Државниот ревизор утврдил низа незаконитости во работењето на Институтот за јавно здравје во 2024 година. Посебно неправилности се утврдени во сметката на средствата од Фондот за здравствено осигурување кои, според ревизорите, се провлекуваат со години, без да се преземе нешто за поправање на состојбите.

„Изразивме неповолно мислење во однос на вистинитоста и објективноста на финансиските извештаи и за усогласеност на финансиските трансакции со релевантната законска регулатива за 2024 година“, стои во извештајот.

Според ревизорите, Институтот за јавно здравје не го водел правилно сметководството, па се случило да прикаже неточни податоци за приходите и расходите во Билансот за успех. Направил попис без вредност на опремата, а на списокот поседува и опрема која е купена и стои во депото без да биде употребена. Со донации се реновирала клучната микробиолошка и вирусолошка лабораторија која поради неправилни тендери не е завршена и е надвор од употреба, што влијае на реализирање на здравствените услуги на населението. Неправилности има и во исплатата на плати и надоместоци на вработените, како и во постапките за вработување и регулирањето на специјализациите.

Сериозни забелешки ревизорите имаат и на јавните набавки кои го надминале и планот за јавни набавки, а спецификациите за одделни набавки се поклопуваат со карактеристиките на еден производител, со што е нарушена конкуренцијата при набавките, во корист на фаворизираниот производител.

Ревизорите утврдиле дека Институтот прикажал планирани податоци за приходи кои требало да ги добие од Фондот за здравство пред да ги добие тие пари, па на крајот на годината покажал вишок приходи од 90.000 евра.

При увидот на пописот утврдено е дека стока во вредност од 234.000 евра не е е пронајдена во пописните листи, но ревизорите добиле усно објаснување дека тоа се 5 возила од кои едно е продадено, а 4 се предадени на Агенцијата за управување со одземен имот и тие се во депото во Идризово.

Институтот вршел исплата на плати и прекувремени часови без одлуки. Па така на 16 вработени им се исплатени 1.087.000 денари за прекувремени повеќе од 190 часови иако не е доставено известување за воведување прекувремено работно време кај Инспекторатот за труд.

На 95 лица им се исплатени 3.140.000 денари за активна и пасивна приправност, работна активност која не е утврдена со посебен акт што го бара законот.

На 3 лица – помошен технички персонал им се исплатени 206.000 денари за дежурства иако за овој вид вработени законски не се предвидени дежурства.

Ревизорите откриле и дека субјективно се определувани износите на надоместоците, бидејќи за тоа немало законска поткрепа.

Институтот располага со медицинска опрема во вредност од 7.639.000 денари (124.000 евра) која воопшто не е ставена во употреба. Опремата е набавувана во периодот од 2019 до 2024 година. Утврдено е дека се реновира клучната лабораторија која поради тендерски пропусти сѐ уште не е пуштена во употреба.

Незаконско однесување, ревизорите утврдиле и во јавните набавки на Институтот. Набавувана е опрема без распишување тендер, а дел од набавките ја надминале висината утврдена во планот за јавни набавки. Таква била и набавката на микробиолошки тестови во вредност од 3.308.000 денари која не била планирана во планот за набавки. За дел од набавките не е консултиран стручниот колегиум на Институтот.

Според ревизорите, Институтот има воспоставено практика на утврдени спецификации на одредени реагенси и потрошен материјал кои одговараат само на еден производител со што при набавката не била можна конкуренција и учество на други производители.

Неправилности се утврдени и при утврдувањето на специјализациите од периодот од 2019 до 2023 година кои според ревизорите се вршат по интерен правилник кој не е во согласност со законот за здравствена заштита. Посебно се наведува казната која треба да ја платат специјализантите кои ќе се откажат од специјализацијата. Висината на надоместокот не соодветствува со законот.

Ревизорите навеле и низа други незаконитости во работењето на Институтот за јавно здравје.

Приемот и потрошувачката на вакцини не е евидентиран во деловните книги; попис на побарувањата не е направен во целост, а за побарувања во износ од 18.245.000 денари кои се постари од три години не се преземени активности за наплата.

Иако Министерството за здравство ги набавува вакцините за задолжителна имунизација, тие во Институтот се примаат само со податоци за количината, без податоци за нивната вредност. Примените и потрошените вакцини се евидентираат во системот „Мој термин“, но не и во деловните книги на Институтот, поради што не е воспоставена целосна сметководствена и материјална евиденција за овие залихи.

Активностите предвидени со Националната програма за јавно здравје за 2024 година не се спроведени во целост. Наведени се и неправилности поврзани со ангажирани лица со договор на дело и недоследности при издавањето на простор на Институтот под закуп.

Ревизорите алармираат и за дополнителни милионски суми кои висат меѓу ИЈЗ и Министерството за здравство.

„Во делот на Нагласување на прашања ревизијата известува за ненаплатените побарувања од Министерството за извршени здравствени услуги по програми за здравствена заштита во износ од 17.058.000 денари, чија наплата е неизвесна“, се наведува во извештајот.

The post ИНСТИТУТОТ ЗА ЈАВНО ЗДРАВЈЕ ИСПЛАЌАЛ ПРЕКУВРЕМЕНИ ЧАСОВИ БЕЗ ОДЛУКИ Ревизорите утврдиле низа слабости во работењето во 2024 година appeared first on plusinfo.mk.

Градоначалникот на Врапчиште доби пријава од Управата за финансика полиција. Постојат сомнежи дека И.Ш. незаконски склучил и реализирал тендер за реконструкција на локален пат, иако постапката по жалба сè уште не била завршена.

Според Финансиската полиција, со исплатата фирмата која била избрана се стекнала со 193.000 евра противправна имотна корист.

Според соопштението, пријавениот во текот на 2025 година постапил спротивно на Законот за јавни набавки при реконструкција на локален пат во селото Добридол.

Станува збор за договор за реконструкција на патот од центарот на селото до вкрстувањето со сервисниот пат покрај државниот пат А2, делницата Тетово-Гостивар.

Од Финансиската полиција тврдат дека договорот бил склучен на 3 април 2025 година со избраниот економски оператор без да се дочека конечната одлука по поднесената жалба пред Државната комисија за жалби по јавни набавки.

Подоцна, одлуката за избор била поништена.

И покрај тоа, според пријавата, градоначалникот извршил исплата кон фирмата.

„Пријавениот извршил плаќање по однос на склучениот договор на правното лице во вкупен износ од 11.848.675 денари и со овие дејства му овозможил на правното лице да стекне противправна имотна корист“, соопшти Управата за финансиска полиција.

Случајот сега е во рацете на Основното јавно обвинителство во Гостивар.

The post ГРАДОНАЧАЛНИК ЗАРАБОТИ КРИВИЧНА ПРИЈАВА Исплатени речиси 193.000 евра по спорен тендер appeared first on plusinfo.mk.

Државниот завод за ревизија утврди сериозни неправилности во работењето на Државната изборна комисија за 2024 година, изразувајќи неповолно мислење и за финансиските извештаи и за усогласеноста со законската регулатива. Според ревизорите, извештаите не ја прикажуваат објективно финансиската состојба, а дел од активностите не се спроведени согласно прописите.

Клучните наоди покажуваат системски слабости во управувањето со средствата и организацијата на изборните процеси. Меѓу нив се издвојува фактот дека пописот на имотот и обврските не е спроведен согласно законските правила, што директно влијае врз точноста на финансиските податоци.

Дополнително, дел од недвижностите со кои располага Комисијата воопшто не биле проценети, па не се ниту евидентирани во сметководствените книги. Ова отвора прашања за реалната вредност на државниот имот со кој управува институцијата.

Ревизијата утврди и дека планирањето на буџетските средства за изборите не било во согласност со законски утврдениот сооднос. Наместо пропишаната распределба, значителен дел од средствата биле пренасочени, при што над 129 милиони денари биле прелеани кон трошоци за политичко рекламирање.

Проблеми се забележани и во начинот на кој изборните органи ја доставувале документацијата за трошоците. Во повеќе случаи извештаите биле некомплетни, без основни документи како фискални сметки, патни налози или записници, што го отежнува следењето на трошењето на јавните пари.

Во делот на јавните набавки, ревизорите констатирале дека се набавувале стоки и услуги без да се спроведе законска постапка, како и недоследна примена на Законот за јавни набавки. Ова, според извештајот, го нарушува принципот на транспарентност и еднаков третман на понудувачите.

Посебно е посочена и спорната набавка на софтвер за обработка на изборни резултати, каде што условите не биле јасно дефинирани, а договорот бил потпишан пред да се обезбеди банкарска гаранција.

Ревизорите укажуваат и на организациски слабости, меѓу кои и фактот дека во текот на најголемиот дел од 2024 година институцијата немала генерален секретар, што влијаело врз координацијата и управувањето со административните процеси.

Дополнителен ризик претставува и нерешеното прашање со складирањето на изборниот материјал. Комисијата долго време немала соодветен магацин, што отвора можност за несоодветно чување и потенцијално оштетување на чувствителна опрема, вклучително и уредите за биометриска идентификација.

И покрај утврдените слабости, ревизорите нотираат дека дел од претходно дадените препораки остануваат неспроведени или само делумно реализирани, што укажува на континуитет на проблемите во работењето. Од вкупно девет препораки од претходната ревизија, само една е целосно исполнета.

Во насока на надминување на состојбите, Државниот завод за ревизија дал повеќе препораки, меѓу кои усогласување на законската рамка за финансирање на изборите и преиспитување на моделот за распределба на средствата за политичко рекламирање.

Целосната ревизија за работата на ДИК може да ја читате на следниот ЛИНК.

The post ГРЕШКИ ВО ТЕНДЕРИТЕ И ТРОШЕЊЕТО ПАРИ, СКАПА ОПРЕМА „СКАПУВА“ Ревизорите најдоа куп неправилности во работата на ДИК appeared first on plusinfo.mk.

Поранешниот градоначалник на Кичево, Фатмир Дехари, заработи кривична пријава под сомнение дека со злоупотреба на службената положба го оштетил буџетот на општината за повеќе од 1,4 милиони денари.

Од полицијата информираат дека пријавата е поднесена против Дехари (52) од селото Србица, како и против уште две лица и едно правно лице, поради сомнежи за злоупотреби при вршење на комунални дејности.

Според истрагата, на 8 јануари 2025 година, Дехари како градоначалник донел план за јавни набавки спротивно на Законот за комунални дејности. Иако општината имала сопствено јавно комунално претпријатие, тој ги доверил сите комунални работи на приватна фирма од селото Длапкин Дол.

Со тоа, како што наведува полицијата, постоела намера да се обезбеди поголема имотна корист за правното лице на штета на општинскиот буџет.

Второпријавениот, кој бил одговорно лице за одржување на зелените површини, не извршил соодветен надзор и несовесно постапил во своите должности. Третопријавениот, пак, како управител на фирмата, свесно ги прекршил правилата во постапката за јавен повик.

Според пресметките, за одржување на зеленилото околу зградата на Општина Кичево биле исплатени вкупно 1.457.205 денари, сума за која се сомнева дека е на штета на општината.

По целосно документирање на случајот, против пријавените ќе следуваат соодветни постапки.

The post ЗЕЛЕНИЛОТО СКАПО ЈА ЧИНЕЛО ОПШТИНА КИЧЕВО Кривична пријава за ексградоначалникот Фатмир Дехари appeared first on plusinfo.mk.

Движењето ЗНАМ – За Наша Македонија остро реагира на обвинувањата што СДСМ ги упати кон претседателот на движењето Максим Димитриевски, оценувајќи ги како класична политичка манипулација, без аргументи и докази.

Од ЗНАМ посочуваат дека нападите на СДСМ се неосновани, тенденциозни и насочени кон дефокусирање на јавноста од, како што велат, сопствениот политички и економски дебакл.

„СДСМ, тргнувајќи од сопственото искуство, мисли дека секој што е на власт краде и се бори за привилегии. Наместо факти и аргументи, повторно настапуваат со навреди, конструкции и популистички флоскули“, се наведува во реакцијата.

Од движењето потенцираат дека Максим Димитриевски никогаш не ја криел својата лична и професионална кариера надвор од политиката, за разлика од, како што велат, кадрите на СДСМ кои со години егзистирале исклучиво од државни функции.

„Димитриевски е човек кој се докажал и во бизнисот и во политиката, со јасен став и интегритет“, нагласуваат од ЗНАМ.

Во реакцијата се посочува и дека, за разлика од лидерот на СДСМ Венко Филипче, Димитриевски нема ниту еден корупциски скандал зад себе, ниту бил поврзан со афери за вакцини, изградба на болници или криминални јавни набавки.

„За разлика од двоецот Заев–Филипче, кој ги трошеше народните пари по луксузни јахти и забави низ светот, Димитриевски нема ‘златни визи’ и не оди на журки во Дубаи“, се вели во соопштението.

ЗНАМ ги отфрла и наводите за „луксуз“, „тендерска коалиција“ и наводно расипничко трошење, оценувајќи ги како чиста клевета, додавајќи дека токму СДСМ ја задолжила државата со милијарди евра и зад себе оставила бројни корупциски афери без одговорност.

Од движењето уверуваат дека сите јавни набавки и финансиски постапки се законски, транспарентни и под надзор на надлежните институции.

„ЗНАМ останува доследен на принципите на отчетност, одговорно управување и крај на партиските монополи. За нас, политиката не е приватен бизнис, туку јавна одговорност во интерес на граѓаните“, порачуваат од движењето.

На крајот, од ЗНАМ посочуваат дека граѓаните многу добро знаат кој ја донесе државата во економска и институционална криза, а кој, како што велат, нуди нов и поинаков политички пристап.

The post СДСМ СУДИ СПОРЕД СЕБЕ Жестока реакција од ЗНАМ по тешките обвинувања од опозицијата appeared first on plusinfo.mk.

Албанскиот експериментален проект – првата виртуелна министерка, направена со вештачка интелигенција, која требаше да биде симбол на борбата против корупцијата, сега се соочува со сериозен скандал – лидерите на државната агенција што го разви системот се под истрага за местење тендери.

Виртуелната министерка Диела стана заштитно лице на напорите на премиерот Еди Рама да ја намали корупцијата во Албанија. Во изминатата година, Диела настапуваше на меѓународни конференции и беше промовирана како пример за тоа како вештачката интелигенција може да се вгради во институциите.

Дури и во албанскиот парламент, Диела се обрати со порака дека е „повредена“ од критиките дека нејзината работа е неуставна.

– Јас немам лични амбиции или интереси. Имам само податоци, знаење и алгоритми посветени на тоа да им служам на граѓаните непристрасно, транспарентно и без замор – порача таа во видео-обраќање, со знамињата на Албанија и ЕУ зад себе.

Во пракса, Диела им помага на граѓаните да аплицираат за државни услуги преку интернет, со цел да се елиминира долгогодишната пракса на мито за побрзо завршување на документи. Наскоро требаше да почне и со анализа на апликации за јавни набавки, за да процени кој понудувач е најквалификуван – врз основа на податоците.

Проектот беше претставен како клучен чекор во борбата против корупцијата – услов што Албанија мора да го исполни за да напредува кон ЕУ.

Во декември, специјалното обвинителство соопшти дека директорката на Националната агенција за информатичко општество и нејзиниот заменик се ставени во домашен притвор. Тие се осомничени дека учествувале во криминална мрежа која манипулирала со јавни тендери преку заплашување.

Токму оваа агенција е одговорна за дигиталната инфраструктура на државата – вклучувајќи ја и Диела. Иако против нив сè уште не е поднесено официјално обвинение, случајот фрли сериозна сенка врз проектот.

Фактот што токму креаторите на Диела се под истрага отвори сериозни прашања: Може ли вештачка интелигенција да открие корупција ако податоците што ги добива се манипулирани?

И дали дигитализацијата навистина значи транспарентност?

Премиерот Еди Рама изјави дека ќе почека судски исход: „Мора да видиме што ќе покаже истрагата. Не можеме однапред да судиме.“

Специјалното обвинителство во последните години отвори истраги и против други високи функционери, меѓу кои и поранешниот претседател Илир Мета, градоначалникот на Тирана, како и вицепремиерката Белинда Балуку. Тоа предизвика политички тензии и протести. Опозицијата го обвинува Рама дека ја користи борбата против корупцијата селективно, додека неговите поддржувачи тврдат дека токму тоа покажува дека системот конечно функционира.

The post „РОДИТЕЛИТЕ“ НА ВИРТУЕЛНАТА МИНИСТЕРКА ПОД ИСТРАГА ЗА КОРУПЦИЈА Фрлена сенка врз антикорупцискиот проект на Еди Рама appeared first on plusinfo.mk.

Државниот завод за ревизија (ДЗР) во ревизијата за 2024 година обелодени дека иако државата преку Дирекцијата за ТИРЗ управува со 16 технолошко-индустриски и развојни зони (ТИРЗ) и 3 индустриски зони, дел од нив зјаат празни или полупразни бидејќи нема доволно инвеститори.

Утврдено е дека 287 хектари од вкупната корисна површина на ТИРЗ и индустриските зони не се дадени под закуп. Дополнително во 7 од вкупно 16 зони, на вкупна површина од 203,5 хектари, и една индустриска зона на површина од 3,2 хектари не се ставени во функција.

Државата почнала и постапка за формирање нови зони на територијата на Општина Куманово и Општина Липково.

Со ревизијата е утврдено и дека инвестициите во тек, извршени во зоните во износ од 68,9 милиони евра се водат како материјални средства во подготовка и за нив не се пресметува амортизација, иако во најголем дел се ставени во употреба. Причина за ваквата состојба е тоа што не се исполнети условите и законските решенија за добивање одобрениja за употреба.

Утврдени се и недоследности во процесот на планирање на јавните набавки и реализација на склучените договори.

Ревизорите утврдиле дека јавните набавки во дирекцијата на ТИРЗ биле планирани без претходни анализи на трошоците и без физибилити студија за економска оправданост и без проектни документации иако станува збор за капитални инвестиции.

Таква набавка имало и за објектите за времено сместување и амбулантата за прва помош, градинки и складишта со пратечки содржини (паркиралишта) во ТИРЗ Скопје 1 и ТИРЗ Скопје 2, како и во ТИРЗ Штип и ТИРЗ Прилеп. По принцип „клуч на рака“, во 2023 година е склучен Договор вреден 28,9 милиони евра. За реализација на договорот на крајот на 2023 година бил исплатен аванс од 20% од договорената вредност, во износ од 4,9 милиони евра.

Исто така, утврдени се и слабости во реализацијата на договорот, кој не содржи јасно уреден начин на плаќање за изработка на проектната документација, што создава правна несигурност и финансиски ризик за договорниот орган. Дирекцијата на ТИРЗ во јули 2025 година доставила информација до Владата за потреба од спогодбено раскинување на овој договор.

Извештајот покажува и дека за изградба на административен објект во ТИРЗ Штип во декември 2022 година е склучен Договор во вредност од 3,5 милиони евра, но утврдени се значајни слабости во неговата реализација.

– Склучен е анекс за дополнителни и непредвидени работи како резултат на недоволно прецизна проектна документација и пресметка, при што изградениот потпорен ѕид и пристапната улица не се опфатени со проектната документација за која е издадено одобрение за градење, што не е согласно Законот  за градење. Изведувачот започнал со набавка и монтажа на пречистителна станица без претходно одобрение за измени во тек на градба од надлежното министерство – наведуваат ревизорите.

Во јануари 2023 година ДТИРЗ склучила договор за консултантски услуги за избор на партнер за јавно-приватно партнерство за ТИРЗ Гевгелија во износ од 634.832 евра со рок на реализација од една година, кој со анекс е продолжен до април 2024 година. Ревизијата утврдила дека објавените два јавни повика за избор на партнер за ЈПП во 2023 и 2024 година биле поништени бидејќи не била доставена ниту една понуда.

– И покрај тоа што договорот е реализиран во вкупен износ од 538.016 евра, односно 85% од вредноста на договорот, клучните активности од проектната програма поврзани со избор на партнер и склучување договор за ЈПП не се реализирани, што укажува на несоодветно користење на буџетските средства – наведува ДЗР.

Дирекцијата за технолошко индустриски развојни зони во 2023 година и покрај тоа што има сопствена маркетинг служба преку рамковни спогодби ангажирала две надворешни агенции за промоција на странски директни инвестиции, маркетинг и изработка на промотивни материјали во износ од близу 250.000 евра за период од две години, која со анекс од февруари 2024 година е зголемена за дополнителни 47.967 евра односно го зголемила износот за 19%.

Во 2023 и 2024 година преземени се обврски во вкупен износ од 274.000 евра, но ревизорите не ги виделе резултатите од оваа промоција.

Во периодот од 2009 до 2023 година во зоните кои не се ставени во функција реализирани се инвестиции во вкупен износ 2,3 милиони евра или 3,4% од вкупниот износ на материјални средства во подготовка и тоа по основ на изградба на основната внатрешна инфраструктура, проектна документација и експропријацијата на земјиштето.

Според ревизорскиот извештај, на име обврски по задржан депозит во сметководствената евиденција на ДТИРЗ се евидентирани близу 650.000 евра кои потекнуваат од минати години по склучени договори за изведување градежни работи.

– Во зоните инфраструктурата се гради во фази, а согласно издадените одобренија за градење, техничкиот преглед може да се направи на конечно изградена инфраструктура како функционална целина, односно по добивање на одобрение за употреба од надлежното министерство, поради што ДТИРЗ не го враќа задржаниот депозит на изведувачите, а објектите се водат како материјални средства во подготовка. Овие состојби предизвикале наталожени обврски по овој основ и реален ризик од покренување на судски постапки од страна на изведувачите.

– Во извештајот нотирано е дека по Договор за закуп на деловен простор, склучен во јануари 2024 година, исплатен е депозит во износ од 116.764 евра, за кој поради недоследности во условите и примопредавањето на просториите, во декември 2024 година се преземени активности за спогодбено раскинување на договорот за закуп и поведена е судска постапка, но депозитот до денот на известување од ревизијата не е вратен од страна на закупецот – наведува ДЗР.

Ревизорите утврдиле и дека до крајот на 2024 година не била донесена тригодишна инвестициона програма како долгорочен документ за планирање на активностите на ДТИРЗ. Програмата е донесена во декември 2024 година и се однесува за период 2025 – 2027 година.

Ревизијата укажува на повеќе системски слабости поврзани со објектите кои се водат како инвестиции во тек, управувањето со државната помош и законската неусогласеност во делот на платите.

The post РЕВИЗОРИТЕ НЕ ВИДЕЛЕ ФАЈДЕ ОД ПОТРОШЕНИТЕ 250.00О ЕВРА ЗА ПРОМОЦИЈА НА ЗОНИТЕ Државата изгради 16 развојни зони, дел од нив зјаат празни appeared first on plusinfo.mk.

На денешната собраниска седница се обрати пратеничката од редовите на ВМРО-ДПМНЕ, Емилија Ангелова која истакна дека измените во Кривичниот законик претставуваат суштински чекор за враќање на довербата на граѓаните за правна држава каде криминалот и корупцијата нема да бидат толерирани, туку ќе бидат соодветно санкционирани.

– Овој предлог-закон за изменување и дополнување на Кривичниот законик претставува неопходен и одговорен чекор кон враќање на правната сигурност, владеењето на правото и довербата на граѓаните во институциите. Со него државата јасно ја испраќа пораката дека корупцијата, злоупотребата на службената положба, организираниот криминал и насилството нема да бидат толерирани, ниту релативизирани преку законски празнини и непропорционално благи санкции – рече Ангелова.

Пратеничката посочи дека ќе се постигне подобра заштита на приватноста на граѓаните, безбедност во сообраќајот, посилна заштита на жените од семејно насилство како и јасна правна рамка за гонење на злоупотреби во јавните набавки.

– Со предложеното решение ќе се постигне враќање на превентивната и репресивната функција на казненото право особено кај делата злоупотреба на службена положба, организиран криминал и корупција. Јасна и ефикасна правна рамка за гонење на злоупотреби во јавните набавки, подобра заштита на приватноста и достоинството на граѓаните, посилна заштита на жената од насилство, семејно насилство со гонење по службена должност во согласност со Истанбулската конвенција, подигнување на безбедноста во сообраќајот преку поостри санкции. Се зголемува и јавната безбедност на патиштата – вели Ангелова.

Пратеничката Ангеловска се осврна на клучните поенти за жените истакнувајќи дека со овој предлог-закон жената е заштитена од дигитално насилство, од семејно насилство, а со тоа постигнување на реална заштита и сигурност на жената во државата.

– Посилна институционална заштита од насилство врз жените и семејно насилство со гонење по службена должност државата ја трга одговорноста од жртвата и јасно застанува на страната на жената. Заштита на приватноста и телесниот интегритет на жените, инкриминирање на злоупотребата на интимни снимки директно ги штити жените од уцени, дигитално насилство и јавно понижување. Европски стандарди, европска заштита за жените – законот директно ги имплементира европските и меѓународните обврски и ја позиционира како партнер во борбата за еднакви можности и човекови права – рече Ангелова.

Весна Ѓорѓиева, пратеничка од редовите на ВМРО-ДПМНЕ, обраќајќи се на седницата, рече дека „нашите граѓани ќе ја гледаат сигурноста кога ќе биде сигурен правниот систем во државата“.

Таа се осврна на членот 353 од предлог законот, со кој како што посочи, се враќа суштината на кривичното дело злоупотреба на службена положба.

– Се враќа суштината на злоупотреба на службена положба, пречекорување на овластувањата или неизвршување на службена положба. Со овој закон се распушта претходниот закон во 2023 година кој беше донесен од СДСМ и ДУИ, каде што беше разводенет, односно каде што казните беа намалени, дејствијата беа потешко докажливи, а роковите за застареност беа скратени – истакна Ѓорѓиева.

Според неа, законот не е наосочен против оние кои работат чесно, туку против корупцијата и злоупотребата на службената положба.

– Држава без кривичен закон е како држава без ‘рбет. А држава без рбет секој може да ја скрши. Почитувани граѓани, овој закон е порака до секој што мисли дека државата е приватен бизнис, овој закон е порака дека времето на неказнивост завршува и да, можеби на некому тоа не му одговора, но на народот тоа му одговара, и тоа го бара од нас.

The post ЖЕНИТЕ ДОБИВААТ ПОГОЛЕМА ЗАШТИТА ОД ДИГИТАЛНО И ОД СЕМЕЈНО НАСИЛСТВО Во измените на Кривичниот законик предвидени и поостри сообраќајни казни appeared first on plusinfo.mk.

ВМРО-ДПМНЕ остро ги отфрли обвинувањата што денеска ги изнесе СДСМ за наводна „тендерска пирамида“ вредна 16 милиони евра, оценувајќи ги како неосновани политички конструкции без ниту еден конкретен доказ.

Од владејачката партија порачаа дека сите јавни набавки во општините и во Град Скопје се спроведуваат согласно Законот за јавни набавки, преку транспарентни и јавно објавени постапки, достапни за проверка од сите надлежни институции.

„СДСМ продолжува со старата матрица на шпекулации, без факти и без докази. Сите јавни набавки се спроведени законски и транспарентно“, соопштија од ВМРО-ДПМНЕ, додавајќи дека СДСМ, наместо да пласира анонимни наводи, треба да одговори за сопствените корупциски скандали од периодот на нивното владеење.

Претходно, Антикорупцискиот тим на СДСМ на прес-конференција објави дека фирмата „Пирамид билдинг солушнс“ од 2022 година до денеска добила 51 тендер во општини управувани од градоначалници од ВМРО-ДПМНЕ, со вкупна вредност од околу 16 милиони евра.

Членот на Извршниот одбор на СДСМ, Јон Фрчкоски, изјави дека фирмата добивала најмногу тендери во општините Аеродром и Гази Баба, но и во Ѓорче Петров, Прилеп, Битола и Гевгелија, како и од Град Скопје. Според него, дел од договорите биле финансирани и со средства од унгарскиот кредит, а последниот тендер со Град Скопје, вреден 320.000 евра, бил склучен во декември 2025 година.

Фрчкоски побара Јавното обвинителство, Финансиската полиција и Државната комисија за спречување на корупцијата да постапат по, како што рече, серијата објавени случаи за јавни набавки.

Од ВМРО-ДПМНЕ, пак, порачаа дека ваквите прес-конференции се обид за дефокус од реалните проблеми и одговорностите на СДСМ од минатото, потенцирајќи дека граѓаните заслужуваат сериозна и одговорна политика, а не дневнополитички конструкции.

The post ВМРО-ДПМНЕ ГИ ОТФРЛА ОБВИНУВАЊАТА НА СДСМ „Тендерска пирамида“ без докази, реагираат од партијата appeared first on plusinfo.mk.

Денеска во кругот на Министерството за внатрешни работи беа промовирани 120 нови возила за потребите на македонската полиција. На настанот присуствуваа премиерот Христијан Мицкоски и министерот за внатрешни работи Панче Тошковски и директорот на БЈБ Александар Јанев.

Министерството за внатрешни работи набави 120 нови автомобили „Peugeot 408 Allure 1.6 PureTech 215 KS EAT8“ за речиси 4 милиони евра, односно 239.068.000 денари. На веб-страницата за јавни набавки е објавен договор склучен на 18.08.2025 година.

Возилата се наменети исклучиво за униформираната полиција и ќе бидат распределени рамномерно низ полициските организациски единици во целата држава, со посебен фокус на Скопје како најголем град со најголеми безбедносни потреби.

– Безбедноста и расчистувањето на криминалот и корупцијата во државата се наш врвен приоритет како Влада, а Министерството за внатрешни работи е нераскинлива алка во тој процес – истакна премиерот Мицкоски на промоцијата.

Премиерот им честиташе на вработените во МВР и истакна дека Владата ќе продолжи да ги поддржува ваквите проекти.

– Би сакал да им честитам на вработените во Министерството, на министерот, на луѓето коишто го водат ова Министерство, за успешно завршената набавка, за успешно завршениот проект и она што е многу важно – се подобрува мобилноста на припадниците на Министерството за внатрешни работи. Владата ќе продолжи да ги поддржува ваквите проекти – рече премиерот.

Мицкоски им посака на вработените возилата да се користат што е можно помалку, нагласувајќи дека тоа ќе значи помалку криминал и криминалци на улиците.

Министерот Панче Тошковски појасни дека распределбата на возилата ќе биде рамномерна на национално ниво, со приоритет на градовите со поголеми безбедносни потреби, при што Скопје ќе добие поголем број возила за поефикасно и побрзо извршување на секојдневните полициски задачи.

– Ова е уште еден чекор кон модернизација на полицијата и подобрување на безбедноста за сите граѓани – додаде министерот.

The post 📷 НОВИ ПОЛИЦИСКИ „ЧУДА“ НА УЛИЦИТЕ Македонија доби 120 супермоќни „Peugeot 408“ за брза борба со криминалот appeared first on plusinfo.mk.