Во моментов има повеќе од 900 лица на кои им се изречени пробациски мерки, а системот има капацитет да опфати уште многу повеќе, нагласија учесниците на работниот состанок на тема „Пробација и условен отпуст“, кој се одржа денеска во Академијата за судии и јавни обвинители „Павел Шатев“ во Скопје.

Директорот на Управата за извршување санкции Александар Пандов посочи дека пробацијата во Македонија постои веќе шест години, но не се користи доволно.

– Таа живее, меѓутоа има многу поголем капацитет и многу почесто и подолги треба да бидат тие условни отпусти. Бројките покажуваат дека низ македонските судови има 430 осудени лица со А третман и 330-340 со Б2 третман. Не велам дека сите треба, но, најголем дел од тие осудени лица можат да бидат на условен отпуст. Нормално, претходно со препорака од секторот за ресоцијализација во затворите и од директорите на македонските затвори – рече Пандов.

Тој го нагласи и економскиот аспект на проблемот.

– Еден осуденик месечно не чини околу 1.000 евра. Одговорно тврдам дека не е мал бројот од овие 750 луѓе што нас нѐ чинат како општество. Одат таму и се однесуваат како во хотел, ги храниме, ги чуваме. Земаат човечки ресурси, ангажирани се луѓето од ресоцијализација, а исто така и од затворската полиција – рече тој.

Директорот Пандов посочи дека соработката со невладини организации е активна, а пробациските мерки се следат според видот на делото – од домашно насилство до злоупотреба на наркотични средства. Тој информираше дека има над 100 барања за прекин на пробацијата кои најчесто се поради непочитување на препораките од страна на осудениците.

Претседателот на Судскиот совет, Александар Камбовски, ја истакна важноста на ресоцијализацијата.

– Со овој чекор правиме една позитивна работа во промовирање на условниот отпуст и пробацијата која што е подолг период во нашата држава согласно законските прописи. Целта на казнувањето не е секогаш казната сама по себе, туку и ресоцијализацијата и рехабилитацијата на сторителите на кривични дела, а секако, условниот отпуст игра доста важна улога во таа насока – рече Камбовски.

Директорката на Академијата за судии и јавни обвинители, Трајкоска Стрезоски ја нагласи улогата на Академијата.

-Ние како академија сме тука присутни да им дадеме поддршка на судовите и судиите кои што ги работат овие алтернативни мерки и санкции, секако и во процесот на едукација – рече таа.

На настанот присуствуваа претседатели на кривични оддели од апелационите судови, претседатели на основни судови и судии кои работат на условен отпуст.

The post СИ ДОАЃААТ КАКО ВО ХОТЕЛ, ЕДЕН ЗАТВОРСКИ ДЕН НЀ ЧИНИ 1.000 ЕВРА! Затворските власти очајни, бараат повеќе пробација и условни казни appeared first on plusinfo.mk.

Стапката на ресоцијализација на затворениците е релативно ниска, вели директорот на Управата за извршување санкции, Александар Пандов, посочувајќи дека кадарот што работи на ресоцијализација во затворите е обучен и подготвен.

Многу ниска стапка на ресоцијализација

Има затвори каде има персонал, но на пример во Затворот Идризово има одделенија каде со неколку стотини затвореници работи само еден човек за ресоцијализација.

– Има стандарди, треба да бидат 30 до 50 лица. Има затвори каде што тој е соодносот, меѓутоа во Идризово не е. Сега беше прекинат огласот, а по локалните избори десет нови луѓе ќе вработиме во Идризово во делот на ресоцијализација – најави Пандов.

Според статистиката, за 2023 година, бројот на повратници во затворите е некаде околу 67-68 проценти.

– Тоа значи дека ние имаме никаква или многу ниска стапка на ресоцијализација – изјави Пандов, одговарајќи на новинарски прашања пред јавната расправа по Предлог-законот за изменување и дополнување на Законот за извршување на санкциите.

Тој посочи и дека треба да се работи и на заживување на затворските економии, за што, како што рече, веќе се прават напори и чекори.

– За жал, ние како затворски систем имаме огромна работна сила, а не ја користиме. Со самото тоа, кога би се смениле тие прилики, а тоа низ пракса е веќе видено во други држави, дека немал дел од економските потреби, затворите ги обезбедуваат од сами себе, од сопствените економии – изјави Пандов.

Тој вели дека ситуацијата не може да се смени преку ноќ, зашто наследиле многу лоша состојба.

Со предлог измените на Законот за извршување на санкциите се предвидува поголемо внимание на правата на затворениците – од аспект на образование, здравствена заштита и правото на работа. Се прецизираат и некои надлежности на Кривичниот совет, наспроти надлежноста на судија на извршување на санкции. Се внесуваат измени во делот на санкциите и преркшоците од аспект на „Безбеден град“, а се става акцент на обуката на сите вработени во затворскиот систем и понатамошно запознавање со европски стандарди.

– Се надевам дека со овие измени, кои најверојатно ќе бидат изгласани по локалните избори ќе имаме подобар и посигурен затворски систем – изјави Пандов.

Се бара хиерархија во платите

Моменталната состојба во затворите во Македонија, нагласи Пандов, е таква што оној што работи со доживотни затвореници во Идризово и оној што работи со затвореници со казни до три години затвор, имаат иста плата, што според него, треба да се наметне како тема и да се направат промени.

Во затворите има мал број здравствени работници.

– Бараме од Министерство за здравство да најдат вработени кои што ќе работат во затворите. За жал, моменталната состојба е многу лоша. Ако мериме, еден здравствен работник на број на осуденици, мислам дека сме една од ретките земји во светот каде што има толку мал број здравствени работници во затворите. Направена е стимулација да има плус 30 проценти додаток на ризик, меѓутоа веројатно тоа повторно не е доволна стимулација за луѓето да се вработуваат – изјави Пандов.

Во однос на образованието, Пандов, посочи дека веќе има разговарано со Државната секретарка и со министерката за образование, и верува дека за многу краток период ќе се направат првите работи.

– Првично во Воспитно-поправниот дом Волквија, а подоцна и во сите останати затвори треба да им овозможиме на затворениците да имаат образование – изјави Пандов.

Јавната расправа беше во организација на Здружението за кривично право и криминологија на Македонија, Управата за извршување санкции при Министерството за правда и Македонското пенолошко друштво.

The post ДВЕ ТРЕТИНИ ОД ЗАТВОРЕНИЦИТЕ ВО МАКЕДОНИЈА СЕ ПОВРАТНИЦИ Ни за 30% повисока плата, лекари не сакаат да работат во затвор appeared first on plusinfo.mk.

Верувам дека оваа година е намалена системската корупција во голема мера, дали е уништена – не, но верувам дека од година во година бројките и оние скалила кои што нè мерат, верувам дека Македонија само ќе напредува, рече в.д. директорот на Управата за извршување санкции Александар Пандов во одговор на новинарско прашање поврзано со системската корупција во затворите ширум земјава.

По денешната Меѓународна научна конференција во организација на Факултетот за безбедност – Скопје, Пандов посочи дека откако е на чело на Управата за извршување санкции имал бројни средби со обвинители и судии и дека точно е дека таму постои корупција.

– Од она што го видов овие година дена во затворите можам да кажам дека буквално имало системска корупција… Овие година дена имав можност да се сретнам со голем број обвинители и судии и точно е дека таму постои корупција. Mеѓутоа, точно е и дека таму постои огромен процент на луѓе кои ја сакаат работата и не сакаат да сме на ова ниво со корупција. Не може една институција да ја уништи системската корупција – рече Пандов.

Тој вели дека во одредени затвори бројките на затвореници кои имаат мобилни телефони се поразителни, односно како што рече „нема телефон само оној којшто не сака да има телефон“.

– Во одредени затвори бројките се поразителни за мене, за тоа колку мобилни телефони имаат затворениците. Јас од позиција на в.д. директор на Управата за извршување санкции можам да правам контроли, меѓутоа борбата против корупцијата во самите затвори е на директорите на затворите и на затворската управа. Можам да посочам одреден број затвори каде што со кого сакате да викнеме да ги направат претресите, јас ве уверувам дека нема да најдеме ниту еден или еден-два телефони. Tочно е дека во одредени затвори нема телефон само оној којшто не сака да има телефон – рече Пандов.

The post САМО ОНОЈ ШТО САКА МИРНО ДА ЈА ОДЛЕЖИ КАЗНАТА ЗАТВОР НЕМА ТЕЛЕФОН Пандов вели дека во затворите имало системска корупција appeared first on plusinfo.mk.

Тој посочи дека станува збор за европска судница, која заслужува многу почесто да биде користена и испрати апел до сите судии да ја користат за поголеми случаи, вклучувајќи го случајот и со пожарот во дискотеката „Пулс“ во Кочани.

– Оваа судница е направена во 2020 година. Првото судење е направено дури после две години, во 2022 година, и од тогаш за жал до ден денес, оваа судница е празна. Оваа судница е под Управата за извршување на санкции, меѓутоа пред сѐ и над сѐ, на Република Македонија. Не знам колку сте имале можност да ја видите судницата, ова е европска судница и заслужува многу почесто да биде користена – рече Пандов.

Тој напомена дека судницата е во одлична состојба и сѐ она што недостасувало од технички аспект, сега е поправено.

Пандов најави дека до крајот на годината или до почеток на следната ќе почне изградба и на втората фаза од затворот Идризово, што се наоѓа во близина на оваа судница.

– И пристапниот пат е проширен, така што мислам дека во идно време посакувам и верувам во тоа дека оваа судница ќе биде многу почесто користена. Она зеленило што го гледате на 50 метри од самата судница е предвидено за изградба на втората фаза од затворот Идризово, за кој што јас искрено се надевам дека ќе започне до крајот на годината, ако не почетокот на следната година. Таму ќе се наоѓа притворот, ќе има 420 кревети за 420 осомничени лица. Ќе биде идеална за сите останати судења, не само поголемите судења, туку и помали судења, за да не треба да се прават спроводи од Шутка или од Куманово или од некој друг град до Кривичен, туку веднаш до самата судница ќе биде главниот притвор на државата – додаде Пандов.

Напомена дека за ова веќе се обезбедени сите потребни дозволи и одмрзнати се парите од Банката за обнова и развој.

– Парите беа замрзнати, затоа што ние сме под постојан мониторинг на Комитетот за борба против тортура, кој што е составен дел од Совет на Европа. Тие имаа огромен број на забелешки на работењето на македонските затвори, на Управата за извршување на санкции и нашите пари од кредитот беа под мораториум. Ние ги имавме на сметка, но не можеа да се користат. Сега истите се одмрзнати – рече Пандов.

На новинарско прашање дали е можно во оваа судница да се одржи и судењето за случајот со пожарот во Кочани, Пандов напомена оти искрено верува и затоа испрати апел до судиите кој ќе го водат тој случај.

– Јас во тоа име и се обраќам сега, како повик до секој судија. Не знам кој ќе биде судија на тој случај, но искрено верувам дека ќе се одвива тука – додаде Пандов.

The post СУДЕЊЕТО ЗА ТРАГЕДИЈАТА ВО КОЧАНИ ЌЕ СЕ ОДВИВА ВО ИДРИЗОВО? Ќе се гради нов притвор со 420 кревети во близина на Дигиталната судница appeared first on plusinfo.mk.

„Имаме неколку осомничени лица кои ја запалија мојата викендица, но наскоро ќе бидат фатени и тие, ама ќе бидат фатени и нарачателите на пожарот“.

Ова, одговарајќи на новинарско прашање, денеска го изјави директорот на Управата за извршување санкции Александар Пандов, додавајќи дека нарачателите на пожарот во викендицата во селото Орешани кај Зелениково се многу поважни од самите сторители на делото.

– Конкретно немам што да ви кажам во моментов. Но, сепак, ќе ви откријам дека има неколкумина осомничени за подметнување на пожарот во викендицата. Наскоро ќе бидат фатени, а фатени ќе бидат и нарачателите на пожарот – рече Пандов.

Тој и пред неколку недели откри дека затвореници или банди во затворите кои се под негово управување, со скапо платен мобилен телефон што го добиле зад решетки, го нарачале палењето на неговата викендичка во Орешани.

Пандов смета дека тоа е чин на одмазда за борбата со затворскиот криминал што тој ја почнал откако дојде на функцијата.

– На што се должи? Се должи на кукавичлукот и на стравот кошто го имаат сега одредени затвореници, од притисокот којшто го имаат со промената на власт, имено привилегиите кои претходно ги имале сега ги имаат изгубено. Зошто? Затоа што ја постапувам само по слово на законот, односно она што наложува законот и правилниците за работа на затворите јас стриктно барам од директорите и затворската полиција да го применуваат. Секој еден затвореник кој го почитува словото на законот, кој го почитува куќниот ред, знае дека во мене има пријател и обратно оној кој мисли дека е шериф и дека негов е затворот и може да прави што сака – е мој непријател. Овие 9 месеци функционирање, сигурно сум стекнал одредени непријатели кои преку овој начин пораката која што е пратена е да ме заплашат мене, а на крајот на денот да ја заплашат и Владата. Не, не, немам никаква двојба, затоа што јас и од претходно имав, тоа се муабети јас не сум имал стриктни докази меѓутоа имало такви разговори конкретно околу палење, околу други потешки кривични дела – рече Пандов во едно телевизиско гостување.

Според него, изминатиот период до него доаѓале гласини за кои немал материјални докази, дека нешто лошо ќе му се случи, односно дека затвореници му подготвуваат нешто лошо.

– Не сум имал директни закани, предупредувачки закани преку сознанија од затвореници, од вработени во затворите дека одредени затвореници разговараат како да ми наштетат. Да бидеме на чисто, јас имам над 50 години, на еден човек јас во животот лошо му немам направено, ниту сум му должен на некого. Ова не е атак на Александар Пандов. Ова е атак на директорот на Управа за извршување санкции. При тоа, како таков јас сум назначен од Владата и овој е доказ дека Владата преводена од Христијан Мицкоски, онаа борба која ја има започнато против корупцијата и криминалот, ги има заболено бандитите кои се во затворите и надвор од затворите. Имам одредени лица поврзани со кој тип на криминал. Со тоа што и вчера и денеска имаше екипи од МВР, од Обвинителство, од форензика, се што треба да дојдат да направат увид. Нема да дозволам моите претпоставки јавно да ги споделувам, меѓутоа имам основано сомневање и на тие треба да им биде јасно дека се задолжиле многу кај мене и дека ако ми се докаже дека е некој од нив – до крајот на нивниот живот ќе го плаќаат тој долг. Повторно ќе кажам – ниту ме уплашиле, ниту мислам да се повлечам од ова ниту јас ниту премиерот Мицкоски. Меѓутоа, дека жестоко ќе биде одговорено на ова и на тие бандити и криминалци кои го имаат направено ова и кои мислат дека можат вака да се однесуваат во Македонија и уште повеќе сум решен и поспремен она што го правам да го правам и понатаму – порача Пандов.

СТАРТУВА НОВИОТ МОДЕЛ ЗА ИЗДРЖУВАЊЕ ЗАТВОРСКА КАЗНА ВО МАКЕДОНИЈА Пандов на своја нога ја тестираше електронската алка

The post ПОЖАРОТ ВО ВИКЕНДИЦАТА НА ПАНДОВ БИЛ НАРАЧАН Има осомничени сторители, а има и осомничени нарачатели appeared first on plusinfo.mk.

Се намалува бројот на осуденици зад решетки – барем формално. Со денешната промоција на електронските алки кои ќе се поставуваат на нозете на осудените лица коишто казната ќе ја издржуваат во домашен затвор, започнува нова фаза во казнено-поправниот систем на Македонија.

Директорот на Управата за извршување санкции, Александар Пандов, изјави дека според последната анализа направена во затворите, околу 60 затвореници во моментот ги исполнуваат условите да добијат електронска алка и казната да ја издржуваат во домашни услови, под 24-часовен електронски надзор.

– Имаме вкупно 2.300 затвореници и 400 притвореници. Во дел од затворите исполнетоста на капацитетите е над 100%. Мојата надеж е дека со овие алки ќе се намали таа пренатрупаност. Низ призма на бројки, јас ќе ви кажам дека во моментов 60 лица можат веднаш да добијат електронска алка – изјави Пандов.

Законската рамка дозволува три категории затвореници да бидат префрлени во домашен затвор со електронска алка: стари и изнемоштени лица, бремени жени или мајки со мали деца, како и тешко болни затвореници.

Самиот процес може да биде инициран на два начина – или затвореникот сам поднесува барање до надлежниот суд, или затворот иницира таква постапка за одреден осуденик.

– Во моментов на мојата нога носам алка и ја тестираме дали работи. Ако излезете од периметарот кој ви е одреден, ние веднаш реагираме. Прво го бараме затвореникот телефонски на СИМ картичката којашто е инсталирана во уредот, па бараме некој негов близок, а ако и тоа не вроди плод, тогаш повикуваме полиција – објасни Пандов, уверувајќи ја јавноста дека системот е сигурен и дека не верува оти некој затвореник ќе си дозволи да го злоупотреби.

Тој откри дека еден затвореник дневно ја чини државата над 2.000 денари.

– Ако земеме предвид дека голем дел од затворениците се тешко болни, самото нивно носење во болница нѐ чини пари. Самото чување на тие затвореници во болниците ни троши ресурси. Затоа, тие затвореници отсега ќе можат да ја отслужуваат затворската казна во својот дом со алка на ногата – рече Пандов, додавајќи дека во моментов во земјава има вкупно 60 затвореници кои одлежуваат доживотна казна затвор.

И министерот за правда Игор Филков присуствуваше на промоција на надградениот систем за електронски надзор во тренинг центарот на КПД Идризово.

– Електронските алки не се само технолошки уреди – тие се алатка за реформа. Тие се симбол на една нова, современа пробациска политика. Преку нивното користење, овозможуваме: Алтернатива на затворот, намалување на пренатрупаноста во казнено-поправните установи, подобра ресоцијализација и поголема безбедност за граѓаните. Ова не е само техничка надградба – тоа е јасна определба дека правдата може да се спроведува со достоинство и почитување на човековите права – истакна министерот Филков.

Дополнително, посочи тој, со новиот Закон за пробација, чиј предлог е веќе подготвен во Министерството за правда, многу скоро ќе биде објавен на ЕНЕР, воспоставуваме правна рамка која овозможува поширока примена на куќен притвор, условен отпуст и ресторативна правда, сето тоа под буден, но хуман надзор.

– Со тоа ги охрабруваме надлежните да пристапат кон пробацијата многу похрабро за во иднина заеднички да ја отстраниме црната дамка која што беше фрлена досега на изречените мерки- куќен притвор. Довербата и сигурноста во системот мораме да ги вратиме. Ќе продолжиме да работиме на реформи кои носат вистинска промена и ќе изградиме правосудство кое е достапно, правично и во служба на граѓаните – порача министерот за правда.

Овој проект претставува прв обид да се воведе модерна технологија во македонскиот пенитенцијарен систем, со надеж дека ќе придонесе за подобра ресоцијализација на затворениците, намалување на пренатрупаноста и рационализација на трошоците во казнено-поправните установи.

Инаку, алките, кои се поставуваат на ногата, се поврзани со ГПС систем и со централен софтвер за 24-часовен мониторинг. Преку нив се следи движењето на осудениците, со прецизни гео-граници за движење, а секое отстапување автоматски ќе биде евидентирано и сигнализирано.

Иако државата уште во 2015 година набави 400 вакви уреди, поради низа административни, технички и институционални пречки, тие останаа неискористени.

Овој систем е дел од пошироката реформа на казнено-поправниот систем, во рамки на пробациската политика што се развива со поддршка од ЕУ. Покрај куќниот затвор, пробацијата опфаќа и други мерки како условна осуда со надзор, општокорисна работа и задолжително советување.

Но, бројките говорат дека Македонија сѐ уште не ја користи доволно оваа можност. Во текот на 2023 година, само две судски пресуди предвиделе куќен затвор, иако условите и техничките решенија се веќе подготвени. Дел од причините за ваквата состојба се недоволна запознаеност на судиите со можностите што ги нуди пробацијата, како и потребата од подобра институционална координација.

Дополнителен притисок за активирање на системот е и тоа што државата се обврзала пред донаторите да ја започне примената на електронските алки до крајот на 2025 година. Во спротивно, ќе треба да плати пенали во износ од околу половина милион евра за неискористена донација.

Сепак, денешната промоција е сигнал дека Македонија конечно го фаќа чекорот со современите практики во извршување на казните. Иако задоцнето, воведувањето на електронскиот надзор би можело да стане важен дел од напорите за ресоцијализација, хуман третман и намалување на пренатрупаноста во казнено-поправните установи.

The post СТАРТУВА НОВИОТ МОДЕЛ ЗА ИЗДРЖУВАЊЕ ЗАТВОРСКА КАЗНА ВО МАКЕДОНИЈА Пандов на своја нога ја тестираше електронската алка appeared first on plusinfo.mk.

Најостро го осудуваме палењето на куќата на директорот на Управата за извршување санкции Александар Пандов и повикуваме на итна и брза реакција од страна на институциите, соопшти ВМРО-ДПМНЕ.

„Овој чин е обид за заплашување и замолчување на Пандов бидејќи изминатиот период јавно говореше за сите криминални дејствија што се случувале, а за кои тогашната власт и раководство се обиделе да ги затскријат. Пандов е мета на напад бидејќи застана во отворена борба против криминалот и корупцијата. Криминалците повеќе немаат заштита од страна на власта. За ваквото девијантно однесување мора да има казна. Времето на палење куќи, автомобили, уцени и закани заврши, за секој одговорен и инволвиран во вакви настани ќе следува одговорност. Правда мора да има“, се вели во соопштението на ВМРО-ДПМНЕ.

The post ВМРО-ДПМНЕ ГО ОСУДИ ПАЛЕЊЕТО НА КУЌАТА НА ПАНДОВ Некој сака да го заплаши и да го замолчи директорот на Управата за извршување санкции appeared first on plusinfo.mk.

Кучката Цеца од затворот во Штип стана ѕвезда на социјалните мрежи, откако директорот на Управата за санкции, Александар Пандов, на прес-конференција кажа дека била злоупотребена во потрага по изгубена дрога или изгубе часовник.

Пандов соопшти дека поднел кривични пријави против неколку затворски полицајци од затворот во Штип, оти во февруари дозволиле непознат автомобил да влезе преку една од капиите и преку ѕидот да фрли кокаин и марихуана спакувани во топка, а потоа затворски полицајци заедно со затвореници ја барале топката во тревникот.

Настанот се случил на 20 февруари во 21.40 часот, па откако во мракот не ја нашле дрогата, затворските полицајци и затворениците следниот ден се правдале дека барале изгубен часовник. Во што им помагала и Цеца…

По оваа комична информација, на Фејсбук и на другите социјални мрежи се појавија зајадливи коментари.

Некои бараат за настанот да реагира Анима Мунди, во заштита на Цеца, која би можела да биде казнета за кражба на скапиот часовник, во рамки на кампањата против неказнивоста.

Други прашуваат зошто сите учесници во настанот се кажани со иницијали, а само Цеца со нејзиното вистинско име, кое, патем, потсетува на името на познатата српска турбофолк ѕвезда. Не е ли тоа повреда на начелото на презумпција на невиноста?

Богдан Илиевски поставува сериозна политичка дилема: „Среќа што кучката се вика Цеца, да се викаше Ѓергана ќе требаше многу да објаснуваме“.

Инфлуенсерот Иљче Затаркоски има криминалистичко решение на загатката: „Ако кучката Цеца ја голтнала топката со кокаин мислам дека се одзиват на Аца!“

Иљче напиша и стихови за случајот:

Ражнатовиќ Цеца Пред вратима, спавала ко пас!
Кучката Цеца Пред портима, трагала ко пас!

The post КУЧКАТА ЦЕЦА ЅВЕЗДА НА ДЕНОТ Во тек е кампања против неказнивоста, ќе ја заштити ли Анима Мунди? appeared first on plusinfo.mk.

Синдикатот на затворската полиција и администрација при Независниот синдикат на државната администрација денеска упати отворено писмо до директорот на Управата за извршување санкции (УИС) Александар Пандов како реакција на „јавните линчувања кон припадници на затворската полиција“. Во писмото тие укажуваат на проблемите со кои се соочуваат затворските полицајци и на потребата од подобрување на правата на вработените и состојбите во затворскиот систем.

„Се поставува прашањето дали воопшто претходниот директор на Управата Ви ги пренел, укажал и објаснил состојбите во затворскиот систем.

Дали знаете кој е оптималниот број на припадници на затворската полиција потребен во Затворот Скопјe за вршење тековни активности?“, се наведува во писмото од Синдикатот.

Оттаму наведуваат и бројни други проблеми со кои се соочуваат затворските полицајци поради извршувањето на нивната работа и заканите по нивната безбедност од криминални групи надвор од работното место.

„Дали знаете колку опожарени возила има на припадници на затворската полиција? Дали знаете дека се фрлаа бомби во куќа на директор на Затвор? Дали знаете дека има постојани закани кон затворската полиција? Дали знаете дека после работа одредени криминални групи ги пресретнуваат затворските полицајци и физички се малтретирани?“, прашуваат од Синдикатот на затворската полиција.

Полицајците го прашуваат директорот на Управата дали знае кога последен пат зеле комплет службена униформа, дека некои припадници немаат задолжено средства за присилба (средства за врзување лисици, гумена палка, пепер спреј-солзавец…), дека речиси нема држава во која не се употребува електричен пиштол, и дека нема набавено ниедна „боди-камера” која е законска обврска и дел од опремата?

Синдикатот наведува дека има проблем со обуката за употреба на боречки вештини, дека има припадници кои повеќе од 20 години не се обучени и не се упатени на гаѓање, дека немаат соодветни возила за транспорт на притворени и осудени лица, дека немаат посебна просторија при арестанско сместување во болница.

„Дали знаете колку припадници имаат напуштено и ќе напуштат работа бидејќи е неиздржливо да се работи во Затворот Скопје и во Идризово? Дали знаете дека веќе не е проблем платата за напуштање на работата туку отсуството на лична безбедност и еден извршител на повеќе работни позиции во исто време?“, наведуваат од Синдикатот и додаваат дека ќе се борат против сечие девијантно однесување.

Директорот на Управата за извршување санкции Александар Пандов вчера изјави дека 70 телефони биле откриени кај притвореници во Истражниот затвор „Скопје“ во претреси на 40 ќелии, кои ги извршила интервентната единица од затворот „Идризово“.

Пандов соопшти дека во моментов во Обвинителството се води постапка против 32 затворски полицајци, а на 100 затворски полицајци и други вработени во затворите им се поднесени дисциплински постапки. За да се справат со корупцијата во затворите, формирани се интервентни единици – една во „Идризово“ и една во затворот во Штип.

The post ЗАТВОРСКИТЕ ПОЛИЦАЈЦИ СЕ ЖАЛАТ ДЕКА КРИМИНАЛЦИ ГИ МАЛТРЕТИРААТ ПОСЛЕ РАБОТА Напуштаат работа бидејќи е неиздржливо да се работи во скопските затвори appeared first on plusinfo.mk.

Намалувањето на затворската популација, посочи Пандов, може да се направи на три начини – преку условен отпус, електронски надзор и подобра ресоцијализација на осудениците, затоа што 60 проценти се повратници.

– За жал, Македонија досега требаше да има целосно нов затвор во Идризово, но освен фаза еден не е направено ништо. За жал, парите што се обезбедени сега се под мораториум. Следната недела треба да има контрола и се надевам да се одмрзнат тие средства следната година – изјави Пандов.

Околу 400 лица моментално имаат А-третман и тие, според Пандов, веќе користат отсуство и работен ангажман.

Пандов, меѓудругото, посочи дека ќе имаме и целосно ново притворско одделение за 400 лица во Идризово.

Во земјава моментално околу 50 лица издржуваат доживотни казни.

The post ЕДЕН ЗАТВОРЕНИК „ЈАДЕ“ 10.000 ЕВРА ГОДИШНО Се бара начин како да се намали затворската популација appeared first on plusinfo.mk.