Агенцијата за аудио и аудиовизуелни медиумски услуги во соопштение вели дека „ги отфрла како неточни и неосновани наводите на ММА и МРТ за погрешно третирање на програмските сервиси Arena M1, Arena M2 и Arena M3 Premium како странски програмски сервиси кои се реемитуваат во Република Северна Македонија.“

„Агенцијата постапува исклучиво во рамките на своите законски надлежности согласно Законот за аудио и аудиовизуелни медиумски услуги. Постапувањето на Агенцијата во конкретниот случај се заснова на релевантна доставена документација, како и на информации и податоци добиени од надлежни институции во Република Северна Македонија и од релевантни странски субјекти.

Врз основа на расположливата документација и добиените информации, предметните програмски сервиси се третираат како странски програмски сервиси кои се реемитуваат, а не како домашни телевизиски сервиси што емитуваат програма на територијата на државата, имајќи предвид дека нивниот изворен сигнал не се емитува на територијата на Република Северна Македонија.

Агенцијата особено ги отфрла инсинуациите дека со своето постапување овозможува заобиколување на законските обврски или дека постои каква било незаконитост во постапувањето на Агенцијата и нејзините службени лица.

Доколку ММА и МРТ располагаат со наводни докази за незаконско постапување на Агенцијата ги повикуваме истите да ги достават до надлежните институции. Во меѓувреме, посочуваме дека е недозволиво исклучиво поради сопствени интереси да се шират неосновани квалификации и инсинуации кои создаваат впечаток за незаконито или произволно постапување на регулаторот“ – се вели во соопште нието на Агенција за аудио и аудиовизуелни медиумски услуги

The post НАПАДИТЕ СЕ НЕОСНОВАНИ, ИЗВОРНИОТ СИГНАЛ НА „АРЕНИТЕ“ НЕ Е ВО МАКЕДОНИЈА Реакција на АВМУ на критиките од ММА и МРТ appeared first on plusinfo.mk.

Агенцијата за аудио и аудиовизуелни медиумски услуги нема надлежност да ги оценува договорните односи што ги склучуваат радиодифузерите со други страни, одговори АВМУ на прашањата на Плусинфо во врска со договорот со кој националниот сервис МРТВ се обврзал да му плати 150.000 евра плус 18% ДДВ на Здружението на граѓани Истражувачка репортерска лабораторија (ИРЛ) за 38 емисии.

Плусинфо ја праша Агенцијата дали АВМУ смета дека е соодветна сумата од речиси 180.000 евра од МРТВ за ИРЛ, предводено од Сашка Цветковска, за една телевизиска сезона. Според договорот, потпишан со директорот на МРТВ Марјан Цветковски, ИРЛ требало да сними 38 емисии и тоа: 4 документарни истражувачки филмови, 18 поткасти и 16 информативни репортажи, кои што ќе бидат придружна програма на поткастите. Ако сумата од 180.000 евра се подели на 38 содржини, произлегува дека ИРЛ за една емисија добила, во просек, околу 4.700 евра.

Плусинфо ја праша АВМУ и дали смета дека случај е пример за државно финансирање на медиум?

„Во врска со доставените прашања, Ве известуваме дека Агенцијата за аудио и аудиовизуелни медиумски услуги нема надлежност да ги оценува договорните односи што ги склучуваат радиодифузерите со други страни, вклучително и јавниот сервис, ниту пак да дава мислење за соодветноста на паричниот износ утврден во договорите за копродукција“, одговори АВМУ.

Надзорот над материјално-финансиското работење на јавниот сервис, согласно Законот за аудио и аудиовизуелни медиумски услуги го врши Надзорниот одбор на МРТ, додава Агенцијата.

„Воедно, Ве известуваме дека Агенцијата не е надлежна институција за оценка и за надозор на државна помош“, одговори АВМУ.

Плусинфо во врска со овој случај побара одговори од МРТВ и од ИРЛ за тоа колку од предвидените документарци, поткасти и репортажи се реализирани и дали е целосно исполнет договорот.

Колумнистот Виктор Грозданов во колумна на Нетпрес вчера обелодени копродукциски договор според кој  Македонската радиотелевизија ѝ исплатила 150.000 евра плус ДДВ од 18% на Истражувачката репортерска лабораторија (ИРЛ).

Грозданов вели дека договорот со кој се трошат народни пари го добил од свиркачи.

Според договорот, склучен во ноември 2023 година помеѓу Јавното радиодифузно претпријатие Македонска радиотелевизија, застапувано од директорот Марјан Цветковски и Здружението на граѓани ИРЛ, застапувано од претедателката Сашка Цветковска, МРТВ и ИРЛ заеднички ќе реализираат 38 емисии од ТВ проектот со наслов „Партнерство за квалитетни реформски процеси преку истражувачко и аналитично новинарство“ – сезона 2.

Тие 38 емисии, според договорот, се: 4 документарни истражувачки филмови (60 минути), 18 поткасти (60 минути) и 16 информативни репортажи (8 минути) кои што ќе бидат придружна програма на поткастите.

Документот предвидува дека МРТВ ќе ја емитува продуцираната содржина, а во проектот ќе учествува со 150.000 евра плус ДДВ, кои ќе им ги исплати на ИРЛ.

Исплатата, според договореното, требало да се изврши на 8 рати, во износ од по 18.750 евра во денарска противвредност, плус 18% ДДВ, од кои првата рата било предвидено да се исплати најдоцна до 31.4.2024 година, а последната најдоцна до 31.12.2025 година.

Според договореното, ИРЛ требала да ги подготви и да го реализира процесите на предпродукција, продукција и постпродукција, односно да ги подготви договорените содржини и да ѝ ги достави на МРТВ. Националниот сервис, пак, имал обврска на ИРЛ да ѝ обезбеди телевизиско студио, да ги исплати парите и да ги емитува содржините.

Грозданов во својата колумна го повика Јавното обвинителство да постапи согласно своите овластувања за, како што пишува, „злосторничко трошење на народни пари на основ на продукциска вредност“.

Колумнистот побара и МРТВ веднаш, во името на сите медиуми да ги објави сите копродукциски договори во периодот од 2012 до 2026 година, со посебен предзнак на ИРЛ.

ИРЛ „ЗГРМИЛА“ 180.000 ЕВРА ОД МРТВ ЗА ЕДНА СЕЗОНА Истражувале независно, ама со буџетски пари

The post АВМУ СЕ ОГЛАСИ ЗА „НЕНАДЛЕЖНА“ ЗА ДРЖАВНИТЕ ПАРИ ЗА ИРЛ Надзор на работата на МРТВ врши надзорниот одбор appeared first on plusinfo.mk.

Во врска со непристојниот однос на новинарот Невриј Адеми кон министерката за образование и наука, Весна Јаневска, Агенцијата за аудио и аудиовизуелни медиумски услуги посочува дека медиумските работници при извршување на својата професија треба доследно да ги почитуваат професионалните новинарски стандарди и принципи.

Комуникацијата помеѓу новинарите и носителите на јавни функции треба да биде коректна, достоинствена и базирана на заемна почит, со висок степен на професионализам и одговорност.

• НЕДОЛИЧНИОТ ОДНОС КОН МИНИСТЕРКАТА ЈАНЕВСКА НЕ Е ИЗОЛИРАН ИНЦИДЕНТ Владата реагира на новинарската провокација во Тетово

Агенцијата потсетува дека критичкото известување и поставувањето прашања се суштински дел од новинарската работа, но тие треба да бидат формулирани и презентирани во согласност со етичките норми на начин што не навредува, не дискредитира и не создава непотребни тензии.

„ТИ РЕКОВМЕ ДА СИ ЗЕМЕШ ПРЕВЕДУВАЧ КОГА ДОАЃАШ ВО ТЕТОВО“ Новинар со националистичка провокација кон министерката за образование

The post НОВИНАРИТЕ НЕ ТРЕБА ДА НАВРЕДУВААТ, ДИСКРЕДИТИРААТ, НИТУ ДА СОЗДАВААТ ТЕНЗИИ Реакција на АВМУ за непристојниот новинар Невриј Адеми appeared first on plusinfo.mk.

На инфлуенсерите, јутјуберите, влогерите и креаторите на содржини односно физичките лица кои се даватели на аудиовизуелни медиумски услуги по барање им тече рокот за регистрирање во Агенцијата за аудио и аудиовизуелни медиумски услуги (АВМУ), обврска од новата законска регулатива.

Покрај ова, независно дали соработуваат со домашни или странски фирми и висината на приходот што го остваруваат треба да поднесат даночна пријава за персонален данок и за ДДВ доколку нивниот приход надминал 2 милиони денари во годината.

Според новата медиумска регулатива, инфлуенсерите, јутјуберите, влогерите и креаторите на содржини односно физичките лица кои се даватели на аудиовизуелни медиумски услуги по барање ќе треба до 15 март да се пријават во АВМУ за да влезат во регистарот по што им течат обврските за плаќање на надоместок кој се пресметува на  остварениот приход во претходната година.

Законските правила за регистрација ги опфаќаат сите кои постираат на Инстаграм, ТикТок, Јутјуб и на слични видео-платформи, имаат повеќе од 10.000 следбеници или претплатници, објавиле најмалку 24 видеа во годината и заработуваат од тоа.

Според новата регулатива, сите кои влегуваат во оваа категорија ќе мора јасно да ги означуваат постовите, видеата, риловите или стримовите на социјалните мрежи кога им се платени реклами или спонзорства.

По регистрацијата, АВМУ ќе спроведува надзор за почитување на правилникот, а инфлуенсерите ќе плаќаат надоместок од 0,5% од својот годишен приход од претходната година. Овој извештај мора да се достави до 15 март, а плаќањето до 15 април.

Пресметките се дека за 100.000 евра годишен приход, инфлуенсерите ќе треба да платат 500 евра надоместок за АВМУ.

Тие кои нема да се регистрираат ќе плаќаат казни кои се движат меѓу 250 и 500 евра.

Иако тече рокот кој го постави Агенцијата досега, на објавениот регистар на АВМУ можат да се видат само 7 регистрирани лица.

Според актуелните закони, инфлуенсерите, јутјуберите, влогерите и слично, како и сите кои остваруваат доход од ангажманот подлежат на данок.

Лицата кои заработуваат на овој начин засега јавно говорат дека им се скратува слободата на говор, а со регистарот на АВМУ и обврските од Правилникот им се наметнуваат обврски кои ќе им ја намалат популарноста. За даночните обврски, засега нема реакции.

Од УЈП велат дека како и сите кои остваруваат доход така и оваа категорија граѓани мора да ги намири обврските кон државата кои произлегуваат од Законот за данокот на личен доход и Законот за данок на додадена вредност.

– Доколку физичките лица (инфлуенсери, влогери, креатори на содржини) како даватели на услуга, остваруваат доход од странство, во тој случај имаат обврска да го пресметаат и платат данокот на личен доход, односно да достават електронска пресметка преку системот е-даночни услуги. Доколку пак, овие физички лица склучуваат договор за услуги со домашна компанија, односно се исплатени од домашно правно лице, во тој случај обврската за пресметување и плаќање на данокот на личен доход е на правното лице (компанијата) – велат од УЈП.

Кога инфлуенсерите и јутуберите рекламираат производи или услуги од домашни фирми треба да склучат и договор за повремено или привремено вршење на услуги или авторски договор.

За секоја реклама треба да има договор и секој исплатувач треба да го задржи и да го плати данокот.

Данок се плаќа и за рекламирањето на компаниите кои на инфлуенсерите оваа услуга им ја плаќаат со подароци (како козметички производи, парфеми, храна, патувања, спонзорирана членарина за фитнес клубови …) бидејќи се работи за трансакција. И во овој случај фирмите имаат обврска во име и за сметка на инфлуенсерот да го пресметаат и платат персоналниот данок, додека инфлуенсерите имаат обврска да си проверат во даночната пријава дали е сè платено како што треба.

За исплатите од странство како монетизација од Јутјуб, физичките лица имаат обврска секој месец да направат аконтативна пресметка за приходите и да уплатат соодветен данок.

Што се однесува до поставувањето банери на компании или брендови, за тоа инфлуенсерите, исто како и порталите, мора да имаат финансиско покритие со направена нарачка од компанијата за конкретен период, идејно решение, фактура во која е пресметан и данок на додадена вредност.

– Кој колку данок ќе треба да плати ќе се утврдува врз основа на континуитетот и висината на остварениот приход. На пример за остварен доход од 1.000 евра инфлуенсерот ќе треба да плати 10% данок на личен доход на тие средства, односно данокот кој ќе треба да го плати е во висина на 100 евра во денарска противвредност 6.163 денари преку платформата е-даноци – велат од УЈП.

Во случај инфлуенсерите да имаат годишни приходи повисоки од 2 милиони денари (околу 32.000 евра) стануваат ДДВ обврзници и освен персоналниот данок ќе треба да платат и ДДВ на државата.

– Кога инфлуенсерите и креаторите на содржини знаат дека од своите услуги ќе остварат приходи од 2 милиони денари во текот на годината треба да се регистрираат за плаќање ДДВ во рок од 15 дена од почетокот на вршењето на услугите, со поднесување на пријава за регистрација за ДДВ. Доколку на почетокот на вршењето на услугите, не предвидуваат дека ќе остварат вкупен промет над 2.000.000 денари, тогаш физичките лица имаат обврска да се регистрираат за ДДВ кога ќе остварат вкупен промет над 2.000.000 денари со поднесување пријава за регистрација за ДДВ најдоцна до 15-ти во месецот кој следи по месецот кога го оствариле прометот – појаснуваат од УЈП.

Секој обид да се изиграат даночните власти е ризичен, порачуваат од Управата за јавни приходи.

– УЈП во рамки на своите надлежности преку даночни контроли или други мерки може да врши проверки дали лицата што остваруваат приходи од дигитални платформи и онлајн активности имаат уредно пријавено доход и дали ги исполнуваат обврските согласно Законот за данок на личен доход и другите релевантни прописи – велат од УЈП.

При тоа, велат оттаму, УЈП ќе врши проверки на приходи остварени од извори како што се AdSense, платени соработки, affiliate програми, донации и други форми на надомест поврзани со континуирана и комерцијална активност, како и дали лицата се регистрирани како самостојна дејност или настапуваат како физички лица.

The post СЕ РЕГИСТРИРАЛЕ САМО 7 ИНФЛУЕНСЕРИ Треба да се плати данок и за спонзорирани патувања и за разни компензации appeared first on plusinfo.mk.

Агенцијата за аудио и аудиовизуелни медиумски услуги (АВМУ) изрази сериозна загриженост поради, како што наведува, континуираните етикетирања и јавни напади од страна на политичката партија СДСМ, насочени кон одделни новинари и медиуми.

Од Агенцијата потсетуваат дека слободата на изразување, медиумскиот плурализам и уредувачката независност претставуваат темелни демократски вредности, кои мора да бидат почитувани, особено во јавната комуникација што доаѓа од политички субјекти.

„ Јавната комуникација, особено кога доаѓа од политички субјекти, мора да биде одговорна и да ја почитува улогата и автономијата на медиумите. Јавното дискредитирање или етикетирање на новинари и медиуми создава атмосфера на притисок, го поткопува јавниот дијалог и може директно да влијае врз безбедноста и професионалниот интегритет на новинарите“, се наведува во соопштението на АВМУ.

Агенцијата нагласува дека медиумите не смеат да бидат третирани како политички противници, ниту да бидат вовлекувани во партиски или политички конфронтации. Напротив, тие, како што се истакнува, треба да имаат можност непречено, слободно и без какви било притисоци да ја извршуваат својата професионална улога, во интерес на јавноста и демократските процеси.

Во соопштението, АВМУ упатува и јасен апел до сите политички субјекти да се воздржат од реторика која придонесува за поларизација, притисок или дискредитација на медиумите и новинарите, и да ја почитуваат нивната уставна и професионална улога во демократското општество.

The post МЕДИУМИТЕ НЕ СЕ ПОЛИТИЧКИ ПРОТИВНИЦИ Остра реакција на АВМУ за однесувањето на СДСМ кон новинарите appeared first on plusinfo.mk.

Зоран Трајчевски ќе ја раководи Агенцијата за аудио и аудиовизуелни медиумски услуги (ААВМУ) и во наредните пет години, откако доби поддршка од Советот на АВМУ за нов мандат.

Прес-службата на АВМУ попладнево соопшти дека Советот на ААВМУ денеска на седница одлучил во наредниот петгодишен период Агенцијата за аудио и аудиовизуелни медиумски услуги да ја води Зоран Трајчевски, кој е на оваа функција од 2014 година.

Трајчевски беше избран за директор на АВМУ на 12-тата седница на Советот на Агенцијата, одржана на 7 октомври 2014 година, а претходно беше директор на Агенцијата за електронски комуникации.

The post УШТЕ ЕДЕН МАНДАТ ЗА ЗОРАН ТРАЈЧЕВСКИ Ќе ја раководи ААВМУ и во наредните 5 години appeared first on plusinfo.mk.

Агенцијата за аудио и аудиовизуелни медиумски услуги изразува загриженост поради навредливиот, омаловажувачки и деградирачки говор во соопштенијата на политичката партија Социјалдемократски сојуз на Македонија, насочен кон новинарот Бранко Героски.

Користењето на лични навреди, дисквалификации и етикетирања на новинари претставува форма на притисок која има обесхрабрувачки ефект врз слободното новинарство. Ваквиот начин на комуникација придонесува за продлабочување на поларизацијата во општеството, со што се поткопува демократијата и се врши индиректен притисок врз уредувачката независност.

Агенцијата во повеќе наврати апелира до сите политички субјекти да покажат повисоко ниво на одговорност во јавниот дискурс, да се воздржат од навредлив и деградирачки говор кон медиумските работници и да ја почитуваат улогата на медиумите како еден од столбовите на демократијата.

The post НAВРЕДИТЕ И ЕТИКЕТИРАЊАТА КОН ГЕРОСКИ СЕ ФОРМА НА ПРИТИСОК Реакција од АВМУ на деградирачкиот говор на СДСМ appeared first on plusinfo.mk.

Со денешниот ден завршува изборната кампања за вториот круг од Локалните избори 2025 година, односно од полноќ започнува изборниот молк кој трае до 19:00 часот на 2 ноември 2025 година. За време на молкот медиумите продолжуваат да известуваат за изборите и за текот на гласањето, но не смее да се емитува ниту еден од облиците на изборно медиумско претставување, се наведува во соопштението од Агенцијата за аудио и аудиовизуелни медиумски услуги.

Од АВМУ посочуваат дека при известувањето во деновите на изборниот молк ќе се смета дека медиумите го прекршиле изборниот молк доколку емитуваат, односно објават какви било информации, фотографии, аудио и аудиовизуелни материјали поврзани со или во кои учествуваат учесници во изборите, какви било облици на медиумско известување кои се отворено или прикриено во функција на нечија кампања и можат да влијаат врз одлуката на избирачите, податоци со кои се открива идентитетот на политички субјекти и/или поединци вклучени во инциденти или неправилности на денот на гласањето; како и изјави од кандидати во изборниот процес, од претставници на политички партии и од носители на функции во органите на власта.

Агенцијата очекува сите медиуми, почнувајќи од ноќеска на полноќ, да ја прилагодат својата програма за изборниот молк.

The post ОД ПОЛНОЌ ПОЧНУВА ИЗБОРНИОТ МОЛК Трае до недела во 19:00 часот appeared first on plusinfo.mk.

Агенцијата за аудио и аудиовизуелни медиумски услуги (АВМУ) поведе прекршочни постапки против ТВ Компани 21-М и ТВ Шутел поради прекршување на изборниот молк во првиот круг од локалните избори 2025 година.

Според извештаите од извршениот мониторинг на изборното медиумско претставување, ТВ Компани 21-М на 18 октомври, првиот ден од изборниот молк, емитувала реприза на емисијата Клик плус – Изборни дебати, која првично била прикажана на 17 октомври. Во емисијата учествувале тројца кандидати за градоначалник на Општина Центар, што претставува прекршување на Изборниот законик, бидејќи медиумот емитувал содржини во кои настапуваат учесници во изборите.

Истовремено, ТВ Шутел на 18 и 19 октомври, за време на двата дена од изборниот молк, емитувала музички спот и документарна емисија во кои се појавува кандидат за градоначалник на Општина Шуто Оризари.

Агенцијата соопшти дека постапките се поведуваат врз основа на утврдени прекршувања од мониторингот и дека ќе продолжи со внимателно следење на медиумското известување за време на изборниот процес.

The post АВМУ ПОВЕДЕ ПОСТАПКИ ПРОТИВ ТВ 21-М И ТВ ШУТЕЛ – Телевизиите го прекршиле изборниот молк appeared first on plusinfo.mk.

И Граѓанскиот и Управниот суд ги отфрлија тужбите од политичката партија Левица против  Агенцијата за аудио и аудиовизуелни медиумски услуги во врска со Упатството за радиодифузерите за локалните избори 2025, со кое партијата Левица го изгуби правото да добие време за рекламирање.

„Управниот суд на седницата одржана на 6 октомври 2025 година, донесе решение со кое ја отфрли тужбата на политичката партија Левица за поништување на Упатството за радиодифузерите за локалните избори 2025 година, донесено од АВМУ. Во образложението е наведено дека Агенцијата во согласност со своите надлежности како јавен орган донела Упатство со кое го пропишува начинот на постапување во извршувањето на одделни одредби од Изборниот законик. Имено, со донесеното Упатство се појаснува распределбата на времето за платено политичко рекламирање, распределба на времето во вестите кај Јавниот радиодифузен сервис, бесплатното политичко претставување на Собранискиот канал и за обезбедување пристапност на содржините за изборниот процес“, соопшти АВМУ.

Со ова, се додава, само уште еднаш се потврдува дека Агенцијата постапува согласно законските прописи и професионално ги спроведува законските решенија.

Агенцијата вчера информираше дека и Граѓанскиот суд на 3 октомври го одби како неоснован предлогот од тужбата на Левица. Партијата од овој суд побара да издаде привремена мерка со која на АВМУ ќе ѝ се забрани до комерцијалните медиуми да го достави Упатството за радиодифузерите, а до Државната изборна комисија да го достави извештајот за емитуваното платено политичко рекламирање, врз основа на кој ДИК ги распределува и исплаќа средствата за платеното рекламирање.

„Агенцијата го усвои Упатството со единствена цел да обезбеди јасни и прецизни насоки за радиодифузерите при примената на членот 75-ѓ став 1 од Изборниот законик, кој ја уредува распределбата на времето за платено политичко рекламирање. Содржината на Упатството е строго условена од одредбите на Изборниот законик, кој експлицитно ги пропишува бројот на минутите за ППР, нивната распределба и субјектите меѓу кои се распределува. Агенцијата нема ниту можност, ниту овластување да излегува надвор од овие рамки, да доделува поголеми права од предвидените или да пропишува поинакви правила од оние утврдени со Законикот“, соопшти АВМУ.

Левица, се додава во соопштението, е парламентарна партија со своја пратеничка група и сигурно знае дека Изборниот законик може да се измени само во Собранието, каде пратениците можат да поднесат предлог за негова измена.

„И покрај тоа што овие факти му се добро познати на лидерот на Левица, тој упорно и намерно ги игнорира, користејќи ја секоја можна прилика за вербални напади врз Агенцијата. При тоа употребува крајно вулгарни, омаловажувачки и недолични изрази, несоодветни за јавна личност и за претставник на политичка партија. Ваквото однесување е веќе препознатлива пракса – истата стратегија на напади лидерот на Левица ја применуваше и за време на претходните избори, кога Уставниот суд ги отфрли иницијативите поднесени од него против тогашното Упатство за радиодифузерите за претседателските и парламентарните избори 2024. Без оглед на ваквите континуирани и неосновани напади, Агенцијата останува доследна на својата единствена цел – почитување и спроведување на законските решенија“, соопшти вчера АВМУ.

Претседателот на Левица Димитар Апасиев пред две недели од Уставниот суд побара да донесе итна мерка и да го стопира Упатството за радиодифузерите за локалните избори 2025, што го донесе АВМУ, со кои се определува времето за рекламирање на политичките партии во медиумите за време на кампањата, а според кое, Левица нема да добие време за рекламирање.

Од Уставниот суд деновиве известија дека иницијативата е стасана и дека ќе постапат согласно Актот на Уставниот суд.

Според член 75-ѓ од Изборниот законик, телевизиите и радијата можат во секој час програма максимално да емитуваат 9 и пол минути политички реклами. Од нив, 4 минути се за двете најголеми владејачки партии според освоени пратеници во парламентот на последните избори, а 4 минути се за двете најголеми парламентарни опозициски партии. Една минута реклами е наменета за партиите кои освоиле пратеници, но помалку од 5 колку што се потребни за формирање пратеничка група, а 30 секунди се наменети за партиите кои не се застапени во Парламентот.

Овој член има системска слабост и не ги предвидува партиите кои не се меѓу двете најголеми на власт или двете најголеми во опозиција. Во актуелниот пратенички состав ЗНАМ има 5 пратеници и е во власта, а Левица со 6 пратеници е во опозицијата.

Истиот принцип на поделба на минутите во ИЗ е предвиден и за рекламирањето во порталите и во весниците.

ЛЕВИЦА НЕМА ДА ДОБИЕ ВРЕМЕ ВО МЕДИУМИТЕ ЗА КАМПАЊАТА Апасиев бара Уставниот суд итно да го стопира Упатството за радиодифизерите

The post ГРАЃАНСКИОТ И УПРАВНИОТ СУД ГИ ОТФРЛИЈА ТУЖБИТЕ НА ЛЕВИЦА ПРОТИВ АВМУ Се чека одлуката на Уставниот суд за платеното политичко рекламирање appeared first on plusinfo.mk.