И натаму највисоките должнички суми се по основ на градежни работи, комуналии, материјали и ситен инвентар.

Вкупниот внатрешен долг на крајот на првиот квартал од годинава достигна дури 490.740.000 евра што е за 82.000.000 евра повеќе во однос на состојбата на крајот од декември. Новите податоци од Министерството за финансии покажуваат дека за само три месеци доспеаните а неплатени обврски ги зголемиле Јавните претпријатија и државните фирми, општинските Јавни претпријатија, јавните здравствени установи, министерствата, агенциите.

Конкретно доспеаните а неплатени обврски на ЈП на централно ниво и државните АД и фирми на крајот од март достигнале износ од 235,4 милиони евра што е за дури 69 милиони евра повеќе во однос на состојбата на крајот од 2023 година. Општинските ЈП во првиот квартал од годинава пријавиле доспеан долг во износ од 76,7 милион евра или 700.000 евра повеќе во однос на последниот квартал од лани.

Јавните здравствени установи, болници, клиники, во првите три месеци од оваа година имале вкупен доспеан а неплатен долг во износ од 73 милиони евра што е за 11,7 милиони евра повеќе во однос на состојбата со долгот на крајот од 2023-та година. Буџетските корисници од прва линија во кои спаѓаат и министерствата, на крајот од март пријавиле доспеани а неплатени обврски во износ од 12,6 милиони евра што е за 261.000 евра повеќе во однос на состојбата во последниот квартал од 2023 та.

Споредбената анализа на „Порталб“ покажува дека има драматичен раст на доспеаните а неплатени обврски по основ на „други градежни работи“ односно во март долгот достигнал скоро 55,3 милиони евра што е за 26,2 милиони евра зголемување за само три месеци.

На крајот од третиот квартал во однос на состојбата на крајот на декември лани доспеаните а неплатени обврски се зголемени по повеќе основи: за комунални услуги, греење, транспорт обврските достигнаа 119,5 милиони евра, за материјали и ситен инвентар 65,8 милиони евра, за договорни услуги долговите достигнаа 49,3 милиони евра а значајно се зголемени и долговите по основ на „субвенции за јавните претпријатија“ кои на крајот од март достигнаа износ од 62 000 евра додека износот што се должи по основ на „трансфери до невладини организации“ се приближи до 500 000 евра. На новата должничка листа во „првите десет“ влегоа и ЈП за државни патишта со пријавени доспеани а неплатени обврски во износ од 20,2 милиони евра, ЕСМ снабдување со долг од 11,8 милиони евра и АД Елем со должнички износ од 15,5 милиони евра.

Новите податоци за внатрешниот долг покажуваат дека сите општини заедно го намалиле долгот но, поединечно, дел од општините само за три месеци пријавиле значајно зголемени неплатени обврски за што Порталб ќе објави податоци во следната анализа.

The post ЗА 3 МЕСЕЦИ ВНАТРЕШНИОТ ДОЛГ Е ЗГОЛЕМЕН ЗА 82 МИЛИОНА ЕВРА За што се потрошени парите? appeared first on plusinfo.mk.

Согласно законската регулатива, Министерството за финансии го објави првиот предизборен извештај кој ги опфаќа првите 2 месеца од оваа нова економска изборна година.

Вкупните приходи во првите 2 месеца во кои се опфатени и првите две недели од распишување на изборите, според предизборниот извештај, изнесувале скоро 670 милиони евра што претставува 13,7% во однос на планираните. Кај ставката „даночни приходи“ доминираат приходите од „домашни даноци на стоки и услуги“ во кои е опфатен и ДДВ, во износ од 249 милиони евра и придонеси за социјално осигурување на ниво од скоро 242 милион евра. Преку ставката „неданочни приходи“ во предизборие се слеале 57,4 милион евра.

Од почетокот на фискалната изборна 2024 година до крајот на февруари, буџетските расходи изнесувале 848,8 милион евра што претставува остварување од 14,9% во однос на планираните. Деталните податоци од предизборниот извештај покажуваат дека на расходната страна највисока сума во апсолутен износ од 345,4 милион евра е исплатена по основ на „социјални бенефиции“ што претставува реализација од 17,5% во однос на планот. Преку оваа ставка, расходите до ПИОМ само за исплата на пензии изнесуваат 237,4 милиони евра. Втора „најиздашна“ ставка се „стоки и услуги“ преку која во првите два месеци се исплатиле 151,2 милион евра или 13,8% во однос на планот. Преку оваа ставка, само по основ на „патни и дневни расходи“ се потрошиле 1,5 милиони евра што претставува 11,2% во однос на планот. Највисока подставка кај „стоките и услугите“ се „договорните услуги“ во износ од 121,1 милион евра или 15% остварување во однос на планот.

За исплата на „плати и надоместоци“ се потрошени речиси 106 милиони евра или 15,8% во однос на планот а по основ на „субвенции и трансфери“ за јавните претпријатија, невладини организации, приватни фирми, земјоделци, се исплатени 83,5 милиони евра – остварување од 21,2% во однос на планот.

„Во оваа категорија најголемо учество имаат расходите за субвенции во земјоделството исплатени од Агенцијата за финансиска поддршка во земјоделството и руралниот развој во износ од 19,5 милиони евра. Управата за јавни приходи има реализирано расходи во износ од 12,9 милиони евра за поврат на мој ДДВ“, се наведува во првиот предизборен Извештај.

Во првите два предизборни месеци за „капитални инвестиции“ се потрошиле 59,2 милиони евра што претставува реализација од 7,6% во однос на планираното

„За капитални дотации до ЕЛС реализирани се расходи во износ од 17,7 милиони денари (289 000 евра)“, се наведува во извештајот.

По основ на „камати“ за заеми земени од странски и домашни кредитори, државата во првите два месеци исплатила 30,6 милиони евра.

Постоечката законска регулатива предвидува бројни ограничувања за трошење на јавните пари во периодот од распишување на избори до денот на избор на Претседател на државата, пратеници во Собранието како и до изборот на новата Влада. Едно од најважните ограничувања е дека не може да се стартува со изградба на нови проекти кои не се планирани во буџетската година во која се спроведуваат изборите. Се забранети и исплати на надоместоци кои не се дел од буџетскиот план.

Според последните информации, до сега до ДКСК се адресирани повеќе од 20 претставки за прекршувања на Изборниот законик во предизборие, а најбројни се оние за користење на државни ресурси за партиски цели.

The post 848 МИЛИОНИ ЕВРА ОД БУЏЕТОТ СЕ ПОТРОШЕНИ ЗА ДВА МЕСЕЦА Предизборно најмногу пари отишле за субвенции и социјални бенефиции appeared first on plusinfo.mk.