Полицијата во изминатите два дена изрекла 1.026 казни за сообраќајни прекршоци низ државата, а 34 лица биле лишени од слобода поради безобѕирно управување со возило. Најголем дел од санкциите се однесуваат на пречекорување на дозволената брзина.

Според информациите од Министерството за внатрешни работи, дури 316 возачи биле фатени како возат побрзо од дозволеното. Во истиот период, полицијата уапсила девет возачи кои управувале под дејство на алкохол, 24 лица без возачка дозвола и едно лице кое возело и покрај претходно изречена забрана.

Во акциските контроли биле одземени и 23 возила согласно член 300-б од Кривичниот законик.

Покрај брзото возење, полицијата регистрирала и 164 прекршоци за непрописно паркирање, како и 29 санкции за возење под дејство на алкохол.

Казни добиле и 107 мотоциклисти кои не носеле заштитен шлем, додека 99 учесници во сообраќајот биле санкционирани поради некористење сигурносен појас. Полицијата казнила и пет пешаци.

Од сообраќај биле исклучени 15 нерегистрирани возила, како и четири возила поради техничка неисправност. Санкционирани биле и двајца возачи поради незаконско затемнување на стаклата на возилата.

Од МВР најавуваат дека сообраќајните контроли ќе продолжат и во наредните денови и апелираат граѓаните да ги почитуваат правилата за да се зголеми безбедноста на патиштата.

The post НАД 1.000 КАЗНИ ЗА САМО ДВА ДЕНА Полицијата одзеде 23 возила и уапси 34 лица appeared first on plusinfo.mk.

Седум возачи завршија во полициска станица во изминатото деноноќие поради безобѕирно возење на патиштата низ државата, а меѓу нив имало и малолетник зад волан.

Најголем дел од приведените, четворица, возеле без возачка дозвола. Еден од нив бил малолетник, кој бил затекнат како управува возило во Тетово. Други случаи на возење без дозвола биле регистрирани во Гостивар, Кавадарци и Прилеп.

Полицијата затекнала и возачи кои седнале зад волан и покрај сериозни прекршувања. Еден возач во Тетово бил фатен како вози под дејство на алкохол, додека во Гостивар бил приведен возач кој управувал возило и покрај тоа што имал активна забрана.

Најтежок бил случајот во Кавадарци, каде возач бил затекнат како управува возило и под дејство на алкохол и со важечка забрана за возење.

Од полицијата најавуваат дека по целосно документирање на случаите ќе следуваат кривични пријави.

Воедно, упатен е апел до сите учесници во сообраќајот да ги почитуваат правилата и да не седнуваат зад волан без дозвола, под дејство на алкохол или со изречена забрана, со цел да се зголеми безбедноста на патиштата.

The post ПОЛИЦИЈАТА УАПСИ 7 БЕЗОБЅИРНИ ВОЗАЧИ Возеле без возачки, пијани и со забрани, меѓу нив има и малолетник appeared first on plusinfo.mk.