Министерот за јавна администрација, Горан Минчев, во гостувањето во емисијата „Топ тема” на Телма истакна дека Предлог-законот за висока раководна служба претставува клучен реформски чекор во насока на департизација, професионализација и зајакнување на мерит-системот во јавната администрација.

– Овој закон не е изолиран случај, туку дел од поширок реформски пакет што го спроведуваме – заедно со Законот за административни службеници и Законот за вработени во јавниот сектор. Целта е јасна, да ставиме крај на партизацијата, непотизмот, вработувањата по партиски и други клучеви и да воведеме систем заснован на знаење, квалитет и професионален интегритет – нагласи Минчев.

Тој потенцираше дека силната политичка волја за реформи е јасно потврдена уште со формирањето на Министерството за јавна администрација, кое, и покрај почетните предизвици, веднаш започна со подготовка и носење на закони што повеќе од една деценија беа препорачувани во извештаите на Европската комисија, но не беа реализирани.

– Носењето на закон не е доволно само по себе. Затоа со Законот за висока раководна служба прецизно ги уредуваме условите, мандатите и контролата на високите раководни позиции, особено на ВД-функциите, со што директно ја намалуваме можноста за злоупотреби – изјави министерот.

Во однос на роковите, Минчев појасни дека иако е евидентирано доцнење во однос на првично планираните рокови, законот е поставен на ЕНЕР во декември 2025 година и веќе е отворен процесот на јавна и инклузивна дебата.

– Процесот го водиме транспарентно, отчетно и инклузивно, во партнерство со релевантни институции, граѓанскиот сектор и меѓународните партнери, како Британската Амбасада и Центарот за управување со промени. Во договор со Европската комисија обезбеден е и грејс-период за финализирање на реформата, и уверен сум дека успешно ќе го заокружиме овој процес – истакна Минчев.

Министерството за јавна администрација останува посветено на спроведување суштински и одржливи реформи кои ќе резултираат со професионална, ефикасна и департизирана јавна администрација во служба на граѓаните.

The post КРАЈ НА ПАРТИЗАЦИЈАТА, KOНТРОЛА ВРЗ РАКОВОДИТЕЛИТЕ Законот за висока раководна служба става точка на непотизмот appeared first on plusinfo.mk.