Службеник од Основниот суд во Гостивар бил уапсен под сомнение дека побарал 100 евра поткуп, објави Министерството за внатрешни работи. Според соопштеното, службеникот требало да „среди“ судска казна од 200 евра и шестмесечна забрана за управување возило.

„Лицето А.Ј. (49) од Присојница, општина Маврово и Ростуше, било приведено во понеделникот вечерта, околу 20:10 часот, од полицијата во Ростуше“.

Во пријавата на Н.А. од Калиште се вели дека вработениот во судот му се обратил преку пријателот С.М. од Гостивар, уверувајќи дека може да ја „избрише“ казната бидејќи документите наводно стигнале кај него на извршување. За тоа, побарал 100 евра.

Двајцата се договориле за средба во угостителски објект во Гостивар. Но таму, наместо договор, следел пресврт.

Kога се сретнале со судијата, Н.А. му рекол дека е новинар и дека снима по што осомничениот се обидел да се оправда дека „се шегувал“ и се обидел да избега.

А.Ј. бил веднаш приведен и задржан во полициска станица.

The post РЕКОЛ ДЕКА СЕ ШЕГУВА КОГА ГО ФАТИЛЕ ПРИ ОБИД ЗА ПОТКУП Судски службеник од Гостивар сакал да „среди“ казна appeared first on plusinfo.mk.

За српскиот претседател Александар Вучиќ, повлекувањето на проектот „Трамп“ во Белград е неверојатно сериозна и лоша вест.

– Ова е неверојатно сериозна и лоша вест – изјави Вучиќ пред новинарите.

Проектот, кој го носеше брендот Трамп, требаше да биде изграден на локацијата на зградата на Генералштабот во центарот на Белград, која беше бомбардирана од силите на НАТО во 1999 година. Зетот на американскиот претседател Доналд Трамп, Џеред Кушнер, се откажа од градењето хотелски комплекс проценет на 750 милиони евра.

Одлуката на Кушнер, според ДПА, дошла неколку часа по тоа што српските антикорупциски обвинители поднеле обвинение против министерот за правда Никола Селаковиќ, близок соработник на Вучиќ, за фалсификување на документ со кој на објектот му бил укинат статусот на културно наследство.

Протестите во Србија против уривањето на историската зграда на Генералштабот ја засилија контроверзата околу проектот.

The post НЕВЕРОЈАТНО ЛОША ВЕСТ Е ПОВЛЕКУВАЊЕТО НА КУШНЕР Вучиќ жали за проектот вреден 750 милиони евра appeared first on plusinfo.mk.

Бај Тјенхуи, поранешен генерален директор на државната компанија „Хуаронг“ бил погубен во севернокинескиот град Тјенџин. Врховниот народен суд ја потврдил пресудата со која Бај бил осуден за примање мито во вредност од над 156 милиони долари, пренесе државната агенција „Синхуа“.

Според судските документи, Бај меѓу 2014 и 2018 година ја злоупотребувал својата позиција и примал огромни суми пари и подароци за да им овозможи на одредени компании пристап до државни средства и поволни договори.

Во мај 2024 година бил осуден на смрт, со конфискација на имот и трајно одземање на политички права. Жалбата му била одбиена во февруари 2025 година, а потоа одлуката ја потврдил Врховниот суд.

Во последните мигови пред извршувањето на казната, според „Синхуа“, Бај имал право да се сретне со своите најблиски.

Погубувањето е дел од континуираната офанзива на кинеските власти против висока корупција. Веќе во 2021 година беше погубен Лаи Сјаомин, поранешен претседател на истата компанија „Хуаронг“.

Антикорупциската стратегија на Пекинг е симболична порака дека ни еден функционер не е недопирлив, особено во финансискиот сектор кој долги години бил извор на злоупотреби.

Западните медиуми укажуваат дека Кина сè почесто ја користи смртната казна како сигнал за морална дисциплина и за политичка контрола во чувствителни економски сектори. Но, организациите за човекови права остро ја осудуваат практиката, потсетувајќи дека земјата не објавува официјални податоци за бројот на погубувања.

The post ПОГУБЕН ЗА МИТО ОД 156 МИЛИОНИ ВО КИНА Борбата против корупцијата во Пекинг пуштена на најјако appeared first on plusinfo.mk.

На денешната панел дискусија насловена “Меѓународна соработка за развиени општини”, во рамките на настанот Саем-oтчет, учествуваше и вишиот директор на американскиот Национален демократски институт во Македонија, Роберт Скот, кој посочи дека НДИ соработува со локалните самоуправи во Македонија и тоа по неколку различни програми.

Роберт Скот истакна дека во програмата за градење отпорност кон корупцијата, со поддршка од шведската влада работат со општините Гази Баба, Боговиње, Струмица, Куманово, додавајќи дека ваквата соработка во борбата против корупцијата сакаат да ја прошират и со други општини.

– Исто така, во рамките на оваа програма, соработувавме со Стефан Андоновски од Министерството за дигитална трансформација, со Златко Перински од Министерството за локална самоуправа и со Орце Ѓорѓиевски од ЗЕЛС. Еден од примерите за регионална соработка е отворено партнерство со Владата, така учат да соработуваат општините низ целиот свет. Принципите лежат и во самата основа на тоа како треба да работат општините, инклузија, соработка, транспарентност и отчетност – рече директорот на НДИ.

Понатаму, тој додаде дека, да се биде член во вакви мрежи на соработка против корупција, „се принципи што ние сакаме да ги примениме за да ги задоволиме потребите на граѓаните“.

– Понатаму ја имаме ГРЕКО како можност за соработка. ГРЕКО е организација на група на земји која се бори против корупцијата. Оценките на ГРЕКО се однесуваат на тоа каква е законската регулатива, но, исто така, и како граѓаните да бидат што поблиски до власта и да се елиминираат сите можности за корупција. Сакам да истакнам неколку примери, Орце и Кисела Вода и Тони од Битола започнаа со имплементација на процедури во согласност со нивниот регистар на ризици од корупција – истакна, меѓу другото, Скот.

The post АМЕРИКАНСКИОТ НАЦИОНАЛЕН ДЕМОКРАТСКИ ИНСТИТУТ СО ПОДДРШКА ЗА КАДРИТЕ НА ВМРО-ДПМНЕ Перински, Ѓорѓиевски и Андоновски дел од проектите за борба против корупцијата appeared first on plusinfo.mk.

Поранешната претседателка на Државната комисија за спречување на корупцијата (ДКСК) Билјана Ивановска, која објави кандидатура за градоначалничка на Центар како кандидат на „Независни заедно“, денеска беше на распит во Обвинителство во врска со кривична пријава против неа.

Ивановска, во изјава за медиумите, по нејзиниот распит во Обвинителсто, рече дека била повикана поради кривична пријава за несовесно работење по член 353, додека била претседателка на Антикорупција, нагласувајќи дека не може да сподели за кој предмет точно се однесува за да не попречува на работата на Обвинителство.

– Обвинета сум дека наводно начинот на кој што ние сме ги отворале предметите во ДКСК и споделувањето на информациите во јавноста, било на некој начин, спорно за пријавителот. Денеска на средбата со обвинителката јас појаснив на кој начин ДКСК ги оформува предметите. Во конкретниот случај бил отворен предмет по сопствена иницијатива, на член на нашата комисија. Предметот се работел, на крајот предметот е без некои наоди и постапката е завршена без никакви сомнежи понатаму, но она што било спорно за пријавувачот е на кој начин ние сме комуницирале со јавноста – изјави Ивановска.

Според Ивановска, нема ништо спорно, нагласувајќи дека на обвинителката убаво и објаснила како постапува ДКСК, која е улогата на Претседателот на ДКСК – дека ги потпишува одлуките кои се носат колективно со мнозинство од членовите, без разлика дали е тоа за отворање или затворање на предмет.

– Пријавата е до мене бидејќи јас сум потписник. Од познат подносител е, не е анонимна. Не ме прашувајте понатака. Не е убаво од моја страна да им попречувам во процедурата – изјави Ивановска.

Во однос на поканата која ја доби во истиот ден кога ја објави кандидатурата за градоначалник на Општина Центар, Ивановска рече дека „мислењето на јавноста за ефикасноста на јавнот обвинителство е такво, какво што е и тоа остава простори за сомнежи, не кај мене, туку општо кај граѓанството“.

– Ако јавното обвинителство постапувало секогаш ревносно и за кратко време ги доставувало пријавите што треба, тогаш никој немало да се посомнева, зошто сега или зошто утре, задутре. Од тука произлегуваат сомнежите. И мене ми е прашањето дали сите пријави кои што биле арховирани на 25 јули се доставени на 14 август и тоа од страна на полиција – изјави Ивановска.

Прашана дали останува сомнежот дека има поврзаност со нејзината изборна кандидатура, Ивановска рече дека „не сака да верува во тоа“ и дека само кажала што и се случило.

– Знаете како е. Ние секогаш сме пред една голема лекција за демократија и мора да ја учиме демократијата. Мораме да оставиме слобода и волја на граѓаните, слободно да мислат и да размислуваат. И тоа е тоа. Предизборието е секогаш можност да направиме проценка до каде сме со нашето растење. Еве и ова е една од тие лекции – изјави Ивановска.

Ивановска на 14 август објави дека ќе се кандидира за градоначалничка на Центар како кандидат на „Независни заедно“, а следниот ден преку својот профил на Фејсбук објави дека полицијата вечерта и доставила кривична пријава.

– По 11 часа откако ја објавив мојата кандидатура за градоначалничка на Општина Центар, полицајци затропаа на мојата врата. Синоќа во 20:30 часот двајца полицајци ме побарале да ми врачат кривична пријава, но јас не бев дома. Утринава веднаш појдов да ја подигнам Поканата од ОЈО Скопје за да видам за што станува збор. Ме повикуваат на разговор на 19 август. Јас немам што да кријам, имам чиста совест и не се плашам од никакви закани и ниски удари и притисоци. Мојата цел е достоинствен живот во Центар и нашата битка заедно со „Независни заедно“ е отпор против воспоставените антивредности на корупција и клиентелизам кои нè доведоа до оваа ситуација – напиша Ивановска.

The post ИВАНОВСКА ДАДЕ ИСКАЗ ВО ОБВИНИТЕЛСТВО Поранешната шефица на Антикорупциска тврди дека нема ништо спорно appeared first on plusinfo.mk.

Европската Унија замрзнува 1,7 милијарди долари помош за Украина, откако претседателот Володимир Зеленски одобри закон кој ги ограничува овластувањата на клучните антикорупциски институции во земјата погодена од војна, објави Њујорк тајмс.

ЕУ задржува повеќе од третина од средствата што биле наменети за наградување на Украина за исполнување стандарди за добро владеење, откако Зеленски ја потпиша контроверзната мерка минатата недела.

Новиот закон му дава поголема моќ на политички назначениот украински обвинител врз Националното антикорупциско биро (НАБУ) и врз Специјалното антикорупциско обвинителство (САПО).

Иако Зеленски веднаш презеде и други мерки за да обезбеди независност на овие агенции – поради бурните реакции и првите протести против неговата администрација од почетокот на војната – сè уште постојат сериозни сомнежи за неговата посветеност да се искорени корупцијата што со децении ја подрива Украина.

ЕУ го воспостави Фондот за Украина минатата година со цел да го поддржи закрепнувањето на земјата и нејзините подготовки за членство во Унијата, ветувајќи речиси 60 милијарди долари за наредните 3 години.

Но, Киев не ги исполнил критериумите на ЕУ, а европските претставници жестоко го критикуваа брзото носење на новиот закон минатата среда.

Одлуката на Унијата да замрзне дел од средствата не е конечна – тие можат да бидат повторно одобрени, доколку Украина ги исполни барањата, велат официјални лица.

Комесарката за проширување на ЕУ, Марта Кос, изјави дека Унијата е „сериозно загрижена“ од обидот на Украина да внесе политичко влијание во двете институции што треба да се борат со висока корупција.

НАБУ и САПО беа формирани по „Револуцијата на достоинството“ во 2014 година, кога новите власти ветија искоренување на системската корупција по соборувањето на прорускиот претседател Виктор Јанукович.

Зеленски првично вети дека ќе ја продолжи борбата против корупцијата, но во последниве месеци сè повеќе ја критикуваше работата на НАБУ и САПО – особено кога започнаа истраги против луѓе блиски до него, вклучувајќи го и поранешниот вицепремиер Олексеј Чернишов.

Претседателот тврдеше дека е потребна построга контрола врз агенциите за да се отстранат „руски влијанија“ и да се објасни зошто некои случаи со години стојат без епилог.

Но, илјадници граѓани излегоа на улиците во Киев, барајќи независност за НАБУ и за САПО, предупредувајќи дека внатрешната корупција ја поткопува способноста на Украина да се брани од руската инвазија.

Меѓу меѓународните лидери што повикаа Зеленски да ја повлече мерката беше и британскиот премиер, Киер Стармер.

The post ЕУ ГО КАЗНУВА ЗЕЛЕНСКИ Стопирани 1,7 милијарди долари помош за Украина поради спорниот закон за антикорупција appeared first on plusinfo.mk.

Во вечерашната емисија „За или против“ на телевизија Алфа, гостуваше портпаролката на Владата и член на Извршниот комитет на ВМРО-ДПМНЕ, Марија Митева, која зборуваше за најновиот извештај на ГРЕКО (Група на држави против корупцијата при Советот на Европа), оценет како позитивен сигнал за борбата против корупцијата во Македонија.

– После години на негативни извештаи и институции потонати во корупција, конечно добиваме признание за напредок. Ова е одличен индикатор за насоката во која се движи државата – изјави Митева.

Таа истакна дека Владата покажала резултати за само една година, што според неа, претставува јасна разлика во однос на претходното владеење. Извештајот нотира видливи подобрувања и исполнети препораки, а остануваат само неколку кои Владата има цел да ги реализира наскоро.

– Ако се погледне внимателно извештајот на ГРЕКО, ќе се види дека имаме конкретни состојби што говорат за реална работа на Владата. За една година, успеавме да изградиме различен систем на функционирање, нов начин на водење институции и управување – додаде Митева.

Според неа, извештајот е „добар импулс“ кој покажува дека институциите веќе работат на поинакви принципи, што е охрабрувачко не само за Владата, туку и за граѓаните кои очекуваат резултати во борбата против корупцијата.

The post МАКЕДОНИЈА СО ПОЗИТИВЕН СКОК ВО ИЗВЕШТАЈОТ НА ГРЕКО Владата ги исполнува ветувањата, вели Митева appeared first on plusinfo.mk.

Не мислам дека треба да се расфрламе со имотот на граѓаните и тој имот да се користи на начин којшто е надвор од законот, посочи премиерот Христијан Мицкоски, коментирајќи го случајот со дипломатските пасоши кои ги бараат антикорупционерите.

Мицкоски денеска на поставувањето на камен-темелник за изградба на нова градинка во Трубарево, во одговор на новинарско прашање поврзано со барањето дипломатски пасоши од страна на членови на Државната комисија за спречување корупција (ДКСК) рече дека Министерството за надворешни работи ќе даде информација дали членовите побарале или не побарале дипломатски пасоши, како и која е политиката на Министерството по ова ова прашање.

– Немам информација во врска со дипломатските пасоши на луѓето коишто се дел од Антикорупциска комисија. Се надевам министерот за надворешни работи даде одговор на ова прашање и мислам дека Министерството за надворешни работи ќе ви даде информација дали побарале или не побарале дипломатски пасоши и која е политиката на Министерството – рече Мицкоски.

Досега дипломатски пасош добила само претседателката на ДКСК Татјана Димитровска, која вели дека е легитимно право на секој член да си побара, а институцијата ќе цени дали им следува. Според Димитровска, дипломатските пасоши им се потребни на членовите на ДКСК поради честите службени патувања во странство и затоа што се тие функционери именувани од Собранието.

The post „НЕ МИСЛАМ ДЕКА ТРЕБА ДА СЕ РАСФРЛАМЕ СО ИМОТОТ НА ГРАЃАНИТЕ“ Вака Мицкоски го коментираше барањето за дипломатски пасоши на антикорупционерите appeared first on plusinfo.mk.

Како што рече во интервју за ТВ 24 (на 28 минута) нејзините колеги од Антикорупциска, односно шесте челнови кои поднеле барања, се уште чекаат одговор од МНР.

– Побарани се дипломатски пасоши за членовите на Комисијата, обезбеден е само за мене како нејзин претседател. За другите членови нема ни одговор дали ќе има дипломатски пасош. Легитимно право е на секој член да си побара, има институција која ќе цени дали им следува – рече претседателката Димитровскаи објасни дека тоа им следува како избрани функционери и дека тие често се поканети на настани во други држави.

Од МНР велат дека Димитровска го добила дипломатскиот пасош по проценка на претходниот министер за надворешни работи Бујар Османи.

Никој од претходниот состав на ДКСК нема добиено дипломатски пасош, ниту пак некој од нив побарал.

The post АНТИКОРУПЦИОНЕРИТЕ БАРААТ ДИПЛОМАТСКИ ПАСОШИ Претседателката Димитровска добила, но не и останатите членови на комисијата appeared first on plusinfo.mk.

Стејт департментот денес соопшти дека додека ја извршувал функцијата градоначалник на Струга, Мерко „присвоил средства и се мешал во судските и другите јавни процеси, нанесувајќи ѝ штета на вербата на јавноста во демократските институции и функционери во Северна Македонија“.

Координаторот за антикорупција на Стејт департментот Ричард Нефју, вели дека ставањата на црна листа имаат цел да ја покажат поддршката на САД за владеењето на правото и напорите за борба против корупцијата низ целиот свет.

– Секогаш кога зборувате за нешто што вклучува визни ограничувања или санкции, секогаш ќе има прашања за ефикасноста. Мислам дека во голема мера, сепак, успеавме да покажеме значајни резултати во однос на помагањето на актерите на граѓанското општество и другите дека тие не се сами. И дека кога се соочуваат со корумпирани актери, имаат поддршка и имаат поддршка од меѓународната заедница – рече Нефју за Албанската редакција на Гласот на Америка.

Тој додаде дека не прави разлика дали санкциите се однесуваат на поранешен или сегашен функционер.

– Повторно, дел од причината зошто ги правиме овие работи е да ги поддржиме актерите од граѓанското општество, да ги поддржиме оние кои се обидуваат да бараат одговорност од корумпираните актери – рече тој.

Нефју додаде дека „ако секретарот има веродостојни информации што укажуваат на вмешаност во значителна корупција, секретарот треба да наметне ограничувања за виза. И така, од гледна точка на законот, од нас се бара да дејствуваме кога тие информации се достапни“.

САД вчера го ставија на црната листа градоначалникот на општина Струга Рамиз Мерко како генерално неподобен за влез во САД поради неговата вмешаност во значителна корупција.

„Денешната акција испраќа порака дека САД ја поддржуваат Северна Македонија во поттикнувањето на стабилноста преку зајакнување на демократските институции и справување со недостатоците во владеењето на правото. Оваа ознака ја потврдува посветеноста на САД за борба против корупцијата, која му штети на јавниот интерес, го попречува економскиот просперитет на земјите и ја намалува способноста на владите ефикасно да одговорат на потребите на својот народ“, се вели во соопштението од Стејт департментот.

Минатата година САД ги ставија на црна листа пранешниот премиер Никола Груевски и поранешниот директор на Управата за безбедност и контраразузнавање Сашо Мијалков заради нивна вмешаност во „значителна корупција“.

„Нивните постапки ги поткопаа владеењето на правото, демократските институции и јавните процеси во двете земји и ја намалија вербата на јавноста во нивните влади“, изјавија тогаш САД.

Покрај Груевски и Мијалков, Стејт департментот ги санкционираше и членовите на нивните потесни семејства, кои добија забрана за влез во Америка. Истото важи и за градоначалникот на Струга Рамиз Мерко.

The post ЕКСОБАР ВЕРУВА ДЕКА САНКЦИИТЕ КОН МЕРКО ЌЕ Ѝ ПОМОГНАТ НА ЗЕМЈАВА Поддршка од САД во борбата со корупцијата appeared first on plusinfo.mk.