Лидерот на опозициската Демократска унија за интеграција (ДУИ), Али Ахмети, изјави дека планира да се повлече од претседателската функција во партијата, која ја извршува веќе 24 години. Ахмети ја соопшти намерата за време на говорот на Изборното собрание на огранокот на ДУИ во Куманово, посочувајќи дека сака да им се приклучи на редовите на ветераните и политичкото делување да го продолжи во поинаква улога.

– Нема да останам засекогаш претседател на партијата. Сакам да се приклучам на ветераните и да видам како ќе се борам како ветеран – рече Ахмети пред партиските членови во Куманово.

Претседателот на ДУИ не прецизираше кога точно би се повлекол од лидерската позиција. Сепак, неговата изјава веднаш ги отвори прашањата за идното раководство на партијата и за можниот наследник на човекот кој ја предводи ДУИ од нејзиното формирање.

Ахмети во декември лани повторно беше избран за претседател на партијата. Тој е единствениот лидер што ДУИ го имала од основањето во 2002 година и е меѓу политичарите со најдолг лидерски стаж на македонската политичка сцена.

Во изминатиот период во локалните структури на партијата беа направени значителни кадровски промени, при што беа сменети повеќе од две третини од раководните позиции. Тоа во дел од јавноста се толкува како подготовка за генерациска транзиција и отворање простор за нови лица во партијата.

Партиите кои долго време се поврзуваат со еден доминантен лидер често се соочуваат со предизвици при преносот на влијанието врз нова генерација функционери. Затоа евентуалното повлекување на Ахмети би можело да претставува една од најзначајните промени во ДУИ од нејзиното основање.

Ахмети нагласи дека и по заминувањето од лидерската позиција нема целосно да се повлече од политиката, туку ќе продолжи да придонесува во политичките процеси како ветеран на албанската кауза.

Али Ахмети е една од највлијателните политички личности меѓу Албанците во Македонија во последните две и пол децении. Роден е во 1959 година во кичевското село Зајас, а пошироката јавност го запозна за време на конфликтот во 2001 година, кога беше политички лидер на Ослободителната национална армија (ОНА).

По завршувањето на конфликтот и потпишувањето на Охридскиот рамковен договор, Ахмети во 2002 година ја формираше Демократската унија за интеграција. Партијата брзо стана најсилна политичка сила меѓу Албанците во Македонија и во наредните години речиси континуирано беше дел од владејачките коалиции.

Иако никогаш не бил премиер или претседател на државата, Ахмети со години важеше за еден од највлијателните политички фактори во земјата. Под негово водство ДУИ беше партнер во влади предводени и од ВМРО-ДПМНЕ и од СДСМ, што дополнително ја зацврсти неговата политичка тежина.

Токму поради тоа, најавата за негово повлекување се смета за потенцијално историски момент за партијата, бидејќи првпат по повеќе од две децении се отвора прашањето кој ќе ја предводи ДУИ во периодот што следува.

The post АХМЕТИ НАЈАВИ ПОВЛЕКУВАЊЕ ОД ФУНКЦИЈАТА, ДУИ ПРЕД ИСПИТ Беше еден и единствен лидер на интегративците 24 години appeared first on plusinfo.mk.

ВМРО-ДПМНЕ на 17 јуни на стадионот во Струмица ќе го одбележи роденденот на партијата, а потоа ќе започнат разговорите за реконструкцијата на Владата, посочи денеска премиерот Христијан Мицкоски по пуштањето во употреба на Домот за стари лица „ПУСЗ Оаза by Adora“ во Општина Илинден. За најавите за парламентарни избори, рече дека ВМРО-ДПМНЕ сака редовни избори, но ако биде предизвикана ќе оди на избори пред рокот и ќе победи.

– Следната недела после роденденот којшто ќе биде на 17 јуни во Струмица со почеток од 20 часот на стадионот, после тоа почнуваме разговори со владините коалициони партнери околу реконструкцијата на Владата – изјави Мицкоски во одговор на новинарско прашање.

Коментирајќи ги тврдењата на опозициската СДСМ дека Владата оди на избори бидејќи ги потрошила државните парите и дека нема да бидат алиби за предвремени избори, премиерот Мицкоски рече дека тоа едното со другото немаат логика. Мицкоски истакна дека нивниот став е да нема предвремени избори, дека добиле мандат од граѓаните четири години и сакаат да одат на редовни парламентарни избори коишто ќе се случат пролетта 2028 година, но доколку се предизвикани мора да се подготвени, како и секоја сериозна политичка опција.

– Нема да се мешам во нивната стратегија. Само знам дека, зборувам политички, кога влегувате во втората половина од мандатот, логично е да сте подготвени за избори без разлика дали се тоа редовни или вонредни, на барање на опозицијата. Еве нашата опозиција не бара, нашата опозиција е сокриена, има три-четворица кои држат прес-конференции полни со невистини и навреди, најчесто кон мене. И сега кога имаат можност да се покажат на терен, да видат еве колку ефект имаат тие нивни невистини и навреди кон мене, тие едноставно бегаат. Тоа нема да биде првпат што го прави СДСМ. Тоа веќе во историјата многу пати го направила СДСМ – рече Мицкоски.

Премиерот додаде дека тие немаат намера да предизвикаат предвремни избори и дека нивната цел се редовни избори, но ако бидат, како што кажа, предизвикани тогаш ќе одат на избори и ќе победат.

За најавеното повлекување на Али Ахмети од лидерското место во ДУИ, Мицкоски рече дека не би сакал да коментира бидејќи тоа се внатрешни работи на партиите, исто како што не би сакал некој да ги коментира внатрешните работи во ВМРО-ДПМНЕ.

The post РЕКОНСТРУКЦИЈА НА ВЛАДАТА ПО 17 ЈУНИ, РОДЕНДЕНОТ НА ВМРО-ДПМНЕ Нема потреба од предвремени избори, освен ако СДСМ не побара appeared first on plusinfo.mk.

Против кого протестира Бујар Ахмети, против самиот себе или против својот чичко Али Ахмети, прашува Вреди преку соопштение.

„Денес политичката иронија го достигна врвот. Бујар Ахмети, внук на Али Ахмети, кој бил заменик-член во комисијата за полагање на правосудниот испит, испит што се одржува само на македонски јазик, беше забележан на протестот на студентите кои бараа можност истиот испит да го полагаат и на албански јазик. Затоа се поставува прашањето: против кого протестира Бујар Ахмети? Против самиот себе, како дел од системот што со години ја одржуваше оваа неправда? Или против својот чичко, Али Ахмети, кој повеќе од 22 години беше на власт и именуваше министри за правда кои не презедоа ниту еден чекор за решавање на ова прашање?“, прашува Вреди.

Оттаму велат дека на албанските студенти не им требаат фотографии и политички театар, туку конкретни решенија, кои ДУИ не ги обезбеди 22 години по ред.

Вреди оценува дека времето на политички манипулации со националните прашања е завршено и порачуваат дека правосудниот испит ќе може да се полага и на албански јазик.

The post БУЈАР АХМЕТИ ПРОТЕСТИРА ПРОТИВ СЕБЕ ИЛИ ПРОТИВ ЧИЧКОТО АЛИ АХМЕТИ? Бил заменик-член во комисијата за полагање правосуден испит appeared first on plusinfo.mk.

Катерина Коларевиќ, обвинителката која ја стопираше истрагата за случајот „Мазут“ тежок 167 милиони евра, според ВМРО-ДПМНЕ е дел од мрежа на блиски релации меѓу СДСМ, ДУИ и обвинителско-судскиот систем.

Дали Коларевиќ по насока на шефот на ОЈО ГОКК Ислам Абази и насока на Венко Филипче, Зоран Заев и Али Ахмети ја стопирала постапката, прашува ВМРО-ДПМНЕ.

Партијата обвинува дека таткото на Коларевиќ е еден од „семејните кадри“ унапредени во времето на СДСМ и ДУИ и дека унапредувањето е типична политичка номинација, а не професионален развој.

„Павле Марков, во 1998 година од тогашната влада на СДСМ е избран за државен правобранител, додека, пак, мајка ѝ Вера Маркова, во 2004 од коалицијата СДСМ и ДУИ е избрана за уставен судија“.

Понатаму во текстот се спомнува блискоста на Ислам Абази со шефот на ДУИ, Али Ахмети, како комшии во Зајас.

„За блискоста на Ислам Абази со Ахмети како комшија од Зајас, на кого според јавно достапни фотографии може да се види како на глава му седи неговиот брат Фекри Ахмети, сите знаат“.

ВМРО-ПМНЕ обвинува дека обвинителката Коларевиќ, блиска до СДСМ и ДУИ, добро знае дека во економскиот криминал или штета на државниот буџет, како што е случајот со ТЕЦ Неготино, се утврдува со економско вештачење, а не со изјави дадени од некомпетентни и неовластени лица вработени во ЕСМ.

„И од ЕСМ јасно потенцираа дека испитаните лица во постапката, не биле ниту одговорни, ниту компетентни лица да проценат штета и да утврдат економски криминал со набавката на мазутот.

Но, со скандалозната одлука за стопирање на истрагата за овој случај тежок 167 милиони евра за кој постојат силни индиции и сомнежи за перење пари и тендерски криминал, станува јасно дека решението на Абази и Коларевиќ не е поткрепено со правно-обвинителски аргументи, туку веројатно е добро подмачкано со прескапиот мазут“, соопшти ВМРО-ДПМНЕ.

Понатаму, ВМРО-ДПМНЕ прашува:

„Од овие прости причини се јавува потребата да се постави прашањето, дали поради тоа обвинителката Коларевиќ во случајот со мазутот тежок 167 милиони евра, не постапувала со главен мотив да ја открие вистината, туку за да го заташка, како што ја стопираше постапката, за од кривична одговорност да ги спаси Васко Ковачевски, Адријан Муча, Асмир Јахоски и другите блиски до Ахмети, Заев и Филипче“.

Оттука ВМРО-ДПМНЕ го тврди следното:

„Или подиректно, дали Коларевиќ како обвинителка поради свои интереси и по насоки од блискиот до ДУИ, Ислам Абази, кои доаѓаат директно од врхушката на СДСМ и ДУИ, односно од Ахмети, Заев и Филипче, ја сопре постапката за овој случај вреден 167 милиони евра?

Очекуваме одговори, затоа што јавноста има право и заслужува да ја знае целата вистина, додека Советот на јавни обвинители има обврска да го истражи работењето и постапувањето и на Абази и на Коларевиќ.

За да се воспостави правна држава и да се врати довербата на граѓаните во правосудството, која сега е минорни 2%, потребно е и обвинителите да подлежат на професионална, дисциплинска и кривична одговорност, доколку се докаже нивно противправно делување.

Македонија заслужува правда и одговорност“,

The post ИСПЛИВА „СЕМЕЈНАТА“ ВРСКА НА СДСМ И КОЛАРЕВИЌ Дали „Мазут“ е стопиран по налог на Абази, СДСМ и на ДУИ? appeared first on plusinfo.mk.

Имаме сведоштва од обвинители и судии дека Зоран Заев, Радмила Шеќеринска и Оливер Спасовски биле тие кои кажувале кој ќе се гони, а кој не, а телефонски повик меѓу раководители на институции не е криминал – оцени ВМРО-ДПМНЕ во соопштение.

„Обвинителката Лејла Кадриу од поранешното СЈО, јавно сведочеше дека Зоран Заев и Радмила Шеќеринска, оделе навечер во тогашните канцеларии на СЈО, и на обвинителите Ленче Ристовска, Гаврил Бубевски, Фатиме Фетаи и Лиле Стефанова им диктирале кој предмет да се работи, кој не, и кој поединец да биде опфатен со одреден предмет, а кој да биде изземен од политичкиот прогон кој го извршуваа, благодарение на Катица Јанева.

Поранешен судија на Врховниот суд, Ристо Катевеновски јавно изјави дека бил разрешен откако не дал позитивно мислење за случајот со Мерцедесот и Гордана Јанкуловска, утредента на вонредна седница на Судски совет, веќе бил разрешен од функцијата. Во кратки црти, Катевеновски бил разрешен затоа што не постапил по политичка директива.

Да не ја заборавиме и Добрила Кацарска, која делуваше по насоки на Заев, за што и стана Уставен судија, и за Вилма Русковска од обвинителството, која по насока на Заев бараше 200 години затвор за уставобранителите, за дело кое не соодвествува со реалноста. Тогаш СДСМ молчеше и не ги осудуваше тие случувања.

Сега СДСМ реагира за телефонски разговор помеѓу претседател на Влада и државен јавен обвинител. Што е тука криминал, ако премиер побара да се информира за скандалот со ослободување од одговорност за милионски криминал во ТЕЦ Неготино? Вака, СДСМ директно се вклучува во одбрана на Васко Ковачевски кој е ослободен во бегство од политичкото обвинителство водено од Ислам Абази, кадарот на Али Ахмети, Зоран Заев и Венко Филипче“ – пишува ВМРО-ДПМНЕ.

The post ИМАМЕ СВЕДОШТВА ДЕКА ЗАЕВ, ШЕКЕРИНСКА И СПАСОВСКИ НАРАЧУВАЛЕ КРИВИЧЕН ПРОГОН Телефонски повик меѓу раководители на институции не е криминал appeared first on plusinfo.mk.

Обединувањето на 5 партии во ВРЕДИ е историско достигнување и нова епоха за еднаквост за Албанците, соопшти партијата велејќи дека ја разбира паниката кај опозициската ДУИ.

„На 9 мај се потврди спротивното од она што се пропагираше две години: ВРЕДИ не само што не се распадна, туку се обедини во единствен политички субјект. Пет партии во заедничка структура претставуваат историско достигнување и нова, поконсолидирана политичка сила“, соопшт ВРЕДИ.

Партијата вели дека  обидите на лидерот на ДУИ, Али Ахмети, за обединување на партиите од таканаречената коалиција НАИ во единствен политички субјект, пропаднаа уште на самиот почеток, соочени со јасно одбивање од неговите политички партнери.

Според ВРЕДИ, тоа е уште еден показател за внатрешната криза во блокот на ДУИ.

„Од една страна е ВРЕДИ, со јасна визија за реформи и развој; од друга страна е ДУИ, нереформирана и оптоварена со скандали. Оваа спротивставеност меѓу новото и старото ќе го одреди правецот на политичкото претставување на Албанците.

Централната точка на ВРЕДИ е Албанецот во Северна Македонија: достоинствен, еднаков и институционално силен. Нашата заложба е за реална застапеност во сите институции и еднаквост што ќе се чувствува во пракса, а не само на хартија.

ВРЕДИ ќе обезбеди правата на Албанците да не бидат симболични или предмет на дневно-политички пазарења. Државата ќе преземе мерки за целосна примена на јазикот, правичната застапеност и еднаков пристап во секоја институција, со што ќе се гарантира праведен и функционален систем за сите“, соопшти консолидираната ВРЕДИ.

The post НОВА ЕПОХА ЗА ЕДНАКВОСТ ЗА АЛБАНЦИТЕ Вреди се обедини, Ахмети не успеа со коалицијата НАИ appeared first on plusinfo.mk.

Претседателот на Движењето ЗНАМ и актуелен градоначалник на Куманово, Максим Димитриевски, во своето гостување во „Топ Тема“ на Телма ја отвори темата која, како што посочи, со години останува без јасни одговори и е обвиена со политички молк, дилеми и недоследности околу процесите поврзани со екстрадицијата на Никола Груевски.

– Во јавноста, наместо целосна транспарентност и институционална доследност, со години се менуваат ставови, се оставаат недоречени ситуации и се отвора простор за сомнежи околу начинот на кој се воделе клучни политичко-правни процеси – вели Димитриевски.

Лидерот на ЗНАМ истканува дека се поставува прашањето дали во кабинетот на поранешниот претседател Стево Пендаровски, во присуство на Димитар Ковачевски, Али Ахмети, Артан Груби и други претставници на СДСМ се разговарало за сценарија поврзани со враќањето на Никола Груевски во Република Македонија во замена за негова амнестија.

– И дали постојат записи или стенограми од тие средби, кои се кријат од јавноста? Дали помеѓу СДСМ и ДУИ постоеле политички договори за законски измени во Кривичниот законик, по барање на Груевски? Дали сето тоа е нотирано на фамозното УСБ стикче кое патувало на релација Будимпешта-Скопје?

Дополнително, вели Димитриевски, останува отворено прашањето за самото заминување на Груевски од државата и дали за тој институционален пропуст е утврдена конкретна одговорност, имајќи ги предвид тогашните надлежности на властите предводени од СДСМ.

Според лидерот на ЗНАМ, наместо целосно расчистување, јавноста со години сведочи на политички дефокус, обвинувања и недоречени објаснувања, додека суштинските прашања остануваат без конечен одговор.

ЗНАМ соопшти дека не прифаќа политика на фиоки, ниту правда што се темели на селективност.

„Доколку постојат материјали, тие не смеат да останат затворени. Вистината не е сопственост на поединци, туку право на граѓаните“, соопшти партијата.

The post ДАЛИ ВО ВРЕМЕТО НА СДСМ СЕ ПРАВЕЛЕ СЦЕНАРИЈА ЗА ВРАЌАЊЕ НА ГРУЕВСКИ? Димитриевски бара да се отворат картите appeared first on plusinfo.mk.

Коалицијата ВЛЕН излезе со остри обвинувања кон ДУИ, оценувајќи дека партијата останала „заглавена во 2008 година“ и дека повторно се служи со, како што велат, застарена политичка реторика во обид да се врати на власт.

Во реакцијата, ВЛЕН наведува дека ДУИ се претставува како единствен заштитник на политичките и демократските права на Албанците, но во суштина, според нив, работи исклучиво за зачувување на власта и функционерските позиции.

Од коалицијата додаваат дека ваквото однесување е доказ дека ДУИ зад себе оставила „половични решенија, недовршени закони и нерешени прашања“, оценувајќи дека партијата со години нудела популистички пораки наместо конкретни резултати.

Во истата реакција, ВЛЕН се осврнува и на лидерот на ДУИ, Али Ахмети, при што се наведува дека аферата „Соравија“ и други скандали, според нивните тврдења, покажуваат дека „личниот интерес и парите му се поважни од националните прашања“.

The post ДУИ СЕ ЗАГЛАВЕНИ ВО 2008 И ОПСЕДНАТИ ЗА ВЛАСТ Жестока порака од ВЛЕН до паријата на Ахмети appeared first on plusinfo.mk.

Али Ахмети преку медиумите си пишува писма сам на себе за албанскиот јазик, но молчи за фактот дека купил зграда од 5 ката во центарот на Тетово со површина од 1.200 квадратни метри, пишуваат во денешното соопштение од Вреди.

Од коалицијата велат дека одамна предупредуваат дека зад лажната грижа на ДУИ за правата на Албанците всушност се кријат тесно партиски интереси за богатење на партискиот врв.

-Бидејќи Али Ахмети се занимавал со „купи-продај” немал време системски и трајно да ги решава прашањата од суштинска важност за Албанците. Затоа, во наследство ни остави половични и недоречени акти кои сега сака да ги подметне како кукавички јајца – велат од Вреди.

Но, додаваат од коалицијата, доаѓа времето за одговорност, а јавноста очекува одговори.

-Дали новиот имот на ДУИ на атрактивна локација во центарот на Тетово бил во сопственост на Телеком?
Дали е точно дека овој имот прво е префрлен на подобно физичко лице со кое ДУИ после склучува договор за купопродажба? Каква врска има овој имот со аферата Маѓар Телеком? -велат од Вреди.

Оттаму потсетуваат дека поранешните директори на Телеком во 2017 пред Окружниот суд во Њујорк признаа вина дека платиле мито од 5 милиони евра на политичари од владината коалиција на СДСМ и ДУИ во 2007 за да ја одложат либерализацијата на телекомуникацискиот сектор. Во оваа постапка пред Окружниот Суд во Њујорк беа споменати имињата на Али Ахмети, Муса Џафери и Абдулахим Касами.

– Нема повеќе простор Али Ахмети да глуми жртва. Митовите за него се рушат како кула од карти – велат од Вреди.

The post КОГО ЗАМАЈУВА АЛИ АХМЕТИ? Вреди го прашува како ДУИ ја платила зградата од 1.200 квадрати во Тетово appeared first on plusinfo.mk.

Изјавата на премиерот Христијан Мицкоски во Собранието, во врска со употребата на албанскиот јазик, претставува еден од најзагрижувачките моменти во политичкиот дискурс од потпишувањето на Охридскиот мировен договор, соопшти Демократската унија за интеграција на Али Ахмети.

„Тврдењето дека албанскиот јазик може да се користи „колку сакате“, но дека службен јазик е македонскиот, не е само политичка изјава, тоа е директно враќање на логиката на Уставот од 1991 година и тогашниот член 7, игнорирајќи го Амандманот 5 од 2001 година, кој претставува темел на уставниот поредок и на меѓуетничката рамнотежа во државата. Овој став ја нарушува суштината на Охридскиот договор, кој не е симболичен компромис, туку реална архитектура на соживот, изградена токму за да ги надмине изворите на конфликт што ги создаде Уставот од 1991 година“, соопшти ДУИ.

Релативизирањето на статусот на албанскиот јазик не е прашање на толкување, туку отворање опасен пат што директно ги засега меѓуетничките односи и функционалноста на нашата мултиетничка демократија, се додава во соопштението.

„Овој пристап претставува чекор назад и обид за ревизија на темелните достигнувања на државата, инспириран од логики што се во спротивност со концептот на мултиетничка и демократска држава. Го повикуваме Премиерот веднаш да се повлече од оваа позиција и целосно да го почитува уставниот поредок произлезен од Охридскиот договор. Секое отстапување од овој поредок не е само политичка грешка, тоа е удар врз самите темели на соживотот и функционалноста на државата“, се вели во соопштението на ДУИ.

The post ИЗЈАВАТА НА ПРЕМИЕРОТ ЗА АЛБАНСКИОТ ЈАЗИК, СПОРЕД ДУИ, Е ЗАГРИЖУВАЧКА „Отворање опасен пат што директно ги засега меѓуетничките односи“ appeared first on plusinfo.mk.