Амбасадорката Анџела Агелер е меѓу дипломатите од кариера кои се отповикани како дел од неодамнешната одлука на претседателот Доналд Трамп која опфати смена на околу 30 амбасадори на САД.

„Длабоко сме ѝ благодарни на амбасадорката Агелер за нејзината служба во Северна Македонија во изминатите три години и посветени сме на обезбедување непречена и ефективна транзиција што ќе им даде приоритет на мисијата на САД и нашите дипломатски односи“, се наведува во изјавата на Амбасадата на САД дадена за МИА.

Амбасадата нагласува дека ќе продолжи да работи нормално во текот на овој процес.

Стејт департментот не го коментираше конкретниот број на персонал или амбасадори на кои се однесува смената, но соопшти дека се работи за стандарден процес во секоја администрација. Како што е соопштено, амбасадорот е „личен претставник на претседателот и право на претседателот е да осигура дека во овие земји има поединци кои ја унапредуваат неговата агенда ’Америка на прво место‘“.

Во Европа, смени ќе има во Ерменија, Северна Македонија, Црна Гора и во Словачка.

АМБАСАДОРКАТА АГЕЛЕР ЗАМИНУВА ОД МАКЕДОНИЈА Трамп менува 30 амбасадори вклучително и во земјава

The post АМБАСАДАТА НА САД Ѝ СЕ ЗАБЛАГОДАРИ НА АГЕЛЕР По 3 години служба Анџела заминува од Македонија appeared first on plusinfo.mk.

Претседателот на САД Доналд Трамп ѝ упати честитка по повод 34-годишнината од Денот на независноста на Македонија – 8 Септември на претседателката Гордана Сиљановска Давкова, информираше таа во објава на Фејсбук.

Сиљановска Давкова изрази благодарност за честитките за кои што оценува дека не се само потврда на цврстото американско-македонско пријателство и стратешко партнерство, туку и причина за нивно унапредување.

„Искрена благодарност до претседателот на САД и до американскиот народ за честитките по повод 34 годишнината од 8 Септември. Пораките на признание, разбирање и поддршка, содржани во честиткатата, којашто ми ја предаде амбасадорката Анџела Агелер, за нас не се само потврда на цврстото американско-македонското пријателство и стратешко партнерство, толку потребни во време на обиди за ставање крај на воените конфликти, справување со меѓународниот криминал и гарантирање траен мир и безбедност, туку и причина за нивно унапредување“, се вели во објавата на Давкова.

Во име на народот на Соединетите Американски Држави, Ви испраќам најдобри желби Вам и на народот на Северна Македонија по повод прославата на 34-годишнината од вашата независност, пишува во честитката од американскиот претседател.

„Во изминативе 30 години, партнерството меѓу САД и Северна Македонија продолжи да се зајакнува и проширува. Ја ценам непоколебливата поддршка на Северна Македонија за нашите напори да се постигне мирно решение на конфликтот меѓу Русија и Украина. Нашата соработка во борбата против транснационалните закани, како што се криминалот и нелегалната трговија со дрога, ги потврдува нашите заеднички вредности и заеднички цели. Соединетите Држави, исто така, го поздравуваат придонесот на Северна Македонија за меѓународниот мир и безбедност, што се гледа преку Вашата посветеност кон зголемена распределба на товарот.Во годината што претстои, со нетрпение очекувам да го унапредиме нашето партнерство“, пишува во честитката.

Ви посакувам Вам и на народот на Северна Македонија среќен Ден на независноста, се вели во честитката од претседателот Доналд Трамп.

The post „СО НЕТРПЕНИЕ ОЧЕКУВАМ ДА ГО УНАПРЕДИМЕ ПАРТНЕРСТВОТО“ Честитка од Трамп до Сиљановска Давкова за Денот на независноста appeared first on plusinfo.mk.

Нашите срца се скршени, благодарна сум на земјите од регионот за веднаш дадената помош, изјави американската амбасадорка во земјава Анџела Агелер, по потпишувањето во Книгата на жалост поради загинувањето на 59 лица во Кочани, отворена во Министерството за надворешни работи и надворешна трговија.

– Благодарна што денеска дојдов овде со мојот пријател амбасадорот на ЕУ Михалис Рокас. Ние ја понудивме сета можна помош, но ние сме далеку и благодарна сум повеќе земји од регионот реагираа многу брзо и понудија помош, и презедоа дел од повредените и понудија помош што им беше потребна во моментот. Ние немавме можност тоа да го понудиме бидејќи сме далеку, и затоа сум многу благодарна на моите колеги и нивните земји што го сторија тоа – изјави Агелер.

Претставникот на Светската здравствена организација (СЗО) во земјава Акиим Али, по потпишувањето во Книгата на жалост изрази сочувство до целата нација по повод трагичниот настан во Кочани, во кој животот го изгубија 59 лица, а 155 се повредени.

– Ова е навистина трагичен настан и во овој момент сè што можеме да направиме е да го изразиме нашето сочувство до целата нација, до заедниците и семејствата кои ги жалат оние кои ги изгубија, како и до оние кои се молат за брзо закрепнување на повредените пријатели и деца – рече Али.

Посочи дека како Светска здравствена организација нудат поддршка на кој било начин што можат да ја дадат во овој момент, како и за понатамошните потреби, штом имаат појасна претстава.

– СЗО стоеше и стои на располагање за земјата брзо и ефикасно да ја добие потребната поддршка и грижа за луѓето на кои им е потребна – рече Али.

The post „НАШИТЕ СРЦА СЕ СКРШЕНИ“ Агелер им се заблагодари на земјите од регионот за понудената помош appeared first on plusinfo.mk.

Американската амбасадорка Анџела Агелер упати сочувство до семејствата и најблиските на загинатите во пожарот во дискотека во Кочани.

„Срцето ми се кине утрово за многуте жртви во синоќешниот пожар во ноќен клуб во Кочани. Нашето најдлабоко сочувство го упатуваме до жртвите и нивните најблиски во ова ужасно време, а им посакуваме брзо закрепнување на повредените. Загубата на толку многу млади животи во една заедница е страшна трагедија“, наведува Агелер во објавата на фејсбук профилот на Амбасадата на САД во земјава.

Таа наведува дека ги понудила сите ресурси на Амбасадата и сета помош, на премиерот, и упатува молитви за сите оние кои страдаат денеска.

The post АГЕЛЕР ГИ ПОНУДИЛА СИТЕ РЕСУРСИ НА АМЕРИКАНСКАТА АМБАСАДА „Загубата на толку многу млади животи во една заедница е страшна трагедија“ appeared first on plusinfo.mk.

Kоментирајќи го случајот со одбиената американска виза на министерот за социјална политика, демографија и млади, Фатмир Лимани, премиерот Мицкоски порача да не се избрзува со заклучоци.

– Јас не би избрзувал со заклучоци поврзани со визата, да почекаме, што ако добие наскоро, тогаш што правиме, што ќе се случи?! Затоа да не брзаме, знаеме точно што правиме нема да направиме ниту милиметар спротивен од интересот на државата и граѓаните – изјави Мицкоски.

Американската амбасадорка Анџела Агелер вчера во врска со одбиеното барање за виза на министерот за социјална политика, демографија и млади Фатмир Лимани упати одговор да се бара кај самиот апликант, посочувајќи дека САД имаат строги закони за приватност и дека не може да коментира прашања поврзани за добивање на американска виза за ниту еден апликант.

– Имаме многу строги закони за приватност во Соединетите Американски Држави и затоа не можам да коментирам какви било прашања за виза за ниту еден поединец. Би ве упатила кај министерот да ви каже за тоа што се случило, но, исто така, ќе кажам дека секој апликант за американска виза, процесот за добивање на американска виза му се објаснува на поединецот, а доколку има нешто дополнително, тоа е исто така објаснето – рече Агелер.

The post ЗОШТО НА МИНИСТЕРОТ ЛИМАНИ МУ БИЛО ОДБИЕНО БАРАЊЕТО ЗА АМЕРИКАНСКА ВИЗА? Мицкоски вели да не се избрзува со заклучоци appeared first on plusinfo.mk.

Многу внимателно ги следиме процедурите во Собранието и изјавите во врска изгласаните интерпелации за петте членови на Судскиот совет, рече денеска амбасадорката на САД Анџела Агелер на свеченост во Центарот за обука на МВР во Идризово.

Во одговор на новинарско прашање во врска со тоа како ги коментира изгласаните интерпелации за петте членови на Судскиот совет, Агелер нагласи дека не може да ги коментира, но, најважно од сè е процесот да се следи на јасен и транспарентен начин.

– Јас не можам да ги коментирам. Многу внимателно ги следиме процедурите во Собранието и изјавите во врска со изгласаните интерпелации за петте членови на Судскиот совет. Она што е најважно за секој од овие случаи е да се следи на начин што е јасен и транспарентен за сите оние кои го набљудуваат – изјави амбасадорката Агелер.

The post САД ВНИМАТЕЛНО ГИ СЛЕДАТ ИНТЕРПЕЛАЦИИТЕ НА ЧЛЕНОВИ НА СУДСКИОТ СОВЕТ Амбасадорката Агелер апелира за транспарентност appeared first on plusinfo.mk.

Вашингтон не дава гаранции за вашиот пат кон Европската Унија, бидејќи ние не сме членка на Унијата, порача денеска во Скопје американската амбасадорка Анџела Агелер.

– Мислам дека за тоа се водат и се воделе разговори со високите претставници на ЕУ, но мило ми е што премиерот Христијан Мицкоски и членовите на неговиот кабинет се во Вашингтон. Фактот што тој е неколку пати таму откако ја презеде неговата позиција како премиер, исто како и многу други министри, само зборува за близината на нашите односи и на многу начини покажува дека ние како САД и Северна Македонија билатерално може да соработуваме. Очекувам таа соработка да биде зајакната –  рече Агелер во одговор на новинарско прашање на настанот за  примопредавање возило на Црвениот крст.

Прашана како ќе се одрази одлуката на претседателот Доналд Трамп за замрзнување на програмите на УСАИД рече дека сè уште не знае како тоа ќе влијае на идната американска поддршка на развојот на земјава.

– Ова е процес што е во тек и јас не знам како ќе се одрази на нашата идна поддршка на развојот. Сепак можам јавно и приватно да ѝкажам на Владата и на нашите партнери дека ние сме тука. САД не си одат и правиме фантастични партнерски настани каков што е денешниот, со примопредавањето на специјалното возило – рече Агелер.

Таа рече и дека САД внимателно ги следат случувањата во правосудниот систем, конкретно владниниот предлог за разрешување на републичкиот јавен обвинител Љупчо Коцевски, но и поднесените интерпелации од страна на пратеничките групи на ВМРО-ДПМНЕ, Вреди и ЗНАМ до Собранието за петмина членови на Судскиот совет.

– Немам коментар, запознаена сум и го следиме процесот. Според моите сознанија во тек е процесот согласно законските процедури и одблиску го следиме – одговори кусо Агелер.

Во врска со случувањата во Судскиот совет, исто така, кусо одговори дека одблиску го следат и тој процес.

– Очигледно со години посочуваме во однос на Судскиот совет, но и за други аспекти на правосудниот систем. Постојат законски процедури и тој процес е во тек. Одблиску ги следиме состојбите и сакаме да видиме дека законот се почитува – рече американската амбасадорка.

The post НА АГЕЛЕР Ѝ Е МИЛО ШТО МИЦКОСКИ ЧЕСТО Е ВО ВАШИНГТОН Стратешкиот не може да ни гарантира за патот кон ЕУ, ама патот до Америка сме го откриле appeared first on plusinfo.mk.

Aмбасадорката на САД во државава Анџела Агелер, во одговор на новинарско прашање за поранешниот вицепремиер Артан Груби, кој како осомничен за случајот „Државна лотарија“ е во бегство, денеска изјави дека нема коменетар во однос на тоа што се случува со Груби, но порача оти е важно луѓето да бидат повикани на одговорност за нивните дела.

– Немам коментар во однос на тоа што се случува со Артан Груби. Не знам каде се наоѓа. Сметам дека е важно луѓето да бидат повикани на одговорност за нивните дела и се надевам дека тој (Груби) е еден од нив – изјави Агелер, која учествуваше во Претпразничната чајанка во ЈП „Лајка“.

Во однос на процедурата за разрешување на членови на Судски совет што се избираат во Собранието, исто така истакна дека треба да постои одговорност но и процесот треба да биде транспарентен.

Мислам дека јас и Амбасадата бевме многу јасни во однос на нашиот став за Судскиот совет и другите институции во рамките на правосудството. Повторно ќе кажам, треба да постои одговорност но и процесот треба да биде транспарентен, со цел граѓаните да разберат што се случува и зошто, рече Агелер.

The post ВАЖНО Е ЛУЃЕТО ДА БИДАТ ПОВИКАНИ НА ОДГОВОРНОСТ ЗА НИВНИТЕ ДЕЛА Агелер за бегството на Груби appeared first on plusinfo.mk.

Aмбасадорката на Соединетите Американски Држави, Анџела Агелер, немаше коментар по почнатите истраги и обвиненија кои се поведени против двајцата функционери откако нејзината земја ги стави на т.н црна листа како осомничени за корупција.

На 9 декември Стејт департментот јавно ги назначи Артан Груби и Енвер Беџети за нивна вмешаност во значителна корупција преку примање мито за поткопување судски процеси.

Два дена подоцна, Обвинителството отвори предмет за двајцата поради обвинувањата за трговија со влијание и значителна корупција.

– Не можам. Јас не сум дел од ниту еден од внатрешните истражни процеси во оваа земја – рече денеска Агелер на прашањето дали може да ја коментира истрагата што започна по ставањето на двајцата функционери на „црната листа“ на Стејт Департментот.

На новинарско прашање дали ќе помогнат САД за прашањето помеѓу Северна Македонија и Бугарија, Агелер рече дека ќе го повтори веќе искажаниот став.

– Ние не сме дел од ЕУ. И затоа ние не сме дел од многу од тие дискусии. Но, ќе го кажам она што го кажавме претходно во Вашингтон и овде во Скопје, а исто така и мојот пријател во Софија, нашиот амбасадор Мартин таму, многу би сакале да ја видиме Северна Македонија во Европската Унија и се надеваме дека нивните дискусии ќе бидат успешни и плодни. Затоа што просперитетната, успешната, сигурната иднина на оваа земја е во рамките на Европската Унија. Таа е во срцето на Европа. И затоа таму припаѓа – рече Агелер.

Амбасадорката во Тетово дојде на Универзитетот на Југоисточна Европа за да одржи предавање пред студентите.

ЌЕ СЕ ВРАТИ ВО МАКЕДОНИЈА, АМА ВО „ШУТКА“ ДА НЕ ОДИ Груби ангажирал адвокат

The post НЕ МОЖАМ, НЕ СУМ ДЕЛ ОД ВНАТРЕШНИТЕ ИСТРАЖНИ ОРГАНИ Агелер одби да ја коментира ситуацијата со Груби appeared first on plusinfo.mk.

Редно е македонската јавност да слушне објаснувања, а веројатно и извинувања, од актерите на една многу грда приказна од нашата понова политичка историја, за која до скоро се шепотеше со половина уста, но сега веќе се зборува отворено и јавно. Во едно цивилизирано и демократско општество, какво што Македонија сака да биде, ваквите скандали мора да завршуваат со преземање морална, политичка, а кога е тоа неопходно и – законска одговорност.

Станува збор за тајната средба кај претседателот Стево Пендаровски, одржана во март 2023 година, на која шефот на државата, тогашниот премиер Димитар Ковачевски, Али Ахмети, Артан Груби, Бујар Османи и Бојан Маричиќ договарале како да го вратат осудениот и избеган поранешен премиер Никола Груевски од Унгарија во Македонија. Во својата последна објава, неделникот „Фокус“ ги именува и двајцата моќни западни амбасадори кои биле на средбата – американската амбасадорка Анџела Агелер и тогашниот амбасадор на Европската унија, Дејвид Гир.

Кога молкот зборуваше посилно од штурите изјави…

Јас за оваа средба прв пат пишував на 16 мај 2023 година:

„Наводно, кон крајот на април, за време на прославите на деновите на НАТО, на една средба ‘од нога’ меѓу луѓе од државниот врв, на претседателот Стево Пендаровски му било предложено да размисли за можноста Никола Груевски и некои други лица да бидат ‘амнестирани’, што би ‘помогнало’ во обезбедувањето на потребните гласови од пратеничката група на ВМРО-ДПМНЕ за изгласување на уставните измени“.

Во тој текст не ги соопштив имињата на другите присутни на средбата (одржана сепак во март, а не во април 2023 година), бидејќи немав потврда. Но, интересно е дека тогаш побарав и веднаш добив изјава од Груевски, кој рече:

„Немам информации за некакви притисоци било кому, ниту од некого сум барал такво нешто. Не се подготвувам за враќање во Македонија, од причина што политичкиот прогон на власта сѐ уште трае со ист интензитет како пред околу шест години. Никој не барал од мене да ослабнам нечии позиции за било кое прашање, ниту би прифатил некој да води таков тип на дискусија со мене“.

НИКОЈ НЕ БАРАЛ ОД ГРУЕВСКИ ДА ГО СКРШИ ОТПОРОТ НА ВМРО-ДПМНЕ ПРОТИВ УСТАВНИТЕ ИЗМЕНИ „Не би прифатил некој да води таков тип дискусија со мене“, вели поранешниот премиер

Освен партијата ДУИ, сите други лица инволвирани во оваа средба и во поширокиот план за враќање на Груевски во Македонија, тогаш ја одмолчаа оваа информација. Јас се повикав на неименувани извори, кои тврдеа дека Пендаровски енергично ја одбил таквата можност.

Втор пат за оваа средба пишував во напис во Плусинфо за битката на Зоран Заев со раководството на СДСМ. Написот беше објавен на 7 ноември 2023 година и во него, меѓу другото, се вели:

„Реакцијата на Заев несомнено значително ја ‘поскапела’ операцијата за враќање на Никола Груевски во земјата. Особено што таа доаѓа после еден сериозен гаф на првата неформална средба на која лидерот на ДУИ, Али Ахмети, пред претседателот Стево Пендаровски, пред премиерот Ковачевски и пред други лица и ја промовирал својата иницијатива за амнестија на Груевски и за негово враќање во земјата. Се зборува дека деталите од таа средба, на која присуствувале и двајца влијателни амбасадори на земји од Запад, протекле во политичките кулоари на еден несекојдневен и скандалозен начин. За своите сознанија за тој гаф, Плусинфо ќе ја извести јавноста кога ќе ги потврди деталите“.

„БЕРЕТЕ УМ, ЌЕ МУ КАЖАМ НА НАРОДОТ ШТО ПРАВИТЕ!“ Плусинфо ексклузивно открива детали за разговорите на Заев со Ковачевски и со Зечевиќ за планот за враќање на Груевски

„Фокус“ ги откри имињата на двајцата западни амбасадори

Капак на ова стави неделникот „Фокус“, во статија, во која, меѓу другото, се вели:

„На оваа средба, одржана лани во март, присуствувале Стево Пендаровски, Димитар Ковачевски, Али Ахмети, Бојан Маричиќ, Артан Груби, Бујар Османи, Анџела Агелер и Дејвид Гир. Притоа, Ахмети посочил дека Груевски може да се врати на два начина – преку помилување од претседателот или преку судовите. Всушност, ова бил најсензитивниот дел на средбата, кој бил пробиен од страна на рамковно вработен административец. Додека траеле ‘тајните’ разговори, ова лице влегло во кабина на преведувач, успеало да го сними разговорот со телефон и на крајот снимката му ја предава на Блерим Беџети, кој тогаш е дел од ‘огнената група’ во ДУИ. На тој начин, содржината од аудио-снимката, претходно симната на хартија, завршува во раце на Христијан Мицкоски, бидејќи во тоа време ‘огнените’ се во конфликт со Груби, Османи, па и со Ахмети. Откако Пендаровски одбива да го помилува Груевски, а Ковачевски на средба со Ентони Блинкен во САД вели дека без нивна помош не може да се истуркаат уставните измени, од амбасадата на САД излегува нон-пејпер, кој, меѓу другото, предвидува активирање делови од поранешното раководство на ВМРО-ДПМНЕ. Иако не бил конкретно споменат, очигледно се алудирало на Груевски, поради кој практично се донесени измените на Кривичниот законик, со цел да се охрабри да почне да дејствува уште од Будимпешта. Меѓутоа, тој барал целосно чиста ситуација за да може да се врати во земјава, по што ДУИ почнува да ја турка амнестијата на Ѓорге Иванов преку Врховниот суд. Сепак, интегративците прават лоша проценка дека ќе придобијат доволен број врховни судии, па целата работа почнува да се компликува и да излегува од контрола и на крајот операцијата пропаѓа, а своја улога и придонес за тоа имале и Зоран Заев и Виктор Орбан…“

Присутните на средбата да дозволат да го видиме транскриптот

Што можеме да заклучиме од сите овие написи? Најмалку пет работи:

Прво, познати се имињата на сите учесници на средбата на која се разговарало за можното помилување или амнестија на Груевски и за неговото враќање во земјата. Никој од спомнатите досега не демантирал дека бил на средбата.

Второ, јавно се соопштени имињата на двајцата моќни западни амбасадори – Анџела Агелер и Дејвид Гир – кои биле на средбата.

Трето, поголем дел од актерите молчат за тоа што било кажано на средбата и за поширокиот план за враќање на Груевски во земјата. Ако не се огласат, јавноста молкот ќе го прифати како потврда на шпекулациите.

Четврто, неспорно е дека постоела скандалозна идеја за враќање на Груевски во земјата, со цел да се поткопаат позициите на ВМРО-ДПМНЕ, не само заради уставните измени, туку и поради очекуваниот триумф на Христијан Мицкоски на претстојните избори.

И петто, постојат снимка и транскрипт од оваа средба.

Како да се затвори скандалот?

Ова го очекувам од домашните актери на скандалот:

Прво, предлагам сите присутни на средбата со посебни изјави да одобрат снимката и транскриптот јавно да се објават. Јавниот интерес во овој случај е неспорен.

Второ, очекувам тогашниот претседател Пендаровски, како домаќин на средбата, значи во ролјата која носела посебна одговорност, јавно и детално да објасни за што се разговарало, да го потврди списокот на присутните и да соопшти која била неговата позиција.

Трето, очекувам тогашниот премиер Димитар Ковачевски да објасни која била неговата позиција на таа средба и дали е вистина тврдењето дека од Блинкен барал американска помош за да се протуркаат уставните промени.

Посебни прашања за амбасадорите Агелер и Гир

Посебни прашања имам и за актуелната американска амбасадорка на САД Анџела Агелер и за тогашниот амбасадор на ЕУ, Дејвид Гир:

Прво, би сакал објаснување врз основа на кои делови од Виенската конвенција за дипломатски односи, клучен документ за дипломатското право, амбасадорите Агелер и Гир биле присутни и учествувале на средба на која се договарала една таква скандалозна операција поврзана со внатрешните политички односи во Македонија.

Второ, би сакал амбасадорката Агелер и амбасадорот Гир јавно да соопштат какви биле нивните ставови за идејата за амнестија или за помилување на Груевски заради негово враќање во Македонија.

И трето, би сакал да слушнам коментар, посебно од амбасадорката Агелер – во која нормална демократска земја, членка на НАТО и кандидатка за членство во Европската унија, е дозволено локални политичари, заедно со водечки амбасадори, да разговараат за спроведување на своевиден политички пуч, заради промена на Уставот и заради слабеење на опозицијата?

Јавноста има право да знае!

Нека биде транспарентно!

The post До кога ќе молчат Пендаровски, Ковачевски, Агелер и Гир за средбата на која се договарало враќање на Груевски во земјата? appeared first on plusinfo.mk.