Генералниот секретар на Европската организација за закони на игри на среќа (EOGL), Зоран Пухач, на денешната јавна расправа пред собраниската Комисија за финансирање и буџет упати сериозни критики и предупредувања за катастрофалните последици од Предлог-законот за игрите на среќа и за забавните игри. Пухач, присуствуваше на јавната расправа на законот на покана на АСОМ.

Тој пред пратениците детално ја елаборираше погубната математика на предложените измени, потенцирајќи дека тие се насочени кон директно уништување на спортските обложувалници преку оданочување на непостоечки профити и одземање на нивната финансиска сигурност.

– Познавачите на игрите на среќа знаат дека секој облик има свои законитости. Спортското обложување е единствената игра на среќа каде што заработката е неизвесна и постои реална можност за влегување во загуби. Кога во најпопуларните лиги ќе дојдат реалните резултати, секоја, па и најдобрата светска обложувалница неколку пати годишно влегува во минус. Тоа не постои во другите игри на среќа каде што секогаш има некаква загарантирана добивка – истакна Пухач на јавната расправа.

Европскиот експерт жестоко го критикуваше и новиот модел на оданочување, особено воведувањето на минималната фиксна давачка од 1.000 евра по уплатно место, нарекувајќи го економски апсурд кој води кон директна пропаст. Тој посочи дека златниот стандард во Европа е оданочување на разликата меѓу уплатата и исплатата.

– Кога оданочувањето на разликата не достигнува сума од 1.000 евра, вие директно оданочувате нешто што не постои. Ако реалната заработка е 500 евра, вие оданочувате 1.000. Значи, ги оданочувате другите 500 евра кои ги нема, односно ја туркате компанијата во загуба. Сè друго води директно кон оданочување на загубите и тоа не е логично. Ваква одредба нема во друг закон во светот и тоа не е случајно, бидејќи води кон гаснење на легалниот пазар на игри на среќа – предупреди Пухач.

Осврнувајќи се на нелогичните давачки и третирањето на дислоцираните локали како нови објекти, Пухач потсети дека европската пракса бара стабилно и предвидливо законско опкружување. Тој ја предупреди државата дека нарушувањето на стекнатите права создава несигурен деловен амбиент кој најчесто резултира со милионски барања за отштета на меѓународните арбитражи.

Дополнително, Пухач го разби митот дека државниот монопол на интернет се прави за заштита на младите, нарекувајќи го несериозен аргумент во 21 век. Тој посочи дека приватните компании во Европа користат софтверски решенија кои со само два клика совршено ја контролираат возраста, количината и редовноста на уплатите. Со монополот, според него, државата само губи дополнителни приходи од лиценци и даноци кои би ги плаќале приватните приредувачи.

На крајот, Пухач ги потсети пратениците на горкото искуство на државите кои се обиделе да го забранат или драстично да го ограничат легалното коцкање, посочувајќи ги примерите со американската прохибиција и неодамнешниот случај во соседна Албанија.

– Тие ги затворија своите пазари за легално работење и се соочија со развој на црниот пазар, криминал и голем одлив на пари кои инаку би завршиле во буџетот. Наместо тоа, напорите треба да се насочат кон превентива и едукација, а не кон стотици метри оддалеченост кои не значат ништо. Зошто се следи погубен модел, кога може да ги следите успешните европски модели – порача Пухач во своето обраќање.

The post ЌЕ ОДАНОЧУВАТЕ ЗАГУБИ И ЌЕ УНИШТИТЕ ЛЕГАЛЕН СЕКТОР Европски експерт ги предупреди пратениците за милионски меѓународни арбитражи appeared first on plusinfo.mk.

Додека за Предлог законот за заштита од пушење имаше серија консултации на извршната власт со еснафските здруженија и претставниците од тутунската индустрија за Предлог законот за игри на среќа и забавни игри, извршната власт постапи обратно и буквално ги игнорира засегнатите страни, иако станува збор за економски сектор кој вкупно гледано е најголем приватен работодавец во Македонија, посочи Стеван Крстевски од Здружението „Сакам да работам“ на денешната јавна расправа во Собранието.

– Осум години сме заложници на различни политички структури кои си поигруваат со нашите судбини тогаш кога мислат дека може да печалат гласови преку жртвување на нашите работни места. Осум години живееме во грч, неизвесност, заедно со нашите семејства се тресеме дали ќе останеме на улица, со нецелосно исплатени кредити, со активирани хипотеки и со авионски карти за еден правец – иселување во странство – рече Крстевски.

Тој го прочита писмото кое Здружението „Сакам да работам“, на 20 мај 2026 година, го испрати до претседателот на македонската Влада, проф. д-р Христијан Мицкоски и во кое се изразува загриженост за егзистенцијата на вработените поради предвидувањето да се затворат речиси сите постоечки легални објекти за игри на среќа.

– Ние не сме гости во сопствената држава. Албанските дипломирани правници бараат да полагаат правосуден испит на мајчиниот јазик, на највисоко ниво веднаш им се ветува решение. Ние испраќаме писма, протестираме, нема никаков ефект. Ни должите одговори, зошто игнорирате над 10.000 вработени во игрите на среќа? Дали причина за тоа е што 90 проценти од вработените сме Македонци кои можеби треба да станеме жртви на политичко-етнички инженеринг? До кога легалните игри на среќа и вработените ќе страдаат поради негативната кампања на дежурните критичари, кои никогаш нема да преземат одговорност кога ќе се отворат играчници на црно по подруми каде младината ќе биде лесна цел? – праша Крстевски.

Тој нагласи дека здружението е подготвено со сите демократски средства да го заштити уставно загарантираното право на работа.

– Надлежните кои предлагаат затворање на легалните објекти за игри на среќа ни должат одговор каде ние да се вработиме, со поминати професионални обуки и работно искуство за приредување игри на среќа по највисоки светски и европски стандарди? Дали сте свесни дека со евентуалното изгласување на ваков закон, директно придонесувате за нови 35.000 кандидати за иселување од Македонија? – заклучи тој.

The post ВРАБОТЕНИТЕ ВО ИГРИТЕ НА СРЕЌА СЕ ЗАЛОЖНИЦИ НА РАЗНИ ПОЛИТИЧКИ СТРУКТУРИ Крстевски од Здружението „Сакам да работам“ предупреди на поигрување со нивните судбини appeared first on plusinfo.mk.

Асоцијацијата на спортски обложувалници на Македонија (АСОМ) на јавната расправа пред собраниската Комисија за финансирање и буџет остро се спротивстави на Предлог-законот за игри на среќа. Претседателот на АСОМ, Васко Илијевски, во своето обраќање пред пратениците ги претстави вистинските намери на предложениот закон, потенцирајќи дека тие не се насочени кон заштита на граѓаните, туку кон воспоставување на целосен државен монопол.

– Денес не сум овде за да ја бранам индустријата на игрите на среќа. Денес сум овде да ја бранам правната држава и да ја бранам еднаквоста пред законот. Денес сум тука да ги одбранам работните места на 10.000 колеги кои поради монополистички интереси на поединци ќе останат на улица – истакна Илијевски на почетокот од неговиот говор.

Осврнувајќи се на тврдењата дека законот ќе го намали играњето, тој нагласи дека вистината е сосема поинаква и дека легалните приредувачи ќе бидат затворени само за да се отвори простор за државната лотарија на интернет.

– Во 21 век интернетот не е посебна игра на среќа и никогаш не бил. Интернетот е само начин на кој се нуди услугата. Но, само во овој закон интернетот одеднаш станува привилегија резервирана за еден државен субјект. Ова е грубо кршење на Уставот – порача претседателот на АСОМ, и ги праша пратениците зошто државата го забранува пристапот до интернет пазарот за лиценцираните компании, а истовремено го резервира ексклузивно за себе.

Илијевски пред Комисијата ја презентираше и фрапантната финансиска нееднаквост која се воведува со новиот закон. Тој појасни дека за истите игри на среќа, државната лотарија ќе плаќа давачка од само 15 %, додека приватниот сектор се задолжува со 23 %, плус нови енормни фиксни давачки од 1.000 евра за секое уплатно место.

– Државата си создава подобри услови за себе отколку за сите останати. Замислете, утре државата да донесе закон според кој една банка ќе плаќа помал данок од другите банки. Никој не би го прифатил тоа. Како може државата истовремено да биде и судија и натпреварувач во ист меч? Како може државата сама да ги пишува правилата и истовремено сама да биде фаворит? Тоа не е европски принцип, тоа не е слободен пазар, тоа не е уставно гарантирана еднаквост – категоричен е Илијевски.

Предупредувајќи за последиците од затворањето на легалните објекти, Илијевски посочи дека граѓаните нема да престанат да играат, туку играта ќе се пресели таму каде што државата нема апсолутно никаква контрола.

– Најзадоволни од овој закон се нелегалните оператори и криминалците кои брзо ќе ја вратат истата шема од деведесетите. Додека ние ќе затвораме легални компании, тие ќе отвораат нелегални канали. Додека ние ќе отпуштаме луѓе, тие ќе регрутираат нови клиенти без лиценца, без контрола и без давачки кон државата – предупреди тој.

На крајот од своето обраќање, Илијевски потсети дека зад бројката од 10.000 работни места стојат семејства и човечки судбини, а државниот буџет трајно ќе ги изгуби 350-те милиони евра кои годишно легално се слеваат во него, бидејќи покачените даноци математички ќе значат само затворање и крах на легалниот бизнис.

– Денес пред вас е избор помеѓу легален и контролиран систем или нелегален и криминализиран пазар. Помеѓу конкуренција и монопол. Помеѓу еднаквост и привилегија. Помеѓу европски вредности и закон кој не постои никаде во Европа. Ние денес не бараме привилегии. Не бараме посебен третман. Бараме само едно, а тоа е истите правила да важат за сите. Бараме закон кој ќе биде правичен, уставен и одржлив. И кој навистина ќе ги штити граѓаните – истакна претседателот на АСОМ.

Тој ги повика пратениците да го отфрлат предложеното решение и да отворат вистински јавен дијалог со експертите.

The post ДРЖАВАТА СИ ПРАВИ МОНОПОЛ, НА УЛИЦА ЌЕ ОСТАНАТ 10.000 ВРАБОТЕНИ Пратениците повикани да го отфрлат предложениот закон за игри на среќа appeared first on plusinfo.mk.

Пратеничката група на ВМРО-ДПМНЕ бара во текот на денешниот ден да биде закажана јавната расправа за Предлог-законот за игри на среќа која, според нив, не се одржува поради СДСМ.

– Повторно СДСМ против СДСМ и нивното бегање од соочување со вистината. Иако бараа јавна расправа за Законот за приредување на игри на среќа, сега сакаат да ја опструираат, не закажувајќи ја јавната расправа. На нивно барање, поддржавме јавна расправа на која експерти од фелата ќе го кажат своето мислење дали се за или против законот, како и нивните ставови во однос на членовите кои што ги содржи тој закон. Во моменти кога сакаме да регулираме цела една индустрија, се јавуваат од СДСМ со нивната опструкција и упорно не сакаат да ја закажат јавната расправа, на која што, повторно кажувам, сите засегнати страни ќе можат да го кажат своето мислење. Зошто? Нека кажат самите – изјави пратеникот Бојан Стојаноски од ВМРО-ДПМНЕ на прес-конференција во Собранието.

Тој ја повика претседателката на Комисијата да ја закаже јавната расправа за да може потоа од ставовите што ќе произлезат од јавната расправа да се донесат заклучоци кои би се инкорпорирале во законот.

– Ние нема да дозволиме да застане процесот. Доколку не се одржи јавната расправа, на следната наредна седница ќе биде ставен законот, согласно Деловникот, и постапката за неговото донесување ќе биде продолжена – рече Стојаноски.

The post СДСМ ПРОТИВ СДСМ И ВО ИГРИТЕ НА СРЕЌА Од ВМРО-ДПМНЕ повикаа СДСМ да не бега од јавната расправа appeared first on plusinfo.mk.

Асоцијацијата на приредувачи на игри на среќа во казина и автомат клубови (АПИС) ја поздрави одлуката на членовите на Комисијата за финансирање и буџет конечно да се одважат и да го прифатат нивното заедничко барање за одржување јавна расправа по повод Предлог законот за игри на среќа кој го помина првото читање. За жал, велат од АПИС, асоцијациите и здружението на вработени во секторот, до сега немаа можност, со својата експертиза, знаење и искуство да дадат придонес во процесот на изработка на ново одржливо законско решение.

„Иако сме прва линија на имплементација на актуелниот важечки закон за игри на среќа, кој е еден од најстрогите во регионот и пошироко, ни беше ускратена можноста преку инклузивен процес да креираме регулатива согласно сите европски и светски стандарди. Јавната расправа е демократска алатка која ќе овозможи претставници на асоцијациите и вработените во легалните објекти со аргументи на целокупната јавност да ја објаснат штетноста на одредени одредби од Предлог законот за игри на среќа. Ќе зборуваме за закон кој се однесува на економски сектор со повеќе од 10.000 вработени што вкупно гледано е најголемиот приватен работодавец. Ќе зборуваме за регулатива од која зависат повеќе од 350 милиони евра буџетски приливи на годишно ниво. Ќе зборуваме за уставно спорните одредби и решенија. Ќе предупредиме дека вака подготвен закон на среден рок ќе направи хаос во општеството кој тешко ќе може да се спречи. Подготвени сме во законодавниот дом да се соочиме со дежурните критичари на игрите на среќа, кои нема да преземат одговорност за тоа што ќе следи доколку овој Предлог закон се изгласа“, се наведува во соопштението од АПИС.

Доколку се прифатат нивните аргументи, подготвени се веднаш да учествуваат во мешовита работна група која во кус рок ќе изработи ново законско решение по европски и светски стандарди за игри на среќа, кое ќе ги даде вистинските одговори за грижите на граѓаните и ќе биде спроведлив во пракса.

The post ЈАВНАТА РАСПРАВА Е МОЖНОСТ ДА СЕ АРГУМЕНТИРА ШТЕТНОСТА НА ПРЕДЛОЖЕНИОТ ЗАКОН ЗА ИГРИ НА СРЕЌА Секторот ја поздрави одлуката на пратениците appeared first on plusinfo.mk.

Асоцијациите на приредувачите на игри на среќа во автомат клубови, казина и во спортски обложувалници, АПИС и АСОМ, денеска доставија барање до Собранието да организира јавна расправа за предлог законот за игри на среќа и забавни игри.

„Барањето е согласно член 129 став 2 од собранискиот Деловник, Комисијата за финансирање и буџет како матично работно тело да ја организира јавната расправа. Примената на ваквата демократска алатка ќе овозможи претставници на асоцијациите и на вработените во легалните објекти да ја споделат со пратениците сопствената експертиза и професионалното искуство. Сметаме дека е неопходно во законодавниот дом да ги соочиме аргументите и, најважно од сè,’ јавноста да добие точна претстава за тоа какви штетни последици ќе предизвика усвојувањето на овој предлог закон“, се вели во соопштението од АПИС и АСОМ.

Асоцијациите дополнуваат дека долг период игрите на среќа се цел на негативна кампања во која се нафрлаат разни клевети.

„Легалните објекти не се закана за младината. Закана за младината е популизмот, кој затворајќи го овој економски сектор ќе ги направи младите лесен таргет на незаконските играчници кои ќе се одвиваат по подруми, а државата ќе нема никаква контрола. Уверени сме дека е неодговорно по секоја цена да се донесе закон кој на среден рок ќе направи страшни последици кои многу тешко ќе можат да се поправат“, соопштија асоцијациите.

АПИС И АСОМ бараат да бидат слушнати.

„Сметаме дека е вообичаена демократска пракса да бидеме ислушани. Особено што сите видови приредувачи на игри на среќа вкупно гледано се најголем приватен работодавец во државата, голем дел од нашите членки имаат капитал од ЕУ, сме општествено одговорни компании кои донираат во јавното здравство, спортот, во културата, покровители сме на многу хуманитарни акции. Нашата експертиза и знаење треба да бидат уважени, со цел изработка на одржливо законско решение во согласност со највисоките европски и светски стандарди за организирање игри на среќа“, се вели во соопштението.

Со предлог-законот се предвидува сите објекти во кои се приредуваат игри на среќа да бидат оддалечени најмалку 500 метри од основните и средните училишта. Во обложувачниците што се наоѓаат во радиус до 500 метри од училишта, пак, нема да биде дозволено поставување електронски видеолотариски терминали и друга опрема за електронски игри на среќа. Се воведуваат и строги ограничувања за рекламирањето на игрите на среќа.

The post НОВИОТ ЗАКОН ЗА ИГРИ НА СРЕЌА ЌЕ ДОНЕСЕ ПОВЕЌЕ ШТЕТА, ОТКОЛКУ КОРИСТ Асоцијациите АПИС и АСОМ бараат јавна расправа во Собранието appeared first on plusinfo.mk.

Детална реформа на дисциплинските постапки, јасни гаранции за самостојноста на јавните обвинители, зголемување на институционалните капацитети и поголема транспарентност при изборот на државниот јавен обвинител се клучните точки во новиот предлог‑закон за јавно обвинителство што универзитетската професорка Александра Деановска-Трендафилова, ги истакна на денешната јавна расправа во Собранието.

Деановска-Трендафилова, која беше дел од работната група за законот, нагласи дека изработката на законот била тешка задача поради комплексноста на материјата, различните ставови и уставните ограничувања, но и поради потребата да се исполнат меѓународните препораки.

Според неа, првичната задача била детална разработка на дисциплинските постапки, согласно препораките на ГРЕКО.

– Се случуваше дисциплинска постапка против јавен обвинител да трае со години и да виси како Дамоклов меч врз него, без рокови, без евиденција, без бришење на осуди – истакна професорката.

Новото решение, како што рече, воведува 3 категории на дисциплински повреди, со јасни рокови, мерки и критериуми за постапување.

Деановска-Трендафилова посочи дека реформите мора да бидат придружени со реално зајакнување на институцијата и потенцира дека без силно обвинителство, ниту судот може да донесе квалитетни пресуди.

– Она што Јавното обвинителство не го поднело како обвинителен акт, судот не може да го пресуди – нагласи Деановска Трендафилова.

Професорката истакна дека работната група се движела во рамките на уставните ограничувања, а едно од нив е и потребното мнозинство за носење на законот и настојувала да ја зголеми транспарентноста.

Таа го нагласи и значењето на улогата на Советот на јавни обвинители.

– Советот е сериозен филтер, ако не даде позитивно мислење за ниту еден кандидат, Владата не смее да предложи ниту еден од нив, појасни Деановска-Трендафилова.

Според неа, во делот на разрешувањето, работната група ги следела препораките на Венецијанската комисија, а во однос на одговорноста на државниот обвинител објасни дека таа мора да биде поврзана со неговите надлежности.

Работната група, според неа, се одлучила за решение адаптирано на нашата ситуација, имајќи ги предвид долгогодишното искуство и резултатите на дел од обвинителите.

Според јавната обвинителка Лидија Раичевиќ, недоволно дефинираните гаранции за платите на јавните обвинители, ограничувањето на надоместокот за дежурства, изоставениот пристап до работно место, како и нејасната институционална позиција на Јавното обвинителство, се клучните забелешки што треба да бидат поправени со предлог‑законот за јавно обвинителство.

Јавната расправа претставува важен чекор кон донесување на квалитетно и европски усогласено законско решение, кое ќе придонесе за унапредување на правната сигурност и владеењето на правото и следува откако Собранието ја утврди потребата од донесување на законот и ја помина првата фаза од собраниската процедура.

Предлог-законот предвидува модернизација на постојната законска рамка, воведување јасен мерит-систем за избор, унапредување и оценување на обвинителите, како и зајакнување на гаранциите за нивната самостојност.

Меѓу клучните новини се поефикасен систем за оценување, прецизирани критериуми за професионалност, подобрено управување со предметите и подетализирана дисциплинска постапка со јасни рокови и механизми за спречување злоупотреби.

Законот ги зголемува и стандардите за транспарентност при изборот на јавниот обвинител, преку јавни седници на Советот на јавни обвинители, јавно презентирање на програмите на кандидатите и објавување на нивните биографии.

The post БЕЗ СИЛНО ОБВИНИТЕЛСТВО НЕМА КВАЛИТЕТНИ ПРЕСУДИ Јавна расправа за новиот закон за Јавното обвинителство appeared first on plusinfo.mk.

За оваа одлука поддршка искажаа пратениците на ВМРО-ДПМНЕ, Вреди, ЗНАМ, Левица и Европскиот фронт. На седницата на Комисијата не присуствуваа пратеници од СДСМ.

Координаторот на пратеничката група на ВМРО-ДПМНЕ, Никола Мицески истакна дека безбедноста на граѓаните мора на сите да им биде приоритет, а тоа, како што рече, значи промени во законите кои ќе обезбедат заштита, превенција и и ефикасни институционални реакции.

– Врз основа на членовите 128 и 129 од Деловникот на Собранието бараме да се организира јавна расправа, имено јас заедно со колешката Мерита Колчи Коџаџику од Вреди и Бобан Карапејовски од ЗНАМ поднесовме известување за потреба од одржување на јавна расправа заради анализа и утврдување на потребата за изменување на законската регулатива со цел зајакнување на безбедноста во сообраќајот. Владејачкото мнозинство во насока на подобрување на законската регулатива ќе побара доуредување и допрецизирање на истата. Време е за сериозни чекори и системски решенија. Безбедноста на граѓаните мора да ни биде приоритет на сите, а тоа значи промени во законите кои ќе обезбедат заштита, превенција и и ефикасни институционални реакции. Порачуваме и повикуваме до сите дека намерата за стручна и експертска дебата е приоритет и како владејачко мнозинство нема да дозволиме политизација на оваа тема. Нас ни требаат издржајни решенија, а не политичка некрофилија и злоупотребување на моментот. Ги повикувам сите пратеници без разлика дали се од власт или опозиција, да ја поддржаат оваа иницијатива и да застанеме зад неа еднаш сите заедно за изнаоѓање на системски решенија и решавање на проблемите со кои се соочуваме – рече Мицески.

Пратеникот на Левица, Ама Мециновиќ рече дека нивната пратеничка група ќе ја поддржи иницијативата за јавна расправа.

– Нашите видувања, иако ја поддржуваме, можеби попаметно беше да имаме надзорна расправа за да видиме и за имплементацијата на регулативата и за нејзината злоупотреба, а не самод а дискутираме за некои законски решенија, но сепак сега е време да се поддржи оваа иницијатива за јавна расправа и ние ќе ја поддржиме – рече Мециновиќ.

И пратеникот на „Европскиот фронт“, Елми Азири ја искажа поддршката на својата пратеничка група за оваа иницијатива од власта.

– Веруваме дека во јавната расправа ќе произлегуваат и други предлози кои же дадат друг предизвик којшто ќе допираат и други точки кои се однесуваат со правото и со правниот систем воопшто, бидејќи видовме и во текот на овие денови каде што во правото според моето оценување не е работено како што треба – рече Азири.

Иницијативата за одржување на јавна расправа произлезе по случајот на Фросина Кулакова, 22-годишната модна дизајнерка од Неготино која во среда беше прегазена на пешачки премин на булеварот Партизански одреди од 20-годишниот Васил Јованов од Скопје, кој возел пијан, без возачка дозвола и минал на црвено светло, додека таа минувала на пешачки премин.

На 20-годишниот скопјанец осомничен за смртта на Фросина му беше определена мерка притвор од 30 дена, а за него и претходно имало кривични пријави за друга сообраќајна незгода и за недозволена употреба на дрога.

The post ЌЕ ИМА ЗАКОНСКИ ИЗМЕНИ ЗА БЕЗБЕДНОСТ ВО СООБРАЌАЈОТ За петок е закажана јавна расправа appeared first on plusinfo.mk.

– На оваа јавна расправа мора да бидат поканети сите стопански комори во Македонија, синдикати, организации на работодавачи, академска заедница и други заинтересирани страни. Резултатот од оваа јавна расправа мора да е еден оперативен план со конкретни мерки кои треба да ги превземе власта за полесно пребродување на 2022 година – рече денеска Љупчо Пренџов, пратеник на ВМРО-ДПМНЕ.

Тој вели дека македонските граѓани се задолжени како никогаш до сега.

– Јавниот долг го надмина прагот од 60% и којзнае кога ќе се вратиме под ова ниво со оваа Влада. Буџетскиот дефицит за месец и половина е 10 милијарди денари или 160 милиони евра. Само од Нова година, за 40-тина дена сме задолжени со нови 160 милиони евра. Од почетокот на 2020 година до денес дупката во буџетот изнесува повеќе од 1,6 милијарди евра – рече Пренџов и додаде дека граѓаните се соочуваат со огромни поскапувања во изминатиов период, а пред неколку дена излезе податокот дека инфлацијата само за јануари е 6,7%, во услови кога дел од производите се со замрзнати цени.

The post ОД НОВА ГОДИНА ДОСЕГА СМЕ СЕ ЗАДОЛЖИЛЕ ЗА 160 МИЛИОНИ ЕВРА Опозицијата бара итна расправа за економската криза appeared first on plusinfo.mk.

Како што соопштија од (АВМУ), во него се утврдува начинот на примена на членот 75-ѓ ставови 1 и 2 од Изборниот законик за Локалните избори за членови на советите на општините и советот на Град Скопје и за градоначалници на општините и градоначалник на Градот Скопје, со цел да се обезбедат прецизни правила за дозволеното времетраење на платеното политичко рекламирање на реален час емитувана програма кај радијата и телевизиите.

Од Агенцијата информираат дека јавната расправа е отворена до 16 септември.

Агенцијата ги повика сите регистрирани политички партии, независни кандидати за градоначалници и советнички листи, радиодифузери и други заинтересирани страни, со свои мислења и предлози да учествуваат во јавната расправа и истите во писмена форма да ги достават по електронски пат на е-адресата „contact@avmu.mk.“

Оттаму посочуваат дека нацрт-упатсвото за платено политичко рекламирање за локалните избори е достапно на нивната веб страна.

The post КАКО ЌЕ СЕ РЕКЛАМИРААТ ПАРТИИТЕ НА ПРЕТСТОЈНИТЕ ИЗБОРИ? Упатството е подготевено и на расправа appeared first on plusinfo.mk.