Албанската театарска и филмска актерка, Анила Биша, стана лице и глас на првата министерка за вештачка интелигенција во светот – Диела, но без нејзина согласност, пишува „Економист тајмс“.

Минатиот септември, албанскиот премиер Еди Рама претстави дигитален аватар наречен Диела, вештачка интелигенција на која ѝ е доверена задачата да ги следи јавните тендери, со цел борба против корупцијата. Кратко по презентацијата, виртуелната министерка одржа говор во парламентот, со видеопорака што ги обиколи светските медиуми.

Актерката Биша рече дека претходно соработувала со државата, но во сосема друг проект. Имено, таа го дала својот лик и глас како дигитален асистент на платформата е-Албанија, која им помага на граѓаните да се снајдат меѓу јавните служби и администрацијата. Според нејзините тврдења, таа никогаш не се согласила истиот материјал да се користи за политички проект или за аватар претставен како член на владата.

По воведувањето на „министерката за вештачка интелигенција“, секојдневниот живот на актерката се променил. Таа вели дека на улица ја нарекуваат со името Диала, а дел од јавноста ја идентификува со владината политика, што довело до онлајн напади и непријатни ситуации. Поради оваа причина, таа покрена судска постапка против државата, барајќи забрана за понатамошно користење на нејзиниот идентитет и надомест за злоупотреба на лични податоци.

Албанските власти, од друга страна, тврдат дека не направиле ништо нелегално и наведуваат дека проектот е дел од поширока дигитална реформа насочена кон намалување на политичкото влијание во постапките за јавни набавки.

Премиерот Еди Рама претходно изјави дека вештачката интелигенција треба да помогне јавните тендери да станат „100 проценти ослободени од корупција“.

Диела првично беше развиена како дигитален асистент за државни служби, но подоцна ѝ беше дадена симболична министерска позиција, потег што владата го претстави како технолошка иновација, а критичарите како политички спектакл.

Случајот на Анила Биша покренува прашања што сè повеќе го придружуваат развојот на генеративната вештачка интелигенција: кој го контролира дигиталниот идентитет, каде завршува договорната употреба на податоци и дали сликата на една личност може да стане политичка алатка без јасна согласност.

Адвокатите предупредуваат дека оваа тужба би можела да стане еден од првите европски преседани поврзани со правото на глас и визуелен идентитет во ерата на вештачката интелигенција, област каде што, велат тие, законодавството сè уште се обидува да го достигне чекорот со технологијата

The post АЛБАНСКА АКТЕРКА ЈА ТУЖИ ВЛАДАТА НА ЕДИ РАМА Дигиталната министерка Диала бесправно ги користи нејзините лик и глас appeared first on plusinfo.mk.

Албанската актерка, Анила Биша поднесе тужба против Владата бидејќи не дозволила понатамошно користење на нејзиното лице и глас, за Диела, министерка создадена со помош на вештачка интелигенција.

Премиерот Еди Рама ја претстави Диела во септември 2025 година, наведувајќи дека таа е министерка дизајнирана со вештачка интелигенција за да биде неподмитлива и ефикасна во државните набавки, со што таа стана позната како првата виртуелна министерка во светот.

Анила Биша тврди дека нејзиниот договор со властите ја вклучувал само платформата е-Албанија и дека тој истекол на 31 декември, и оти нејзиното лице и глас се користат без дозвола.

Актерката ја тужи Владата на Албанија, лично Рама, приватната компанија со која имала договор и Националната агенција за информатичко општество (НАИС), тврдејќи дека тие продолжиле нелегално да ја користат нејзината слика и глас, нанесувајќи ѝ „непоправлива штета“.

Биша, исто така, побара Владата да престане да ја користи нејзината слика додека случајот не се реши. Нејзината тужба беше објавена од локалните медиуми.

Неодамна виртуелната министерка Диела го доби признанието „Фјучр фит сил“ (Future Fit Seal) на Светскиот самит на влади во Дубаи, Обединети Арапски Емирати.

Министерството за економија и иновации на Албанија оцени дека оваа награда е престижна и дека ги одликува иновативните иницијативи и новите модели на владеење, кои ги подготвуваат владите за идните предизвици во секторите на иднината.

The post ПРОДОЛЖИЛЕ ДА Ѝ ГИ КОРИСТАТ ЛИКОТ И ГЛАСОТ ЗА АИ „ДИЕЛА“ Глумица ги тужи Албанија и премиерот Рама appeared first on plusinfo.mk.