Премиерот Христијан Мицкоски денеска во врска со најавите на СДСМ и нејзиниот лидер Венко Филипче за нов закон за борба против корупцијата, со кој, како што посочуваат, ќе се врати довербата во правосудството, рече дека станува збор за истите луѓе кои кога биле на власт ги направиле измените на Кривичниот законик, со кои се овозможи застарување на дела и избегнување одговорност.

– Пред неколку недели, кога првпат ја слушнав оваа иницијатива, мислев дека станува збор за нешто што би можело да се прочита во рубриката „Верувале или не“. Затоа се воздржав од коментар и почекав извесно време. Но, гледам дека тие сериозно ја промовираат оваа идеја и очигледно навистина веруваат во неа. Станува збор за луѓе кои беа дел од власта во периодот кога беа направени измени на Кривичниот законик, со кои беа избришани одредени одредби што овозможија застарување или избегнување на одговорност за голем број предмети поврзани со висока корупција – рече Мицкоски.

И денес, без никаква задршка, додаде тој, десетина дена ја убедуваат македонската јавност дека токму тие ќе бидат носители на борбата против корупцијата.

– Искрено, тешко ми е да се изначудам на тоа што го слушам. Доколку навистина се убедени во својата невиност, тогаш не треба да стравуваат од ниту еден судски процес. Но, моето чувство е дека работите не стојат така – рече премиерот Мицкоски денеска одговарајќи на новинарско прашање по отварањето на новиот базен Карпош.

The post ОВОЗМОЖИЈА ЗАСТАРУВАЊЕ НА ДЕЛА, A СЕГА ПРЕДЛАГААТ ЗАКОН Идејата на СДСМ е како од „Верувале или не“ appeared first on plusinfo.mk.

Претседателот на Украина Володимир Зеленски соопшти дека одобрил предлог-закон со кој се зајакнува независноста на специјализираните антикорупциски институции. Тој најави дека документот денеска ќе биде доставен до Врховната рада (украинскиот парламент), пренесе Укринформ, повикувајќи се на објава на претседателот на Телеграм.

„Тукушто го одобрив текстот на закон со кој се гарантира вистинско зацврстување на владеењето на правото во Украина, независноста на институциите за борба против корупцијата и сигурна заштита од какво било руско влијание или мешање. Текстот е избалансиран“, напиша Зеленски.

Тој нагласи дека најважно е антикорупциските тела – Националното антикорупциско биро на Украина (НАБУ) и Специјализираното антикорупциско обвинителство (САП) – да располагаат со вистински инструменти, да немаат никакви руски врски и да останат целосно независни.

„Важно е да го чуваме единството. Важно е да ја зачуваме независноста. Важно е да ја почитуваме волјата на украинскиот народ и сме благодарни на сите кои ја поддржуваат Украина“, додаде украинскиот претседател.

И покрај најавата, засега не е познато кога парламентот ќе го разгледа новиот закон, особено што се очекува пратениците оваа недела да заминат на летна пауза.

Предлог-законот доаѓа по серија контроверзии: на 22 јули парламентот го изгласа законот за ограничување на надлежностите на НАБУ и САП, кој Зеленски го потпиша истиот ден. Законот предизвика бурни реакции – дел од пратениците веќе собираат потписи за поднесување иницијатива до Уставниот суд на Украина, додека во Киев и други градови веќе два дена траат протести.

Критичарите на мерките предупредија дека новото законско решение го става антикорупцискиот систем под контрола на обвинител назначен од Зеленски, што го отвора прашањето за политичко влијание врз независните институции.

И претставници на ЕУ јавно ја критикуваа одлуката за намалување на автономијата на НАБУ и САП.

Зеленски вчера изјави дека одржал состаноци со раководителите на антикорупциските и на безбедносните институции и им дал рок од две недели да подготват конкретни препораки пред новиот закон да биде доставен до парламентот. Но, денеска не прецизираше дали ќе го повлече претходниот закон кој ги ограничува овластувањата на антикорупциските тела, ниту ги објави деталите од новиот предлог.

Во Киев вечерва се очекуваат нови улични протести.

The post ПРОТЕСТИТЕ ПРОТИВ ЗЕЛЕНСКИ ВРОДУВААТ СО ПЛОД? Украинскиот претседател најави нов закон со кој ќе зајакнат актикорупциските институции appeared first on plusinfo.mk.