Во новата епизода на поткастот „Бизнис-клуб“, во разговорот на претседателот на Стопанската комора Бранко Азески со м-р Аријана Коскарова, претставник на Стопанската комора во Мајами, се изнесуваат факти за значењето и за реномето што го има Стопанската комора во САД преку добивањето виза за нејзиниот престој во Америка врз основа на препораката од претседателот на Стопанската комора на Северна Македонија и за посетата на Стопанската комора како најстара и најмоќна бизнис-организација во Македонија од директорот на магазинот „Форбс“.

– Кога аплицирав за виза за некој со извонредни способности, која Америка ја дава на 0,00005 % од луѓето во светот, еден од потписниците за препораката бевте и Вие, поради нашата соработка која ја имавме за Балканскиот самит, кој го организиравме во 2019 година, така што можам да кажам дека благодарение на Вас мојот пат и успех во Америка започнаа токму со тоа – истакна м-р Аријана Коскарова.

Во поткастот се отвори прашањето за лобирањето и е направена паралела на процесот на лобирање во Македонија и во САД. Лобирањето во САД е вообичаена и сосема легитимна работа, која е уредена со закон, а лицето кое лобира за добивање тендер се наведува во тендерот, бидејќи тоа му е легална работа за која наплаќа уште на почетокот на тендерот. Тоа е еден од начините како се спречува корупцијата во САД. Во Македонија, иако постои Законот за лобирање, кој беше донесен во јуни 2021 година за да се спречат нелегитимното влијание врз јавните политики и процеси и можните коруптивни ефекти, до денес тој не е заживеан во пракса.

– Кога аплицираш на тендер ти наведуваш кој ти е лобистот во тендерот и во самата апликација – изјави м-р Коскарова.

М-р Аријана Коскарова е организатор на еден од позначајните бизнис-настани, Балканскиот претприемачки самит, во 2019 година, во соработка со Стопанската комора. Одржувањето на вториот самит е планирано за 2025 година, а целта, според Коскарова, е освојување на американските пазари преку поврзување на македонските и американските компании. За остварување на оваа цел потребно е да се најдат вистинските луѓе кои ќе можат да ги насочат македонските компании како да го направат тоа, а еден од нив е и директорот за економски развој, кој го има тимот кој може да ги насочи.

– Целта ми е да направиме самит за поврзување македонски и американски компании и да се отвори можност за македонските компании да работат во Америка. Го имам знаењето и ги имам луѓето кои можам да ги доведам и да ги насочам македонските компании да работат на американскиот пазар – вели м-р Коскарова.

Погледнете го целиот разговор.

The post 🎥 СО ПОТПИС И ПЕЧАТ ОД СТОПАНСКА КОМОРА ДОБИЛА АМЕРИКАНСКА ВИЗА Коскарова во „Бизнис клуб“ зборува за лобирањето во Македонија и во САД appeared first on plusinfo.mk.

Во новата епизода на поткастот „Бизнис-клуб“, гостин на претседателот на Стопанската комора на Северна Македонија Бранко Азески му е Аријана Коскарова, претприемач, коосновач на „Креатив хаб“, академија за дигитални вештини со седиште на 3 пазари (Македонија, Косово и Мајами, САД), и добитник на наградата на „Форбс 30 под 30“ за Европа во категоријата социјално претприемништво, која се доделува на млади луѓе кои преку своите бизнис идеи прават општествено добро.

Во разговорот со м-р Аријана Коскарова се прави паралела на македонското и на американското претприемништво и се изнесуваат факти за претприемништвото и за развојот на бизнис-моделите, но од друга перспектива, односно со користење грантови за едукација кои ќе понудат поквалитетно образование и поврзување со професионалци од индустријата.

Со својот бизнис во Америка, м-р Коскарова истакнува дека целта на САД е градење на Америка како силна економска држава преку вложување во бизниси и во нови инвестиции. Според неа, Америка има многу практики за развој на државата кои можат да бидат пример за развој и на нашата држава. Таа прави паралела на постоењето на економските зони кај нас и во Америка.

– Ако ти си бизнисмен кој сака да вложи сериозни пари, ти даваат можност да вложиш во економските зони. Целта е економските зони во Америка да се направат како градови и да не бидат сите сегментирани во градот Мајами, па затоа ако бизнисите вложат таму, имаат придобивки од аспект на данокот, што за Америка е многу битно – истакна Коскарова.

М-р Коскарова магистрирала на Интернационалниот универзитет во Монако и имала можност да работи во Шангај, Њујорк, Мајами и на Бали, каде што се здобила со искуство и со работна дисциплина. Иако живеела во повеќе држави надвор од Македонија, во 2017 година одлучила да вложи во својата земја со отворањето на Академијата „Креатив хаб“ во Скопје. Аријана е една од коосновачите на Академијата, која во 2022 година се проширила и во Приштина и во Мајами.

Нејзината бизнис-приказна во Мајами, САД, започнува во 2022 година со добивањето виза од САД за лице со извонредни способности. Една година чекала за лиценца за акредитација на Академијата, а во 2024 година започнала со работа. Во моментов има добиено два гранта – едниот од Министерството за економија на САД за обука на невработени лица од Америка со вештини од областа на вештачката интелигенција, а вториот грант е од Градот Мајами.

Во разговорот со претседателот Азески, Коскарова истакнува дека за развој на претприемништвото во Америка се важни три сегменти: 1) искуство како да се развива бизнисот; 2) едукација, па затоа стратешки приоритет на Америка е преку бесплатни обуки да го оспособи народот со вештини со кои ќе бидат компетентни на пазарот на трудот, а тоа во моментов се вештините за вештачка интелигенција, и 3) инвестиција, која ја добиваат преку стимулативни мерки за инвестирање.

М-р Коскарова потенцираше дека во Америка се нудат многу можности за отворање бизниси. Општината (конкретно во Мајами, каде што живее) многу им помага на бизнисите со тоа што им нуди разни грантови за отворање бизнис преку Агенцијата отворена за таа намена, а истовремено им помага и во поврзувањето преку промоција и видливост на компаниите.

Во поткастот фокусот беше ставен и на младата американска популација. М-р Коскарова истакна дека кога станува збор за младата американска популација во американското општество, важни се две работи: 1) дали си Американец или дојден од друга држава и 2) дали имаш вештини или не. Лицата дојдени од други држави кои немаат вештини се робови на општеството, бидејќи работат ниско платени работи. Но на младите Американци им се нудат многу можности. Тие имаат добро и квалитетно бесплатно образование и им се нудат грантови за нови стартапи, за бизниси и за акцелератори. Но и на лицата кои имаат вештини, а кои се дојдени од други држави многу им се помага во развивањето на бизнисот, особено во научно-истражувачката дејност.

Како младо лице, покрај наградата на „Форбс 30 под 30“, м-р Аријана Коскарова е добитник и на наградата за жена претприемач во Давос за време на Светскиот економски форум.

Погледнете го целиот разговор.

The post 🎥 АРИЈАНА КОСКАРОВА ГИ ПРЕНЕСУВА ИСКУСТВАТА ОД АМЕРИКА ЗА БИЗНИС Коосновач е на академија за дигитални вештини со седиште во Македонија, Косово и во Мајами appeared first on plusinfo.mk.