи јасна намера да се нормализира употребата на никотин и да се создаде доживотна зависност кај младите. Ова не е прифатливо. Забранувањето на вкусовите спасува животи, бидејќи младите луѓе се намерно таргетирани. Важно е активностите за јавно здравје за намалување на зависноста од никотин да развиваат вкусови како што се нане, боровинка, лубеница, не се безопасни. Тие се специјално дизајнирани да ја маскираат суровоста на никотинот и да ги олеснат производите за употреба, особено за младите – рече Али.

На прес-конференцијата, претставникот од СЗО, кажа дека 14 од 100 млади луѓе во земјава користат тутун, а 9 проценти од нив користат е-цигари, посочувајќи дека од последното истражување 2016-та, употребата на е-цигари двојно е зголемена. И во Европа, младите се „најтешки пушачи“ и имаат ризик покрај нетрадиционалните да почнат да користат и традиционални производи од тутун.

Али нагласи дека СЗО и партнерите, Министерството за здравство и Институтот за јавно здравје, ќе преземат активности, бидејќи како што нагласи цената е превисока, земјава губи луѓе и дел од БДП за лекување на болести предизвикани од користење на тутун и повика да се забранат никотински производи со вкусови и да се спасат животи.

Директорката на Институтот за јавно здравје, д-р Марија Андоновска на прес конференцијата кажа дека тутунот е водечки фактор за појава на незаразни заболувања и ја нагласи неопходната од подигање на свеста кај наслението за последиците по здравјето. Фактот што половина од возрасните граѓани се активни пушачи е сигнал за како што рече, одлучно преземање на меки за заштита на населението.

– Според резултатите на Институтот за јавно здравје од истражувањето во 2023 година во соработка со СЗО, ИЈЗ, Министерството за здравство, дури 45,4 проценти, од возрасната популација се изјасниле како активни пушачи. Исто така истражувањето коешто го правевме во сите училишта на деца на возраст до 16 години покажува висок процент. Процентот е значително над европскиот, над регионот на СЗО која изнесува 25 проценти. Дополнително загрижува и фактот што пушењето кај нас во голема мера се смета за општествено прифатлива појава, а само 17 проценти од граѓаните во Македонија изразуваат одобрување кон пушењето – рече Андоновска.

Употребата на тутун е поврзана со бројни заболувања, кардиоваскуларните, хронично-белодробните заболувања, мозочниот удар, малигни заболувања промени во бременоста… Никотинот создава силна зависност, рече директорката, поради што многу луѓе тешко успеваат да се откажат од пушењето. Таа истакна дека загрижува фактот што се повеќе млади лица започнуваат со употреба на никотински производи уште во рана возраст, со што ризикот за долгорочни здравствени последици. Воедно, додаде Андоновска се зголемува товарот, и врз целиот здравствен систем, бидејќи огромен дел од ресурсите се насочуваат кон лекување заболувања кои можат да се превенираат. Таа сподели информации од анализите на СЗО за Македонија каде што според проценките, употребата на тутун ја оптоварува државата со трошоци за околу 38 милијарди денари на годишно ниво. Посочи дека секој еден денар вложен во превенција носи 19 денари поврат преку избегнати здравствени трошоци. Ваквите инвестиции имаат потенцијал да ја намалат смртноста на годишно ново, како и да ја намалат економската загуба и затоа превенцијата е најважна.

– Институтот во овој период ги зголеми своите активности во однос на превентивните едукации во училиштата на темава и во иднина ќе продолжиме  да работиме на подигнување на јавната свест, следење на состојбите и поддршката на сите политики насочени кон намалување на употребата на тутун, заедно со Министерството за здравство СЗО, сите релевантни институции и медиумите. Нашата цел е јасна, поздрава иднина за сегашните и за идните генерации – рече Андоновска.

Светскиот ден без тутун, годинава се одбележува под мотото, „Разоткривање на привлечноста, спротивставување на зависноста од никотин и од тутун“.

The post ДРЖАВАТА СО АКТИВНОСТИ ПРОТИВ ЗАВИСНОСТА ОД ПУШЕЊЕ Нови лекови, нов закон и советувалишта за откажување од тутун appeared first on plusinfo.mk.

Водечката африканска агенција за јавно здравје денеска потврди дека во покраината Итури, во Демократска Република Конго, избувнала епидемија на ебола.

Африканските центри за контрола и превенција на болести соопштија дека поради ситуацијата ќе одржат итен состанок, додека здравствените власти предупредуваат на ризик од понатамошно ширење.

Според првичните податоци, пријавени се околу 246 сомнителни случаи и најмалку 65 смртни случаи, најмногу во здравствените зони Монгбвалу и во Рвампара.

Не е најсмртоносниот сој

Агенцијата соопшти дека првичните анализи укажуваат на сој на вирусот што не припаѓа на Заир, најчестиот и најсмртоносен тип на ебола.

Во тек е дополнително секвенционирање за попрецизно утврдување на карактеристиките на вирусот.

– Постои ризик од понатамошно ширење поради урбаното опкружување и интензивното движење на населението – предупреди Африканскиот центар за контрола и превенција на болести.

Здравствените власти се особено загрижени поради мобилноста поврзана со рударските активности во регионот.

Смртоносен вирус

Еболата е тешка вирусна болест што често има фатален исход. Се пренесува преку директен контакт со телесни течности од заразени лица, контаминирани предмети или тела на починати пациенти.

Конго со години се соочува со периодични епидемии на ебола, а здравствените системи во делови од земјата остануваат под силен притисок.

The post ПОТВРДЕНА Е ЕПИДЕМИЈА НА ЕБОЛА ВО КОНГО Умреле најмалку 65 лица, 246 се заразени appeared first on plusinfo.mk.

Канада по речиси 30 години повеќе не е земја во која сипаниците се искоренети. Панамериканската здравствена организација (ПАХО) ѝ го поништи статусот поради неуспехот да спречи епидемија што трае веќе повеќе од една година, соопшти Канадската агенција за јавно здравје.

Според британските медиуми, одлуката следи откако во текот на минатата година во земјата биле регистрирани над 5.000 случаи на мали сипаници во девет од десетте провинции и во една северна територија.

Во официјалното соопштение на ПАХО се наведува дека, иако ширењето на инфекцијата неодамна се забавило, епидемијата траела повеќе од 12 месеци, најмногу во заедници каде што процентот на вакцинирани лица е недоволен.

– ПАХО ја информираше Канадската агенција за јавно здравје дека земјата повеќе нема статус на држава во која се искоренети малите сипаници – стои во соопштението, додавајќи дека фокусот сега ќе биде ставен на масовна вакцинација и подигнување на свеста за имунизација.

Здравствените експерти предупредуваат дека падот на стапката на вакцинација, особено по пандемијата на Ковид-19, бил клучен фактор за повторното ширење на оваа високо заразна болест.

Во последните неколку години, расте бројот на луѓе кои изразуваат недоверба кон вакцините, што резултираше со појава на џебови на невакцинирано население, идеална почва за вирусот да се врати.

Според експертите, доколку темпото на вакцинација не се подобри, постои ризик болеста повторно да стане ендемска во некои делови од земјата.

The post ПО ТРИ ДЕЦЕНИИ СИПАНИЦИТЕ СЕ ВРАТИЈА Падот на вакцинацијата доведе до нова епидемија, Канада не е „безбедна земја“ appeared first on plusinfo.mk.

Македонскиот професор, епидемиолог и поранешен министер за здравство, Драган Данаиловски, во објава на социјалните мрежи предупреди дека најсмртоносните суштества на планетата, комарците, и ова лето се во офанзива и дека претставуваат сериозна јавно-здравствена закана.

Ви ја пренесуваме во целост неговата објава на социјалната мрежа Фејсбук.

„Најсмртоносните суштества на светот – комарците – и ова лето упорно ни пијат крв – континуирано 24 часа! Најагресивниот вид, „азискиот тигрест комарец“ (Aedes albopictus) галопира со ‘чекори од 7 милји’, освојувајќи територии, уште од 2016 година (кога прв пат е идентификуван кај нас). Нашиот дамнешен „сожител“, домашниот комарец (Culex pipiens) ја изгуби трката. На југот од земјата може да се сретне и маларичниот комарец Anopheles (sacharovi). И сите бодат и пијат крв. Женките. Мажјаците служат за приплод…

Но, не се толку проблем здодевните убоди. И несносното чешање.
Проблем е што некои единки може да налетаат на болни луѓе од одредени болести. Чиишто причинители (вируси, паразити) наоѓаат привремен ‘дом’ во утробата на комарците. Чекајќи нивниот домаќин да касне нова жртва (човек, животно или птица). И да ги пренесе во нивен нов резервоар. До следниот убод на некој друг ‘крвопиец’… и така во круг…
Секој тип од ‘крвопијците’ си има посебен афинитет кон одредени причинители на заразни болести: ‘Летечкиот тигар’ – денга, чикунгуња, зика. Домашниот кулекс – Западно-нилска треска. Маларичниот комарец – маларија.

Ризиците од Западно-нилска треска се реални. Ја има во соседните држави. Имаше и кај нас два случаи минатата година (2024). Ризиците, пак, од денга, чикунгуња, зика и маларија, засега, се како ‘Дамоклов меч’. Зашто, луѓето патуваат сѐ повеќе. И на егзотични дестинации, каде што овие болести се ендемски.

Оттаму, не смее ‘главата да се пика в песок’. Што значи тоа? Тоа значи дека ни оддалеку не е доволно само да се спроведе рутинска дезинсекција (од воздух и од земја, т.н. терестрична). И да се извести јавноста со штура објава во јавните гласила. И толку. Зашто, никогаш не се уништува целата популација комарци. Па, макар се прскало и неколкупати во една сезона. Што значи, ризиците по здравјето се редуцираат, но и понатаму се присутни.

И тие ризици ќе бидат сѐ поприсутни. Со затоплување на планетата, односно климатските промени, ќе се продолжува сезоната на комарци. Најсмртоносното суштество во светот ќе го прошири својот географски опсег во нови региони и повторно ќе почне да се јавува во области во кои бројот на комарци се намалувал со децении.

Екстремните климатски и временски услови како што се суши, топлотни бранови, поплави и врнежи се интензивираат ширум светот. Тие обезбедуваат поволни услови за размножување на комарците и би можеле да помогнат во ширењето на вируси на поголеми географски ширини и надморски висини. Една неодамнешна студија, предводена од Лондонската школа за хигиена и тропска медицина, има предвидено дека повеќе од 8 милијарди луѓе би можеле да бидат изложени на ризик од маларија и денга до 2080 година.

Значи, болестите што се пренесуваат со комарци (ќе) стануваат сѐ позначаен јавно здравствен проблем. Кој никако не смее да се потценува. Заради што, потребна е подготовка на системот за превенција и благовремена реакција на можни предизвици.
Не треба тоа да бидат формални, површни и некоординирани потези.
Потребен е нов пристап – координиран, системски, долгорочен. Холистички пристап. Нова парадигма. Парадигма наречена „Едно здравје“ (One Health approach, One Health paradigm).

Таа ја препознава меѓусебната поврзаност помеѓу здравјето на луѓето, здравјето на животните и животната средина. Таа ја нагласува меѓузависноста на трите области, односно здравјето на една област е тесно поврзано со здравјето на другата.

Во контекст на болестите што се пренесуваат преку комарци, примената на концептот „Едно здравје“ е важна поради сложените интеракции меѓу комарците, луѓето, животните и животната средина во пренесувањето и контролата на овие болести. Овој пристап претпоставува соработка меѓу различни засегнати страни (главните „играчи“): стручњаците за јавно здравје, ветеринарите, екологистите, креаторите на политики и локалните заедници.
Клучните елементи на пристапот „Едно здравје“ за контрола на комарци се следните:

1. Намалување на местата за размножување на комарците со елиминирање на застоените води, подобрување на санитарните услови и ефикасно управување со отпадот (управување со животната средина);
2. Користење на природни предатори или патогени микроорганизми на комарците, како што се ларви од риби или бактерии (Wolbachia, Bacillus thuringiensis israelensis) како алтернативи на хемиските инсектициди (биолошка контрола);
3. Комбинирање различни методи за контрола, вклучувајќи управување со животната средина, биолошка контрола и хемиска контрола (кога тоа е потребно и со одговорна употреба), за да се постигне одржливо и ефикасно намалување на популацијата на комарци (интегрирано управување со вектори);
4. Имплементирање на системи за следење на популациите на комарци, рано идентификување на епидемии на болести и евалуација на ефикасноста на мерките за контрола (надзор и мониторинг);
5. Едукација на јавноста за болестите што се пренесуваат преку комарци, промовирање на лични заштитни мерки (како што се употреба на репеленти, мрежи за кревети, комарници на прозорците) и поттикнување на учеството на заедницата во напорите за контрола.
Во овој сегмент, матичните доктори имаат незаменлива улога. Тие се најблиску до граѓаните, ја уживаат нивната доверба и можат директно да ги едуцираат за:

• како да се заштитат од убоди,
• како да ги намалат местата за размножување на комарци во својата околина,
• кога е време да побараат медицинска помош при појава на симптоми.

6. Поттикнување на соработката помеѓу јавно здравствените установи, ветеринарниот сектор, со секторот за животна средина и други релевантни сектори (меѓусекторска соработка);

7. Препознавање дека животните можат да послужат како резервоари за некои болести што се пренесуваат преку комарци и спроведување стратегии за управување со интеракциите меѓу комарците и животните, како што е третирање на добитокот со инсектициди (справување со животинските резервоари).

Се прашувам, колку елементи од погоре набројаните кај нас функционираат?

Или со други зборови, сме помислиле ли дека е крајно време да организираме пристап „Едно здравје“ во справувањето со овој јавно здравствен проблем?

За почеток, барем да изработиме Програма за справување со болестите што се пренесуваат со комарци и други вектори со јасно дефинирани улоги и одговорности“.

The post ЕДЕН УБОД – БОЛЕСТИ РОЈ Д-р Даниловски предупредува дека комарците во земјава веќе не се шегуваат appeared first on plusinfo.mk.

На Клиниката за детски болести е обезбеден дигитален мобилен рендген апарат со поддршка од Амбасадата на Jапонија

Државниот секретар во Министерството за здравство, д-р Бесим Мемеди, денеска, на Клиниката за детски болести присуствуваше на настан по повод промоција на дигитален мобилен рендген апарат, обезбеден со поддршка од Амбасадата на Јапонија.

– Станува збор за дигитален мобилен рендген апарат, во вредност над 60.000 евра. Оваа инвестиција претставува значаен чекор кон подобрување на здравствената грижа за најмладите пациенти. Изразувам длабока благодарност до Амбасадата на Јапонија, а особено до амбасадорката, Сецуко Кавахара, за нејзиниот личен ангажман и за долгогодишната, пријателска и плодна соработка. Оваа донација е уште еден доказ за силното партнерство меѓу нашите две земји и за вистинската грижа на Јапонија кон градење отпорен и хуман здравствен систем – изјави д-р Мемеди.

Тој изрази благодарност за поддршката и до Канцеларијата на Светската здравствена организација во земјава, и до нејзиниот шеф, Аким Али, за континуираната поддршка во развојот на здравствените политики.

Амбасадорката на Јапонија во нашата држава, Сецуко Кавахара, потсети дека во рамки на заедничката соработка веќе се имплементирани над 70 проекти во здравствениот сектор и истакна дека поддршката за оваа клиника значи придобивка за пациентите од целата држава.

Воедно директорот на Детска клиника, д-р Реџеп Мемеди, се заблагодари за значајниот придонес за унапредување на здравствените услуги во оваа клиника, како врвна терциерна установа која годишно згрижува над 5.000 деца со најсложени здравствени состојби.

– Новата апаратура за нас претставува чекор напред во унапредување на здравствената грижа за најмладите пациенти – посочи д-р Мемеди.

The post ЈАПОНИЈА ДОНИРА РЕНДГЕН АПАРАТ ОД 60.000 ЕВРА ЗА ДЕТСКАТА КЛИНИКА Новата мобилна апаратура ќе помогне во лекувањето на илјадници деца годишно appeared first on plusinfo.mk.

Два случаи на мајмунски сипаници (Monkeypox) се лабораториски потврдени во земјава. Двајца пациенти упатени од Клиниката за кожни болести денес пристигнале во Институтот за јавно здравје (ИЈЗ) со симптоми сомнителни за ова вирусно заболување.

Од ИЈЗ соопштуваат дека веднаш по приемот на пациентите се постапило согласно протоколите – направени се испитувања за мајмунски сипаници, како и за ХИВ, сифилис и херпес.

„Институтот за јавно здравје изврши лабораториски испитувања на три различни начини, со што лабораториски се потврдија два случаи на мајмунски сипаници“, информираат од ИЈЗ.

Ова е првпат во земјава лабораториски да се потврдат случаи на ова заразно заболување. Од Институтот посочуваат дека по добиените резултати, веднаш биле известени сите надлежни институции, меѓу кои Министерството за здравство, Клиниката за кожни болести и Инфективната клиника.

„Докторот кој ги прими пациентите веднаш ги информираше за резултатите, а стручните лица епидемиолози од Институтот се вратија на работа и пристапија кон епидемиолошко анкетирање на двете лица. Се добиваат податоци кои се исклучително важни за понатамошно постапување“, велат од ИЈЗ.

Анкетата со пациентите е сè уште во тек, а на лицата кај кои е потврден вирусот ќе им биде препорачано да се јават на Инфективната клиника.

„Во моментов нема простор за паника. Брзо и навремено се преземаат сите потребни институционални мерки. Вечерва се мобилизирани сите институционални капацитети, а во текот на утрешниот ден ќе бидат објавени подетални информации“, порачуваат од Институтот за јавно здравје.

The post МАЈМУНСКИ СИПАНИЦИ ЗА ПРВПАТ ПОТВРДЕНИ ВО МАКЕДОНИЈА Вирусот е детектиран кај двајца пациенти, информира ИЈЗ appeared first on plusinfo.mk.

РЕК Битола активно работи на решавање на проблемот со одлагањето на пепелта и уверува дека квалитетот на воздухот не е нарушен, соопшти РЕК Битола.

„Во врска со неодамнешните реакции во јавноста во врска со наводите за несоодветно одлагање на пепелта во РЕК Битола, АД ЕСМ, Подружница РЕК Битола, сака да ја информира јавноста за преземените мерки и континуираните напори за еколошки одговорно работење. Иако присуството на прашина при поинтензивен ветер е позната појава во изминатите децении поради специфичниот процес на производство, транспортот и одлагањето на пепелта преку 3,7 километарска лента, РЕК Битола активно работи на нејзино минимизирање. Пепелта, како нуспроизвод од производството на електрична енергија, се третира со континуирано навлажнување, проследено со одлагање и со засипување со земја. Сепак, високите температури и ветрот може да доведат до сушење на површинскиот слој и евентуално подигнување на прашина при нејзиното спуштање во касетата“, велат од комбинатот.

Надлежните институции веќе извршиле увид на терен. Инспекцискиот надзор потврдил отстапување од стандардите, но санкции не се изречени, што според РЕК Битола е доказ за признавање на напорите за надминување на состојбата.

„На 26 март 2025 година, Државниот инспекторат за животна средина изврши надзор на одлагалиштето за пепел во РЕК Битола. При увидот беше констатирано присуство на поголеми количини пепел кои отстапуваат од пропишаните во Главниот рударски проект, за што беше издадено задолжение во рок од 30 дена количините да бидат соодветно одложени и посипани со земја. Инспекторатот не изрече санкции, што укажува на препознавање на напорите на комбинатот за решавање на ова прашање“, се посочува во соопштението.

Од комбинатот велат дека денеска теренот е целосно исчистен и посипан со земја.

„Со задоволство информираме дека денеска, на одлагалиштето кое беше предмет на инспекцискиот надзор, нема ниеден грам пепел. Целата количина е одложена, а теренот е целосно посипан со земја“, велат од РЕК Битола.

Најавено е долгорочно решение кое треба да овозможи поефикасно и посигурно одлагање на пепелта.

„Во насока на долгорочно решение, веќе е извршено планирање и поместување на транспортната лента, со што од 25 април одлагањето на пепелта ќе продолжи директно во касета. Водените топови за дополнително навлажнување ќе бидат ставени во функција веднаш по поместувањето на лентата. Дотогаш, попрскувањето на одложената пепел се врши континуирано со специјални средства и со цистерна“, се посочува во соопштението.

Дополнително, резултатите од мерењата на амбиенталниот воздух покажуваат дека нема надминување на дозволените вредности на честички ПМ10, велат од комбинатот.

„Дополнително, ги споделуваме резултатите од мерењата на амбиенталниот воздух, спроведени од страна на акредитираната лабораторија ‘Технолаб’ Скопје. Согласно добиените податоци, констатирано е дека во испитуваниот период не е надмината 24-часовната гранична вредност за заштита на човековото здравје за концентрацијата на суспендирани цврсти честички ЦЧ10 (PM10), согласно Уредбата за граничните вредности за нивоата и видовите на загадувачки супстанции во амбиентниот воздух (Сл. весник на Р.М. бр.50/2005 и 183/2017)“, се наведува во соопштението.

Од РЕК Битола уверуваат дека ќе продолжат со транспарентно информирање на јавноста и со работа според еколошките стандарди.

„Актуелното раководство на РЕК Битола е целосно посветено на справување со долгогодишните проблеми и на обезбедување одржливо работење на комбинатот според највисоките еколошки стандарди. Ќе продолжиме транспарентно да ја информираме јавноста за сите наши активности во оваа насока“, додаваат од комбинатот.

ОЈО ИНТЕРВЕНИРА ПО РЕАКЦИИ НА ГРАЃАНИТЕ Инспекција во РЕК Битола откри отстапувања при одлагање на опасна пепел

The post РЕК БИТОЛА ВЕЛИ ДЕКА СЀ Е ПОД КОНТРОЛА Комбинатот уверува дека теренот е исчистен, воздухот не е загаден и дека се работи на трајно решение appeared first on plusinfo.mk.