Семејството на претседателот на САД Доналд Трамп заработило најмалку 2,3 милијарди долари од криптовалутни проекти што ги промовирало по изборите во 2024 година, покажува истражување на Ројтерс. Според агенцијата, повеќе од 1 милион инвеститори истовремено забележале нето-загуби од приближно ист износ. Наодите се темелат на анализа на блокчејн записи, корпоративни документи и јавни изјави.

Ројтерс навел дека истражувањето било разгледано од повеќе од 10 експерти за сметководство и криптовалути. Тие ги оцениле проценките како разумни. Агенцијата разговарала и со претставници од криптоиндустријата.

Токени растеле, инвеститорите губеле

Во центарот на истрагата се четири проекти. Тоа се „Ворлд либерти фајненшл“, мем-криптовалутата „$TRUMP“, „Американ биткоин“ и „АИ фајненшл корп“.

Според Ројтерс, моделот бил сличен кај сите проекти. Семејството Трамп вложувало малку или воопшто не вложувало сопствени средства. Потоа ги промовирало проектите преку своето име и политичко влијание. Добивката останувала кај промоторите. Малите инвеститори често останувале со загуби.

Ројтерс го издвојува примерот на 29-годишната Фатима Елргдави од Санта Барбара. Таа во јануари 2025 година вложила 2.000 долари во „$TRUMP“. До крајот на мај вредноста на инвестицијата паднала на помалку од 120 долари.

Најголемиот профит доаѓал од еден проект

Најголема заработка, според истражувањето, донел проектот „Ворлд либерти фајненшл“. Компанијата почнала да продава токени во октомври 2024 година. Меѓу главните промотори биле Ерик Трамп и Доналд Трамп Помладиот.

Ројтерс проценува дека преку договор за лиценцирање на името Трамп, повеќе од 1,6 милијарди долари завршиле кај субјект поврзан со семејството. Загубите на инвеститорите во овој проект се проценуваат на околу 674 милиони долари.

Мем-криптовалутата „$TRUMP“ наводно донела околу 616 милиони долари за семејството Трамп. Истовремено, инвеститорите изгубиле повеќе од 700 милиони долари. Според агенцијата, токенот изгубил 97 % од вредноста во однос на врвот достигнат во јануари 2025 година.

Судир на интереси или легален бизнис?

Осум експерти за владина етика изјавиле за Ројтерс дека ваквото збогатување отвора сериозни прашања за можен судир на интереси. Според нив, станува збор за ситуација без преседан во современата американска историја.

Белата куќа не ги коментирала директно наодите. Портпаролката Ана Кели изјавила дека сите постапки на претседателот и на неговата администрација се преземаат во интерес на американскиот народ.

Од Белата куќа ги отфрлиле оценките за судир на интереси. Порачале дека ниту претседателот ниту неговото семејство не се впуштиле, ниту ќе се впуштат во такви активности.

Поранешниот министер за трговија Вилбур Рос застанал во одбрана на семејството Трамп. Тој изјавил дека политичарите и нивните семејства имаат право да заработуваат, додавајќи дека инвеститорите во шпекулативни средства мора да бидат свесни за ризиците.

The post ТРАМПОВИ ЗАРАБОТУВАЛЕ, ВЛОЖУВАЧИТЕ ВО КРИПТО ГУБЕЛЕ Над милион инвеститори останале со тенки џебови appeared first on plusinfo.mk.

Три месеци по заедничките американско-израелски напади врз Иран, односите меѓу Вашингтон и Тел Авив влегуваат во чувствителна фаза. Според анализа на Си-Ен-Ен, она што почнало како заедничка воена кампања сè повеќе се претвора во дипломатски процес во кој Израел има ограничено влијание.

Телевизијата наведува дека Нетанјаху зад затворени врати признал оти Израел нема голема моќ да влијае врз американско-иранските разговори за завршување на конфликтот.

Страв од „лош договор“

Според израелски функционер цитиран од Си-Ен-Ен, во Тел Авив постои загриженост дека Доналд Трамп би можел да прифати привремен договор кој нема да ги реши клучните прашања околу иранскиот збогатен ураниум, балистичките ракети и регионалните сојузници на Техеран.

– Постои вистински страв дека Трамп ќе се задоволи со лош привремен договор – изјавил функционерот.

Во анализата се наведува дека Израел посебно е загрижен поради можноста да се намали економскиот притисок врз Иран и да се отвори пат за закрепнување на режимот во Техеран.

„Така изгледа кога Трамп ве фрла под автобус“

Еден израелски извор уште подиректно ја опишал ситуацијата.

– Значи, така се чувствувате кога Трамп ве фрла под автобус – изјавил изворот за Си-Ен-Ен.

Според телевизијата, незадоволството во Израел е големо, но Нетанјаху избегнува отворен судир со Трамп бидејќи голем дел од својот политички капитал го вложил токму во односите со американскиот претседател.

Нема подобрување од војната во Газа?

Си-Ен-Ен потсетува дека Нетанјаху со децении се претставува како лидер кој најодлучно се спротивставува на нуклеарните амбиции на Иран. Затоа евентуален договор меѓу САД и Иран би можел да биде доживеан како тежок политички удар за него.

Анализата наведува и анкета според која 45 проценти од Израелците сметаат дека ситуацијата со Иран денес е полоша отколку пред нападот на Хамас на 7 октомври 2023 година, додека само 31 процент гледаат подобрување.

The post ДАЛИ ДОГОВОРОТ САД-ИРАН ЌЕ МУ ПРЕСУДИ НА НЕТАНЈАХУ? Си-Ен-Ен пишува за стравови во израелскиот врв appeared first on plusinfo.mk.

САД и Иран се поблиску до мировен договор, изјави претседателот на САД, Доналд Трамп. Тој рече дека Техеран се согласил ниту да развива, ниту да набавува нуклеарно оружје.

Во интервју за „Фокс њуз“, Трамп порача дека преговорите напредуваат, но предупреди дека воената опција останува на маса ако разговорите пропаднат.

– Би сакал да имаме договор, бидејќи можеме веднаш да го отвориме Ормускиот Теснец по потпишувањето. Единствената гаранција што ми треба е да нема нуклеарно оружје. Тие се согласија со тоа и тоа беше многу интересно – рече Трамп.

Тој додаде дека Иран прифатил да не дојде до нуклеарно оружје по ниту еден основ.

– Првично рекоа дека нема да развиваат нуклеарно оружје. Потоа прашав што ако го купат. Сега велат дека ниту ќе развиваат, ниту ќе купуваат оружје на каков било начин. Полека го добиваме тоа што го сакаме. Преговарачите се многу строги и потребно е време, но не брзам – изјави Трамп.

Воената опција останува на маса

Претседателот на САД рече дека очекува голем договор, но предупреди дека постои и друга можност.

– Ќе постигнеме голем договор. Во спротивно ќе се вратиме и ќе ги завршиме работите по воен пат – рече Трамп.

Сепак, тој нагласи дека повеќе би сакал дипломатско решение и избегнување на нова воена ескалација.

– Во суштина ја победивме нивната војска – додаде Трамп.

Трамп барал измени во договорот

Американскиот портал „Аксиос“, повикувајќи се на извори од администрацијата, објави дека Трамп побарал дополнителни измени во текстот на договорот што го подготвиле американските и иранските преговарачи.

Според информациите, една од забелешките се однесувала и на формулациите поврзани со отворањето на Ормускиот Теснец за меѓународниот бродски сообраќај.

The post „ПОЛЕКА ГО ДОБИВАМЕ ТОА ШТО ГО САКАМЕ“ Трамп најави договор, тврди дека Иран попушта appeared first on plusinfo.mk.

Долгогодишната соработничка на претседателот на САД Доналд Трамп, Натали Харп, според американските медиуми има клучна улога во неговата медиумска машинерија и во објавувањето на пораки на Truth Social.

Според „Волстрит журнал“, 34-годишната помошничка секојдневно собира реакции, коментари и снимки од екранот од поддржувачи на Трамп, а потоа му ги носи испечатени за преглед. Откако ќе добие одобрение, таа ги објавува на неговиот профил, често доцна навечер или за време на викенди и празници.

„Човечкиот печатач“ на Трамп

Натали стекнала репутација на една од најлојалните личности во кругот на Трамп. Според американските медиуми, таа дури носела лаптоп и печатач за физички да му покажува позитивни статии, пораки и реакции, поради што го добила прекарот „човечки печатач“.

– Таа ги држи сите во добро расположение, а најважно е што го држи претседателот во добро расположение – изјавил поранешниот лекар на Белата куќа, Рони Џексон.

Според извори за „Волстрит журнал“, Харп стоела и зад дел од најконтроверзните објави на Трамп, меѓу кои и фотографијата генерирана со вештачка интелигенција на која бил прикажан како Исус.

„Ти си сè што ми е важно“

Харп станала позната во конзервативните кругови по говорот на Републиканската конвенција во 2020 година, кога изјавила дека политиките на Трамп ѝ помогнале во борбата со рак на коски.

Во писма што, според американските медиуми, му ги испраќала на Трамп, таа го нарекувала свој „Старател и Заштитник“.

– Ти си сè што ми е важно – наводно напишала Харп во едно од писмата.

Во Белата куќа не сакаат да откриваат детали за начинот на кој функционира профилот на Трамп, но признаваат дека Truth Social е главниот канал преку кој претседателот на САД ги испраќа своите директни пораки до јавноста.

The post ЖЕНАТА ЗАД ЖЕСТОКИТЕ ОБЈАВИ НА ТРАМП Му носи реакции, а тој одлучува што ќе се објави appeared first on plusinfo.mk.

Претседателот на САД Доналд Трамп повторно ја разбранува јавноста со објава на социјалната мрежа Truth Social. Во графиконот наречен „Времетраење на војните“ конфликтот со Иран е опишан како кратка „екскурзија“.

„Леле. Проучете го овој графикон!“, напиша Трамп.

6 недели или повеќе од 9?

Во графиконот Трамп тврди дека „екскурзијата на Иран“ траела само 6 недели. Но конфликтот почна на 28 февруари, што значи дека до денес поминале повеќе од 9 недели.

Иако моментално има кревко примирје, американските сили и понатаму се во борбена готовност околу Иран.

„Брзо влегување, брзо излегување“

Трамп со месеци се обидува конфликтот да го претстави како брза и успешна операција.

На неодамнешен митинг во Пенсилванија тој изјави дека не станувало збор за војна, туку за „брзо влегување и излегување за да се исчисти нередот“.

Ормуз и натаму под блокада

И покрај пораките на Трамп, тензиите во регионот остануваат високи.

Ормускиот Теснец и натаму е под силен притисок, а поморската блокада продолжува да влијае врз светската трговија.

Некои аналитичари велат дека Трамп е под притисок и поради претстојните избори за Конгресот во САД наречени и меѓуизбори бидејќи се одржуваат на половина од претседателскиот мандат.

The post ЕКСКУРЗИЈАТА ВО ИРАН ТРАЕ САМО 6 НЕДЕЛИ?! Трамп го спореди конфликтот со војните во Виетнам, Авганистан… appeared first on plusinfo.mk.

Американското Министерство за финансии објави дека потписот на Доналд Трамп ќе стои на новите доларски банкноти. За првпат во историјата име на актуелен претседател се појавува на книжни пари.

Првите банкноти од 100 долари со новиот потпис ќе се печатат во јуни. Потоа ќе следуваат и другите апоени. Досегашната пракса налагаше на парите да стои само потпис на министерот за финансии.

Министерот Скот Бесент ја објасни одлуката како признание за „историските достигнувања“ на Трамп. Потегот доаѓа во време кога се засилуваат симболичките потези поврзани со неговото враќање во Белата куќа.

Во јавноста во САД веќе се отвори дебата. Дел ја поздравува одлуката. Дел предупредува дека ваквите чекори можат да создадат култ на личноста.

The post ЗА ПРВПАТ ВО ИСТОРИЈАТА НА ДОЛАРОТ Потписот на актуелниот шеф на САД ќе стои на банкнотите appeared first on plusinfo.mk.

Новинарите во Вашингтон речиси слободно го делат приватниот мобилен број на Доналд Трамп, тврди американскиот новинар Макс Тани. Тој решил да провери колку е навистина тешко да се добие телефонот на претседателот и открил дека му биле потребни само неколку минути.

„Најлошо чуваната тајна во Вашингтон“

Тани пишува дека идејата ја добил откако прочитал серија телефонски интервјуа со Трамп, дадени на новинари од различни медиуми.

„Почетокот на минатата недела, откако прочитав нешто што изгледаше како педесетто ‘ексклузивно’ телефонско интервју со Трамп, решив да го добијам бројот на претседателот и да го повикам“, напиша Тани за порталот „Semafor“.

Новинарот сакал да провери дали бројот е навистина тешко достапен.

„Брзо открив дека, како и многу други работи во ерата на измами, само затоа што нешто е на продажба не значи дека е тешко да се добие. Всушност, тоа е најлошо чуваната тајна во Вашингтон“, напиша тој.

Во вториот телефонски разговор додека ја подготвувал приказната, новинар кој ја следи американската политика му го понудил бројот без тој воопшто да го побара.

Во следниот разговор, друг новинар му го дал истиот број, со единствен услов да не го споделува понатаму. Ова, според Тани, покажува колку широко мобилниот број на Трамп се споделува меѓу новинарите.

„Често ги става новинарите на спикер“

Според анонимен функционер од Белата куќа, Трамп не ги сфаќа овие разговори премногу сериозно.

– Кога одговара, често е преокупиран. Ги става новинарите на спикер пред група луѓе и се забавува малку задевајќи ги – рече службеникот.

Според него, новинарите кои мислат дека прават голема работа со вакви повици често си прават „лоша услуга“.

Телефонската тактика на Трамп

Склоноста на Трамп кон директни разговори со новинари не е нова. Уште пред мобилните телефони, многу новинари во Њујорк го имале неговиот канцелариски број.

Дури и во првиот претседателски мандат, Трамп често се јавувал на телевизиски водители и новинари.

Неговиот приватен мобилен телефон станал пошироко достапен меѓу двата мандата, кога почнал да користи број од Флорида и почесто да комуницира со бизнисмени, политичари и новинари.

„Се тешев дека не сум пропуштил многу“

Откако го добил бројот, Тани решил да се јави. Тој избрал сабота попладне, кога претседателскиот распоред бил полесен. Се подготвил Трамп да одговори со кратко „Ало?“, како што му кажале колеги.

Но, претседателот не се јавил.

„Се тешев со мислата дека не сум пропуштил многу“, напиша Тани.

„Телефонот никогаш не престанува да ѕвони“

Мобилниот број на Трамп станал неформална „валута“ во Вашингтон.

Телефонот на претседателот речиси никогаш не престанува да ѕвони. Повиците пристигнуваат доцна навечер, додека гледа телевизија, или рано наутро кога објавува на социјалната мрежа Truth Social.

Во последните две недели, додека САД и Израел извршуваат воени операции во Иран, Трамп дал повеќе од 30 телефонски интервјуа.

Вреди ли да се има бројот на Трамп?

Некои новинари почнуваат отворено да ја критикуваат оваа практика. Ерик Шулц, поранешен функционер во администрацијата на Барак Обама, изјави дека е незамисливо толку многу новинари да го имаат приватниот број на претседател.

Тој го опиша Трамп како „мајстор за давање пристап во замена за поволно известување“, но додаде дека ваквите интервјуа немаат вистинска вредност.

– Која е крајната цел? Да се добие повик од претседателот или да се повика моќта на одговорност? – рече Шулц.

The post ГО ДОБИЛ БРОЈОТ НА ТРАМП ЗА НЕКОЛКУ МИНУТИ Шефот на САД не одбива повици, дал 30 интервјуа за 2 недели appeared first on plusinfo.mk.

Одлуката на американскиот претседател Доналд Трамп да ја разреши Кристи Ноем од функцијата секретарка за внатрешна безбедност предизвика бурни реакции во Вашингтон и отвори прашања за вистинските причини зад овој потег. Ноем важеше за една од најлојалните сојузнички на Трамп и за клучна фигура во спроведувањето на неговата тврдокорна политика кон имиграцијата. Нејзиното заминување од администрацијата многумина го толкуваат како знак дека Белата куќа сака да ја намали политичката штета од серијата контроверзии поврзани со нејзината работа.

„Беше време за промена“

Според повеќе американски медиуми, одлуката на Трамп дошла по недели силен политички притисок и по низа скандали кои постепено ја ослабнале позицијата на Ноем во администрацијата. Дел од критиките се однесуваат на начинот на кој Министерството за внатрешна безбедност ги спроведувало имиграциските операции, како и на управувањето со буџетот и со одредени чувствителни безбедносни операции.

„Беше време за промена. Претседателот сметаше дека Министерството мора да продолжи напред со ново раководство“, изјавил еден висок претставник на администрацијата за американските медиуми.

Иако Трамп јавно ѝ се заблагодари за работата, во политичките кругови се зборува дека Белата куќа била незадоволна од начинот на кој Ноем се справувала со кризите.

– Кристи направи многу за безбедноста на нашите граници. Но, администрацијата мора да остане фокусирана и ефикасна. – изјави Трамп во кратка изјава.

Ја разнишаа сослушувањата во Конгресот

Контроверзиите околу Ноем не се нови. Таа долго време беше симбол на најтврдата линија на републиканската политика кон мигрантите и често го бранеше агресивниот пристап на федералните служби. Критичарите, пак, ја обвинуваа дека токму тој пристап предизвикал сериозни политички и безбедносни проблеми.

Во последните месеци, нејзината позиција дополнително се разниша по жестоките сослушувања во Конгресот, каде што сенатори од двете партии поставуваа прашања за трошењето на средства и за одредени операции на федералните агенции. Еден демократски сенатор на тие сослушувања изјави дека „Министерството за внатрешна безбедност под водство на Ноем често изгледало како да работи без доволна политичка контрола“.

Дали беше во врска со Левандовски?

Покрај политичките критики, медиумите отворија и неколку лични контроверзии. Во јавноста се појавија информации за сомнителни патувања финансирани со јавни средства и за блиските врски на Ноем со политичкиот стратег Кори Левандовски – поранешен советник на Трамп. Иако Ноем ги отфрли овие обвинувања, скандалите дополнително го зголемија притисокот врз Белата куќа.

Кристи Ноем е една од најпознатите фигури на современата Републиканска партија. Таа беше гувернерка на сојузната држава Јужна Дакота и брзо се наметна како една од најверните политички сојузнички на Трамп. Во текот на неговите кампањи често се појавуваше како еден од најгласните бранители на неговата политика, а нејзиното име дури се споменуваше и како потенцијален кандидат за потпретседател.

Токму затоа, нејзиното разрешување од функцијата секретарка за внатрешна безбедност се смета за значаен политички сигнал. Ресорот што таа го водеше е еден од најмоќните во американската влада, бидејќи ги контролира граничната безбедност, имиграцијата, антитерористичките операции и агенции како „ICE“ и „FEMA“.

Во Вашингтон веќе се шпекулира дека Трамп сака да го стабилизира овој сектор пред новата политичка битка околу имиграцијата, која повторно станува една од централните теми во американската политика.

The post ЗОШТО ПАДНА НАЈМОЌНАТА ЖЕНА ВО ТИМОТ НА ТРАМП? Кристи Ноем требаше да биде потпретседателка, а не интимна пријателка на Левандовски appeared first on plusinfo.mk.

Иран изгубил голем дел од ракетниот арсенал и не е потребна копнена инвазија од страна на САД, изјави во телефонски интервјуа американскиот претседател Доналд Трамп.

Во интервју за телевизијата „Ен-Би-Си“, Трамп рече и дека САД сакаат целосна промена на раководството во Иран. Додаде дека во Вашингтон размислуваат за неколку можни кандидати.

– Сакаме да влеземе и да исчистиме сè – рече Трамп во телефонски разговор.

„Имаме неколку луѓе“

Американскиот претседател откри дека има луѓе кои, според него, би можеле да ја водат земјата. Сепак одби да открие имиња.

– Имаме неколку луѓе за кои мислам дека би биле одлични за работата – изјави Трамп.

Тој потврди дека се преземаат мерки за нивна безбедност. Според него тие лица треба да ја преживеат војната и да имаат улога во идниот политички поредок.

Во интервју за „Аксиос“ Трамп изјави дека сака да биде вклучен во изборот на нов лидер.

„Изгубија сè што можеше да се изгуби“

Американскиот претседател ја отфрли можноста за копнена операција. Изјавата беше реакција на коментарите на иранскиот министер за надворешни работи Абас Аракчи.

Иранскиот министер претходно тврдеше дека земјата е подготвена за копнена инвазија од страна на американските и израелските сили.

– Тоа е губење време. Тие изгубија сè. Ја изгубија морнарицата, изгубија сè што може да се изгуби – изјави Трамп.

Тој додаде дека темпото и интензитетот на нападите ќе продолжат.

Синот на Хамнеи или некој од Исламската гарда?

Политичката сцена во Иран е нестабилна. Причина е смртта на врховниот лидер Али Хамнеи минатиот викенд.

Се шпекулира дека неговиот син Моџтаба Хамнеи би можел да го наследи. Аналитичарите, пак, предупредуваат дека Корпусот на Исламската револуционерна гарда би можел да го зголеми влијанието.

„Не се плашам, пак ќе паднат цените на нафтата“

Трамп исто така изјави дека не е загрижен за зголемувањето на цените на бензинот во земјата поради војната со Иран.

– Немам никакви загрижености за тоа. Тие ќе паднат многу брзо кога ќе заврши ова, а ако се зголемат, нека се зголемат, но ова е многу поважно од мало зголемување на цените на бензинот – рече шефот на САС во интервју за Ројтерс.

Војната со Иран доведе до зголемување на цените на бензинот за околу 20 центи за галон, или за седум проценти за неколку дена.

Трамп додаде дека нема планови да ги користи Националните стратешки резерви на нафта, најголемите светски резерви за итни случаи складирани во подземни пештери за сол во Луизијана и Тексас.

„Би ја затворил владата поради тоа“

Покрај надворешната политика Трамп зборуваше и за домашните политички прашања. Тој го критикуваше Конгресот што не го усвоил Законот SAVE America.

Предлогот бара нови правила за регистрација на гласачи. Меѓу нив и доказ за американско државјанство.

– Јас би ја затворил владата поради тоа. За мене тоа е фундаментално верување – изјави Траот лидер

The post ИЗГУБИЈА СÈ, НЕМА ПОТРЕБА ОД КОПНЕНА ИНВАЗИЈА Трамп сака да бира нов лидер на Иран appeared first on plusinfo.mk.

Американскиот претседател Доналд Трамп ја отпушти министерката за внатрешна безбедност Кристи Ноем и најави дека за нејзин наследник ќе го номинира сенаторот од Оклахома Маркван Малин.

Трамп одлуката ја објави преку социјалните мрежи, само два дена откако Ноем се соочи со остри прашања за време на сослушување во Конгрес на САД, каде што ја критикуваа и републиканци и демократи.

И покрај разрешувањето од функцијата, Трамп најави дека Ноем ќе добие нова улога – специјален пратеник за иницијативата „Штитот на Америка“, нова стратешка безбедносна програма која, според него, ќе биде фокусирана на регионот на Западната хемисфера.

Со оваа одлука, Ноем станува првиот член на кабинетот што ја напушта функцијата во вториот мандат на Трамп.

Нејзиното заминување доаѓа по турбулентен период за Министерството за внатрешна безбедност, кога строгите мерки за спроведување на имиграциските закони предизвикаа протести и бројни тужби низ Соединетите Американски Држави.

The post ПОЛИТИЧКИ ЗЕМЈОТРЕС ВО ВАШИНГТОН Трамп ја отпушти министерката за внатрешна безбедност appeared first on plusinfo.mk.