Пратеничката група на СДСМ нема да ја поддржи фискалната стратегија 2027 – 2031, соопшти пратеникот на оваа партија Фатмир Битиќи во рамки на општиот претрес на пленарна седница на Собранието.

СДСМ, како што рече тој, оценува дека Стратегијата наместо да се потпира на структурни промени, таа се  базира на претпоставка дека БДП ќе расте побрзо од задолжувањето и не нуди одговор на прашањето – како ќе се амортизираат идните ценовни шокови.

Спротивно на ова заменик-министерот за финансии, Николче Јанкуловски, потсети дека во време на  оваа влада обезбеден е раст на економијата во просек од 3% и тоа  шест квартали по ред.

Според Битиќи, предложената стратегијата го нормализира отстапувањето на Владата од Законот за буџети, кој треба да ја ограничи политичката самоволност во трошењето на јавните пари.

– Се соочуваме со институционализирање на дефицитот како нормална состојба. Според најновите податоци од фискалниот бројач, заклучно со 21 мај, приходите изнесуваат 135,4 милијарди денари, односно 36,12% од планот, додека расходите изнесуваат 165,6 милијарди денари, односно 39,98% од планот. Разликата меѓу приходите и расходите веќе изнесува 30,2 милијарди денари. Ако годишно планираниот дефицит е 39 милијарди денари, тогаш до 21 мај се реализирани речиси 77 % од годишниот буџетски дефицит. Со овие бројки стратегијата не нуди решенија за фискалниот ризик. Владата тешко може да ја продава приказната дека фискалната состојба е стабилна и под контрола и се обидува да ја релативизира фискалната реалност – рече Битиќи.

Тој додаде дека во регионален контекст, Македонија е веќе меѓу позадолжените економии, а стратегијата не покажува движење кон суштинско раздолжување.

– Стратегијата не зборува никаде како ЈПДП преговара за нов долг од 300 милиони евра со домашните комерцијални банки иако јавноста ќе го дознае тоа наскоро. Македонија заслужува фискална стратегија што ќе ја гради иднината, а не што ќе ја задолжува. Од економски, политички и вредносни причини нема да ја поддржиме – рече Битиќи.

Тој додаде и дека според фискалната стратегија за 2026 година, врз основа на постоечките буџетски проекции, се предвидуваат приходи од 374,9 милијарди денари, расходи од 414,2 милијарди денари и буџетски дефицит од 39,2 милијарди денари, односно 3,5% од БДП.

–  Законот за буџети поставува фискално правило според кое буџетскиот дефицит треба да биде ограничен на 3% од бруто домашниот производ, но актуелниот буџет веќе предвидува дефицит од 3,5% од БДП, а истото ниво се проектира за 2027 година. Со други зборови, стратегијата ја коригира фискалната недисциплина на оваа влада, сама ја потврдува и се обидува да ја легитимира – рече Битиќи.

Заменик-министерот за финансии, Николче Јанкуловски, посочи дека фискалната стратегија е резултат на одговорното, домаќинско и чесно работење на Владата, а ја изготвиле најкомпетентните луѓе од сферата на економијата и финансиите.

– Кој пример сте вие да и кажувате на оваа Влада што обезбедува шест квартали по ред економски раст во просек од 3% кога од 2017 година до втор квартал од 2024 двојно го зголемивте јавниот долг со просечен раст од 1,9%? Што обезбедивте вие со двојното зголемување на јавниот долг за граѓаните? Додека бевте на власт на терен беше нула, а сега поминете, видете како е – патишта, железница, реконструкција на студентски домови, училишта,… Оваа Влада  е максимално посветена на капиталните инвестиции и не наплаќа глупости како солидарен данок, сега го враќаме за некои грешки што сте ги правеле во минатото. Имаме конкретни бројки на кои се гордееме, а тежнееме кон уште поголем економски раст, и на БДП и на животниот стандард на граѓаните – рече Јанкуловски.

Јанкуловски во обрзложението на документот пред Собранието истакна дека во периодот 2027 – 2031 година, даночната политика ќе се базира на намалување на сивата економија и поголема наплата на средствата во државниот буџет, преку зголемена дигитализација и воспоставување ефикасен даночен систем со цел секој праведно и на праведен начин да ги плаќа своите даночни обврски.

-Политиката на управување со јавен долг ќе биде насочена кон обезбедување на неопходните средства за финансирање на буџетскиот дефицит, за отплата на долговите што достасуваат како резултат на задолжувањата од претходните години и за проектно финансирање, без притоа да се предизвика неоправдано зголемување на долгот до ниво кое може да ја загрози стабилноста на економијата и економскиот раст на државата- рече тој.

Според Министерството за финансии со усвоената владината фискална стратегија, а преку јасно дефинирани цели, принципи и мерки,  се обезбедува балансиран пристап кон справување со тековните фискални и економски предизвици. При тоа фокусот на фискална консолидација создава солидна основа за зачувување на стабилноста и обезбедување одржлив и инклузивен економски развој.

Оттука на среден рок до 2031 година предивидено е намалување на буџетскиот дефицит како процентуално учество во БДП од 3,5% во 2027, на 3% во 2027 и сведување на ниво од 2,8%  во 2029 година. При тоа со утврдените проекции буџетскиот дефицит од 2028 година е целосно усогласен со европските стандарди за фискална дисциплина, што е јасен сигнал за зачувување на стабилноста и кредибилитетот на јавните финансии.

Во периодот 2027-2031 година економскиот раст се очекува постепено да се динамизира и економската активност да забележи просечен раст од 4%.

Главни двигатели се очекува да бидат реализацијата на стратешки инвестиции во инфраструктурата и енергетиката, финансиска поддршка на инвестициската активност на домашните производни компании за зголемување на иновативноста, конкурентноста и продуктивноста, реформи во деловното окружување и даночната политика, и раст на извозот, реформите во образованието и прилагодувањето на потребите на пазарот на труд, борбата против корупција, сивата економија и нелојалната конкуренција, дигитализацијата на процесите во обезбедувањето на јавните услуги за граѓаните и компаниите, се очекува позитивно да влијаат врз потенцијалот за раст.

Исто така придонес кон потенцијалот за раст се очекува и од активностите за привлекување на странски директни инвестиции и проширувањето на капацитетите на постоечките. Поддршка на еконмската активност се очекува и од Планот за раст на ЕУ за Западен Балкан. При тоа согласно Фискалната стратегија една од клучните претпостави за остварување на повисоки стапки на раст е нормализација на глобалното окружување, стабилизирање на инфлациските притисоци и јакнење на економската активност кај нашите главни трговски партнери.

Клучен инструмент на фискалната политика и носител на економскиот раст ќе бидат капиталните расходи  со цел обезбедување долгорочни економски придобивки преку зголемување на јавниот капитал во патна и железничка инфраструктура, енергетски капацитети, водоводни и канализациони системи, дигитална и образовна/социјална инфраструктура. Исто така предвидените капитални вложувања ја зголемуваат продуктивноста и ја подобруваат конкурентноста на економијата

По завршувањето на општата расправа за фискалната стратегија, пратениците ја почнаа расправата по Предлог-законот за задолжување со заем од 260 милиони евра.

The post СДСМ НЕМА ДА ЈА ПОДДРЖИ ФИСКАЛНАТА СТРАТЕГИЈА 2027-2031 ГОДИНА Јанкуловски возврати дека владите на СДСМ не се репер за остварување економски раст appeared first on plusinfo.mk.

Потребно е да се избере нов државен јавен обвинител, зашто сегашниов се поставува над законот и е неспособен за таа функција, пишув познатиот македонски политиколог, аналитичар и универзитетски професор д-р Звонимир Јанкуловски во својата колумна со наслов „Независноста како смоквин лист на некомпетентноста“.

„Криејќи се зад барањето за политичка независност, државниот јавен обвинител се поставува над законот и волјата на оние што го бираат на таа функција. Неговите правни аргументи за останување на функцијата по секоја цена не ја носат тежината на правдата – но на политиката секако. Досега не видовме како се бори за вистината и достоинството на професијата и како да се избори за правдата во општеството, но видовме како се бори „бескомпромисно“ за својата позиција. Тој искажува неспособност, незнаење и некомпетентност на ваква одговорна функција. Затоа, не смее и не може веќе да се одложува изборот на нов државен јавен обвинител“ – пишува Јанкуловски во колумната објавена на Нетпрес.

Во колумната, покрај другото, Јанкуловски истакнува: „Универзална практика е дека во најголем дел обвинителите не треба да бидат независни, туку неутрални, или неполитички во нивното донесување одлуки. Ваквата посветеност на неутралноста и непристрасноста не треба да ги заслепи реформаторите за политичката природа на процесите, во кои функционира обвинителството, како што тоа го замислува државниот јавен обвинител. Но, зарем може да очекувате да го разбере ова долгогодишен „потпросечен студент по право“, кој е експонент на еден „пиљарски“ претставен правен систем од поранешната власт? Срамот што го носи е голем, и за него и за професијата, во која најлошите предводат. Но, тоа е прашање на лично достоинство и на достоинство на професијата, што ја врши.“

„Само Македонија може „дебело“ да плаќа неспособни и некомпентентни поединци на високи државни позиции. Имаме сериозна фалинка во системот на кривична правда кога дозволуваме оние, што ги „мереа“ ходниците на Правниот факултет во Скопје со години (ние ги викавме вечните студенти) и со судни маки ги полагаа испитите, да станат клучен фактор во државата, идентификуван како чувар на законитоста, уривајќи ја довербата во правниот систем. Се фаворизираат луѓе на високи позиции во системот на кривичната правда сo ниско ниво на правна писменост. Кога државата и политика свесно ќе го закопаат вистинското знаење и талент, некомпетентните луѓе се искачуваат на врвот во сите видови организации, затоа што се сигурни дека политиката ќе ги поддржи. Она од што секој систем на кривична правда би се срамел – правната неписменост – кај нас не е хендикеп. Тоа е сликата на вистинското вложување во луѓето во правосудството и обвинителството што го направи претходната влада“ – пишува универзитетскиот професор Јанкуловски.

The post ДРЖАВНИОТ ЈАВЕН ОБВИНИТЕЛ ТРЕБА ДА БИДЕ СМЕНЕТ Љупчо Коцевски се поставува над законот и над волјата на оние што го бираат appeared first on plusinfo.mk.

„За потсетување, Македонија веќе има усвоено Закон за меѓународна соработка во кривичната материја, едногласно усвоен од Собранието на седницата одржана на 2 април 2021 година, потпишан од претседателот Стево Пендаровски и објавен во Службен Весник.

Во овој закон предвидена е можноста домашен надлежен орган, Министерството за правда или Јавното обвинителство да испрати замолница за соработка во кривичната материја до надлежна институција на странска држава (чл.16).

Со замолницата, која се доставува преку Министерството за правда, од странската надлежна институција се бара да достави списи, информации и материјални докази за одредена предистрага, истрага или тековен судски предмет за физичко и/или правно лице.

Овој закон (чл.35) овозможува и формирање на заеднички истражни тимови за истражување и гонење на кривични дела, а договорот за заеднички истражен тим го склучува државниот обвинител на Македонија.

Во чл.39 од Законот за меѓународна кривична соработка дури е предвидено и секое истражно дејствие што го превземал надлежен орган на странската држава да биде изедначено со соодветно дејствие во кривичната постапка пред домашните институции.

Да сумираме, владата, министерот за правда и ЈО, доколу имаат политичка волја за сериозна борба против корупцијата, имаат важечки законски основи, без одолговлекување преку Министерството за правда веднаш да испратат замолница до надлежните органи на САД за достава на сите документи, списи, докази и информации за Рамиз Мерко, Катица Јанева, Стевчо Јакимовски и другите лица на „црната листа“.

Државниот јавен обвинител може веднаш да оформи заеднички македонско-американски истражен тим и да поведе самостојна или заедничка истражна постапка и да оформи и да процесуира кривично-правни предмети пред надлежните институции во Македонија.

Овој Закон добро е да се надгради и синхронизира со дополнителен закон за рестриктивни мерки, за што претставниците на стручната фела ценат дека е потребна квалитетна јавна расправа. Сметам дека Собранието треба да биде организатор и домаќин на една таква јавна расправа на која главниот збор ќе го имаат претставниците на судската фела, претставници на обвинителството, адвокати и професори по кривично право. На ваквата јавна расправа многу ќе користи и присуството на експерти за рестрикции и санкции од САД и од ЕУ, за да имаме одржливо унапредување на позитивните норми во оваа регулирана област за меѓународна соработка во кривичната материја – вели Милошоски во својата објава на Фејсбук.

Реагирајќи на објавата на Милошоски, СДСМ го повика него и неговата партија да не го блокираат Законот за рестриктивни мерки во македонското Собрание.

„Предлог Законот до Собранието е доставен на 6 ти февруари, пред месец и половина. Значи месец и половина Антонијо Милошоски го одолговлекува и не го става на разгледување пред матичната комисија за надворешни работи. Бараме Милошоски кој раководи со собраниската Комисија за надворешна политика, веднаш да го стави на дневен ред Законот за рестриктивните мерки. А Мицкоски и ВМРО-ДПМНЕ да го поддржат и законот да биде усвоен.

Ако ВМРО-ДПМНЕ е „за“ борба против корупцијата, ќе го поддржи законот. Ако сакаат да продолжат со лажни ветувања, ќе даваат 1.000 изговори и нема да го поддржат.

Последната одлуката на нашиот стратешки партнер, САД за црната листа е уште една потврда зошто итно е потребно да се донесе Законот за рестриктивни мерки. Со овој закон се создава можност сите вакви случаи, наведени од нашите стратешки партнери, да може да се процесираат преку домашното законодавство. Нема компромиси во борбата против корупцијата и криминалот и не смее да има дополнителни одлагања“ – се вели во соопштението на СДСМ.

The post ИМАТЕ ЗАКОН, АМА НЕМАТЕ ХРАБРОСТ И ПОЛИТИЧКА ВОЛЈА! Владата може да ги побара од САД сите докази за лицата од „црната листа“, вели Милошоски appeared first on plusinfo.mk.

– Покажавте голема отвореност за различни форми на соработка со Франција. Од вашето именување за декан на Медицинскиот факултет при УКИМ во Скопје во 2009-та, благодарение на добрата соработка Францускиот институт успеа да реализира повеќе настани во амфитеатарот на Деканатот како „Празникот на науката” и бројни конференции од областа на физиката, медицината и радиофармацијата. Од вашиот избор за ректор на УКИМ во 2016 година оваа соработка вклучува и нова димензија. Тука мислам на потпишувањето на Договорот со Универзитетската агенција за франкофонија кој овозможи отворање на Центарот за универзитетска успешност во септември 2018 година во кругот на кампусот на Универзитетот – проект кој се чекаше со години а се реализираше благодарени на вас, рече меѓу другото францускиот амбасадор – нарекувајќи го Јанкуловски пријател на Франција.

Бомгартнер се осврна на силната поддршка од ректорот Јанкуловски и за издавањето двојна диплома по применети странски јазици помеѓу УКИМ и Универзитетот во Кајен, а особено го подвлече деблокирањето на средствата од Константин Стојанов во рамки на Фондацијата што го носи името на овој богат македонски покровител и можноста тие да се користат за универзитетската мобилност со Франција, особено на студентите од Катедрата по фарнцуски јазик и книжевност.

Ректорот Јанкуловски нагласи дека ова одликување го смета за голема привилегија и чест, но и голем мотив да продолжи по патот кој го одбрал – да и служи на својата земја, но и да придонесува за пријателството и соработката меѓу двете земји.

– Целокупниот личен и професионален капацитет ќе го насочам за продолабочување на соработката меѓу нашите две земји нашата земја Република Македонија и Република Франција, посебно во делот на академската соработка која отвора многу предизвици, идеи, многу можности и многу хоризонти за нас, и создава дополнителни вредности како што се слободната мисла, демократијата, просперитетот и благосостојбата на граѓаните од нашата земја – рече Јанкуловски.

Одликувањето „Витез од Национален ред за заслуги” на Република Франција, е воведено 1963 година од францускиот претседател Шарл Де Гол и едно од најпрестижните одличја што Франција го дава на лица за особени заслуги за Републиката. 

The post „ВИТЕЗ ОД РЕДОТ ЗА ЗАСЛУГИ“ Ректорот на УКИМ е одликуван со престижното француско одличје appeared first on plusinfo.mk.

Ова го соопшти ректорот на УКИМ, Никола Јанкуловски во врска со, како што наведува, написите во одредени портали кои ги пренесоа субјективните и невистините видувања на изолиран број на припадници на академската заедница на УКИМ.

Постапката за избор на ректор, посочува ректорот Јанкуловски, ќе биде спроведена согласно споменатиот Закон, Статутот на УКИМ и, секако, роковникот ќе се спроведува согласно превентивните мерки на Владата за справување со состојбите предизвикани од последиците од ковид-19.

– Членот 5 од цитираната Уредба со законска сила за примена на Законот за високо образование за време на вонредна состојба, се однесува за продолжување на мандатот на органите на Универзитетот и единиците, каде тој е истечен за време на вонредната состојба и се продолжува само за времетраењето на вонредната состојба, што не е случај со мандатот на ректорот, така што имајќи ги предвид мерките на Владата за одржување седници, состаноци и сл., постапката за избор на ректор треба да продолжи – истакнува ректорот Јанкуловски.

Тој нагласува дека Универзитетот „Св. Кирил и Методиј“ во Скопје веќе трет месец ја прилагодува својата работа согласно споменатата Уредба и согласно сите превентивни мерки и протоколи.

– Моја должност и обврска како ректор на Универзитетот е да ја продолжам започнатата законска постапка за избор на ректор и да ја спроведам во најдемократска и отворена постапка за што сведочат и веќе закажаните седници на органите на Универзитетот кои имаат должност и обврска да ја спроведат оваа постапка, за жал и во овие вонредни корона состојби. Напротив, непродолжувањето на веќе започната постапка за избор на ректор на Универзитетот значи директна повреда и непочитување на Законот за високото образование и Статутот на Универзитетот. Мандатот на ректорот на УКИМ не е истечен, оваа законска процедура не е никаков лов во матно, туку само станува збор за спроведување на законска постапка која ќе продолжи да се спроведува на фер и транспарентен начин, со почитување на сите мерки и протоколи за заштита на здравјето и животот на сите членови на академската заедница – додава ректорот Јанкуловски.

The post Јанкуловски: Законски ќе биде извршен изборот на ректор appeared first on plusinfo.mk.