Целта на техничката влада е на 100 дена пред изборниот ден да се воведат контролни механизми во клучните ресори каде што се трошат државните ресурси, но ако таа контрола не постои, односно ако на опозицијата не ѝ биде овозможено да предложи свои технички министри и заменици, тогаш таа влада не е техничка, туку повторно е политичка, без оглед на тоа дали техничкиот премиер е Македонец или Албанец.

Вака политичките аналитичари ја коментираат можноста предлогот за состав на техничката влада што ќе биде доставен до Собранието да има празни места во делот каде што треба да фигурираат имињата на министрите од ВМРО-ДПМНЕ.

Па така, доколку ВМРО-ДПМНЕ остане на ставот да не гласа за техничката влада и доколку не ги поддржи нивните предлози, тогаш за нив нема да гласаат ниту пратениците од владината коалиција.

Предлогот за креирање половична влада е еден обичен политички аматеризам од страна на власта. Ние практично нема да имаме министри во неколку сектори. Кој ќе ги потпишува платите, на пример?

Никола Мицевски Пратеник, ВМРО-ДПМНЕ

Во таков случај, местата на опозициската партија во техничката влада би останале неисполнети, па оттаму е и загриженоста на координаторот на пратеничката група на ВМРО-ДПМНЕ, Никола Мицевски, кој предупредува на опасноста да нема кој да потпишува плати и други решенија во секторите каде што нема да бидат назначени министри.

– Оставката на претседателот на Владата повлекува и оставка на целата Влада, а тоа значи дека датумите коишто ги соопштуваат како можни датуми за оставки на премиерот и на претседателот на Собранието, практично е оставка на целата Влада. Така што, предлогот за креирање половична влада е еден обичен политички аматеризам од страна на власта. Ние практично нема да имаме министри во неколку сектори. Кој ќе ги потпишува платите, на пример? Ние не можеме да имаме дополнителни министри или заменици-министри кога законот е сосема јасен: орган на управа е Владата, а со Владата управуваат министри – објаснува Мицевски.

Интересно е тоа што ваквиот развој на настаните, во поглед на проблемите со формирањето техничка влада, не е единствен пример на којшто се сеќаваат граѓаните.

Во 2016 година, за време на гласањето за техничка влада на ВМРО-ДПМНЕ на чело со тогашниот технички премиер Емил Димитриев, пратениците на СДСМ ја напуштија седницата за избор на техничка влада. На таа седница СДСМ не ги гласаше своите кандидати за министри.

Тогашните технички министри за внатрешни работи Оливер Спасовски и за труд и социјала Фросина Ременски дадоа заклетва дури 3 дена подоцна, а ВМРО-ДПМНЕ воопшто не се закани со санкции за таквото кршење на законот од страна на СДСМ.

Политичкиот аналитичар Владимир Божиновски вели дека ниту некогаш се видело, ниту некогаш се чуло да се формира техничка влада без опозиција.

– Никако не е изводливо, затоа што не постои полупразна или полуполна влада. Мандатарот предлага состав на новата влада којашто треба да добие поддршка од мнозинството пратеници, а во тој состав на влада има повеќе ресори. Доколку вие не предложите министри за тие ресори, тоа значи дека ресорите треба да се укинат. Така што, не постојат празни места или влада во којашто ќе имаме министри на чекање. Мнозинството е 61 пратеник, па кој ќе гласа за таа влада и дали воопшто ќе се собере 61 пратеник, правото воопшто не навлегува во тоа дали ќе гласаат пратеници од ДУИ, СДСМ, ВМРО-ДПМНЕ или на било која друга парламентарна партија – објасни Божиновски.

Ако во техничката влада не учествуваат министрите од опозицијата и не се воспостави заштитниот механизам, додаваат експертите, тогаш може да си остане политичката влада, бидејќи нема да има потреба од формирање техничка влада.

– Тогаш веќе немаме техничка влада, туку имаме политичка влада, односно тоа што го тврдеше ВМРО-ДПМНЕ дека целата игра всушност со техничката влада е да се исполни ветувањето кон ДУИ во последните 100 дена од мандатот на оваа влада да добие свој премиер – посочи Божиновски.

Поранешниот претседател на Државната изборна комисија (ДИК) и поранешен генерален секретар на Собранието, Александар Новаковски, во интервју за Канал 5 изјави дека техничката влада теоретски би можела да функционира и без учество на најголемата опозициска партија во неа, но како што вели, со тоа ќе се отворат низа правни прашања кои ќе доведат до сериозни последици меѓу кои и оспорување на нејзиниот легитимитет.

– Главната цел на формирањето на техничката влада беше учеството на најголемата опозициска партија во неа, која, преку клучните министерски позиции – Министерство за внатрешни работи и Министерство за труд и социјала – ќе ја контролира власта при спроведувањето на изборите за да се спречат евентуални злоупотреби. Ако опозицијата не се согласи да номинира свои технички министри и заменици, може да се доведе во прашање и да се оспори законски таа техничката влада иако не носи суштински одлуки и нема мандат за тоа – вели Новаковски и додава дека се надева дека ВМРО-ДПМНЕ сепак ќе биде дел од техничката влада.

Оставките на премиерот Димитар Ковачевски и на претседателот на Собранието Талат Џафери се најавени за в четврток, пред новата седница на Собранието закажана за в петок, 26 јануари, кога би биле констатирани оставките и би бил избран новиот претседател на Собранието, Јован Митрески, актуелен координатор на пратеничката група на СДСМ.

Изборот на техничката Влада треба да биде в недела на 28 јануари. Владата треба да биде избрана најдоцна до полноќ, а ќе ја предводи новиот технички премиер Талат Џафери.

The post ТЕХНИЧКА ВЛАДА БЕЗ ОПОЗИЦИЈА – И ИЗГЛЕДА ШАШАВО И НЕ ФУНКЦИОНИРА! Ќе настане хаос, многу луѓе ќе останат без плати appeared first on plusinfo.mk.

– Очекувам по судската ферија написмено да ја добиеме пресудата и во рок од 15 дена колку што предвидува Законот за кривична постапка (ЗКП) ќе поднесеме жалба по сите основи од кривичната постапка – вели Новаковски за Плусинфо.

Тој објаснува дека во случајот со обвинетиот Јанакиески за кого, според адвокатот, треба да има ослободителна пресуда се направени материјални и суштествени повреди во постапката, а ќе се жали и поради, како што вели, погрешно и нецелосно утврдена фактичка состојба, како и поради висината на казната.

Пресудата, како што предвидува Законот за кривична постапка, мора писмено да се изготви во рок од 15 дена по објавувањето, а во сложени предмети по исклучок во рок од 60 дена. Овие рокови не можат да бидат пречекорени.

Против пресудата донесена во прв степен, бранителите можат да се жалат во рок од две недели од
од денот на доставувањето на преписот од пресудата. Ако второстепениот суд утврди дека постои суштествена повреда на одредбите на кривичната постапка и ја уважи жалбата по службена должност со решение ќе ја укине првостепената пресуда и ќе го врати предметот на повторно судење, освен ако не одлучи да одржи расправа пред второстепениот суд.

Адокатот Новаковски вели дека ќе бараат јавна расправа на Апелацискиот суд.

Законот за кривична постапка (ЗКП) предвидел второстепениот суд да може да нареди да се одржи нова главна расправа пред првостепениот суд пред целосно изменет совет, но може и само делумно да ја укине првостепената пресуда ако одделни делови од пресудата можат да се издвојат без штета за правилното пресудување.

Освен адвокатите и Обвинителството за гонење организиран криминал најави жалби поради, како што рече обвинителката Гордана Смаќоска по изрекувањето на пресудата, ниските казни за организаторите на 27 април. Обвинителката дури и направи споредба со висината на казната од седум години затвор за полесно кривично дело на поранешната обвинителка Катица Јанева.

Според Обвинителството, за делото за кое се осудени четворицата поранешни функционери за настаните во законодаввниот дом на 27 април 2017 година пропишани се минимум 10 години затвор.

Адвокатот Еленко Миланов, исто така, најави жалба на пресудата од судечкиот совет предводен од судијата Илија Трпков за наводните организатори на 27 април. Тој дури вели дека во текот на судењето не слушнал ниту еден факт за дејствија на кого било од осудените на вкупна казна од 25 години.

Пресудата, според Миланов, покажува дека во македонското судство има дежурни сведоци, дежурни лица кои даваат искази и се главни за сите предмети.

– Тоа е Александар Василевски Нинџа на кого уште еднаш му се поклонува верба и покрај сите факти што ги изнесе одбраната – рече адвокатот Миланов кога пред десетина дена најави жалба на пресудата.

The post Јанакиески ќе се жали по сите основи во Апелација за пресудата за „27 април“ appeared first on plusinfo.mk.